E Mensahe Ku Nos Tin Ku Proklamá

“TEME DIOS I WARDA SU MANDAMENTUNAN”

SIGLONAN promé ku era kristian, Yehova a papia ku fiel Abraham tokante un areglo pa “tur e nashonnan di e tera” por bendishoná nan mes. (Gén. 22:18) Tambe el a inspirá Sálomon pa skirbi tokante un obligashon fundamental di tur ser humano: “Teme Dios i warda su mandamentunan, pasobra esaki ta aplikabel na kada persona.” (Ekl. 12:13) Pero kon tur e nashonnan lo a siña tokante e kosnan aki?

Ounke semper tabatin hende ku a kere e palabra di Dios, Beibel ta indiká ku e predikashon intenso di e bon nobo den tur nashon lo a tuma lugá durante “e dia di Señor.” E dia aki a kuminsá na aña 1914. (Rev. 1:10) Papiando di e tempu ei, Revelashon 14:6 i 7 a profetisá ku bou di guia di e angelnan “tur nashon i tribu i lenga i pueblo” lo a risibí un proklamashon importantísimo. Nan lo a haña e estímulo: “Teme Dios i dun’é gloria, pasobra e ora di su huisio a yega; i adorá Esun ku a traha shelu i tera i laman i fuentenan di awa.” E boluntat di Dios ta pa plama e mensahe aki, i nos tin e privilegio di kolaborá den e obra ei.

‘E Dios Berdadero.’ Yehova su deklarashon, “Boso ta mi testigunan,” tabata den e konteksto di un debate riba e kuestion di ken ta e Dios berdadero. (Isa. 43:10) P’esei e mensahe ku nos tin ku prediká ta pa hende no kontentá nan mes ku djis pertenesé na un religion òf kere den un dios. Mas bien, nos tin ku duna nos oyentenan e oportunidat di siña ku e Kreadó di shelu i tera ta e úniko Dios berdadero. (Isa. 45:5, 18, 21, 22; Huan 17:3) E so por predisí futuro na un manera konfiabel; i nos tin e privilegio di mustra hende ku e manera ku Yehova su palabra a kumpli den pasado ta duna nos motibunan sólido pa konfia ku tur su promesanan pa futuro tambe lo ser realisá.—Hos. 23:14; Isa. 55:10, 11.

Pero awe, hopi hende ku nos ta prediká na dje ta adorá otro diosnan òf ta bisa ku nan no ta kere mes den niun dios. Pa nos por logra ku nan ta skucha nos, nos lo tin ku kuminsá ku menshoná algu di interes mutuo. Na Echonan 17:22-31 nos ta haña un bon ehèmpel di esaki ku por benefisiá nos. Tuma nota ku ounke apòstel Pablo a usa takto, el a mustra bon kla ku tur hende mester rindi kuenta na e Dios ku ta Kreadó di shelu i tera.

Yuda Hende Konosé e Nòmber di Dios. Nos tin ku presentá e Dios berdadero na su nòmber. Yehova stima su nòmber. (Éks. 3:15, NW; Isa. 42:8, NW) E kier pa hende konosé su nòmber. El a sòru pa su nòmber glorioso aparesé mas ku 7.000 biaha den Beibel. Ta nos responsabilidat pa laga hende sera konosí kuné.—Deu. 4:35.

Ta hende ku konosé Yehova i ku ta invoká su nòmber so tin chèns di haña bida den futuro. (Yoël 2:32; Mal. 3:16; 2 Tes. 1:8) Sin embargo, mayoria hende no konosé Yehova, i esei ta inkluí hopi hende ku ta bisa ku nan ta adorá e Dios di Beibel. Ounke nan tin un Beibel i ta les’é, kisas tòg nan no konosé Dios su nòmber personal pasobra hende a sak’é for di den hopi tradukshon moderno. E úniko kos ku algun hende sa di e nòmber “Yehova,” ta ku nan lidernan religioso a bisa nan pa no us’é.

Kua ta e manera mas efikas pa siña hende e nòmber di Dios? Mustra nan e nòmber den Beibel, si ta posibel den nan mes Beibel. Den algun tradukshon, e nòmber ei ta aparesé míles di biaha. Den otronan bo ta hañ’é solamente na Salmo 83:18 òf Éksodo 6:3-6, òf den un nota na pia di página na Éksodo 3:14 i 15 (manera ta e kaso den Beibel na papiamentu koriente) òf na Éksodo 6:3. Den hopi Beibel, inkluso Beibel Santu, bo ta haña ku kada bes ku e teksto original a usa e nòmber personal di Dios, nan a remplas’é ku “Señor” i “Dios” skirbí ku lèter kapital òf otro tipo di lèter. Kaminda traduktornan moderno a laga Dios su nòmber personal kompletamente afó, podisé bo tin ku usa un tradukshon di Beibel mas bieu pa mustra loke nan a hasi. Den algun pais ta posibel pa bo mustra e nòmber divino den himnonan religioso òf skirbí riba edifisionan públiko.

Yeremías 10:10-13, sitá for di e Tradukshon di Mundu Nobo, por yuda asta e hendenan ku ta adorá otro dios, pasobra no solamente e ta menshoná e nòmber di Dios, sino tambe ta splika bon kla ken e ta.

No skonde e nòmber Yehova tras di títulonan manera “Dios” i “Señor,” manera kristiandat ta hasi. Sin embargo, esei no kier men ku bo tin ku us’é na komienso di tur kòmbersashon. Algu asina lo pone hende ku tin prehuisio para e kombersashon. Pero unabes bo a establesé un base pa kòmbersá, no keda sin usa e nòmber divino.

Ta bon pa menshoná ku Beibel ta usa Dios su nòmber personal mas tantu bes ku tur e vários títulonan huntu—manera “Señor” i “Dios.” Pero asina mes e eskritornan di Beibel no a purba inkluí e nòmber divino den delaster un frase. Simplemente nan a us’é na un manera natural, spontáneo i ku rèspèt. Un ehèmpel digno di imitá.

E Persona Ku e Nòmber Ta Identifiká. E echo ku Dios tin un nòmber personal riba su mes ta un bèrdat importante, pero esei ta apénas e prinsipio.

Pa stima Yehova i invoká su nòmber ku fe, hende mester sa ki klase di Dios e ta. Ora Yehova a sera Moises konosí ku su nòmber riba Seru Sínai, El a hasi muchu mas ku djis bisa e palabra “Yehova.” El a hala atenshon na algun di su kualidatnan prinsipal. (Éks. 34:6, 7) Esei ta un ehèmpel pa nos imitá.

Sea ku bo ta dunando testimonio na un persona resien interesá òf un diskurso dilanti e kongregashon, ora bo ta papia tokante e bendishonnan di e Reino, señalá loke esakinan ta siña nos di e Dios ku ta hasi e promesanan ei. Ora bo ta menshoná Dios su mandamentunan, enfatisá e sabiduria i amor ku nan ta revelá. Mustra bon kla ku e rekisitonan di Dios no ta un karga pa nos, sino mas bien ta pa nos bon. (Isa. 48:17, 18; Mik. 6:8) Splika kon kada un di e maneranan ku Yehova ta manifestá su poder ta siña nos algu di su personalidat, di su normanan i di su propósito. Hala atenshon na e manera balansá ku Yehova ta desplegá su kualidatnan. Ekspresá bo propio sintimentunan pa ku Yehova, pasobra bo amor p’e por stimulá mesun sintimentu den bo próhimo.

E mensahe urgente ku nos ta hiba awe ta hasi un yamada riba tur hende pa nan teme Dios. P’esei nos tin ku sòru ku loke nos ta bisa ta stimulá tal temor sano, es desir, un rèspèt i atmirashon profundo pa Yehova. (Sal. 89:7) E temor ei ta hasi nos konsiente di e echo ku Yehova ta e Hues supremo i ku nos futuro ta dependé di su aprobashon. (Luk. 12:5; Rom. 14:12) Pues anto, e temor ei ta ligá ku nos amor profundo p’e i un deseo intenso di agrad’é. (Deu. 10:12, 13) Temor di Dios tambe ta motivá nos pa odia loke ta malu, obedesé su mandamentunan i ador’é di henter kurason. (Deu. 5:29; 1 Kró. 28:9; Pro. 8:13) E ta protehá nos di e eror di purba sirbi Dios i alabes stima e kosnan di mundu.—1 Huan 2:15-17.

E Nòmber di Dios Ta “un Toren Fuerte.” Hende ku realmente siña konosé Yehova ta gosa di gran protekshon. Esaki no ta simplemente pasobra nan ta usa su nòmber personal òf nan por menshoná algun di su kualidatnan, sino ta pasobra nan ta konfia den Yehova. Proverbionan 18:10 ta bisa di e personanan ei: “E nòmber di SEÑOR ta un toren fuerte; e hustu ta kore drenta den dje i ta sigur.”

Probechá di tur oportunidat pa bo animá hende pa konfia den Yehova. (Sal. 37:3; Pro. 3:5, 6) Pasobra tal konfiansa ta demostrá fe den Yehova i den su promesanan. (Heb. 11:6) Ora hende ta invoká e nòmber di Yehova pasobra nan sa ku e ta e Soberano Universal, ta stima su kamindanan i ta kere plenamente ku e ta e úniko fuente di salbashon, nan tin e garantia di e Palabra di Dios ku nan lo ser salbá. (Rom. 10:13, 14) Ora bo ta siña otro hende, yuda nan demostrá e fe ei den tur aspekto di nan bida.

Hopi hende ta konfrontá problemanan personal masha difísil mes, kisas sin ku nan ta mira un salida. Stimulá nan pa siña kiko ta e boluntat di Yehova, konfia den dje i pone na práktika loke nan siña. (Sal. 25:5) Animá nan pa roga Yehova pa yuda nan i gradisié pa su bendishonnan. (Fil. 4:6, 7) Ora ku nan realmente siña konosé Yehova, no djis dor di a lesa sierto deklarashonnan den Beibel, sino dor di a mira su promesanan kumpli den nan propio bida, nan lo kuminsá disfrutá di e siguridat ku hende ta haña ora nan ta komprondé loke e nòmber di Yehova ta representá.—Sal. 34:8; Yer. 17:7, 8.

Probechá di tur oportunidat pa yuda hende komprondé ku ta sabí pa teme Yehova, e Dios berdadero, i warda su mandamentunan.

“DUNA TESTIMONIO DI HESUS”

DESPUES ku Hesukristu a resusitá i promé ku el a bolbe na shelu, el a duna su disipelnan e siguiente instrukshon: “Boso lo ta mi testigunan . . . te na e parti mas alehá di mundu.” (Echo. 1:8) Beibel ta indiká ku sirbidónan leal di Dios den nos tempu ta esnan ku “tin e trabou di duna testimonio di Hesus.” (Rev. 12:17, NW) Kon diligente bo ta den e trabou ei di duna testimonio?

Hopi hende sinsero ku ta bisa ku nan ta kere den Hesus no sa mes ku el a eksistí promé ku e tabata hende, i ku ora e tabata riba tera e tabata un ser humano di bèrdat. Nan no ta komprondé kiko kier men ku Hesus ta e Yu di Dios ni ki papel e ta hunga den e kumplimentu di Dios su propósito. Tampoko nan no sa kiko Hesus ta hasiendo aktualmente ni kon loke e ta bai hasi den futuro lo influensiá nan bida. Kisas nan ta asta pensa eróneamente ku Testigunan di Yehova no ta kere den Hesus. Pues nos tin e privilegio di duna di konosé e bèrdat tokante e asuntunan aki.

Di otro banda, tin hende no ta kere ku realmente a eksistí un persona manera e Hesus ku Beibel ta deskribí. Algun ta konsiderá Hesus simplemente komo un gran hòmber i nan ta rechasá e idea ku e ta e Yu di Dios. “Duna testimonio di Hesus” na e tipo di personanan ei ta eksigí hopi esfuerso, pasenshi i takto.

Sin importá kiko bo oyentenan ta kere, nan tin ku siña konosé Hesukristu pa nan por benefisiá di Dios su areglo pa bida eterno. (Huan 17:3) Dios a ekspresá bon kla ku su boluntat ta “ku tur lenga mester konfesá ku Hesukristu ta Señor” i someté nan mes na su outoridat. (Fil. 2:9-11) Pues nos no por djis evitá e tema ora nos topa hende ku tin opinionnan eróneo òf prehuisio abierto. Miéntras ku den algun kaso nos por papia libremente tokante Hesukristu—inkluso na nos promé bishita—den otro kasonan, nos lo tin ku hasi komentarionan diskreto pa yuda nos oyentenan kuminsá pensa korektamente tokante dje. Kisas tambe nos tin ku pensa riba maneranan pa introdusí otro aspektonan di e tema ei durante nos siguiente bishitanan. Pero podisé no ta posibel pa nos trata tur loke esei ta enserá sino te ora ku nos establesé un studio bíbliko ku e persona.—1 Tim. 2:3-7.

Hesus Su Papel Krusial den e Propósito di Dios. Nos tin ku yuda e hendenan mira ku ta imposibel pa nan tin un bon relashon ku Dios si nan no tin fe den Hesus, pasobra Kristu ta “e kaminda” i ‘ni un hende no ta bin serka e Tata, sino ta pa medio di dje.’ (Huan 14:6) A ménos ku un persona ta komprondé e papel krusial ku Yehova a asigná na su Yu primogénito, ta imposibel p’e komprondé Beibel. Dikon? Pasobra Yehova a hasi su Yu e figura sentral den e kumplimentu di tur Su propósitonan. (Kol. 1:17-20) Profesia bíbliko ta drei rònt di e realidat aki. (Rev. 19:10) Hesukristu ta e medio pa solushoná tur e problemanan kousá dor di e rebelion di Satanas i dor di e piká di Adam.—Heb. 2:5-9, 14, 15.

Pa un persona por komprondé bon e funshon di Kristu, e mester rekonosé ku humanidat ta den un kondishon lamentabel for di kua e no por libra su mes. Nos tur a nase den piká. Esei ta afektá nos den vários manera den transkurso di nos bida, i tardi òf trempan, e ta resultá den morto. (Rom. 3:23; 5:12) Yuda hende ku bo ta duna testimonio pa reflekshoná riba e realidat ei. Despues señalá ku Yehova amorosamente a hasi posibel pa hende ku pone fe den e sakrifisio di reskate di Hesus, ser librá di piká i morto. (Mar. 10:45; Heb. 2:9) Dor di esei, nan lo tin e posibilidat di biba pa semper den perfekshon. (Huan 3:16, 36) No tin otro manera pa logra esaki. (Echo. 4:12) Pero komo maestro, sea den privá òf den kongregashon, bo tin ku hasi mas ku djis deklará e bèrdatnan aki. Ku pasenshi i bondat, kultivá den bo oyentenan un gratitut pa Kristu su papel komo nos Reskatadó. Apresio pa e areglo aki por tin un gran influensia riba un persona su aktitut, komportashon i metanan den bida.—2 Kor. 5:14, 15.

Naturalmente, ta un biaha so Hesus a entregá su bida komo sakrifisio. (Heb. 9:28) Sin embargo, aktualmente e ta sirbi aktivamente komo Sumo Saserdote. Yuda bo oyentenan komprondé kiko esei ta nifiká. Nan ta konfrontá strès, desilushon, sufrimentu òf problema debí na e falta di konsiderashon di hende ku ta rondoná nan? Tempu ku Hesus tabata hende, el a eksperensiá tur e kosnan ei, pues e sa kon nos ta sinti. Siendo hende imperfekto, nos ta sinti ku nos mester di Dios su miserikòrdia? Si nos pidi Dios pordon a base di Hesus su sakrifisio, Hesus ta aktua komo “un abogado serka e Tata.” Yen di kompashon e “ta intersedé pa nos.” (1 Huan 2:1, 2; Rom. 8:34) A base di Hesus su sakrifisio i mediante su servisionan komo Sumo Saserdote, nos por aserká Yehova su “trono di grasia” pa risibí yudansa den tempu di nesesidat. (Heb. 4:15, 16) Ounke nos ta imperfekto, e yudansa ku Hesus ta duna komo Sumo Saserdote ta permití nos sirbi Dios ku un konsenshi limpi.—Heb. 9:13, 14.

Ademas, Hesus tin gran outoridat komo esun asigná pa Dios komo Kabes di e kongregashon kristian. (Mat. 28:18; Efe. 1:22, 23) Komo tal, e ta perkurá e guia nesesario di akuerdo ku e boluntat di Dios. Ora bo ta siña hende, yuda nan komprondé ku ta Hesukristu ta e Kabes di kongregashon, i no ningun ser humano. (Mat. 23:10, NW) For di bo promé kòmbersashon ku un persona interesá, invit’é na e reunionnan di e kongregashon lokal, kaminda nos ta studia Beibel hasiendo uso di e informashon ku “e esklabo fiel i prudente” a perkurá. Splika nan ken e “esklabo” aki ta i tambe ken ta e Doño (òf Shon), ya asina nan por bira konsiente di Hesus su posishon komo kabes. (Mat. 24:45-47) Laga nan sera konosí ku e ansianonan, i menshoná e rekisitonan bíbliko ku e ansianonan mester kumpli kuné. (1 Tim. 3:1-7; Tito 1:5-9) Splika nan ku e kongregashon no ta di e ansianonan, sino ku nan ta yuda nos sigui e pasonan di Hesukristu. (Echo. 20:28; Efe. 4:16; 1 Ped. 5:2, 3) Yuda e personanan interesá aki mira ku tin un sosiedat mundial ku ta funshoná na un manera organisá bou di e liderato di Kristu.

For di e Evangelionan nos ta siña ku ora Hesus a drenta Yerúsalèm djis promé ku su morto, su disipelnan a alab’é komo “e Rei ku ta bin den e nòmber di SEÑOR.” (Luk. 19:38) Segun ku e studiantenan ta profundisá nan mes den Beibel, nan ta siña ku awor Yehova a duna Hesus outoridat pa manda riba hende di tur nashon. (Dan. 7:13, 14) Ora bo ta duna diskurso den kongregashon òf ta kondusí studionan bíbliko, yuda hende komprondé i balorá loke Hesus su gobernashon mester nifiká pa nos tur.

Enfatisá ku ta nos manera di biba ta demostrá si realmente nos ta kere ku Hesukristu ta Rei i ku nos ta someté nos mes boluntariamente na su outoridat. Konsentrá riba e obra ku Hesus—despues di a ser ungí komo Rei—a asigná su siguidónan pa hasi. (Mat. 24:14; 28:18-20) Papia di loke Hesus, e Konsehero Maravioso, a bisa ku nos mester mira komo lo mas importante den bida. (Isa. 9:6, 7; Mat. 6:19-34) Dirigí atenshon na e aktitut ku e Prens di Pas a bisa ku su siguidónan lo a desplegá. (Mat. 20:25-27; Huan 13:35) Pero tene kuidou pa bo no hasi bo mes hues i kuminsá husga si otro hende ta hasiendo tur loke nan mester hasi; mas bien, animá nan pa analisá nan akshonnan pa wak si nan ta reflehá sumishon na e reinado di Kristu. Anto ora bo ta destaká tur e kosnan aki, rekonosé ku bo tambe tin ku hasi meskos.

Pone Kristu Komo Fundeshi. Beibel ta kompará e trabou di hasi disipel kristian ku e konstrukshon di un edifisio ku tin Hesukristu komo fundeshi. (1 Kor. 3:10-15) Pa logra esaki, bo tin ku yuda hende siña konosé Hesus manera Beibel ta deskribié. Tene kuidou pa nan no mira abo komo esun ku nan ta sigui. (1 Kor. 3:4-7) Dirigí atenshon na Hesukristu.

Si e fundeshi ta bon poné, studiantenan lo komprondé ku Kristu a laga un ehèmpel pa nos “sigui den su pasonan” ku sumo kuidou i atenshon. (1 Ped. 2:21) Pa sigui konstruí riba esei, animá e studiantenan pa lesa e Evangelionan no djis komo historia real sino komo un ehèmpel òf patronchi ku nan mester sigui. Yuda nan tuma bon nota di e aktitutnan i kualidatnan ku a karakterisá Hesus. Animá nan pa opservá ki sintimentu Hesus tabatin pa su Tata, kon el a wanta prueba i tentashon, kon el a mustra sumishon na Dios i kon el a trata ku hende den vários sirkunstansia. Destaká e aktividat ku a yena e bida di Hesus. Di e manera ei, ora un studiante ta konfrontá desishon i prueba den bida lo e puntra su mes: ‘Kiko Hesus lo a hasi den e situashon aki? Loke mi hasi lo demostr’é ku mi ta gradisidu pa loke é a hasi pa mi?’

Ora bo ta dirigí bo na e kongregashon, bo no mester pensa ku komo ku bo rumannan ya kaba tin fe den Hesus, no ta nesesario pa bo hala atenshon spesial na dje. Loke bo ta bisa lo tin mas nifikashon si bo logra fortalesé nan fe. Si bo ta papia tokante e reunionnan, relashoná esaki ku Hesus su papel komo Kabes di e kongregashon. Si bo ta trata sirbishi di vèlt, hala atenshon na e aktitut ku Hesus a demostrá ora ku e tabata partisipá den esei, i mustra kiko Kristu ta hasiendo aworakí komo Rei pa reuní hende pa drenta bibu den e mundu nobo.

Ta bisto anto ku no ta sufisiente pa hende djis siña algun echo básiko tokante Hesus. Pa nan por bira berdadero kristian, nan mester tin fe den dje i stim’é di kurason. E amor ei ta motivá hende na desplegá obedensia leal. (Huan 14:15, 21) Ademas, e amor ei ta yuda hende para firme den fe apesar di kontratempu, pa sigui kana den e pasonan di Kristu henter nan bida, i demostrá ku nan ta kristiannan maduro ku tin “rais bon pegá i fundá.” (Efe. 3:17) Tal proseder ta glorifiká Yehova, e Dios i Tata di Hesukristu.

“E BON NOTISIA DI E REINO”

ORA Hesus tabata duna detaye di e señal di su presensia i di fin di e sistema aki, el a profetisá: “Lo prediká e bon notisia di e reino rònt mundu komo testimonio pa tur nashon. Anto e ora ei, fin lo yega.”—Mat. 24:14, BPK.

Kiko presis ta e mensahe aki ku mester risibí tantu publisidat? Ta tokante e Reino ku Hesus a siña nos pidi Dios p’e, bisando: “[Laga] bo reino bin.” (Mat. 6:10) Revelashon 11:15 ta deskribié komo “e reino di nos Señor [Yehova], i di su Kristu,” pasobra e outoridat pa reina ta bini di Yehova, kende ta dun’é na Kristu komo Rei. Sin embargo, tuma nota ku e mensahe ku segun Hesus lo ser proklamá den nos tempu, ta bai mas leu ku loke su siguidónan a prediká den promé siglo. Nan a anunsiá na e hendenan: “E reino di Dios a yega serka boso.” (Luk. 10:9) Tabata asina pasobra Hesus tabata meimei di nan komo esun ungí komo Rei. Pero manera ta pará skirbí na Mateo 24:14, Hesus a profetisá e proklamashon mundial di un otro suseso importante den e kumplimentu di Dios su propósito.

Profeta Daniel a haña un vishon di e suseso aki. El a mira “unu manera un yu di hende” (Hesukristu) risibiendo for di e “Ansiano di Dianan” (Yehova Dios), “dominio, gloria i un reino, pa tur pueblo, nashon i hende di tur idioma por sirbié.” (Dan. 7:13, 14) E suseso ei di importansia universal a tuma lugá den shelu na aña 1914. Despues di esei, Miguel i su angelnan a tira Diabel ku su demoñonan abou na tera. (Rev. 12:7-10) E sistema bieu aki a drenta den su último dianan. Pero promé ku elimin’é por kompletu, tin ku proklamá rònt mundu ku e Rei Mesiániko di Yehova ta goberná awor for di su trono selestial. Hende di tur parti ta ser notifiká di esaki, i nan reakshon ta revelá ku ki aktitut nan ta mira e Haltísimo komo Gobernante di “e reino di hende.”—Dan. 4:32.

Ta sierto ku hopi kos mas mester sosodé. P’esei nos ta sigui pidi: “[Laga] bo reino bini,” pero no pasobra nos ta pensa ku e instalashon di e Reino di Dios tin ku tuma lugá den futuro. Mas bien, pasobra e Reino selestial lo aktua na un manera desisivo pa kumpli ku profesianan manera Daniel 2:44 i Revelashon 21:2-4. Lo e transformá e tera den un paradeis yen di hende ku ta stima Dios i nan próhimo. Ora nos ta prediká “e bon notisia di e reino” aki nos ta hala atenshon na e speransa ei, pero tambe nos ta anunsiá ku konfiansa ku ya kaba Yehova a duna su Yu pleno outoridat komo gobernante. Abo ta enfatisá e bon notisia aki ora bo ta duna testimonio tokante e Reino?

Splika e Reino. Kon nos por kumpli ku nos enkargo di anunsiá e Reino di Dios? Nos por papia riba vários tema pa lanta interes di hende, pero mester ta bisto umbes ku nos mensahe ta tokante e Reino di Dios.

Un aspekto importante di e obra aki ta di lesa òf sita tekstonan bíbliko ku ta referí na e Reino. Ora bo ta menshoná e Reino, hasi sigur ku bo oyentenan ta komprondé kiko e ta. Kisas lo bo tin ku hasi mas ku djis bisa ku e Reino di Dios ta un gobièrnu, pasobra pa algun hende ta difísil pa nan imaginá ku un gobièrnu ta invisibel. Lo bo por rasoná ku nan den vários manera. Por ehèmpel, lo bo por menshoná ku bientu ta invisibel, pero e tin un efekto poderoso riba nos bida. Nos no por mira Esun ku ta kontrolá bientu, pero ta bisto ku e tin gran poder. Beibel ta yam’é “e Rei eterno.” (1 Tim. 1:17) Un otro posibilidat ta di bisa ku den un pais grandi, hopi suidadano no a yega di bai nan kapital ni mira nan promé mandatario en persona. Nan sa di e kosnan ei via informenan di notisia. Asina tambe Beibel, publiká den mas ku 2.200 idioma, ta konta nos tokante e Reino di Dios; e ta laga nos sa ken a risibí outoridat i kiko e Reino ta hasiendo. E Toren di Vigilansia, publiká den mas idioma ku kualkier otro revista, ta deklará riba su portada ku su mishon ta pa ‘Anunsiá e Reino di Yehova Dios.’

Un otro manera pa yuda hende komprondé kiko e Reino ta, ta dor di menshoná algun di e kosnan ku nan kier pa gobièrnu perkurá: siguridat ekonómiko, pas, eliminashon di kriminalidat, trato imparsial di tur grupo étniko, edukashon i kuido médiko. Mustra nan ku ta solamente mediante e Reino di Dios e deseonan aki i tur otro deseo sano di humanidat lo ser satisfasé.—Sal. 145:16.

Purba stimulá den hende e deseo pa bira suidadano di e Reino, ku tin Hesukristu komo Rei. Señalá ku e milagernan ku el a hasi ta un muestra di loke lo e hasi komo Rei selestial. Papia ku frekuensia tokante e kualidatnan atraktivo ku el a desplegá. (Mat. 8:2, 3; 11:28-30) Splika ku el a entregá su bida pa nos i ku despues di esei Dios a resusit’é pa bida inmortal den shelu. Ta for di einan e ta goberná.—Echo. 2:29-35.

Bo mester enfatisá ku e Reino di Dios ya ta goberná for di shelu. Sin embargo, bo tin ku tene kuenta ku mayoria hende no ta mira kondishonnan ku pa nan lo ta prueba ku e gobièrnu ei ta na mando. Laga nan sa ku bo ta komprondé nan punto, i puntra nan si nan sa kiko Hesukristu a bisa lo ta prueba di esei. Destaká algun di e rasgonan di e señal kombiná ku tin na Mateo kapítulo 24, Marko kapítulo 13 i Lukas kapítulo 21. Kaba puntra nan pakiko Kristu su entronisashon den shelu lo a kousa e kondishonnan ei riba tera, anto bai na Revelashon 12:7-10, 12.

Komo prueba palpabel di loke e Reino di Dios ta hasi awe, lesa Mateo 24:14, i deskribí e programa internashonal di edukashon bíbliko ku ta tumando lugá aktualmente. (Isa. 54:13) Konta hende tokante e vários skolnan ku Testigunan di Yehova ta benefisiá di dje, i mustra semper ku nan tur ta basá riba Beibel i ta grátis. Splika tambe ku fuera di prediká di kas pa kas, nos ta ofresé instrukshon bíbliko grátis na personanan individual i famia den mas ku 230 pais. Kua gobièrnu humano ta den posishon pa duna un programa edukativo asina ekstenso, no solamente na su suidadanonan sino na henter mundu? Invitá hende pa asistí na e Salòn di Reino i na asamblea- i kongresonan di Testigunan di Yehova pa nan por mira pa nan mes ki efekto e instrukshon aki tin riba bida di hende.—Isa. 2:2-4; 32:1, 17; Huan 13:35.

Pero awor, e doño di kas lo komprondé kon esaki ta toka su propio bida? Kisas bo por bis’é ku takto ku e propósito di bo bishita ta pa papia di e oportunidat ku tin dilanti tur hende: skohe bida komo suidadano di e Reino di Dios. Kon hende ta skohe esei? Dor di siña kiko ta e rekisitonan di Dios i obedesé nan awor.—Deu. 30:19, 20; Rev. 22:17.

Yuda Otro Hende Pone e Reino na Promé Lugá. Asta despues ku un persona aseptá e mensahe di Reino, tin desishonnan ku e mester tuma. Ki importansia lo e duna na e Reino di Dios den su bida? Hesus a animá su disipelnan pa sigui “buska promé e reino.” (Mat. 6:33) Kon nos por yuda nos rumannan kristian hasi esei? Dor di pone un bon ehèmpel pa nan i dor di komentá riba e posibilidatnan ku tin pa hasi esei. Bo por puntra nan si nan a yega di pensa riba sierto posibilidatnan i konta nan eksperensianan ku ta mustra loke otro rumannan ta hasi al respekto. Splika relatonan bíbliko di tal manera ku nan ta profundisá un persona su amor pa Yehova. Tambe bo por enfatisá e realidat di e Reino i e importansia di proklam’é. Por lo general bo ta haña mihó resultado no dor di bisa hende kiko nan tin ku hasi, sino dor di stimulá den nan e deseo pa hasi esei.

No tin duda ku e mensahe sumamente importante ku nos tur tin ku proklamá ta konsentrá prinsipalmente riba Yehova Dios, Hesukristu i e Reino. Nos mester destaká e bèrdatnan importante relashoná ku nan den nos predikashon públiko, den nos kongregashon i den nos bida personal. Ora nos ta hasi esei, nos ta demostrá ku realmente nos ta benefisiá di e Skol di Ministerio Teokrátiko.