Kapítulo Sinku

E Libertat Ku Adoradó di Yehova Ta Gosa di Dje

1, 2. (a) Ki klase di libertat Dios a duna e promé pareha humano? (b) Menshoná algun dje leinan ku a dirigí e aktividat di Adam ku Eva.

ORA Yehova a krea e promé hòmber i muhé, nan a gosa di un libertat ku a surpasá kualkier libertat ku hende tin awe. Nan kas tabata Paradeis, e bunita Hòfi di Eden. Malesa no a daña nan goso di bida, ya ku nan tabatin un mente i kurpa perfekto. Morto no tabata spera nan, manera e ta spera tur hende ku a biba despues di nan. Ni nan no tabata robòt, sino mas bien nan tabatin e maravioso don di boluntat liber, kapas pa tuma nan propio desishonnan. Sin embargo, pa sigui gosa di tal maravioso libertat nan mester a respetá e leinan di Dios.

² Tuma por ehèmpel e leinan físiko ku Dios a establesé. Klaro ku e leinan aki no a keda ekspresá ku palabra, pero Adam ku Eva a ser kreá di tal manera ku tabata natural pa obedesé e leinan ei. Apetit tabata un señal ku nan mester kome; set, ku nan mester bebe; bahamentu di solo, ku nan mester drumi. Tambe Yehova a duna nan un trabou pa hasi ku bon mirá tabata meskos ku un lei, pasobra lo el a dirigí nan moda di anda. El a manda nan haña yu, tene dominio riba e hopi formanan di bida na mundu, i ekstendé e Paradeis te ora ku esei a kubri henter e planeta. (Génesis 1:28; 2:15) Esta un lei plasentero i probechoso! Nan a haña un trabou ku lo a duna nan gran satisfakshon i ku lo a pèrmití nan hasi pleno uso di nan talentonan na un manera sano. Tambe nan tabatin sufisiente libertat pa disidí kon nan lo a kumpli ku nan asignashon. Kiko mas un hende por a deseá?

3. Kon Adam ku Eva por a siña usa nan libertat di tuma desishon na un manera sabí?

³ Ta klaro ku ora Adam ku Eva a haña e privilegio di tuma desishon, esaki no a nifiká ku tur desishon ku nan tuma lo a duna bon resultado. Nan mester a ehersé nan libertat di tuma desishon den e límitenan di Dios su lei i prinsipionan. Kon nan lo por a siña esakinan? Dor di skucha Esun ku a traha nan i studia su obranan. Dios a duna Adam ku Eva e inteligensia nesesario pa apliká loke nan a siña. Komo ku Dios a krea nan perfekto, nan inklinashon natural lo tabata pa reflehá e kualidatnan di Dios ora di tuma desishon. Sí, nan lo a sòru di hasi asina si di bèrdat nan a apresiá loke Dios a hasi pa nan i nan kier a agrad’é.—Génesis 1:26, 27; Huan 8:29.

4. (a) E mandamentu ku Adam ku Eva a haña pa no kome dje fruta di un sierto palu a kita nan libertat? (b) Dikon e eksigensia aki tabata na su lugá?

⁴ Ta na su lugá anto ku Dios a skohe pa tèst nan deboshon na dje komo Esun ku a duna nan bida. Tambe e kier a wak si nan lo ta dispuesto pa keda den e límitenan ku el a dekretá. Yehova a duna Adam e mandamentu aki: “Di tur palu di e hòfi bo mag kome libremente, ma di e palu di konosementu di bon i malu lo bo no kome, pasobra e dia ku bo kome di dje, lo bo muri sigur.” (Génesis 2:16, 17) A informá Eva tambe dje lei aki despues ku el a ser kreá. (Génesis 3:2, 3) E restrikshon aki a kita nan libertat? Di ningun manera. Nan tabatin un abundansia di tur sorto di kuminda dushi pa kome, sin ku nan tabatin ku kome di esun palu ei. (Génesis 2:8, 9) Tabata apropiado pa nan rekonosé ku tera ta pertenesé na Dios, ya ku ta é a kre’é. Pues e tin derecho di traha lei ku ta pas ku su propósito i ku ta benefisiá humanidat.—Salmo 24:1, 10.

5. (a) Kon Adam ku Eva a pèrdè e libertat glorioso ku nan tabatin? (b) Kiko a bini na lugá dje libertat ku Adam ku Eva tabatin, i kon esei a afektá nos?

⁵ Pero kiko a sosodé? Un angel, impulsá pa ambishon egoista, a hasi mal uso di su boluntat liber i a bira Satanas, ku ta nifiká “Resistidó.” El a gaña Eva dor di sigur’é di algu ku tabata kontrali na Dios su boluntat. (Génesis 3:4, 5) Adam a djòin Eva den kibra Dios su lei. Dor di kohe algu ku no tabata di nan, nan a pèrdè nan libertat glorioso. Piká a kuminsá manda riba nan, i manera Dios a spièrta, despues nan a muri. E herensia ku nan a pasa pa nan desendensia tabata piká. I e piká a manifestá su mes den un tendensia natural pa hasi malu. Tambe piká a kousa debilidatnan ku ta hiba na malesa, behes i morto. E inklinashon pa hasi malu, ku a bira pió dor dje influensia di Satanas, a produsí un sosiedat humano ku un historia di odio, krímen, opreshon i gueranan ku a mata miónes di hende. Esta un kontraste grandi ku e libertat ku Dios a duna hende na prinsipio!—Deuteronomio 32:4, 5; Job 14:1, 2; Romanonan 5:12; Revelashon 12:9.

Kaminda Nos Por Haña Libertat

6. (a) Unda nos por haña berdadero libertat? (b) Di ki klase di libertat Hesus tabata papia?

⁶ En bista dje mal situashon ku ta reina tur kaminda awe, no ta nada straño ku hende ta anhelá mas libertat. Pero unda nos por haña berdadero libertat? Hesus a bisa: “Si boso keda den mi palabra, boso ta berdaderamente disipelnan di mi, i boso lo konosé e bèrdat, i e bèrdat lo hasi boso liber.” (Huan 8:31, 32) E libertat aki no ta e tipo ku hende ta spera di haña ora nan rechasá un gobernante òf un forma di gobièrnu na fabor di un otro. Mas bien, e libertat aki ta yega n’e rais di problemanan humano. Loke Hesus tabata papia di dje ta libertat for di sklabitut na piká. (Huan 8:24, 34-36) Pues, ora un persona bira un berdadero disipel di Hesukristu, e ta eksperensiá un kambio remarkabel den su bida, un liberashon!

7. (a) Den ki sentido nos por ta liber di piká awor? (b) Kiko nos tin ku hasi pa nos por tin e libertat ei?

⁷ Esaki no kier men ku aktualmente kristiannan berdadero ya no ta sinti e efektonan di nan inklinashon natural pa kometé piká. Komo ku nan a heredá piká, ainda nan tin un lucha. (Romanonan 7:21-25) Sin embargo, si un persona ta ègt biba na armonia ku e siñansanan di Hesus, lo e no ta katibu di piká mas. Ya piká lo no ta manera un diktadó riba dje ku ta dun’é òrdu ku e tin ku obedesé siegamente. Lo e no ta atrapá den un estilo di bida ku no tin propósito i ku ta lagu’é ku un mal konsenshi. Lo e tin un konsenshi limpi dilanti Dios debí ku a base di su fe den e sakrifisio di Kristu, su pikánan di pasado a ser pordoná. Inklinashonnan pekaminoso por lanta i purba poderá dje persona, pero si e nenga di sede na nan pasobra e ta kòrda riba e siñansanan limpi di Kristu, e ta mustra ku piká no ta esun ku ta manda riba dje mas.—Romanonan 6:12-17.

8. (a) Ki libertat kristianismo berdadero ta duna nos? (b) Ki aktitut nos mester tin pa ku gobièrnu?

⁸ Konsiderá e libertatnan ku nos komo kristian ta gosa di dje. Nos a ser librá dje efektonan di siñansa falsu i di ta katibu di superstishon i piká. E bèrdat maravioso tokante e kondishon dje mortonan i di e resurekshon a libra nos dje miedu eksagerá di muri. E konosementu ku pronto Dios su Reino hustu lo remplasá gobièrnunan humano imperfekto, ta libra nos di desesperashon. (Daniel 2:44; Mateo 6:10) Sin embargo, e libertat ei no ta hustifiká falta di rèspèt pa outoridatnan gubernamental ni pa nan leinan.—Tito 3:1, 2; 1 Pedro 2:16, 17.

9. (a) Den Yehova su gran amor, kon e ta yuda nos pa nos tin e mayor grado di libertat posibel pa hende awor? (b) Kon nos por tuma desishonnan sabí?

⁹ Yehova no ta laga nos deskubrí kua ta e mihó manera pa biba dor di purba esaki i esaya te ora nos logra. E sa kon nos ta trahá, kiko ta duna nos berdadero satisfakshon, i kiko ta duna nos benefisio eterno. E sa tambe ki maneranan di pensa i aktua por daña un persona su relashon kuné i ku otro hende, i asta stroba e persona ei di drenta e mundu nobo. Den Yehova su gran amor, e ta informá nos di tur e kosnan aki via Beibel i via su organisashon visibel. (Marko 13:10; Galationan 5:19-23; 1 Timoteo 1:12, 13) Anto ta keda na nos pa usa e boluntat liber ku Dios a duna nos pa disidí kon nos ta bai reakshoná riba e konseho ei. Kontrali na loke Adam a hasi, nos sí lo tuma desishonnan sabí si nos hasi kaso di loke Beibel ta bisa nos. Nos lo demostrá ku un bon relashon ku Yehova ta loke mas ta interesá nos den bida.

Tin Hende Kier un Otro Klase di Libertat

10. Ki klase di libertat algun persona ku ta Testigu di Yehova a purba haña?

¹⁰ Tin biaha algun hóben ku ta Testigu di Yehova—i tambe Testigunan ku no ta asina yòn—ta sinti ku nan kier un otro klase di libertat. Mundu ta parse asina atraktivo i eksitante, i mas nan pensa riba dje, mas fuerte nan deseo ta bira pa bai hasi e kosnan ku ta popular den mundu, kosnan ku no ta kristian. Podisé nan no ta plania pa bai usa droga, bebe di mas òf kometé inmoralidat. Pero nan ta kuminsá asosiá ku algun hende ku no ta kristian berdadero, i kier pa esakinan aseptá nan. Tal bes nan ta asta kuminsá imitá e hendenan ei su forma di papia i aktua.—3 Huan 11.

11. Di unda e tentashon pa hasi malu ta bini tin biaha?

¹¹ Tin biaha e tentashon pa partisipá den kondukta ku no ta kristian ta bini di un persona ku ta bisa ku e ta sirbi Yehova. Esei ta loke a sosodé ku algun dje promé kristiannan i mesun kos por sosodé den nos tempu. Hopi bes hende asina kier hasi kosnan ku nan ta pensa lo duna nan plaser, pero e kosnan aki ta kontra lei di Dios. Nan ta animá otro hende pa “ban gosa.” Nan ‘ta primintí libertat miéntras ku nan mes ta esklabo di korupshon.’—2 Pedro 2:19.

12. Kua ta e resultadonan tristu di kondukta ku ta kontra Dios su lei i prinsipionan?

¹² E resultado di e asina yamá libertat ei semper ta malu, pasobra e ta nifiká desobedesé lei di Dios. Por ehèmpel, relashon seksual fuera di matrimonio por resultá den trastorno emoshonal, malesa, morto, embaraso indeseá i asta un matrimonio kibrá. (1 Korintionan 6:18; 1 Tesalonisensenan 4:3-8) Uso di droga por pone hende bira krepchi, i haña lenga pisá, bista wazig, biramentu di kabes, difikultat pa hala rosea, halusinashon i morto. Tambe e por resultá den adikshon, ku tal bes ta hiba un persona na kometé krímen pa por kumpra mas droga. Bebementu di mas ta hiba na kasi mesun konsekuensianan. (Proverbionan 23:29-35) Hende ku ta hasi tal kosnan por kere ku nan ta liber, pero despues ora ta muchu lat, nan ta deskubrí ku nan a bira katibu di piká. I piká ta un doño kruel! Dor di rasoná riba esei awor, nos por protehá nos mes kontra tal eksperensia.—Galationan 6:7, 8.

Kaminda e Problemanan Ta Kuminsá

13. (a) Kon e deseonan ku ta hiba na problema ta lanta hopi bes? (b) Ken su punto di bista nos tin mester pa komprendé kiko ta “mal kompania”? (c) Segun ku bo ta kontestá e preguntanan menshoná den paragraf 13, enfatisá Yehova su punto di bista.

¹³ Pensa un ratu riba unda e problemanan ta kuminsá hopi bes. Beibel ta splika: “Kada un ta wòrdu tentá ora ku e wòrdu atraé i sedusí dor di su mes pashon. Anto ora pashon konsebí, e ta duna lus na piká; i ora piká keda kumplí, e ta produsí morto.” (Santiago 1:14, 15) Kon e deseo òf pashon ta lanta? Dor di loke ta drenta den e mente. Hopi bes esaki ta bini dor di anda ku hende ku no ta apliká prinsipionan bíbliko. Klaro ku nos tur sa ku nos mester evitá “mal kompania.” (1 Korintionan 15:33) Pero ken òf kiko ta mal kompania? Kon Yehova ta mira e asuntu? Nos por yega na e konklushon korekto dor di rasoná riba e siguiente preguntanan i buska e tekstonan bíbliko menshoná.

E echo ku sierto hende ta parse onorabel ta nifiká ku nan ta bon kompania? (Génesis 34:1, 2, 18, 19)

Nan kòmbersashon, kisas nan chistenan, ta indiká ku nos por ta bon amigu ku nan? (Efesionan 5:3, 4)

Kon Yehova ta sinti si nos ta skohe pa bira bon amigu ku hende ku no stim’é? (2 Krónikanan 19:1, 2)

Ounke tal bes nos ta traha òf bai skol ku hende ku no ta kompartí nos kreensia, dikon nos mester ta kouteloso? (1 Pedro 4:3, 4)

Wakmentu di televishon i pelíkula, usamentu di Internet, i lesamentu di buki, revista i korant ta formanan di asosiá òf tene kompania ku otro hende. Nos mester tene kuidou ku ki tipo di informashon for dje fuentenan ei? (Proverbionan 3:31; Isaías 8:19; Efesionan 4:17-19)

Kiko e klase di hende ku nos ta skohe pa anda kuné ta bisa Yehova tokante e klase di persona ku nos ta? (Salmo 26:1, 4, 5; 97:10)

14. Ki libertat magnífiko ta spera esnan ku apliká e konseho dje Palabra di Dios fielmente awor?

¹⁴ Dios su mundu nobo ta djis nos dilanti. Pa medio di Dios su Reino selestial, lo e libra humanidat di e influensia di Satanas i di henter su sistema di kosnan malbado. Progresivamente tur e efektonan di piká lo ser eliminá for di humanidat obediente. Esei lo resultá den perfekshon di mente i kurpa, di manera ku nos lo por disfrutá di bida eterno den Paradeis. Ku tempu, henter kreashon lo gosa di un libertat ku ta na pleno armonia ku “e spiritu di Señor” Yehova. (2 Korintionan 3:17) Lo ta lógiko pa kore e riesgo di pèrdè tur esei debí ku nos ta ignorá e konseho dje Palabra di Dios awor? Laga nos tur ehersé nos libertat kristian na un manera sabí awor, i asina demostrá bon kla ku loke en realidat nos kier ta “e libertat glorioso di e yunan di Dios.”—Romanonan 8:21.

Komo Repaso

• Ki klase di libertat e promé pareha humano tabatin? Kon esei ta na komparashon ku loke humanidat ta eksperensiá awor?

• Ki libertat kristiannan berdadero tin? Kon esaki ta na kontraste ku loke mundu ta konsiderá komo libertat?

• Dikon ta asina importante pa evitá mal kompania? Ken su desishon di loke ta malu nos sí ta aseptá, kontrali ku Adam?

[Plachi na página 46]

E Palabra di Dios ta spièrta: “No laga hende gaña boso: ‘Mal kompania ta daña bon kustumber’”