Kapítulo Shete

Loke Nos Ta Siña for dje Echo Ku Dios A Pèrmití Maldat

1, 2. (a) Si Yehova a mata e rebeldenan mesora den Eden, ki konsekuensia esei lo tabatin pa nos? (b) Ki areglonan amoroso Yehova a hasi disponibel pa nos?

“E AÑANAN di mi bida tabata poko i trabahoso,” e patriarka Yakòb a bisa. (Génesis 47:9) Job tambe a deklará ku hende “ta biba poko dia i ta yen di problema.” (Job 14:1) Meskos ku nan, mayoria di nos a pasa dor di difikultat, inhustisia i asta tragedia den bida. Pero tòg no tabata un inhustisia di Dios su parti ku el a laga nos nase. Nos por laga di tin e mente i kurpa perfekto òf e Paradeis ku Adam ku Eva tabatin originalmente. Pero kiko lo a pasa si Yehova a duna nan e kastigu di morto inmediatamente despues ku nan a rebeldiá? Awor aki lo no tabatin malesa, tristesa ni morto, pero lo no tabatin e rasa humano tampoko. Nos lo no a nase. Den su miserikòrdia, Dios a pèrmití Adam ku Eva haña yu, maske esakinan a heredá imperfekshon. I mediante Kristu, Yehova a hasi areglo pa nos por haña bèk loke Adam a pèrdè: bida eterno riba un tera transformá den un paradeis.—Huan 10:10; Romanonan 5:12.

² Ta ki un animashon ku nos por antisipá bida eterno den un mundu ku ambiente di Paradeis, kaminda nos lo no tin malesa, tristesa, doló, ni morto, ni tampoko hende malbado! (Proverbionan 2:21, 22; Revelashon 21:4, 5) Pero for di Beibel nos ta siña ku ounke nos salbashon personal ta hopi importante pa nos i pa Yehova, tin algu asta mas importante ainda den e asuntu aki.

Pa Motibu di Su Gran Nòmber

3. Kiko ta nesesario pa Yehova su propósito pa e tera i humanidat kumpli?

³ Dios su nòmber ta enbolbí den kumplimentu di su propósito relashoná ku e tera i humanidat. E nòmber ei, Yehova, ta nifiká “E Ta Kousa pa Bira.” Su nòmber ta representá su reputashon komo e Soberano di universo, komo Esun Magnífiko ku ta establesé su propósitonan i semper ta kumpli ku nan, i komo e Dios di e bèrdat. Debí na Yehova su posishon komo gobernante supremo, e pas i bienestar di tur persona den universo ta dependé dje echo ku su nòmber—i loke e nòmber ta enserá—ta risibí e pleno rèspèt ku e meresé. I tambe ta nesesario pa tur persona obedes’é.

4. Kiko tabata Yehova su propósito pa e tera?

⁴ Despues ku Yehova a krea Adam ku Eva, el a duna nan un asignashon pa nan kumpli kuné. El a laga nan komprendé bon kla ku su propósito no tabata solamente pa nan dominá henter e tera—i asina ekstendé e fronteranan di Paradeis—sino tambe yen’é ku nan desendientenan. (Génesis 1:28) E propósito aki lo a frakasá debí na nan piká? Lo ta un bèrgwensa pa e nòmber di Yehova todopoderoso si e no por a kumpli ku su propósito pa e tera i humanidat!

5. (a) Ki tempu e promé pareha humano lo a muri si nan a kome dje palu di konosementu di bon i malu? (b) Kon Yehova a kumpli ku su palabra na Génesis 2:17 i na mesun tempu a respetá su propósito p’e tera?

⁵ Yehova a spièrta Adam ku Eva ku si nan a desobedesé i kome for dje palu di konosementu di bon i malu, nan lo a muri “e dia” ku nan kome di dje. (Génesis 2:17) I di akuerdo ku su palabra, mesun dia ku nan a peka Yehova a pidi nan pa rindi kuenta i a pronunsiá e sentensia di morto. For di Dios su punto di bista, Adam ku Eva a muri e dia ei. Sin embargo, pa kumpli ku su propósito p’e tera, Yehova a pèrmití nan produsí un famia promé ku nan a muri físikamente. Pero, komo ku Dios por konsiderá 1.000 aña komo un dia, ora Adam su bida a terminá na edat di 930 aña, esei ainda a kai denter di un “dia.” (2 Pedro 3:8; Génesis 5:3-5) Dje manera ei Yehova a kumpli ku su palabra i a ehekutá kastigu manera el a bisa ku lo e hasié, i nan morto no a stroba su propósito p’e tera. Pero pa un tempu, el a pèrmití hende imperfekto—inkluso hende malbado—keda riba tera.

6, 7. (a) Segun Éksodo 9:15 i 16, pakiko Yehova a pèrmití e malbadonan sigui biba pa un tempu? (b) Den kaso di Fárao, kon Yehova a demostrá su poder, i kon Su nòmber a ser proklamá? (c) Ora e sistema malbado djawe yega na su fin, den kiko esei lo resultá?

⁶ Loke Yehova a bisa e gobernante di Egipto den tempu di Moises tambe ta indiká pakiko Dios a pèrmití e malbadonan sigui na bida. Ora Fárao a prohibí e yunan di Israel di bai for di Egipto, Yehova no a dale mata mesora. Yehova a manda Dies Plaga riba e pais. Plaga ku a demostrá Yehova su poder na maneranan asombroso. Ora Yehova a spièrta e Fárao pa e di shete plaga, el a bis’é ku fásilmente lo e por a eliminá Fárao i su pueblo for di riba tera. “Ma di bèrdat,” segun Yehova, “pa e motibu aki mi a pèrmití bo keda na bida, pa mustra bo mi poder i pa proklamá mi nòmber den henter mundu.”—Éksodo 9:15, 16.

⁷ I asina a sosodé. Ora Yehova a libra e israelitanan, bèrdat su nòmber a bira ampliamente konosí. (Hosué 2:1, 9-11) Awe, kasi 3.500 aña despues, hende no a lubidá loke el a hasi e tempu ei. E nòmber personal di Yehova a ser proklamá i tambe e bèrdat tokante Esun ku ta karga e nòmber ei. Esaki a establesé Yehova su reputashon komo e Dios ku ta kumpli ku su promesa i ku ta tuma akshon na fabor di su sirbidónan. (Hosué 23:14) Esei a demostrá ku debí ku e ta todopoderoso, nada no por stroba su propósito. (Isaías 14:24, 27) P’esei nos por tin konfiansa ku pronto lo e tuma akshon na fabor di su sirbidónan fiel dor di destruí henter e sistema malbado di Satanas. Tal despliegue di su forsa todopoderoso i e gloria ku esei lo duna Yehova su nòmber, nunka mas lo ser lubidá. E benefisionan lo ta eterno.—Ezekiel 38:23; Revelashon 19:1, 2.

‘O e Profundidat di e Sabiduria di Dios!’

8. Ki faktornan Pablo ta animá nos pa konsiderá?

⁸ Den su karta n’e romanonan, apòstel Pablo ta hasi e pregunta: “Akaso tin inhustisia serka Dios?” Enfátikamente e ta kontestá: “Di ningun manera!” Kaba, e ta enfatisá Dios su miserikòrdia i ta referí na loke Yehova a bisa ta e motibu ku el a pèrmití Fárao biba un poko mas largu. Tambe Pablo ta mustra ku nos ta manera klei den man di un alfarero. I e ta deklará: “Kiko anto si Dios, ounke dispuesto pa demostrá su furia i pa hasi su poder konosí, a soportá ku hopi pasenshi e ophetonan di furia, prepará pa destrukshon? I el a hasi asina pa e por hasi konosí e rikesa di su gloria riba e ophetonan di miserikòrdia, kuanan el a prepará di antemano pa gloria, kendenan el a yama tambe, esta nos, no for di entre e hudiunan so, ma tambe for di entre e paganonan.”—Romanonan 9:14-24.

9. (a) Ken ta e “ophetonan di furia, prepará pa destrukshon”? (b) Dikon Yehova a demostrá gran pasenshi ora el a konfrontá su opositornan, i kon e resultado final lo ta na benefisio di esnan ku stim’é?

⁹ For di tempu dje rebelion den Eden, ken ku a oponé Yehova i su leinan tabata “ophetonan di furia, prepará pa destrukshon.” For dje tempu ei padilanti Yehova a demostrá hopi pasenshi. Malbadonan a hasi bofon di su akshonnan, a persiguí su sirbidónan, i asta a mata su Yu. Demostrando gran dominio propio, Yehova a pèrmití sufisiente tempu pasa pa tur kreashon por mira bon kla kiko ta e resultadonan desastroso di rebelion kontra Dios i di gobernashon humano independiente di Dios. Na mesun tempu, e morto di Hesus a perkurá e medio pa libra humanidat obediente i pa “destruí e obranan di Diabel.”—1 Huan 3:8; Hebreonan 2:14, 15.

10. Dikon Yehova a tolerá e malbadonan durante e último 1.900 añanan?

¹⁰ Durante e mas ku 1.900 añanan ku a pasa desde Hesus su resurekshon, Yehova a sigui tolerá e “ophetonan di furia,” i a wanta ku nan destrukshon. Dikon? Un motibu ta pasobra e tabata prepará esnan ku lo mester a bira sosio di Hesukristu den su Reino selestial. Nan ta 144.000 persona, i nan ta e “ophetonan di miserikòrdia” ku apòstel Pablo a papia di dje. Na promé instante, a invitá personanan for di entre e hudiunan pa forma e grupo selestial aki. Despues, Dios a invitá hende dje otro nashonnan. Yehova no a fòrsa ningun di e hendenan aki pa sirbié. Mas bien, el a duna algun di esnan ku a demostrá apresio pa su areglonan amoroso e privilegio di bira gobernante huntu ku su Yu den e Reino selestial. Preparashon dje grupo selestial ei ta kasi kla awor.—Lukas 22:29; Revelashon 14:1-4.

11. (a) Kua grupo ta benefisiá awor di Yehova su gran pasenshi? (b) Kon e mortonan lo benefisiá?

¹¹ Pero, kiko di habitante p’e tera? Yehova su gran pasenshi a hasi posibel tambe ku por a rekohé “un multitut grandi” for di tur nashon. Awor nan ta miónes. Yehova a primintí ku e grupo terenal aki lo sobrebibí fin dje sistema aktual i nan lo tin e speransa di haña bida eterno den Paradeis riba tera. (Revelashon 7:9, 10; Salmo 37:29; Huan 10:16) Na Dios su debido tempu, gran kantidat di hende morto lo resusitá i haña e oportunidat di bira siudadano terenal dje Reino selestial. E Palabra di Dios ta profetisá na Echonan 24:15: “Lo tin un resurekshon di tantu e hustunan komo e malbadonan.”—Huan 5:28, 29.

12. (a) Kiko nos ta siña tokante Yehova for dje echo ku el a tolerá maldat? (b) Kiko abo ta pensa dje manera ku Yehova a atendé e asuntunan aki?

¹² Akaso tabatin inhustisia den tur esaki? Nò, pasobra dor di wanta ku e destrukshon dje malbadonan, esta e “ophetonan di furia,” Dios ta mustra kompashon na otro hende, i esei ta na armonia ku su propósito. Esaki ta mustra kon miserikòrdioso i amoroso e ta. Tambe, e tempu ku nos a haña pa opservá kon Yehova su propósito a desaroyá, a siña nos hopi tokante dje. Nos ta keda impreshoná ku e vários aspektonan di su personalidat ku a sali na kla: su hustisia, su miserikòrdia, su gran pasenshi i su sabiduria amplio. E manera sabí ku Yehova a atendé e kuestion di su derecho di goberná komo esun supremo den universo, lo keda pa semper komo un testimonio dje echo ku su manera di goberná ta esun mihó. Huntu ku apòstel Pablo, nos ta bisa: “O profundidat di e rikesanan, tantu di e sabiduria komo di e konosementu di Dios! Ki inskudriñabel su huisionan ta i insondeabel su kamindanan!”—Romanonan 11:33.

Oportunidat pa Demostrá Nos Deboshon

13. Ora nos ta sufri personalmente, ki oportunidat esei ta duna nos, i kiko lo yuda nos reakshoná na un manera sabí?

¹³ Hopi sirbidó di Dios ta den situashonnan ku ta kousa sufrimentu personal. Nan ta sigui sufri pasobra ainda Dios no a destruí e malbadonan ni restorá humanidat manera el a profetisá. Esaki mester amargá nos? Òf mas bien nos por mira e situashonnan ei komo un oportunidat pa nos duna prueba ku Diabel ta un mentiroso? Nos por haña e forsa pa hasi esei si nos keda kòrda riba e ruego: “Sea sabí, mi yu, i hasi mi kurason kontentu, pa mi por kontestá esun ku reprochá mi.” (Proverbionan 27:11) Satanas, esun ku ta reprochá Yehova, a deklará ku si hende sufri pèrdida material òf haña malesa físiko, nan lo kulpa Dios i asta maldishon’é. (Job 1:9-11; 2:4, 5) Nos ta hasi Yehova su kurason kontentu i ta mustra ku Satanas su akusashon no ta sierto den nos kaso, ora nos keda fiel apesar di difikultatnan ku nos ta konfrontá.

14. Si nos dependé riba Yehova ora nos ta pasa den prueba, ki benefisionan nos lo por haña?

¹⁴ Si nos dependé riba Yehova ora nos ta pasa den prueba, nos por desaroyá kualidatnan presioso. Por ehèmpel, komo resultado di e kosnan ku Hesus a sufri, el “a siña obedensia” den un manera ku nunka promé el a konosé. Nos tambe por siña for di nos pruebanan. Nos por siña kultivá gran pasenshi, perseveransia i un komprendementu i apresio mas profundo pa Yehova su normanan hustu.—Hebreonan 5:8, 9; 12:11; Santiago 1:2-4.

15. Kon otro hende por benefisiá ora nos ta soportá difikultatnan ku pasenshi?

¹⁵ Otro hende lo opservá loke nos ta hasi. Debí ku nan ta mira kiko nos ta pasa aden pa motibu di nos amor pa hustisia, algun di nan ku tempu kisas ta bin komprendé ken ta e kristiannan berdadero djawe. I dor di uni ku nos den adorashon, nan por bini na remarke pa risibí e bendishonnan di bida eterno. (Mateo 25:34-36, 40, 46) Yehova i su Yu kier pa hende haña e oportunidat ei.

16. Kon e manera ku nos ta mira difikultatnan personal ta relashoná ku e asuntu di union?

¹⁶ Ta hopi bon ora nos por konsiderá asta situashonnan difísil komo un oportunidat pa demostrá nos deboshon na Yehova i tambe pa yuda kumpli ku su boluntat! E echo ku nos ta hasi esei por duna evidensia ku nos di bèrdat ta bayendo den direkshon di union ku Dios i Kristu. Hesus a hasi orashon na Yehova i a pidi pa tur kristian berdadero, bisando: “Mi no ta pidi pa esakinan so [su disipelnan mas serkano], ma tambe pa esnan ku ta kere den mi pa medio di nan palabra, pa nan tur por ta ún, meskos ku abo, o Tata, ta den [union ku] mi i ami den [union ku] bo, pa nan tambe por ta den [union ku] nos; pa mundu kere ku ta abo a manda mi.”—Huan 17:20, 21, NW.

17. Ki konfiansa nos por tin si nos keda fiel na Yehova?

¹⁷ Si nos keda fiel na Yehova, lo e rekompensá nos rikamente. Su Palabra ta bisa: “Sea firme, konstante, semper abundando den e trabou di Señor, sabiendo ku boso trabou no ta enbano den Señor.” (1 Korintionan 15:58) Tambe e ta bisa: “Dios no ta inhustu pa lubidá boso trabou i e amor ku boso a mustra pa su nòmber.” (Hebreonan 6:10) Santiago 5:11 ta bisa: “Mira, nos ta konsiderá komo bendishoná esnan ku a pèrseverá. Boso a tende di e perseveransia di Job i a mira e fin ku Señor tabatin na bista, ku Señor ta yen di kompashon i ta miserikòrdioso.” Kiko tabata e resultado pa Job? “SEÑOR a bendishoná e último dianan di Job mas ku e proménan.” (Job 42:10-16) Sí, Yehova “ta rekompensá esnan ku ta busk’é.” (Hebreonan 11:6) I ki un rekompensa nos tin nos dilanti: bida eterno den Paradeis riba tera!

18. Ku tempu, kiko lo pasa ku tur rekuerdo doloroso ku nos lo por tin?

¹⁸ Dios su Reino lo deshasí di tur daño kousá n’e famia humano durante e míles di añanan ku a pasa. Kualkier sufrimentu ku nos ta pasa aden awor akí lo no ta nada na komparashon ku e felisidat dje tempu ei. Ningun mal rekuerdo di sufrimentu di pasado lo molestiá nos. E pensamentunan i aktividatnan positivo ku lo yena e bida diario di hende den e mundu nobo, pokopoko lo eliminá e rekuerdonan doloroso. Yehova ta deklará: “Mi ta krea shelunan nobo [un gobièrnu selestial nobo riba humanidat] i un tera nobo [un sosiedat humano hustu]; i e kosnan di ántes lo no wòrdu rekordá mas ni bin na memoria. Ma sea kontentu i regosihá pa semper den loke mi ta krea.” Sí, den Yehova su mundu nobo, e hustunan lo por bisa: “Henter e tera ta na pas i ta ketu; nan ta dal gritunan di alegria.”—Isaías 14:7; 65:17, 18.

Komo Repaso

• Ounke Yehova a pèrmití maldat, kon el a demostrá na un manera apropiado gran rèspèt pa su mes nòmber?

• Kon e echo ku Dios a tolerá “ophetonan di furia” a hasi posibel pa su miserikòrdia yega te na nos?

• Kiko nos mester hasi esfuerso pa mira den situashonnan ku ta kousa sufrimentu personal?

[Plachi na página 67]

Yehova “a bendishoná e último dianan di Job mas ku e proménan”