Hóben​—Kiko Lo Bo Hasi ku Bo Bida?

“MI KE saka lo mihó for di bida.” Asina un mucha muhé tiner a bisa. Sin duda, bo tambe ke meskos. Pero, kon bo ta saka “lo mihó” for di bida? Medionan di komunikashon i bo pareunan, kisas asta bo maestronan, tal bes ta bisa ku bo por logra esei dor di gana hopi plaka i gosa di un karera prestigioso, ku otro palabra, ser un persona eksitoso!

Sinembargo, Beibel ta spièrta hóbennan ku buskamentu di éksito material ta meskos ku “korementu tras di bientu.” (Eklesiástes 4:4) Un motibu ta ku masha poko hóben ta logra yega na rikesa i fama. Esnan ku logra mes sa keda hopi desilushoná. Un hóben britániko ku a sigui un karera akadémiko prestigioso a bisa: “Éksito material ta manera un kaha bashí. Ora bo habrié, no tin nada den dje.” Ta bèrdat ku tin bes un trabou por trese rikesa i rekonosementu. Pero e no por satisfasé bo “nesesidat spiritual.” (Mateo 5:3) Ademas, 1 Huan 2:17 ta spièrta nos ku “mundu ta pasa bai.” Asta si bo logra alkansá éksito den e mundu akí, lo e no dura mashá.

Eklesiástes 12:1 ta animá hóbennan: “Kòrda . . . riba bo Kreador den e dianan di bo hubentut.” Sí, e mihó manera pa usa bo bida ta den e sirbishi di Yehova Dios. Pero pa bo ta den e sirbishi di Dios, bo mester kualifiká promé. Kiko bo mester hasi pa kualifiká? I kiko ke men sirbi Dios?

Kon pa Kualifiká pa Bira un Testigu di Yehova

Pa kuminsá, bo mester kultivá un deseo pa sirbi Dios. E deseo ei no ta bini outomátikamente, ni si bo mayornan ta kristian. Bo mester forma bo propio relashon ku Yehova. Un mucha muhé tiner a bisa: “Orashon ta yuda bo haña bo propio relashon ku Yehova.”—Salmo 62:8; Santiago 4:8.

Romanonan 12:2 ta hala atenshon na un otro kos ku bo mester hasi. E ta bisa: “Komprobá pa boso mes kiko ta e boluntat di Dios, ku ta bon, agradabel i perfekto.” Bo tin duda tokante algun kos ku bo a siña? Si ta asina, sigui e spièrtamentu di Beibel i ‘komprobá pa bo mes’ si e kosnan akí ta bèrdat! Investigá pa bo mes. Lesa Beibel i publikashonnan basá riba Beibel. Pero, pa bo siña tokante Dios, no ta bo mente so bo tin ku usa. Tuma tempu pa meditá riba loke bo ta lesa di manera ku e informashon, na moda di papia, ta baha den bo kurason. Esaki lo pone bo amor pa Dios krese.—Salmo 1:2, 3.

Despues, purba kompartí loke bo ta siña na un manera informal; kisas ku bo kompañeronan di skol. E siguiente paso ta di prediká di kas pa kas. De bes en kuando lo bo por topa un kompañero di skol ora bo ta prediká. Na kuminsamentu esaki por hasi bo nèrvioso. Pero Beibel ta konsehá nos pa no tene “bèrgwensa di deklará e bon notisia.” (Romanonan 1:16) Bo ta hibando un mensahe di bida i speransa! Pakiko tene bèrgwensa di dje?

Si bo mayornan ta kristian, kisas ya kaba bo ta kompañá nan den e trabou di prediká. Pero bo por hasi mas ku djis para na porta sin bisa nada òf simplemente laga revista ku tratado? Bo mes por papia na porta, usando bo Beibel pa siña e doño di kas algu? Si no ta asina, buska yudansa serka bo mayornan òf serka un miembro maduro dje kongregashon. Pone meta pa bo kualifiká komo un publikadó no-batisá di e bon notisia!

Ku tempu, lo bo sinti bo motivá pa hasi bo dedikashon na Dios, es desir, hasi un promesa solèm na Dios ku lo bo sirbié p’e restu di bo bida. (Romanonan 12:1) Sinembargo, dedikashon no ta simplemente un asuntu personal. Dios ta rekerí pa nos tur “hasi deklarashon públiko . . . pa haña salbashon.” (Romanonan 10:10) Na momento ku bo ta bai batisá, bo ta hasi un deklarashon verbal di bo fe promé. Anto despues bo ta batisá den awa. (Mateo 28:19, 20) En bèrdat boutismo ta un paso serio. Pero no keda sin hasié pasobra bo ta sinti ku lo bo por faya di un manera òf otro. Si bo dependé riba Dios pa haña fortalesa, lo e duna bo “e poder ku ta surpasá esun di hende” pa yuda bo para firme.—2 Korintionan 4:7; 1 Pedro 5:10.

Ora bo batisá, bo ta bira un Testigu di Yehova. (Isaías 43:10) Esaki mester tin un impakto grandi riba e manera ku bo ta bai usa bo bida. Dedikashon ta enserá ‘nenga bo mes.’ (Mateo 16:24) Kisas lo bo por legumai algun meta i ambishon personal ku bo tabatin i ‘buska promé e reino di Dios.’ (Mateo 6:33) Pues, dedikashon i boutismo ta duna bo hopi oportunidat pa hasi esei. Laga nos konsiderá algun di nan.

Oportunidatnan pa Sirbi Dios “Full-Time”

● Sirbishi di pionero ta un oportunidat asina. Un publikadó pionero ta un kristian ehemplar i batisá ku a hasi areglo pa dediká un mínimo di 70 ora pa luna predikando e bon notisia. Pa bo desaroyá bo abilidat di prediká i di siña hende, bo tin ku oumentá e kantidat di ora ku bo ta traha den sirbishi di vèlt. Hopi pionero a eksperensiá e goso di yuda nan studiantenan di Beibel bira Testigu batisá. Kua otro trabou lo por ta mes eksitante i duna bo e mesun satisfakshon?

Pa kubri nan gastunan, mayoria di pionero ta traha part-time. Hopi di e pioneronan akí ta plania delantá pa e responsabilidat akí dor di siña un fishi na skol òf for di nan mayornan. Si abo ku bo mayornan ta haña ku lo ta mihó pa bo optené mas entrenamentu despues di skol sekundario, hasi sigur ku bo motivashon ta pa sostené bo mes den bo sirbishi i kisas sirbi full-time komo pionero i no pa gana hopi plaka.

Sinembargo, e kos prinsipal den bida di un pionero no ta su trabou, sino su sirbishi—yuda otro hende gana bida! Pakiko no pone e sirbishi di pionero komo un meta personal? E sirbishi di pionero hopi bes ta hiba na otro privilegionan. Por ehèmpel, algun pionero ta muda bai kaminda tin mas nesesidat di publikadónan di Reino. Tin di nan ta siña otro idioma i ta sirbi sea den un kongregashon lokal di otro idioma òf asta na otro tera. Sí, sirbishi di pionero ta un estilo di bida ku ta duna hopi satisfakshon!

● Skol pa Predikadó di Reino ta un kurso di dos luna pa ruman hòmber i ruman muhé soltero i pareha kasá. Nan mester tin 23 pa 65 aña di edat, ta pionero ku eksperensia i ta dispuesto pa muda kaminda tin nesesidat di mas predikadó di reino. Komo ku nan ta imitá e ehèmpel di Hesukristu, e Predikadó mas importante ku a yega di biba riba tera, nan ta bisa: “At’ami akí! Manda mi.” (Isaías 6:8; Huan 7:29) Despues ku nan muda, kisas nan mester siña kon pa hiba un bida simpel, adaptá na otro kultura, kuminda òf klima. Podisé nan mester asta siña un otro idioma. E kurso ta yuda nan kultivá kualidat spiritual ku nan lo mester den nan asignashon nobo. Despues di e kurso, nan lo ta bon prepará pa tuma mas responsabilidat den Yehova su organisashon.

● Sirbishi di Bètel ta enserá sirbi komo boluntario na un di e sukursalnan di Testigunan di Yehova. Algun miembro di e famia di Bètel ta sirbi direktamente den e produkshon di literatura bíbliko. Otronan ta asigná ku trabou ku ta yuda pa e produkshon di literatura bíbliko por sigui, por ehèmpel mantenementu di e edifisionan i ekipo òf perkurá físikamente pa e famia di Bètel. Kada asignashon ta un privilegio sagrado di sirbishi na Yehova. I esnan ku ta traha na Bètel tin e goso di sa ku loke sea nan ta hasi einan, e ta benefisiá un kantidat grandi di ruman rònt mundu.

Sukursal sa invitá rumannan ku tin sierto fishi òf spesialisashon pa sirbi na Bètel. Sinembargo, mayoria ruman ta risibí nan entrenamentu despues ku nan yega Bètel. Esnan ku ta traha na Bètel no ta sirbi pa gana plaka, sino mas bien nan ta satisfecho ku e kuminda i alohamentu ku nan ta haña i tambe ku e ‘zakgeld’ ku nan ta haña pa kubri gastunan personal. Un miembro hóben di e famia di Bètel a deskribí su sirbishi asin’akí: “E ta tremendo! E rutina no ta fásil, pero mi a risibí hopi bendishon sirbiendo akinan.”

● Sirbishi internashonal ta permití bo partisipá den konstrukshon di edifisionan di sukursal i Salònnan di Reino. Sirbidónan internashonal, manera nan yama, ta biaha bai otro tera pa yuda den tal trabou di konstrukshon. Esaki ta un forma di sirbishi sagrado, meskos ku e trabou di esnan ku a konstruí e tèmpel di Sálomon. (1 Reinan 8:13-18) Pa e sirbidónan internashonal tin mesun areglo di kuido ku pa e famia di Bètel. E rumannan akí tin un privilegio masha grandi di sirbi den e kampo di aktividat akí pa e alabansa di Yehova!

Sirbi Yehova ku Henter Bo Alma

E mihó manera pa usa bo bida ta di sirbi Yehova. Pakiko no pone un meta personal pa sirbi Dios full-time? Papia ku bo mayornan, e ansianonan di bo kongregashon i ku bo superintendente di sirkuito tokante sirbishi full-time. Si bo ta interesá pa sirbi na Bètel òf asistí na e Skol pa Predikadó di Reino, nos ta invitá bo pa asistí na e reunion ku ta tene na kongreso regional pa esnan interesá.

Ta bèrdat ku no ta tur hende por sirbi den e trabou full-time òf ta kualifiká pa esei. Tin bes problema di salú, situashon finansiero i obligashonnan di famia ta limitá loke bo por hasi. Sinembargo, tur kristian dediká mester hasi kaso dje mandamentu bíbliko: “Stima Yehova bo Dios ku henter bo kurason, ku henter bo alma i ku henter bo mente.” (Mateo 22:37) Yehova ta rekerí pa bo hasi bo bèst te kaminda bo sirkunstansia ta permití. Pues, den ki situashon ku bo por ta, hasi sirbishi na Yehova e enfoke di bo bida. Pone metanan realístiko den bo sirbishi na Dios. Sí, ‘kòrda riba bo Kreador den e dianan di bo hubentut’ i lo bo ser bendishoná eternamente pa esei!

A ménos ku tin otro indikashon, den e tratado akí, e tekstonan di e Skritura Hebreo ta saká for di Beibel Santu. E tekstonan di e Skritura Griego ta saká for di e Tradukshon di Mundu Nobo di e Skritura Griego Kristian.