Hesus Semper A Obedesé

Abo ta haña ku semper ta fásil pa bo obedesé, esta, tende di bo tata ku bo mama?— Tin biaha ta difísil. Bo tabata sa ku Hesus a obedesé tantu Yehova komo su mayornan?— Su ehèmpel por yuda abo tambe obedesé, asta ora no ta fásil. Ban siña mas di esaki.

Promé ku Hesus a bini na mundu, e tabata serka su Tata Yehova den shelu. Pero Hesus tabatin mayor aki riba mundu tambe. Nan nòmber ta Hose ku Maria. Bo sa ta kon nan por a bira su mayornan?—

Yehova a pone Hesus den barika di Maria i lag’é krese meskos ku tur otro yu ta krese den barika di nan mama. Ta un milager esei tabata! Mas o ménos nuebe luna despues, Hesus a nase. Ta asina Maria ku Hose a bira Hesus su mayornan aki na mundu.

Tempu ku Hesus tabatin 12 aña so, el a hasi algu ku a mustra kuantu e ta stima su Tata, Yehova. Esei a sosodé ora ku Hesus i su famia a kana bai leu te na Herúsalèm pa un selebrashon spesial. E selebrashon ei tabata pa kòrda e dia ku Yehova a skapa Israel for di Egipto. Riba kaminda pa kas, Hose ku Maria no por a haña Hesus niun kaminda. Bo sa unda e tabata?—

Hose ku Maria a kore bai Herúsalèm bèk i a kana buska Hesus tur kaminda. Nan tabata hopi preokupá, pasobra nan no por a hañ’é. Pero tres dia despues, nan a bin hañ’é den tèmpel! Bo sa pakiko Hesus tabata den tèmpel?— Pasobra ei e por a siña di su Tata, Yehova. Hesus ta stima Yehova i e kier a siña kon e por a hasié kontentu. Despues ku Hesus a bira grandi, el a keda obedesé Yehova semper, asta ora esei tabata difísil p’e i ora e mester a sufri. Hesus a obedesé Hose ku Maria tambe?— Sí, Beibel ta bisa ku sí.

Kiko e ehèmpel di Hesus ta siña bo?— Bo tin ku obedesé bo mayornan, asta ora ta difísil. Bo ta bai hasié?—