Timoteo Tabata Ke Yuda Hende

Timoteo tabata un mucha hòmber ku gusta yuda. El a biaha bai hopi kaminda pa yuda hende. P’esei, e tabatin un bida yen di aventura. Bo ke tende su historia?—

Tempu ku Timoteo tabata mucha, el a biba na un siudat ku yama Listra. For di tempu ku e tabata chikitu, su wela Loida i su mama Eunise a kuminsá siñ’é di Yehova. Segun ku Timoteo tabata krese bira grandi, el a haña gana di yuda hende siña di Yehova.

Ora Timoteo tabata yòn ainda, Pablo a puntr’é si e ke bai prediká kuné na otro pais. Timoteo kier a bai yuda hende, p’esei mesora el a bisa sí.

Timoteo a bai huntu ku Pablo na un siudat ku yama Tesalónika, na un pais ku tabata yama Masedonia. Pa nan a yega ei, nan tabatin ku kana hopi, anto biaha den boto tambe. Ora ku por fin nan a yega, nan a yuda hopi hende siña di Yehova. Pero tin hende na e siudat ei ku a rabia i kier a mata nan. P’esei Pablo ku Timoteo mester a bai prediká otro kaminda.

Un par di luna despues, Pablo a pidi Timoteo bai Tesalónika bèk pa wak kon ta ku e rumannan aya. Timoteo tabatin mester di hopi kurashi pa e bai bèk na e siudat peligroso ei! Pero el a bai sí, pasobra e tabata preokupá pa e rumannan. Ora el a yega bèk serka Pablo, e tabatin bon notisia. Tabata bai hopi bon ku e rumannan na Tesalónika!

Timoteo a traha hopi aña huntu ku Pablo. Un biaha, Pablo a skirbi ku Timoteo ta e mihó hende ku e por a manda pa yuda e kongregashonnan pasobra Timoteo a stima Yehova i el a stima hende.

Abo ta stima hende i ke yuda nan siña di Yehova?— Si ta asina, bo tambe por tin un bida mashá felis, meskos ku Timoteo!