Promesanan di Reino​—Lo “Traha Tur Kos Nobo”

BO TA kita un apel grandi i hechu for di e pal’i apel i ta hol’é promé ku bo pon’é den e makutu ku ta kasi yen. Bo tin basta ora ta traha, pero bo ta sinti bo bon bon, ku gana di traha un poko mas. Bo mama ta na un otro palu ei banda ta kita apel. E ta traha felis di dje i ta kòmbersá ku otro miembro di famia i amigunan ku ta yudando ku e kosecha. E ta mustra asina yòn; manera bo ta kòrd’é tempu bo tabata chikitu, hopi hopi aña pasá. Kasi bo no por kere ku bo a mir’é bira bieu den e mundu ku masha ten a pasa pa historia. Bo ta kòrda kon bo a mir’é para kaba na nada pa motibu di malesa, kon bo a tene su man ora el a hala su último rosea i kon bo a yora na su graf. Pero awor, at’é aki, huntu ku asina hopi hende mas, salú i bibitu bibitu!

Un dia e esena akí lo ta realidat; nos sa esei. Nos sa pasobra e promesanan di Dios semper ta kumpli. Den e sekshon akí nos lo analisá kon algun promesa di e Reino lo kumpli den futuro serkano i hiba na e guera di Armagedon. Tambe nos lo repasá algun promesa di Reino emoshonante ku lo kumpli despues di esei. Esta kontentu nos lo ta ora e tempu yega ku e Reino di Dios ta goberná henter e tera i lo “traha tur kos nobo”!—Rev. 21:5.