Hesus A Duna Testimonio na un Muhé Samaritano

Ora Hesus a sali Hudea rumbo pa Galilea, é i su disipelnan a kue direkshon nort pa pasa via Samaria. Banda di 12 or di mèrdia, kansá di nan biahe, nan a para na un pos den bisindario di Sikar, un stat na Samaria, pa nan por a sosegá. Ta parse ku e pos ei tabata un di esnan ku Yakòb a koba òf a laga koba hopi siglo pasá. E pos ei ta eksistí te awe; e ta situá den bisindario di e stat Nablus.

Hesus a kai sinta na e pos pa sosegá i su disipelnan a bai kumpra kos di kome den e stat. Awor, tabatin un señora samaritano ku a bini na e pos pa saka awa. Hesus a bis’é: “Duna mi poko awa di bebe.”—Huan 4:7.

Generalmente, debí na prehuisio, hudiunan no tabata atendé ku samaritano. P’esei e señora a keda asombrá i a puntra Hesus: “Kon por ta ku abo, apesar ku bo ta un hudiu, ta pidi mi awa pa bebe, siendo ku mi ta un muhé samaritano?” Hesus a kontest’é: “Si bo tabata sa kiko e regalo di Dios ta i ken ta esun ku ta pidi bo: ‘Duna mi poko awa di bebe,’ lo bo a pidié, i lo el a duna bo awa ku ta duna bida.” El a bisa Hesus: “Señor, bo no tin ni un hèmber pa saka awa, i e pos ta hundu. Di unda bo ta saka e awa ei ku ta duna bida? Akaso bo ta mas grandi ku nos antepasado Yakòb, kende a duna nos e pos akí i for di kua e mes huntu ku su yunan i su bestianan a bebe?”—Huan 4:9-12.

Hesus a kontest’é: “Tur hende ku bebe di e awa akí lo bolbe haña set. Ma ken ku bebe di e awa ku ami lo dun’é lo no haña set nunka mas; mas bien, e awa ku ami lo dun’é lo bira den dje un fuente di awa ku ta brota pa duna bida eterno.” (Huan 4:13, 14) Sí, maske Hesus tabata kansá, el a probechá di e oportunidat pa papia ku e señora samaritano tokante e bèrdat ku ta hiba na bida.

E señora a bis’é: “Señor, duna mi e awa ei, pa mi no haña set i pa mi no tin nodi di bini na e lugá akí mas pa saka awa.” Awor ta parse ku Hesus a kambia e kòmbersashon, pasobra el a bisa e señora: “Bai yama bo kasá i boso bini akinan.” E señora a kontest’é: “Mi no tin kasá.” Hesus a bis’é: “Bo tin rason di bisa: ‘Mi no tin kasá.’ Pasobra bo tabatin sinku kasá, i e hòmber ku bo tin aworakí no ta bo kasá.” E muhé samaritano lo a keda di shòk ora el a tende loke Hesus a bisa.—Huan 4:15-18.

El a komprondé bon kla ku Hesus no tabata un hòmber komun i koriente. Asombrá, el a bisa Hesus: “Señor, mi ta ripará ku bo ta un profeta.” I el a bisa Hesus algu ku a mustra ku e tabata interesá den kosnan spiritual. El a bisa: “Nos antepasadonan [e samaritanonan] a adorá Dios riba e seru akí [Seru Gerizim, ku tabata situá djis ei banda], pero boso [e hudiunan] ta bisa ku ta Herúsalèm ta e lugá kaminda hende mester ador’é.”—Huan 4:19, 20.

Hesus a indiká ku e lugá kaminda hende ta adorá Dios no ta importante; Hesus a bis’é: “Lo yega e ora ku ni riba e seru akí ni na Herúsalèm boso lo no adorá e Tata.” Hesus a sigui bisa: “Lo yega e ora, i ta awor, ku e adoradónan berdadero lo adorá e Tata ku spiritu i ku bèrdat, pasobra, en realidat, e Tata ta buska esnan ku ke ador’é asina.”—Huan 4:21, 23, 24.

Sí, loke ta importante pa e Tata ta e manera ku un persona ta ador’é i no e lugá kaminda e persona ta rindi adorashon na dje. E muhé samaritano a keda impreshoná. El a bisa Hesus: “Mi sa ku e Mesías ta bini, esun ku yama Kristu. Ora e yega, lo e deklará tur kos abiertamente na nos.”—Huan 4:25.

Hesus a bis’é: “T’e ta papia ku bo aki,” revelando asina un bèrdat importante na e muhé samaritano. (Huan 4:26) Imaginá bo e esena! Un señora a bin saka awa mèrdia i a haña un maravioso privilegio: Hesus a bis’é bon kla ku ta é ta e Mesías, un bèrdat ku aparentemente e no a revelá na ningun hende ainda.

HOPI SAMARITANO A PONE FE DEN HESUS

Ora Hesus su disipelnan a yega bèk for di Sikar ku kos di kome, nan a haña Hesus na e pos di Yakòb kaminda nan a bai lag’é. Anto e muhé samaritano, ku Hesus tabata papia kuné, a laga su poron di awa einan i a bai den stat.

Ora el a yega den stat, esta Sikar, el a konta e hendenan e kosnan ku Hesus a bis’é. Ku konvikshon el a bisa nan: “Bin mira un hòmber ku a bisa mi tur loke mi a yega di hasi.” I kisas pa lanta nan kuriosidat, el a puntra nan: “Akaso esaki ta Kristu?” (Huan 4:29) Sí, el a hasi un pregunta ku, for di tempu di Moises, hende tabata ke sa su kontesta. (Deuteronomio 18:18) E pregunta sin duda a motivá e hendenan pa nan mes bai wak Hesus.

Mientrastantu, e disipelnan tabata insistí pa Hesus kome e kuminda ku nan a trese. Pero Hesus a bisa nan: “Mi tin kuminda pa kome ku boso no sa di dje.” E disipelnan a keda strañá i a kuminsá puntra otro: “Ningun hende no a trese nada di kome p’e, tòg?” E ora ei, na un manera bondadoso, Hesus a splika nan ku palabranan ku nan tur por a komprondé. I loke el a bisa nan ta importante pa tur su siguidónan. El a bisa: “Mi kuminda ta pa hasi e boluntat di Esun ku a manda mi i kaba e trabou ku el a duna mi pa hasi.”—Huan 4:32-34.

E trabou ku Hesus tabata papia di dje no tabata e trabou di kosechá grano ku lo mester a kuminsá un kuater luna despues. Nò, Hesus tabata referí na e trabou di kosecha spiritual. P’esei, el a bisa nan: “Hisa boso kara wak e kunukunan; nan ta kla pa kosechá. Ya kaba esun ku ta kosechá ta risibí pago i ta rekohé fruta pa bida eterno, di manera ku tantu esun ku ta sembra komo esun ku ta kosechá por alegrá huntu.”—Huan 4:35, 36.

Hesus por a mira kaba ki efekto su enkuentro ku e muhé samaritano tabatin riba otro hende. Sí, hopi habitante di Sikar a pone fe den Hesus debí na e testimonio di e muhé samaritano, kende tabata bisa e hendenan: “El a bisa mi tur loke mi a yega di hasi.” (Huan 4:39) P’esei, ora e hendenan di Sikar a bini serka Hesus na e pos, nan a pidié pa e keda i papia un poko mas ku nan. Hesus a aseptá nan invitashon i a keda dos dia na Samaria.

Komo resultado, hopi hende mas a skucha Hesus i a kere den dje. Nan a bisa e muhé: “Awor nos no ta kere den dje mas djis pa motibu di loke bo a papia, ya ku nos mes a tend’é, i nos sa ku e hòmber akí sigur ta e salbador di mundu.” (Huan 4:42) No tin duda, e manera ku e muhé samaritano a duna testimonio tokante Kristu ta un ekselente ehèmpel pa nos. Nos tambe mester lanta kuriosidat di nos oyentenan di manera ku nan ta haña smak di siña mas.

Awor, kuantu tempu Hesus a keda na Hudea siñando i batisando hende? Kòrda ku tabata falta un kuater luna promé ku kosecha kuminsá—probablemente kosecha di puspas. I den e área ei, esaki tabata kuminsá den lènte. Pues, ora Hesus a ekspresá e palabranan registrá na Huan 4:35 i 36, probablemente tabata novèmber òf desèmber. Esei ta nifiká ku, despues di e Pasku Hudiu di aña 30 di promé siglo, Hesus i su disipelnan lo a keda un ocho luna na Hudea, siñando i batisando hende. Awor, nan a sigui ku nan biahe pa Galilea, rumbo pa kas. Kiko a spera nan einan?