Moises A Skohe pa Adorá Yehova

Na Egipto, hende tabata yama e famianan di Yákòb israelita. Despues ku Yákòb i Yósef a muri, un otro fárao a kuminsá goberná Egipto. E fárao akí tabatin miedu ku e israelitanan lo a bira mas poderoso ku e egipsionan. P’esei, el a hasi tur e israelitanan katibu. El a fòrsa nan traha klenku, i el a fòrsa nan traha masha duru mes den kunuku. Pero mas duru e egipsionan a pone e israelitanan traha, mas hopi e israelitanan tabata bira. Fárao no a gusta esei niun tiki. P’esei, el a manda mata tur e bebinan israelita ku tabata mucha hòmber. Bo por imaginá bo kon spantá e israelitanan lo tabata?

Un señora israelita ku tabata yama Yokabèd tabatin un yu hòmber masha bunita. Pa protehá e yu, Yokabèd a pone su yu den un makutu, i el a pone e makutu meimei di e ritnan di riu Nilo. E bebi tabatin un ruman muhé ku yama Míriam. Míriam a keda para banda di e makutu ku tabatin e bebi aden pa wak kiko lo a pasa.

Ora yu muhé di Fárao a bai baña den riu Nilo, el a mira e makutu. El a habri e makutu, i el a mira e bebi ta yora. El a haña duele di e bebi. Míriam a puntra e yu muhé di Fárao: ‘Bo ke mi bai yama un hende muhé ku por duna e yu pechu pa bo i yuda bo kuid’é?’ E yu muhé di Fárao a bis’é: “Ta bon!” E ora ei, Míriam a yama su mes mama, esta, Yokabèd. Anto yu muhé di Fárao a bisa Yokabèd: “Bai ku e bebi akí, dun’é pechu pa mi i kuid’é, i lo mi paga bo.”

Ora e yu a krese, Yokabèd a hib’é pa e yu muhé di Fárao. E yu muhé di Fárao a adoptá e mucha, i el a yam’é Moises. Moises a lanta manera un prens, i e por a haña tur loke e tabata ke. Pero nunka Moises a lubidá riba Yehova. Moises tabata sa ku, en realidat, ta un israelita e tabata i no un egipsio. Moises a skohe pa sirbi Yehova.

Ora Moises tabatin 40 aña, el a disidí di yuda su pueblo. Ora el a wak un egipsio ta bati un katibu israelita, Moises a dal e egipsio asina duru ku e egipsio a muri. Moises a skonde e kurpa di e egipsio den santu. Ora Fárao a haña sa loke a pasa, el a purba di mata Moises. Pero Moises a hui bai Mádian. Einan, Yehova a kuida Moises.