Yehova A Skohe Hosue

Moises a guia e nashon di Israel pa hopi aña. Nèt promé ku su morto, Yehova a bis’é: ‘Lo bo no hiba e israelitanan den e pais ku mi a primintí di duna nan. Pero lo mi laga bo wak e pais sí.’ Despues, Moises a pidi Yehova skohe un otro hende ku lo a kuida i dirigí e hendenan. Yehova a bisa Moises: ‘Laga Hosue bini serka bo, i bis’é ku ta e ta esun ku lo kuida i dirigí e hendenan.’

Ora Moises tabata serka di muri, el a bisa e israelitanan ku Yehova a skohe Hosue pa dirigí nan i yuda nan drenta e Tera Primintí. Moises a bisa Hosue: ‘No tene miedu. Yehova lo yuda bo.’ Despues, Moises a subi seru Nebo i bai te na tòp dje seru. Einan, Yehova a mustra Moises e pais ku Yehova a primintí di duna Ábraham, Ísak i Yákòb. Anto Moises a muri. E tabatin 120 aña ora el a muri.

Yehova a bisa Hosue: ‘Krusa riu Yordan, i drenta Kánan. Lo mi yuda bo, meskos ku mi a yuda Moises. Bo mester lesa mi leinan tur dia. No tene miedu. Bo mester tin kurashi, i hasi loke mi a bisa bo pa hasi.’

Hosue a manda dos spion bai e stat ku tabata yama Yériko. Den e siguiente lès, nos lo mira kiko a pasa einan. Ora e spionnan a bini bèk serka Hosue, nan a laga Hosue sa ku tabata un bon tempu pa drenta Kánan. E siguiente dia, Hosue a bisa e israelitanan pa nan desharmá nan tèntnan i prepará pa bai. Anto el a bisa e saserdotenan ku tabata karga e arka di pakto pa nan pasa bai dilanti di e hendenan i bai na riu Yordan. Awa di e riu tabata hopi haltu. Pero asina ku e saserdotenan a hinka nan pia den e awa, e riu a stòp di kore, i e riu a seka. E saserdotenan a kana bai meimei di e riu, i nan a keda para einan te ora tur e hendenan a kaba di krusa e riu i yega na e otro banda. E milager ei lo mester a laga nan kòrda riba loke Yehova a hasi na Laman Kòrá.

Finalmente, despues di hopi aña, e israelitanan a drenta e Tera Primintí. Nan por a traha kas i lanta hopi stat. Nan por a planta mata den kunuku; nan por a planta drùif i otro palu di fruta den hòfi. E pais tabata produsí lechi i stropi.