Yehova A Duna Sámsòn Forsa

Hopi israelita a bolbe adorá dios falsu. P’esei, Yehova a laga e israelitanan sufri na man di e filisteonan. Pero algun israelita tabata stima Yehova. Manoa tabata un di nan. Manoa ku su kasá no tabatin yu. Un dia, Yehova a manda un angel serka Manoa su kasá. Anto e angel a bis’é: ‘Lo bo haña un yu hòmber. E lo libra e israelitanan for di e filisteonan. E yu ei lo ta un nazareo.’ Bo sa ken e nazareonan tabata? Nan tabata sirbi Yehova na un manera spesial, i nan no tabatin mag di kòrta nan kabei.

Manoa ku su kasá a haña un yu hòmber, i nan a yam’é Sámsòn. Yehova a laga Sámsòn bira masha fuerte mes. E por a mata un leon ku su mannan so. Un biaha, el a mata 30 filisteo sin yudansa di otro hende. P’esei, e filisteonan tabata odi’é i nan tabata buska manera pa mat’é. Un anochi Sámsòn tabata na un stat ku yama Gaza. Ora Sámsòn tabata drumí, e filisteonan a bai na e porta di e stat i nan ward’é einan pa nan mat’é ora mainta habri. Pero meianochi Sámsòn a lanta i bai na porta di e stat. El a ranka e portanan for di e muraya, karga e portanan riba su skouder i kana bai te na tòp di un seru serka di Hébròn!

E filisteonan a sigui buska Sámsòn problema. Nan a bai serka Sámsòn su mucha muhé, Dalila, i nan a bisa Dalila: ‘Nos lo paga bo 5.500 pida plata si bo haña sa dikon Sámsòn tin asina tantu forsa. Nos ke hink’é den prizòn.’ Dalila kier a haña e sèn; p’esei, el a hasi loke nan a bis’é. Promé, Sámsòn no kier a bisa Dalila nada. Pero Dalila a keda puntra Sámsòn dikon e tin asina tantu forsa te ora Sámsòn a fada. E ora ei, Sámsòn a bisa Dalila kiko ta su sekreto: ‘Nunka nan no a kòrta mi kabei pasobra mi ta un nazareo, i si nan kòrta mi kabei lo mi pèrdè mi forsa.’ Esta bobo ku Sámsòn a konta Dalila su sekreto!

Mesora Dalila a bai bisa e filisteonan: ‘M’a haña sa su sekreto!’ Despues, Dalila a laga Sámsòn pega soño den su skochi, anto el a laga un hende kòrta Sámsòn su kabei. Dalila a grita: ‘Sámsòn, e filisteonan ta akinan!’ Sámsòn a lanta for di soño, pero e no tabatin forsa mas. E filisteonan a gar’é, hasié siegu i tir’é den prizòn.

Un dia, e filisteonan a bini huntu pa adorá nan dios Dagon, i nan a grita: ‘Nos dios a yuda nos gara Sámsòn! Trese Sámsòn pafó pa nos harié!’ Nan a pone Sámsòn para meimei di dos pilá i nan a hasi bofon di dje. Anto Sámsòn a bisa ku un stèm fuerte: ‘O Yehova, por fabor, duna mi forsa un biaha mas.’ E tempu ei ya Sámsòn su kabei a bolbe krese bèk. El a pusha e pilánan ku tur su forsa i henter e edifisio a basha den otro. Tur hende den e tèmpel a muri, i Sámsòn tambe.