David i Góliat

Yehova a bisa Sámuèl: ‘Bai na e kas di Isaí. Un di su yu hòmbernan lo ta e siguiente rei di Israel.’ Pues, Sámuèl a bai kas di Isaí. Ora ku Sámuèl a mira e yu mas grandi, el a pensa: ‘E mucha hòmber akí lo mester ta esun.’ Pero, Yehova a bisa Sámuèl ku no ta e mucha hòmber akí el a skohe. Yehova a bisa: ‘Ami ta wak kurason, mi no ta wak loke un persona ta di pafó.’

Isaí a trese su seis otro yu hòmbernan pa Sámuèl. Pero, Sámuèl a bisa: ‘Yehova no a skohe niun di nan. Bo tin mas yu hòmber?’ Isaí a kontestá: ‘Mi tin un yu hòmber mas, esun mas chikitu, David. E ta kuidando e karnénan.’ Ora David a yega, Yehova a bisa Sámuèl: “Ta e mi a skohe.” Sámuèl a basha zeta riba David su kabes, i el a ungié komo e futuro rei di Israel.

Algun tempu despues, e israelitanan tabata bringa kontra e filisteonan. E filisteonan tabatin un guerero gigante ku tabata bringa pa nan. Su nòmber tabata Góliat. Tur dia, Góliat tabata hasi bofon di e israelitanan. E tabata grita: ‘Manda un hòmber pa bin bringa kontra mi. Si e gana, nos lo bira boso esklabo. Pero, si ami gana, boso lo bira nos esklabo.’

David a hiba kuminda na e kampamentu di e israelitanan pa su ruman hòmbernan. David a tende loke Góliat tabata bisa. Anto David a bisa: ‘Ami lo bai bringa kontra dje!’ Rei Saul a bisa: ‘Pero, bo ta mucha ainda.’ David a kontestá: ‘Yehova lo yuda mi.’

Saul tabata ke pa David bisti e armadura ku el a dun’é, pero David a bisa: ‘Mi no por bringa ku e kosnan akí bistí na mi kurpa.’ David a kohe su slenger, i el a bai na un riu. El a piki sinku piedra lizu, i el a hinka nan den su tas. Despues, el a bai bringa kontra Góliat. E gigante tabata grita: ‘Bini aki mucha. Bini pa mi laga e paranan di shelu i e bestianan di mondi kome bo karni.’ David no tabatin miedu. El a kontestá: ‘Abo ta bin bringa kontra mi ku spada i sper. Pero ami ta bin bringa den nòmber di Yehova. Bo no ta bringando kontra nos; bo ta bringando kontra Dios. Tur hende akinan lo mira ku Yehova tin mas poder ku un spada òf ku un sper. Lo e entregá boso tur den nos man.’

David a pone un piedra den su slenger, i el a zuai e slenger mas duru ku e tabata por. Ku yudansa di Yehova, e piedra a dal Góliat den su frenta. E gigante a kai abou i muri. Anto e filisteonan a kore limpi bai. Abo ta konfia den Yehova meskos ku David?