Yónatan Tabatin Kurashi i E Tabata Leal

Yónatan, e yu mayó di Rei Saul, tabata un guerero ku kurashi. David a bisa ku Yónatan tabata mas lihé ku un águila i mas fuerte ku un leon. Un dia, Yónatan a mira 20 sòldá filisteo riba un seru. El a bisa su kargadó di arma: ‘Nos lo ataká nan solamente si Yehova duna nos un señal. Si nan bisa nos subi bini, nos lo sa ku nos mester ataká nan.’ E filisteonan a grita: ‘Subi bini serka nos pa nos bringa!’ Pues, e dos hòmbernan a subi e seru i vense e sòldánan.

Yónatan tabata e yu hòmber mayó di Saul, pues ta e mester a bira e siguiente rei. Pero Yónatan tabata sa ku Yehova a skohe David pa bira e siguiente rei di Israel. P’esei, e no tabata yalurs. Yónatan i David a bira bon amigu. Nan a primintí otro ku nan lo protehá i defendé otro. Yónatan a duna David su mes mantel, spada, bog i faha pa mustra ku nan tabata bon amigu.

Ora David tabata hui for di Saul, Yónatan a bai serka David i bis’é: ‘Sea fuerte i tene kurashi. Yehova a skohe abo pa bira rei. Asta mi tata sa esei bon bon.’ Lo bo ke tin un bon amigu manera Yónatan?

Yónatan a riska su bida vários biaha pa yuda su amigu. E tabata sa ku Rei Saul tabata ke mata David. Pues, el a bisa su tata: ‘Lo ta un piká pa mata David, pasobra e no a hasi bo nada.’ Saul tabata masha rabiá ku Yónatan. Algun aña despues, Saul i Yónatan a muri huntu den bataya.

Despues ku Yónatan a muri, David a bai buska Mefíbosèt, yu hòmber di Yónatan. Ora David a hañ’é, el a bis’é: ‘Komo ku bo tata tabata un bon amigu di mi, lo mi sòru pa bo pa restu di bo bida. Lo bo biba den mi palasio i kome na mi mesa.’ David nunka a lubidá su amigu Yónatan.