Un Tèmpel pa Yehova

Despues ku Sálomon a bira rei di Israel, Yehova a bis’é: ‘Kiko bo ke pa mi duna bo?’ Sálomon a bisa: ‘Mi ta yòn i sin eksperensia. Por fabor, duna mi sabiduria pa mi por kuida bo pueblo.’ Yehova a bisa: ‘Pasobra bo a pidi pa bo bira sabí, lo mi hasi bo e persona di mas sabí riba tera. I tambe lo mi hasi bo masha riku. I si bo obedesé mi, lo bo biba largu.’

Sálomon a kuminsá traha e tèmpel. El a usa e mihó oro, plata, palu i piedra. Míles di hòmber i muhé eksperto a traha riba e tèmpel. Despues di shete aña, e tèmpel a keda kla i el a dedik’é na Yehova. Tabatin un altar i riba di e tabata pone sakrifisio. Sálomon a hinka rudia dilanti di e altar, i el a resa: ‘O Yehova, e tèmpel akí no ta sufisientemente grandi ni sufisientemente bunita pa bo, pero, por fabor, aseptá nos adorashon i skucha nos orashonnan.’ Kiko Yehova a pensa di e tèmpel i kon el a haña e orashon di Sálomon? Asina ku Sálomon a kaba di hasi orashon, kandela a baha for di shelu i kima e sakrifisionan ku tabatin riba e altar. Di e manera ei, Yehova a mustra ku el a gusta e tèmpel. Ora e israelitanan a mira esei, nan a bira masha kontentu.

Rei Sálomon tabata masha sabí. P’esei, el a bira famoso den henter Israel i asta na e lugánan mas leu. E hendenan tabata bai serka Sálomon pa e yuda nan ku nan problemanan. Asta e reina di Saba a bini serka dje pa hasié pregunta difísil. Ora e reina di Saba a tende su kontestanan, el a bisa: ‘Mi no a kere loke hende a konta mi di bo, pero awor mi ta mira ku bo ta mas sabí di loke nan a bisa mi. Bo Dios, Yehova, a bendishoná bo.’ E pueblo di Israel tabata biba bon i nan tabata felis. Pero, un djis nan situashon lo a kambia.