LÈS 03
Bo Por Konfia Loke Beibel Ta Bisa?
Den Beibel, nos ta haña vários promesa i hopi konseho. Kisas bo ta masha kurioso pa sa loke Beibel ta siña, pero na mes momento bo ta duda si loke Beibel ta bisa ta bèrdat. Kisas bo ta puntra bo mes: ‘Komo ku Beibel ta un buki asina bieu, mi por konfia su promesanan i su konsehonan? Di bèrdat mi por kere ku loke Beibel ta bisa ta práktiko den nos tempu? Di bèrdat mi por konfia loke Beibel ta bisa tokante futuro?’ Miónes di hende ta kere ku sí. Nos ke animá bo pa investigá esei pa bo mes.
1. E susesonan ku Beibel ta relatá a tuma lugá di bèrdat?
Beibel ta bisa ku su ‘palabranan ta bèrdat i eksakto.’ (Eklesiástes 12:10) E susesonan ku Beibel ta relatá a sosodé di bèrdat. Ademas, e relatonan ei ta hasi menshon di hende ku realmente a eksistí. (Lesa Lukas 1:3 i 3:1, 2.) Hopi historiadó i arkeólogo a konfirmá ku e detayenan ku Beibel ta menshoná relashoná ku fecha, hende, lugá i suseso ta eksakto.
2. Dikon bo por konfia loke tin den Beibel apesar ku e ta un buki bieu?
Hopi biaha, Beibel ta hasi menshon di detaye ku hende no tabata sa di dje tempu ku Beibel a ser skirbí. Por ehèmpel, Beibel ta menshoná vários kos ku e sientífikonan a deskubrí den nos tempu. Tempu ku Beibel a ser skirbí, mayoria di hende no tabata kere loke Beibel tabata bisa tokante e kosnan ei. Pero loke e sientífikonan a deskubrí ta konfirmá ku loke Beibel ta bisa ta eksakto. Sí, loke Beibel ta bisa “ta konfiabel, awor i pa semper.”—Salmo 111:8.
3. Dikon nos por konfia loke Beibel ta bisa tokante futuro?
Den Beibel, tin profesiaa ku ta papia tokante “kos ku no a sosodé ainda.” (Isaías 46:10) Ku eksaktitut, Beibel a menshoná vários suseso hopi tempu promé ku nan a tuma lugá. Ademas, Beibel a deskribí en detaye kon situashon di mundu lo ta den nos tempu. Den e lès akí, nos lo analisá algun profesia ku tin den Beibel. E manera eksakto ku e profesianan akí a ser skirbí ta fasinante!
KIKO MAS NOS POR SIÑA?
Laga nos analisá kon Beibel ta kuadra ku loke e sientífikonan a deskubrí den nos tempu i laga nos analisá algun profesia impreshonante ku tin den Beibel.
4. Beibel ta kuadra ku siensia
Den antigwedat, mayoria di hende tabata kere ku tabatin algu ta tene mundu na su lugá. Pasa e VIDIO.
Tuma nota loke e buki di Yòb a bisa mas o ménos 3.500 aña pasá. Lesa Yòb 26:7. Despues, analisá e siguiente pregunta:
Dikon loke Beibel ta bisa aki, esta, ku “no tin nada” ta wanta tera, ta remarkabel?
Beibel ta papia di e siklo di awa. E siklo di awa ta ora solo evaporá awa for di laman, i e awa akí ta kai bèk riba tera den forma di áwaseru. E awa ku kai ta bolbe bai laman. Ta mas o ménos 200 aña pasá numa hende a kuminsá komprondé kon e siklo di awa akí ta funshoná. Pero tuma nota loke Beibel a bisa míles di aña pasá. Lesa Yòb 36:27, 28 i Eklesiástes 1:7. Despues, analisá e siguiente preguntanan:
Dikon e deskripshonnan akí di e manera ku e siklo di awa ta funshoná ta impreshonante?
E tekstonan ku bo a kaba di lesa ta yuda bo haña mas konfiansa den Beibel?
5. Beibel a profetisá suseso importante
Lesa Isaías 44:27–45:2. Despues, analisá e siguiente pregunta:
Ki detaye Beibel a duna 200 aña promé ku kaida di e stat Babilonia?
Historia ta konfirmá ku Rei Siro di Pèrsia huntu ku su ehérsito a konkistá e stat Babilonia na aña 539 promé ku Kristu. Nan a desviá e awanan di e riu ku tabata protehá e stat. Despues ku Siro i su ehérsito a drenta e stat via e portanan ku a keda habrí, nan a konkistá e stat sin ku nan mester a bringa. Awe, mas ku 2.500 aña despues, e stat Babilonia ainda ta un ruina. Awor, laga nos wak kiko Beibel a profetisá tokante esei.
Lesa Isaías 13:19, 20. Despues, analisá e siguiente pregunta:
Kon e profesia akí a kumpli?
E ruinanan di e stat Babilonia na Irak
6. Beibel a profetisá kon situashon di mundu lo ta den nos tempu
Beibel ta referí na e tempu ku nos ta biba aden komo “e último dianan.” (2 Timoteo 3:1) Tuma nota loke Beibel a profetisá tokante e último dianan.
Lesa Mateo 24:6, 7. Despues, analisá e siguiente pregunta:
Kon Beibel ta deskribí e último dianan?
Lesa 2 Timoteo 3:1-5. Despues, analisá e siguiente preguntanan:
Segun Beibel, kon aktitut di mayoria di hende lo ta den e último dianan?
Kua di e karakterístikanan akí bo ta mira den hende rònt di bo awe?
LOKE HENDE SA BISA: “Beibel ta un buki di kuenta i leyenda.”
Ki evidensia ta konvensé abo ku Beibel ta un buki konfiabel?
RESÚMEN
Historia, siensia i profesia ta mustra ku bo por konfia Beibel.
Repaso
E susesonan ku Beibel ta relatá a tuma lugá di bèrdat?
Kon Beibel ta kuadra ku siensia?
Bo ta kere ku Beibel ta revelá loke ta bai pasa den futuro? Dikon bo ta kere esei?
MAS INFORMASHON INTERESANTE
Beibel ta eksakto ora ta trata di asuntu sientífiko?
Kiko lo sosodé den “e último dianan”?
“6 Profesia Bíbliko Ku Ta Kumpliendo” (E Toren di Vigilansia di 1 di yüni 2011)
Wak kon profesia di Beibel tokante e Imperio Griego a kumpli.
Wak kon un hòmber su punto di bista tokante Beibel a kambia despues ku el a analisá profesia di Beibel.
“Pa Ami, Dios No Tabata Eksistí” (E Toren di Vigilansia Num. 5 2017)
a Profesia ta mensahe di Dios tokante suseso di futuro.