Kiko e Reino di Dios Ta?

E Reino di Dios ta e tema prinsipal di Beibel. Yehova lo usa e Reino ei pa kumpli ku e propósito ku e tabatin for di prinsipio pa tera, esta, pa hasi tera un paradeis. Kiko e Reino di Dios ta? Kon nos por sa ku e ta gobernando kaba? Kiko e Reino ei a logra i kiko lo e hasi den futuro? Den e lès akí i e siguiente dos lèsnan, nos lo haña kontesta pa e preguntanan ei.

1. Kiko e Reino di Dios ta, i ken ta Rei di e Reino ei?

E Reino di Dios ta un gobièrnu ku Yehova Dios mes a forma. Hesukristu ta Rei di e Reino ei i e ta goberná for di shelu. (Mateo 4:17; Huan 18:36) Beibel ta bisa tokante Hesus: “Lo e reina komo Rei pa semper.” (Lukas 1:32, 33) Komo Rei di e Reino di Dios, Hesus lo goberná tur hende riba tera.

2. Ken lo goberná huntu ku Hesus?

Hesus lo no goberná su so. Hende for di ‘tur tribu, idioma, pueblo i nashon lo ta rei i lo goberná tera’ huntu ku Hesus. (Revelashon 5:9, 10) For di tempu ku Hesus a bini na tera, miónes di hende a bira su siguidó. Ta nan tur lo goberná huntu kuné? Nò. Di tur e siguidónan di Hesus, ta solamente 144.000 persona lo bai shelu pa goberná huntu kuné. (Lesa Revelashon 14:1-4.) Tur e otro siguidónan di Hesus lo biba riba tera bou di e Reino di Dios.—Salmo 37:29.

3. Dikon e Reino di Dios ta mihó ku gobernashon humano?

Asta ora un gobernante humano ke hasi bon, su poder ta limitá i e no por hasi tur loke e ta deseá. Ademas, e gobernantenan ku bini despues di dje, kisas ta egoista i no ke yuda e pueblo. Pero, niun persona lo no remplasá Hesus komo Gobernante di e Reino di Dios. Dios a “lanta un reino ku nunka lo ser destruí.” (Dánièl 2:44) Hesus lo goberná henter tera i lo e no mustra faboritismo, esta, lo e no trata algun hende mihó ku otro. E ta un gobernante amoroso, bondadoso i hustu i lo e siña hende pa trata otro meskos, esta, ku amor, bondat i hustisia.—Lesa Isaías 11:9.

4. Un gobièrnu poderoso lo goberná henter tera

Hesukristu tin mas outoridat pa goberná ku kualke gobernante den historia. Lesa Mateo 28:18. Despues, analisá e siguiente pregunta:

• Kiko ta e diferensia entre Hesus su outoridat pa goberná i esun di gobernante humano?

Ta masha normal ku un gobièrnu ta bai i un otro ta bini. Ademas, kada gobièrnu ta goberná un parti di mundu. Awor, kiko di e Reino di Dios? Lesa Dánièl 7:14. Despues, analisá e siguiente preguntanan:

• Dikon ta bon ku e Reino di Dios “lo no ser destruí”?

• Dikon ta bon ku lo e goberná henter tera?

5. E Reino di Dios mester remplasá tur gobièrnu humano

Dikon e Reino di Dios mester remplasá gobernashon humano? Pasa e VIDIO. Despues, analisá e siguiente pregunta:

VIDIO: Kiko e Reino di Dios Ta?—Fragmento (1:41)

• Kiko ta e konsekuensianan di gobernashon humano?

Lesa Eklesiástes 8:9. Despues, analisá e siguiente preguntanan:

• Abo ta pensa ku e Reino di Dios mester remplasá gobernashon humano? Dikon bo ta pensa esei?

6. E gobernantenan di e Reino di Dios ta komprondé kon nos ta sinti

Komo ku nos Rei Hesus a biba komo hende, e por “tene kompashon ku nos debilidatnan.” (Hebreonan 4:15) Yehova a skohe 144.000 hòmber i muhé fiel pa goberná huntu ku Hesus. Nan ta bini “for di tur tribu, idioma, pueblo i nashon.”—Revelashon 5:9.

• Awor ku bo sa ku Hesus i tur esnan ku lo goberná huntu kuné a biba komo hende riba tera, kon esei ta laga bo sinti? Dikon?

7. E leinan di e Reino di Dios ta mihó ku e leinan di gobièrnu humano

Por lo general, gobièrnu ta traha lei pa yuda i protehá su pueblo. E Reino di Dios tambe tin lei pa hende ku lo biba bou di su gobernashon. Lesa 1 Korintionan 6:9-11. Despues, analisá e siguiente preguntanan:

• Kon bo ta kere mundu lo ta ora tur hende ta obedesé e leinan di Dios?a

• Bo ta kere ta bon ku Yehova ta ferwagt pa hende ku ta biba bou di su Reino obedesé su leinan? Dikon bo ta pensa asina?

• Kiko ta mustra ku hende ku no ta obedesé e leinan akí por kambia?—Wak versíkulo 11.

RESÚMEN

E Reino di Dios ta un gobièrnu real den shelu ku lo goberná henter tera.

Repaso

• Ken ta e gobernantenan di e Reino di Dios?

• Dikon e Reino di Dios ta mihó ku kualke gobièrnu riba tera?

• Kiko Yehova ta spera di hende ku lo biba bou di su gobernashon?

MAS INFORMASHON INTERESANTE

Unda Hesus a bisa ku e Reino di Dios ta?

“E Reino di Dios Ta Algu den Bo Kurason?” (artíkulo na spañó riba jw.org)

Dikon Testigunan di Yehova ta pensa ku ta mas importante pa nan keda leal na e Reino di Dios ku na gobièrnu humano?

Nan Tabata Leal na e Reino di Dios (1:43)

Wak kiko Beibel ta bisa tokante e 144.000 personanan ku Yehova a skohe pa goberná huntu ku Hesus.

“Ken Ta Bai Shelu?” (artíkulo riba jw.org)

Kiko a konvensé un señora ku tabata den prizòn ku ta Dios so por trese hustisia na mundu?

“Mi A Haña Sa Ken Lo Kaba ku Inhustisia” (Spièrta! di novèmber 2011, na spañó)