LÈS 54

Ken Ta “e Esklabo Fiel i Prudente” i Kiko E Ta Hasi?

Edishon Imprimí

Hesus ta Kabes di e kongregashon kristian. (Efesionan 5:23) Hesus, komo Rei den shelu, ta usa “e esklabo fiel i prudente” pa guia su siguidónan riba tera. (Lesa Mateo 24:45.) Hesukristu mes a nombra “e esklabo” ei i a dun’é un grado di outoridat. Aunke “e esklabo” ei a haña un grado di outoridat, e mester obedesé Kristu i sirbi e rumannan di Kristu. Ken e esklabo ei ta? Den ki manera e esklabo ei ta pèrkurá pa nos?

1. Ken ta “e esklabo fiel i prudente”?

Semper Yehova a usa un hende hòmber òf un grupo chikitu di hende hòmber pa guia su pueblo. (Malakías 2:7; Hebreonan 1:1) Despues di morto di Hesus, e apòstelnan i e ansianonan na Herúsalèm tabata guia e kongregashon. (Echonan 15:2) Awe, di mes manera, un grupo chikitu di ansiano ta guia e kongregashon kristian. Nan ta ser yamá Kuerpo Gobernante di Testigunan di Yehova. Nan ta pèrkurá kuminda spiritual i ta dirigí e trabou di prediká. E grupo akí ta “e esklabo fiel i prudente ku [Hesus] a nombra.” (Mateo 24:45a) Tur e miembronan di Kuerpo Gobernante ta kristian ku a ser ungí ku spiritu santu. Nan ta warda riba e tempu ku nan lo goberná ku Hesus den su Reino selestial ora nan bida aki riba tera kaba.

2. Ki kuminda spiritual e esklabo fiel ta pèrkurá pa nos?

E esklabo fiel lo “duna nan [esta, e rumannan kristian] nan kuminda na e debido tempu,” manera Hesus a bisa. (Mateo 24:45b) Kuminda ta yuda nos kurpa keda fuerte i salú. Di mes manera, kuminda spiritual, esta, instrukshon for di Palabra di Dios, ta duna nos e forsa ku nos mester pa keda leal na Yehova i hasi e trabou ku Hesus a duna nos. (1 Timoteo 4:6) Nos ta haña e kuminda spiritual ei pa medio di nos reunionnan, asambleanan, kongresonan, publikashon basá riba Beibel i vidio. Tur esakinan ta yuda nos komprondé Dios su boluntat i yuda nos fortalesé nos amistat kuné.

KIKO MAS NOS POR SIÑA?

Wak dikon nos tin mester di “e esklabo fiel i prudente,” esta, Kuerpo Gobernante.

Kolekshon di plachi: Testigunan di Yehova di rònt mundu ta haña instrukshon i ta sigui guia di Kuerpo Gobernante. 1. Un famia ta wak JW Broadcasting huntu. 2. Algun Testigu di Yehova ku ta traha komo boluntario pa duna ousilio ta pone algun produkto den un trùk. 3. Dos Testigu di Yehova ta prediká na un stènt di literatura. 4. Un ansiano ta lesa un karta na un reunion di kongregashon. — Kuerpo Gobernante ta pèrkurá kuminda spiritual, instrukshon i yudansa práktiko pa Testigunan di Yehova rònt mundu

3. E pueblo di Yehova mester ta organisá

Kuerpo Gobernante ta haña guia di Hesus pa sa kon nan mester organisá e trabou di Testigunan di Yehova. Hesus a guia e promé kristiannan na un manera similar. Pasa e VIDIO.

VIDIO: Yehova Ta Organisá Su Pueblo (6:18)

Lesa 1 Korintionan 14:33, 40. Despues, analisá e siguiente pregunta:

Kon e teksto akí ta mustra ku Yehova ke pa su Testigunan ta organisá?

4. E esklabo fiel ta organisá nos trabou di prediká

E trabou di prediká tabata e trabou di mas importante ku e kristiannan di promé siglo a hasi. Lesa Echonan 8:14, 25. Despues, analisá e siguiente preguntanan:

Den tempu di e kristiannan di promé siglo, ken a dirigí e trabou di prediká?
Ora Pedro ku Huan a haña instrukshon serka e otro apòstelnan, kiko nan a hasi?

E trabou di prediká ta e trabou di mas importante ku Kuerpo Gobernante ta organisá. Pasa e VIDIO.

VIDIO: Enfoká Riba e Trabou di Prediká (1:24)

Hesus a mustra kon importante e trabou di prediká ta. Lesa Marko 13:10. Despues, analisá e siguiente preguntanan:

Dikon Kuerpo Gobernante ta haña e trabou di prediká asina importante?
Dikon ta nesesario pa “e esklabo fiel i prudente” organisá e trabou akí ku ta tuma lugá rònt mundu?

5. E esklabo fiel ta guia nos

Kuerpo Gobernante ta guia e kristiannan rònt mundu. Kon nan ta disidí ki instrukshon nan tin ku duna? Wak kon e kuerpo gobernante di e kristiannan di promé siglo a hasi esei. Lesa Echonan 15:1, 2. Despues, analisá e siguiente preguntanan:

Ki desakuerdo algun kristian di promé siglo tabatin?
Serka ken Pablo, Bárnabas i algun otro kristian a bai pa resolvé e desakuerdo akí?

Lesa Echonan 15:12-18, 23-29. Despues, analisá e siguiente pregunta:

Promé ku e kuerpo gobernante di promé siglo a tuma un desishon, kon nan a buska Dios su guia tokante e asuntu ei?—Wak versíkulo 12, 15 i 28.

Lesa Echonan 15:30, 31 i 16:4, 5. Despues, analisá e siguiente preguntanan:

Kiko e kristiannan di promé siglo a hasi ora nan a haña instrukshon for di kuerpo gobernante?
Kon Yehova a bendishoná e kristiannan di promé siglo pa nan obedensia?

Lesa 2 Timoteo 3:16 i Santiago 1:5. Despues, analisá e siguiente pregunta:

Ora di tuma desishon, unda Kuerpo Gobernante ta buska guia awe?

LOKE HENDE SA BISA: “Si bo hasi loke Kuerpo Gobernante ta bisa, ta hende bo ta sigui.”

Kiko ta konvensé abo ku Hesus ta guia Kuerpo Gobernante?

RESÚMEN

Kuerpo Gobernante ta “e esklabo fiel i prudente” ku Kristu a nombra. E esklabo ei ta duna e kristiannan rònt mundu instrukshon i kuminda spiritual.

Repaso

Ken a nombra “e esklabo fiel i prudente”?
Kon Kuerpo Gobernante ta pèrkurá pa nos?
Bo ta konvensí ku Kuerpo Gobernante ta “e esklabo fiel i prudente”?

A kompletá e lès akí dia:

Meta

Na armonia ku 2 Tesalonisensenan 3:1, hasi orashon regularmente pa Yehova bendishoná e trabou ku Kuerpo Gobernante ta hasi.

Otro meta:

Your other goal

MAS INFORMASHON INTERESANTE

Wak kon Kuerpo Gobernante ta organisá pa kumpli ku nan trabou.

“Kiko Ta Kuerpo Gobernante di Testigunan di Yehova?” (artíkulo riba jw.org)

Wak kon Kuerpo Gobernante ta hasi sigur ku nos ta haña kuminda spiritual ku ta konfiabel.

Produkshon di Literatura Eksakto (17:17)

Kiko e miembronan di Kuerpo Gobernante ta pensa tokante e trabou ku Hesus a duna nan pa hasi?

Nos Tin un Bunita Privilegio (na spañó) (7:09)

Kon nos reunion- i kongresonan ta mustra ku Yehova ta dirigí Kuerpo Gobernante?

Yehova Ta Siña Su Pueblo (9:39)