Tene Mashá Presente e Dia di Jehova

“E dia di Jehova ta cerca den e sabana abao di decision.”—JOËL 3:14.

“BOSO proclama esaki den e nacionan, ‘Santifica gera!’” (Joël 3:9) Esei kier men un gera santo? Si nos ta corda Cruzada, gera religioso, i e dos gera mundial—den locual cristiandad a hunga e papel principal—e idea di un gera “santo” por hácinos tembla. Sin embargo, e gera santo dje profecía di Joël no ta un gera entre e nacionan. Esei no ta un lucha yen di odio pa obtene territorio of posesion, usando religion como un frente. Esei ta un gera husto. Esei ta e gera di Dios pa libra e planeta aki di golosidad, contencion, corrupcion, i opresion. Esei lo vindica e bon gobernacion di Jehova Dios como Soberano riba tur e dominio di su creacion. E gera ei lo habri camina pe Reino di Cristo introduci humanidad den e mil aña di paz, prosperidad, i felicidad universal cu profeta di Dios a profetiza.—Salmo 37:9-11; Isaías 65:17, 18; Revelacion 20:6.

² Kico, anto ta e “dia di Jehova” profetizá den Joël 3:14? Jehova mes a sclama: “Ai dje dia ei, pasobra e dia di Jehova ta cerca, i lo e bini manera un plundermento violento for dje Todopoderoso!” Di ki manera esei tabata un plundermento violento? E profeta a splica despues: “Multitud, multitud ta den e sabana abao di decision, pasobra e dia di Jehova ta cerca ne sabana abao di decision.” (Joël 1:15; 3:14) Esei ta e dia riba locual Jehova Dios ta ehecuta su decision hudicial riba multitud di hende malbado cu ta rechaza e husticia di su soberanía riba cielo i tera. E decision di Jehova Dios ta di plunder e sistema satánico di cosnan cu pa tanto tempo a mantene su gara riba humanidad cu su tengla.—Jeremías 17:5-7; 25:31-33.

³ E sistema corrupto riba tera tin cu enfrenta tal decision. Pero, e sistema di mundo realmente ta asina malu? Un bista so di su pasado mester ta suficiente! Jesús a declara e principio den Mateo 7:16: “Via nan fruta boso por reconocénan.” Stad grandi di mundo no a bira centro di corrupcion di droga, crimen, terror, inmoralidad, i contaminacion? Den hopi país libertad alcanzá recientemente ta ser sofocá pa confusion político, scarcidad di cuminda, i pobreza. Mas cu mil miyón hende ta muri di hamber. Además, epidemia di AIDS, cu droga i moda di biba inmoral a produci, ta tira un sombra scur riba un parti grandi di mundo. Specialmente desde e principio di ripiente di Gera Mundial I na 1914, tabatin un degradacion di tur aspecto di bida na un escala mundial.—Compara cu 2 Timoteo 3:1-5.

⁴ No obstante, Jehova Dios ta recoge for di tur nacion un pueblo cu mucho gusto ta recibi instruccion tocante su camina i ta camna den su berea. Tal pueblo di alcance mundial a bati nan spada na ploeg, i a rechaza e camina violento di mundo. (Isaías 2:2-4) Sí, a bati nan spada na ploeg! Pero, esei no ta net contrario cu e proclamacion cu Jehova a inspirá den Joël 3:9, 10? Nos ta leza ei: “Boso proclama esaki den e nacionan, ‘Santifica gera! Lanta e hombernan fuerte! Láganan hala cerca! Láganan subi, tur homber di gera! Bati boso ploeg na spada i boso chapi na lanza.’” Sí, asina Jehova ta reta gobernante di mundo pa trece nan forza armá combiná contra dje den Armagedón. Pero, nan no por triunfa! Nan mester baha den derota total!—Revelacion 16:16.

⁵ Den oposicion abierto cu Señor Soberano Jehova, gobernante poderoso a produci un surtido di arma spantoso—pero en bano! Jehova ta duna ordu den Joël 3:13: “Hinca e machete, pasobra e cosecha a hecha. Bin, baha, pasobra e baki di pers biña a yena. Baki di biña realmente ta pasa over; pasobra nan maldad a bira abundante.” E palabra ta corresponde cu Revelacion 14:18-20, unda un angel cu tin un machete skerpi ta ser mandá pa “recoge troshi di wijndruif dje tera, pasobra su druif a hecha.” E angel ta hinca su machete i ta tira tal nacion opositor “den e baki grandi di pers biña dje rabia di Dios.” Simbólicamente, sanger ta sali for dje baki tanto halto como freno di cabai, pa un distancia di 1.600 estadio—rond di 300 kilometer! Ki un prospecto spantoso pe nacionan cu ta desonra Jehova Dios!

Ciudadano Obediente ne Ley

⁶ Esei kier men cu Testigo di Jehova no ta respeta e nacionan i nan gobernante? Leu di dje! Nan simplemente ta deplora e corrupcion cu ta keda bisto pa tur hende mira, i nan ta duna advertencia dje dia di Jehova pa ehecuta su decision cu ta yegando lihé. Ne mesun tempo, nan humildemente ta obedece e mandamento di apóstol Pablo den Romano 13:1: “Laga tur alma keda sumiso na autoridad superior.” Nan ta rindi e debido onor na tal gobernante humano, pero no ta adoránan. Como ciudadano obediente ne ley, nan ta sigi ley bíblico pa ser onrado, papia e berdad, i ser limpi i inculca bon moralidad den nan mes famía. Nan ta yuda otro hende siña con nan també por haci esei. Nan ta biba den paz cu tur hende, sin enbolbénan den manifestacion ni revolucion político. Testigo di Jehova ta purba di ser ehemplar obedeciendo ley di autoridad superior humano, mientras cu nan ta spera pe Autoridad Supremo, Señor Soberano Jehova, restora paz perfecto i gobernacion husto ne planeta aki.

Ehecucion di su Decision

⁷ Usando idioma bibiente i simbólico, Jehova a duna mas detaye di tal ehecucion di su decision: “E solo i luna mes siguramente lo bira scur, i strea mes realmente lo retira nan resplandor. I Jehova mes lo borotá for di Sion, i lo haci su boz sali for di Jerusalem. I cielo i tera siguramente lo sagudi; pero Jehova lo ser un refugio pa su pueblo, i un fortaleza pe yiunan di Israel.” (Joël 3:15, 16) Loke ta parce un estado briyante i próspero di humanidad lo bira scur, indicando desaster, i cu e sistema mundial na scheurmento lo ser sagudí te na cabamento, destruí como si fuera pa un temblor grandi!—Ageo 2:20-22.

⁸ Tuma nota dje siguranza feliz di cu Jehova lo ser un refugio i un fortaleza pa su pueblo! Pakico? Pasobra nan ta un solo pueblo—un pueblo internacional—cu a reacciona ne palabra di Jehova: “Boso lo tin cu sa cu ami ta Jehova boso Dios.” (Joël 3:17) Siendo cu e nomber di Joël kier men “Jehova ta Dios,” e ta simboliza apropiadamente testigo ungí di Jehova di dia djawe, cu ta sirbi cu curashi proclamando e soberanía di Jehova. (Compara cu Malaquías 1:11.) Pasando ne promé palabra dje profecía di Joël, nos ta mira ki bibo el a profetiza dje actividad dje pueblo di Dios djawe.

Ehército di Sprinkhan

⁹ Leza awor e “palabra di Jehova cu a sosode na Joël”: “Scucha esaki, anciano, i presta oído, tur habitante dje país. Esaki a sosode den boso dia, of sikiera den e dia di boso antepasado? Haci relato di dje na boso mes yiunan, i na yiu di nan yiunan, i na yiu di nan ne sigiente generacion. Loke bichi a laga, sprinkhan a come; i loke sprinkhan a laga, sprinkhan lastrador, sin hala, a come; i loke sprinkhan lastrador, sin hala, a laga, cacalaca a come.”—Joël 1:1-4.

¹⁰ Esei ta un campaña extraordinario, uno cu lo ser conmemorá pa semper. Ola tras ola di insecto, cu e sprinkhan mas prominente, ta desola e tera. Kico esei kier men? Revelacion 9:1-12 també ta menciona un plaga di sprinkhan, cu Jehova Dios ta manda bao di “un rey, e angel dje abismo,” cu no ta nada menos cu Cristo Jesús. Su nomber Abadón (hebreo) i Apolión (griego) ta nifica “Destruccion” i “Destructor.” Sprinkhan ta simboliza e resto ungí di hende cristian cu, den e dia di Señor awor, ta sali pa desola sabana di cristiandad, completamente desenmascarando religion falso i proclamando e vinganza di Jehova Dios riba dje.

¹¹ Segun cu Revelacion 9:13-21 ta indica, un plaga enorme di cabayería ta sigi e plaga di sprinkhan. Ki cierto esei tá awe, ora mas cu cuater miyón “otro carné” ta apoya e poco mil di hende cristian ungí, i e dos grupo ta compone un cabayería irresistible! (Juan 10:16) Nan ta uni proclamando e huicio picante di Jehova Dios riba idólatra di cristiandad i riba hende cu ‘no ta arrepenti di nan asesinato ni di nan práctica di spiritismo ni di nan fornicacion ni di nan ladronicia.’ E clero—tanto católico como protestante—cu ta apoya activamente gera sangriente dje siglo aki, i també pastor abusador di mucha i evangelista perverso di TV, ta hunto cu hende contra locual e mensahe di huicio ta ser dirigí.

¹² Jehova Dios ta dirigi e sigiente yamada na tal “caballero” degradá dje clero: “Burrachénan, lanta i yora; i sclama, tur bebedor di biña, pa causa dje biña dushi, pasobra el a wordu cortá for di boso boca.” (Joël 1:5) Den siglo 20 aki, religion di cristiandad ta pone complacencia di mundo como sustituto pa principio moral limpi dje Palabra di Dios. Bebimento di camina di mundo ta parce dushi pa religion falso i parokiano di dje, pero ki un cosecha di maleza spiritual i fisical nan a cosechá! Pronto, segun detaye di Revelacion 17:16, 17, e “pensamento” di Dios lo ta pa poder político bira contra henter e imperio mundial di religion falso, Babilonia e Grandi, i destruyé. Solamente ne tempo ei, ora e ta mira cumplimento dje decision di Jehova Dios contra dje, lo e “lanta” for di su soño di burrachería.

“Un Pueblo Grandi i Fuerte”

¹³ E profeta di Jehova ta sigi duna detaye dje ehército di sprinkhan como “un pueblo grandi i fuerte,” i ta parce asina pa Babilonia e Grandi. (Joël 2:2) Por ehempel, su clero ta lamenta e echo cu religion di cristiandad no por a conberti Hapón budista. Sin embargo, awe un ola di mas cu 160.000 Testigo di Jehova haponés ta pasa riba e país i ta conduci estudio bíblico personal den mas cu 200.000 cas di pueblo. Den Italia 180.000 Testigo di Jehova ta ser reconocí como número dos despues di hende católico. En bano un monseñor católico romano den Italia a lamenta e echo cu Testigo di Jehova ta kita for dje iglesia ‘por lo menos 10.000 fiel católico’ tur aña.a Testigo di Jehova ta keda contentu pa recibi hende asina.—Isaías 60:8, 22.

¹⁴ Dunando detaye dje ehército di testigo ungí manera sprinkhan, Joël 2:7-9 ta bisa: “Nan ta corre manera homber fuerte. Nan ta subi un muraya manera homber di gera. I nan ta bai cada un den su mes camina, i nan no ta cambia nan berea. I nan no ta stoot un e otro. Manera homber balente den su camina, nan ta sigi; i si algun ta cai asta bao di proyectil, e otronan no ta kita for di nan camina. Nan ta drenta lihé den stad. Nan ta corre riba e muraya. Nan ta subi riba cas. Nan ta drenta den bentana manera ladrón.”

¹⁵ Detaye bibo en berdad di un ehército di “sprinkhan” ungí, i cu mas cu cuater miyón compañé uní cu nan, e otro carnénan! Ningun “muraya” di enemistad religioso por detenénan. Cu curashi nan ta “sigi camna ordenadamente den e mesun rutina” di duna testimonio público i den otro actividad cristian. (Compara cu Filipense 3:16.) En bez di haci compromiso, nan ta keda dispuesto di enfrenta morto, mescos cu e miles di Testigo cu ‘a cai bao di proyectil’ pasobra nan a nenga di saluda Hitler católico di Alemania nazista. E ehército di sprinkhan ta duna un testimonio cabal den e “stad” di cristiandad, pasando riba tur obstáculo, penetrando, den un sentido, manera ladrón den cas pasobra nan a plama miles di miyones di publicacion bíblico den nan trabao di cas pa cas. E boluntad di Jehova tá di duna testimonio, i ningun poder den cielo of riba tera por strobé.—Isaías 55:11.

“Yená cu Spiritu Santo”

¹⁶ Jehova Dios ta bisa su testigonan: “Boso tin cu sa cu mi ta meimei di Israel [spiritual], i cu mi ta Jehova boso Dios i no tin otro.” (Joël 2:27) Su pueblo a obtene tal comprendimento precioso ora Jehova Dios a cuminza cumpli cu su palabra skirbí den Joël 2:28, 29: “Mester sosode cu lo mi basha mi spiritu riba tur sorto di carni, i boso yiu homber i boso yiu muhernan siguramente lo profetiza.” Esei a sosode na Pentecoste di aña 33 E.C., ora un reunion di disípel di Jesús tabata ungí “i nan tur a yena cu e spiritu santo.” Nan a predica cu e poder dje spiritu santo, i riba un solo dia, “rond di tres mil alma tabata agregá.”—Echo 2:4, 16, 17, 41.

¹⁷ Riba e ocasion feliz ei, Pedro també a cita Joël 2:30-32: “Lo mi duna siñal den cielo i riba tera, sanger i candela i columna di huma. E solo mes lo bira scur, i e luna bira sanger, promé cu e binimento dje dia grandi i inspirador di temor di Jehova. I mester sosode cu tur cu ta inboca e nomber di Jehova lo scapa salbo.” E palabra a wordu cumplí parcialmente ora Jerusalem tabata destruí na aña 70 EC.

¹⁸ Sin embargo, tabatin un aplicacion adicional di Joël 2:28-32. Realmente, e profecía tabatin un cumplimento notable desde September di 1919. Ne tempo ei un asamblea memorable dje pueblo di Jehova Dios tabata celebrá den Cédar Point, Ohío, EUA. E spiritu di Dios tabata claramente manifestá, i sirbidor ungí di dje tabata estimulá pa cuminza un campaña mundial di duna testimonio cu ta extende te ne dia djawe. Ki un expansion magnífico tabatin como resultado! E mas cu 7.000 hende na asistencia ne asamblea den Cédar Point a aumenta te na un total di 10.650.158 asistiendo ne Conmemoracion dje morto di Jesús dia 30 di Mart di 1991. Di eseinan, 8.850 so a afirma cu nan tabata cristian ungí. Ki grandi tabata e gozo di nan tur ora nan a mira e fruta mundial cu e spiritu dinámico di Jehova a produci!—Isaías 40:29, 31.

¹⁹ Mashá pronto lo yega e “binimento dje dia grandi i inspirador di temor di Jehova” cu lo destrui e sistema di cosnan di Satanás. (Joël 2:31) Felizmente, “tur hende cu ta inboca e nomber di Jehova lo ser salbá.” (Echo 2:21) Di ki manera? Apóstol Pedro ta bísanos cu e “dia di Jehova lo bini manera ladrón” i a agrega: “Siendo cu tur e cosnan ei lo ser liquidá asina, ki sorto di hende boso mester tá den acto santo di conducta i echo di debocion piadosa, sperando i teniendo mashá presente e presencia dje dia di Jehova.” Teniendo presente cu e dia di Jehova ta cerca, nos por alegrá també pa mira cumplimento dje promesa di Jehova di un husto “cielo nobo i tera nobo.”—2 Pedro 3:10-13.

[Nota]

Bo por splica?

◻ Kico ta e “dia di Jehova”?

◻ Di ki manera e ‘mata di wijndruif dje tera’ lo ser cosechá, i pakico?

◻ Di ki manera un plaga di sprinkhan a afligi cristiandad desde 1919?

◻ Di ki manera e spiritu di Jehova tabata bashá riba su pueblo na aña 33 EC, i atrobé na 1919?

[Preguntanan di Estudio]

1. Pakico e gera santo binidero cu Jehova ta declara lo ser diferente cu gera “santo” di humanidad?

2, 3. (a) Kico ta e “dia di Jehova” profetizá den Joël 3:14? (b) Pakico e nacionan ta merece loke nan lo recibi durante e dia ei?

4. Cua reto Jehova ta tira ne nacionan?

5. Ki resultado lo tin ora e “mata di wijndruif dje tera” lo ser cosechá?

6. Con Testigo di Jehova ta considera e nacionan i nan gobernante?

7, 8. (a) Di ki ma­nera e nacionan lo ser sagudí i scuridad lo baha riba nan? (b) Joël ta simboliza ken den e dia djawe, i na contraste cu e mundo en general, con eseinan ta ser bendicioná?

9, 10. (a) Joël a profetiza di cua plaga? (b) Con Revelacion a repiti e profecía di Joël di un plaga, i e plaga ta tene cua efecto riba cristiandad?

11. Con sprinkhan djawe ta haya apoyo, i ken specialmente ta e obheto di nan atake?

12. Pakico lider di cristiandad ta merece di recibi mensahe di huicio, i kico lo sosodénan pronto, hunto cu tur miembro di Babilonia e Grandi?

13. Di ki manera ehército di sprinkhan ta parce “grandi i fuerte” pa cristiandad?

14, 15. Con Joël a pinta e ehército di sprinkhan, i di ki manera esei a ser cumplí den e dia djawe?

16, 17. (a) Na ki tempo e palabra di Joël 2:28, 29 tabatin un cumplimento sobresaliente? (b) Cua palabra profético di Joël no tabata cumplí completamente den e promé siglo?

18. Na ki tempo e cumplimento mayor di Joël 2:28, 29 a cuminza sosode?

19. Den bista dje cercanía dje dia di Jehova, cada un di nos mester tene cua actitud?