Keda Lantá den e “Tempo di Fin”
“Sigi vigila, keda lantá, pasobra boso no sa ki ora e tempo siñalá tá.”—MARCO 13:33.
1. Con nos mester reacciona ora suceso excitante ta desaroya den e “tempo di fin” aki?
MIENTRAS cu suceso excitante ta desaroya den e “tempo di fin” aki, con hende cristian mester reacciona? (Daniel 12:4) Nan no ta ser lagá den duda. Jesucristo a declara e profecía cu ta contene e siñal combiná cu ta alcanzando cumplimento den siglo 20 aki. El a profetiza dje cantidad di rasgo cu ta identifica e tempo aki desde 1914 como singular. Siendo cu Jesús a conoce e profecía di Daniel tocante e “tempo di fin,” el a conclui su mes profecía grandi urgiendo su disípelnan pa “keda lantá.”—Lucas 21:36.
2. Pakico tin un gran necesidad pa keda lantá spiritualmente?
2 Pakico keda lantá? Pasobra esaki ta e tempo di mas peligroso den existencia humano. Ta desastroso pa hende cristian pega soño spiritualmente den e tempo aki. Si nos ta bira complaciente of ta permiti nos curazón bira cargá cu ansha di bida, nos ta den peliger. Jesucristo a advertínos den Lucas 21:34, 35: “Presta atencion na boso mes pa boso curazón nunca bira cargá debí na comemento di mas ni na bebemento di mas i na ansha di bida, i di ripiente e dia ei ta riba boso instantáneamente manera laz. Pasobra esei lo bini riba tur hende cu ta biba riba e cara di tur e tera.”
3, 4. (a) Kico Jesús kier men ora el a bisa cu e dia di furia di Dios lo bini instantáneamente riba hende “manera laz”? (b) Siendo cu Dios no ta pone laz, pakico e dia ei lo alcanza hende en general inesperadamente?
3 Tabata pa un bon motibo cu Jesús a bisa cu e dia di Jehova lo yega ‘instantáneamente riba nos manera laz.’ Hopi bez laz ta armá cu trampa, i ta ser usá pa coge páhara i bestia. E laz tin gai, i ken cu ta drenta den dje ta hala e gai. Anto e trampa ta cera i ta coge e víctima. Tur esei ta sosode mashá lihé. Segun Jesús, hende inactivo spiritualmente lo haya sorpresa di igual manera i e “dia di furia” di Dios lo alcanzánan.—Proverbio 11:4.
4 Jehova Dios ta esun cu ta pone trampa pa su pueblo? No, e no ta spera pa coge den trampa hende descuidá i destruínan. Pero e dia ei lo alcanza hende en general pasobra nan no ta duna e Reino di Dios e consideracion primordial cu e ta merece. Nan ta sigi nan mes camina di actividad di bida, pasando por halto dje nificacion di loke ta sosode rond di nan. Pero, esei no ta cambia e orario di Dios. E tin su mes tempo fiho pa regla cuenta. I, den su misericordia, e no ta laga humanidad den ignorancia di su binidero huicio.—Marco 13:10.
5, 6. (a) Pa motibo dje binidero huicio, cua percuracion amoroso e Creador a haci pa su creacion humano, pero cu cua resultado general? (b) Kico lo ser considerá pa yúdanos keda lantá?
5 Tal spiertamento ta un percuracion amoroso di parti dje gran Creador, cu ta interesá den e bienestar di su creacion humano aki riba e banki simbólico pa su pia. (Isaías 66:1) E tin cariño pa habitante dje lugar unda bíblicamente su pia ta descansa. Pues, pa medio di embahador i representante terrenal di dje, e ta dúnanan advertencia di suceso cu ta bini. (2 Corintio 5:20) Sin embargo, apesar di tur advertencia duná, tal suceso lo yega riba e famía humano tanto inesperadamente como si nan pia ta cai den trampa. Pakico? Pasobra casi tur hende ta drumí spiritualmente. (1 Tesalonicense 5:6) Solamente un cantidad relativamente chikito di hende ta presta atencion ne advertencia i lo sobrebiba pa drenta den e mundo nobo di Dios.—Mateo 7:13, 14.
6 Pues, anto, con nos por keda lantá den e tempo di fin aki pa nos ser contá hunto cu esnan cu lo ser salbá? Jehova Dios ta percura e yudanza necesario. Láganos tuma nota di siete cos cu nos por haci.
Lucha Contra Destraimento
7. Jesús a duna cua advertencia tocante destraimento?
7 Primeramente, nos tin cu lucha contra destraimento. Den Mateo 24:42, 44, Jesús a bisa: “P’sei sigi vigila, pasobra boso no sa riba ki dia boso Señor ta bini. P’sei, boso també mustra cu boso ta cla, pasobra na un ora cu boso no ta pensa cu té, e Yiu di hende ta bini.” E idioma cu Jesús a usa ei ta indica cu ne tempo crítico aki, lo tin hopi destraimento, i destraimento por resulta den destruccion. Den e dia di Noé hopi cos a preocupa hende. Como resultado, hende destraí “no a haci caso” di loke tabata pasa, i e diluvio a hiba nan tur. P’sei, Jesús a adverti: “Asina lo ta e presencia dje Yiu di hende.”—Mateo 24:37-39.
8, 9. (a) Con ocupacion diario di bida por destraénos i pónenos den peliger? (b) Pablo i Jesús a dúnanos cua advertencia?
8 Tene presente també cu den su advertencia den Lucas 21:34, 35, Jesús tabata papia tocante aspecto diario di bida, tal como come, bebe, i ansha riba ganamento di pan. Eseinan ta común pa tur hende, incluyendo disípel di Señor Jesús. (Compara cu Marco 6:31.) Di nan mes, tal cosnan ta inofensivo, pero si nos ta permitié, nan por destraénos, preocupános, i asina causa un soño spiritual peligroso den nos.
9 P’sei, láganos no neglisha e cos di sumo importancia—e ganamento di aprobacion divino. En bez di keda ocupá den cos diario di bida, láganos úsanan te na un grado limitá necesario pa sostenénos. (Filipense 3:8) Nan no mag tuma e lugar di interés di Reino. Manera Romano 14:17 ta bisa, “e reino di Dios no kier men come i bebe, sino kier men husticia i paz i gozo cu spiritu santo.” Corda e palabra di Jesús ora el a bisa: “Sigi, pues, buscando promé e reino i su husticia, i tur e otro cosnan ei lo ser agregá na boso.” (Mateo 6:33) Además, den Lucas 9:62, Jesús a declara: “Ningun hende cu a pone man na ploeg i ta wak atrás ta bien apto pe reino di Dios.”
10. Ta existi cua peliger si nos no ta mantene nos bista fihá stret dilanti ne meta?
10 Despues di a cuminza ploeg, simbólicamente, nos mester sigi ploeg stret. Ploegdor cu ta mira atrás no ta ploeg stret. E ta destraí i cualkier obstáculo por desvié of detené fácilmente. Láganos no ser manera esposa di Lot, cu a mira atrás i nunca a alcanza salbacion. Ta necesario pa nos tene nos bista fihá stret padilanti den direccion dje meta. Pa haci esei nos tin cu lucha contra destraimento.—Génesis 19:17, 26; Lucas 17:32.
Reza Encarecidamente
11. Jesús a duna énfasis na kico despues di a advertínos dje peliger di destraimento?
11 Sin embargo, tin mas cos cu nos por haci pa keda lantá. Un segundo cos importante ta di: Reza encarecidamente. Despues cu Jesús a advertínos contra e destraimento di cosnan diario di bida, el a duna e sigiente conseho: “Keda lantá, anto, tur ora haciendo súplica pa boso logra scapa foi tur loke ta destiná di sosode, i para dilanti dje Yiu di hende.”—Lucas 21:36.
12. Cua clase di oracion ta necesario, i cu cua resultado?
12 Pues, nos tin cu haci súplica constante tocante e peliger di nos situacion i nos necesidad di keda alerto. Anto, láganos acudi na Dios den oracion cu súplica. Pablo a bisa den Romano 12:12: “Persevera den oracion.” I den Efesio 6:18, nos ta leza: “Cu tur forma di oracion i súplica . . . , haci oracion na tur ocasion den spiritu. I pe fin ei, keda lantá cu tur constancia.” Esei no ta simplemente un caso di ofrece oracion como si fuera un cuestion segundario di poco importancia. Nos existencia mes ta den peliger. P’sei nos tin cu pidi yudanza divino encarecidamente. (Compara cu Hebreo 5:7.) Dje manera ei nos ta mantenénos ne banda di Jehova Dios. Nada por ta mas beneficioso pa yúdanos logra esei cu nos ‘hacimento di súplica tur ora.’ Anto, Jehova Dios lo mantenénos den un estado consiente i vigilante. Pues, ta ki importante pa persisti den oracion!
Pega Estrechamente ne Organizacion di Dios i su Trabao
13. Cua clase di asociacion ta necesario pa keda lantá?
13 Nos kier scapa for di tur e cosnan ei cu lo bini riba e mundo aki. Nos kier para dilanti dje Yiu di hende, i tene su aprobacion. Pa logra esei, tin un tercer cos cu nos por haci: Pega inquebrantablemente ne organizacion teocrático di Jehova Dios. Nos tin cu asocia sin reserva cu e organizacion i participa den su actividad. Dje manera ei nos inequibocablemente ta identificános como hende cristian cu ta keda alerto.
14, 15. (a) Kedando ocupá den cua trabao por yúdanos keda lantá? (b) Ken ta determina e tempo pe trabao di predica termina, i con nos mester síntinos tocante dje? (c) Despues dje tribulacion grandi, kico nos por mira ora nos ta mira atrás ne predicacion dje Reino cu tabata hací?
14 Den estrecha relacion cu esei ta cos di cuater cu por yúdanos keda lantá. Nos mester forma parti di esnan cu ta duna advertencia na hende dje binidero fin dje sistema di cosnan aki. E fin completo dje sistema di cosnan bieu aki lo no sosode te cu “e bon nobo di reino” a ser predicá te ne grado cu Dios Todopoderoso kier. (Mateo 24:14) Testigo di Jehova no ta esnan cu ta determina ki ora e trabao di predica ta ser realizá. Jehova ta reserbá tal derecho pa su mes. (Marco 13:32, 33) No obstante, nos ta keda determiná di traha tanto duro posibel i tanto tempo cu ta necesario pa predica tocante e mihor gobierno cu humanidad hamás por haya, esta, e Reino di Dios. E comienzo dje “tribulacion grandi” lo yega mientras cu nos ta ocupá den tal trabao ainda. (Mateo 24:21) Durante tur e tempo di futuro, hende salbá por corda i confirma di curazón cu Jesucristo no tabata un profeta falso. (Revelacion 19:11) E trabao di predica lo ser realizá te na un grado hopi mas grandi cu loke esnan cu ta participa den dje a spera.
15 P’sei, ne tempo importante ora e trabao lo ser realizá ne satisfaccion di Dios mes, probablemente mas hende ta participa den dje cu na cualkier otro tempo na antes. Ki agradicido nos lo keda di a tene un parti den e gran trabao! Apóstol Pedro ta dúnanos e siguranza di cu Jehova “no kier pa ningun hende ser destruí sino kier pa tur hende alcanza arrepentimento.” (2 Pedro 3:9) P’sei, e forza activo di Dios Todopoderoso ta obra awe mas intensamente cu nunca, i Testigo di Jehova kier sigi den tal actividad estimulá pe spiritu. Keda estrechamente pegá ne organizacion di Jehova Dios, i keda ocupá den su ministerio público. Esei ta un yudanza pa bo keda lantá.
Haci un Examinacion di bo Mes
16. Pakico nos mester examina nos mes en cuanto nos estado spiritual actual?
16 Tin un cos di cinco cu nos por haci pa nos keda lantá. Individualmente, nos mester haci un examinacion propio di nos estado actual. Esei ta apropiado awor mas cu nunca na antes. Nos tin cu duna prueba na ken su banda nos tin e determinacion di keda. Den Galatio 6:4, Pablo a bisa: “Laga cada un duna prueba di loke ta su mes obra.” Haci un examinacion di bo mes di acuerdo cu e palabra di Pablo den 1 Tesalonicense 5:6-8: “Láganos no sigi drumi manera e otronan, sino láganos keda lantá i mantene nos huicio. Pasobra hende cu ta drumi tin e costumber di drumi anochi, i hende cu ta bebe burachi generalmente ta burachi anochi. Pero en cuanto nos cu ta di dia, láganos mantene nos huicio i tene bistí e coraza di fe i amor i como helm e speranza di salbacion.”
17. Ora nos ta examina nos mes, cua pregunta nos mester haci nos mes?
17 Kico di nos? Ora nos ta examina nos mes den luz dje Scritura, nos ta mira cu nos ta keda lantá, ta tene bistí e helm dje speranza di salbacion? Nos ta hende cu positivamente a separános for dje sistema di cosnan bieu i no ta cultiva idea di dje mas? Nos berdaderamente tin e spiritu dje mundo nobo di Dios? Nos ta keda plenamente alerto tocante unda e sistema aki ta bai? Si ta asina, anto e dia di Jehova lo no alcanzános como si nos ta ladrón.—1 Tesalonicense 5:4.
18. Cua otro pregunta nos tal bez tin cu haci nos mes, i cu cua resultado?
18 Pero, con ta para si nos examinacion di nos mes ta revela cu nos ta lucha pa establece un moda di biba agradabel, cómodo, dushi, i trankilu? Con ta para si nos ta descubri cu nos wowo spiritual ta pisá i yen di soño? Nos ta den un estado di soño, sigiendo tras di algun fantasía di mundo? Si ta asina, anto láganos lanta for di soño!—1 Corintio 15:34.
Medita Riba Profecía Cumplí
19. Menciona algun profecía cu nos a mira cumpli.
19 Awor nos ta yega na cos di seis cu por yúdanos keda lantá: Medita riba e cantidad di profecía cu a ser cumplí den e tempo di fin aki. Nos a pasa 77 aña caba desde cu e tempo siñalá di nacionan a termina na 1914. Ora nos ta mira atrás riba tres cuarto di un siglo, nos por mira con un profecía tras di otro a wordu cumplí—e restoracion dje adoracion berdadero; e liberacion dje resto ungí, hunto cu nan compañénan, i nan introduccion den un paradijs spiritual; e predicacion dje bon nobo di Reino na un escala mundial; e presentacion dje multitud grandi. (Isaías 2:2, 3; capítulo 35; Zacarías 8:23; Mateo 24:14; Revelacion 7:9) Tabatin un engrandecimento dje gran nomber di Jehova Dios i di su soberanía universal, i també un aumento dje chikito pe bira mil i e chikito bira un nacion fuerte, cu Jehova acelerando esei na su tempo. (Isaías 60:22; Ezekiel 38:23) I e vision di apóstol Juan den e relato di Revelacion ta yegando nan culminacion awor.
20. Tur Testigo di Jehova tin cua conviccion, i nan realmente a resulta di ser kico?
20 Pues, mas cu nunca na antes, Testigo di Jehova ta keda firmemente convencí cu nan ta comprende correctamente e nificacion di asunto di mundo desde 1914. Teniendo un conviccion asina, nan a resulta di ser un instrumento den man di Dios Haltísimo. Nan ta hende cu a recibi e responsabilidad di entrega e mensahe divino ne tempo importante aki. (Romano 10:15, 18) Sí, e palabra di Jehova pe tempo di fin a ser cumplí. (Isaías 55:11) Esei, en turno, mester estimulános pa sigi padilanti te cu nos ta mira e realizacion final di tur promesa di Dios mediante Jesucristo.
Salbacion ta mas Cerca cu ora Nos a Bira Creyente
21. Menciona yudanza di siete cu nos tin pa keda spiritualmente lantá?
21 Finalmente, e yudanza di siete pa nos keda lantá: Semper tene presente cu nos salbacion ta mas cerca cu ora nos a bira creyente. Mas importante, e vindicacion dje soberanía universal di Jehova Dios i dje santificacion di su nomber ta hopi mas cerca. Pues, e necesidad di keda lantá ta mas urgente cu nunca. Apóstol Pablo a skirbi: “Boso ta conoce e tempo, cu ta ora caba pa boso lanta foi soño, pasobra awor nos salbacion ta mas cerca cu ora nos a bira creyente. Anochi ta cerca di pasa; e dia a yega cerca.”—Romano 13:11, 12.
22. E cercanía di nos salbacion mester tene cua efecto riba nos?
22 Cu nos salbacion tanto mas cerca, nos tin cu keda lantá! Nos no mag laga ningun interés personal of mundano ser mas importante cu nos aprecio pa loke Jehova Dios ta haci pa su pueblo durante e tempo di fin aki. (Daniel 12:3) Nos tin cu demonstra mas persistencia cu nunca afin di no ser desviá for dje camina cu e Palabra di Dios ta establece claramente pa nos. (Mateo 13:22) Evidencia ta mustra claramente cu e mundo aki ta den su último dianan. Pronto lo e ser eliminá for di existencia pa semper pa haci lugar pe mundo nobo di husticia.—2 Pedro 3:13.
23. Di ki manera Jehova Dios lo yúdanos, i cu cua resultado bendito?
23 Pues, di tur manera láganos keda lantá. Mas cu nunca na antes, keda alerto en cuanto unda nos tá den e corriente di tempo. No lubida, Jehova Dios nunca lo pega soño tocante e asunto. Mas bien, e semper lo yúdanos keda lantá den e tempo di fin aki. Anochi ta cerca di pasa. E dia ta yega cerca. Pues, keda lantá! Pronto nos lo experimenta e dia di mas bonita cu tur, ora e Reino Mesiánico ta cumpli cu e propósito di Jehova Dios pe tera!—Revelacion 21:4, 5.
Cua Contesta bo ta Duna?
◻ Kico Jesús kier men ora el a bisa cu e dia di furia di Dios lo bini riba hende “manera laz”?
◻ Pakico nos mester lucha contra destraimento, i con nos por haci esei?
◻ Cua clase di oracion ta necesario afin di keda lantá?
◻ Cua clase di asociacion ta vital?
◻ Pakico examina nos mes estado spiritual?
◻ Profecía ta hunga cua papel pa mantenénos lantá?