Piscamento di Hende den Awa di Mundo

“Awor, si mi ta declara e bon nobo, esei no ta un motibo pa mi gaba, pasobra necesidad ta poní riba mi. Realmente, ai di mi si mi no declara e bon nobo!”—1 CORINTIO 9:16.

1, 2. (a) Ken berdaderamente a acepta e desafío indicá den 1 Corintio 9:​16, i pakico bo ta contestá asina? (b) Testigo di Jehova ta acepta cua responsabilidad?

KEN den siglo 20 aki realmente a acepta e desafío cu e palabra anterior di Pablo ta presenta? Ken a sali den mundo na miyones pa pisca hende homber i muher cu ta “consiente di nan necesidad spiritual”? (Mateo 5:3) Ken a corre e rísico di prisón i morto, i ken a sufri di esei den hopi país pasobra nan a obedece e mandamento di Cristo den Mateo 24:14?

² Registro histórico ta contesta: Testigo di Jehova. Durante aña pasá so mas cu cuater miyón Testigo di Jehova a camna di cas pa cas ‘declarando e bon nobo’ den 211 país i territorio i na mas cu 200 idioma. Eseinan no tabata solamente un grupo escogí di misionero entrená. No; tur Testigo di Jehova ta sinti e responsabilidad di predica i siña di cas pa cas i na tur ocasion apropiado. Pakico nan ta sinti e necesidad di comparti nan creencia cu otro hende? Pasobra nan ta reconoce cu conocimento ta duna responsabilidad.—Ezekiel 33:8, 9; Romano 10:14, 15; 1 Corintio 9:16, 17.

Piscamento di Hende, un Desafío di Alcance Mundial

3. E trabao di pisca mester ta ki extenso?

³ E gran trabao di piscamento no ta limitá, den un sentido, na ningun rio of lagún, ni sikiera na un solo lamá. No, manera Jesús a manda, e mester ta hací den “tur nacion.” (Marco 13:10) Promé cu el a subi cerca su Tata, Jesús a bisa su disípelnan: “Bai pues i haci disípel di hende di tur nacion, bautizando nan den e nomber dje Tata i dje Yiu i dje spiritu santo, siñando nan pa warda tur loke mi a manda boso. I, mira! mi ta cu boso tur dia te ne conclusion dje sistema di cosnan.”—Mateo 28:19, 20.

4. (a) Kico mester a sorprende e promé sigidor hudío di Jesús? (b) Con Testigo di Jehova ta considera e grandeza di nan trabao di predica?

⁴ E comision tabatin cu ser sorprendente pa sigidor hudío di Jesús. El a bisa disípel hudío cu awor nan tabatin cu bai cerca gentil “impuro” di tur nacion i síñanan. Nan tabatin cu reahusta nan moda di pensa pa nan wanta e impacto dje asignacion i cumpli cuné. (Echo 10:9-35) Pero, no tabatin alternativa; Jesús a caba di cóntanan den un comparacion cu e “cunucu ta e mundo.” P’sei, Testigo di Jehova djawe ta considera henter mundo como e awa unda nan tin derecho di pisca. No por tin “awa nacional” of otro restriccion pa nan comision di Dios. Tin bez cu prudencia ta necesario unda no ta existi libertad religioso. No obstante, nan ta pisca cu un sintimento di urgencia. Pakico? Pasobra suceso mundial i cumplimento di profecía bíblica ta indica cu nos ta den e parti final dje trabao mundial di pisca.—Mateo 13:38; Lucas 21:28-33.

Progreso den e Piscamento Mundial

5. Ki clase di hende ta reacciona ne piscamento mundial?

⁵ E mayor parti di heredero ungí dje Reino tabata “piscá” for dje nacionan promé cu 1935, di manera cu e cantidad total di nan ta fundamentalmente completo. P’sei, specialmente desde 1935, Testigo di Jehova ta busca hende humilde cu por ta yamá e “mansonan” cu lo “ocupa e tera.” (Salmo 37:11, 29) Hende asina ta “suspira i ta lamenta riba tur e cosnan repugnante cu ta ser hací.” Nan ta dal paso na fabor di gobernacion dje Reino di Dios promé cu e “tribulacion grandi” ta desbarata e sistema degradá i corrupto di cosnan di Satanás i ta tira adorador di dje den e “fornu di candela” di destruccion final.—Ezekiel 9:4; Mateo 13:47-50; 24:21.

6, 7. (a) Nan a dal cua paso na 1943 en relacion cu e trabao di predica? (b) Cua resultado tabatin?

⁶ E piscamento mundial a goza bon éxito asina leu? Laga echo papia pa nan mes. Ayá na 1943, Gera Mundial II tabata den su furia ainda, pero e fiel rumanan ungí den e central mundial di Testigo di Jehova den Brooklyn, New York, a anticipa cu un enorme piscamento mundial tabatin cu ser hací. Pues, nan a dal cua paso?a—Revelacion 12:16, 17.

⁷ Na 1943 e Sociedad Watchtower a establece un scol pa misionero yamá Galad (hebreo: “Montón di Testimonio”; Génesis 31:47, 48) cu a cuminza entrená cien ­misionero cada seis luna pa nan por ta mandá como piscador simbólico den tur e mundo. Den e tempo ei tabatin solamente 126.329 Testigo di Jehova piscando hende activamente den 54 país. Dentro di diez aña e cantidad casi a bula te na 519.982 Testigo di Jehova den 143 país! Siguramente, e Scol di Galad tabata produci piscador i piscadora intrépido, dispuesto pa bai na cultura di stranhería i adaptánan na awa nobo di piscamento. Como resultado, miles di hende di curazón onrado a reacciona. Tal misionero, i Testigo di Jehova local cu locual nan a traha, a pone fundeshi pe aumento maraviyoso cu ta tuma lugar awe.

8, 9. (a) Nos por mencioná cua ehempel di trabao sobresaliente di misionero? (b) Cua aumento notable misionero a mira den nan territorio? (Mira també Anuario de los testigos de Jehová para 1992.)

⁸ Hopi fiel veterano cu a graduá dje promé klasnan di Galad ta sirbi ainda den nan asignacion den stranhería, aunque awor nan tin mas cu 70 of 80 aña di edad. Un ehempel cu ta típico di hopi di nan ta esun di Eric Britten cu tin 82 aña i su esposa Christina, cu a gradua di klas número 15 na 1950 i ta sirbi ainda den Brasil. Ora nan a bai pa sirbi den Brasil, tabatin menos cu 3.000 Testigo di Jehova den e país. Awor tin mas cu 300.000! Siguramente, e ‘chikito a bira un nacion fuerte’ den Brasil pasobra e trabao di piscamento tabata productivo.—Isaías 60:22.

⁹ I kico nos por bisa di misionero den Africa? E mayoría a adaptánan na un cultura mashá diferente i a yega di stima e pueblo africano. Típico ta rumanan John i Eric Cooke i nan esposa, Kathleen i Myrtle, sirbiendo actualmente den Zuidáfrica. John i Eric a gradua di klas número 8 na 1947. Entre nan dos, nan a sirbi den Angola, Zimbabwe, Mozambique, i Zuidáfrica. Algun misionero a muri den Africa debí na maleza, i otronan debí na gera i persecucion, tal como Alan Battey i Arthur Lawson, cu a muri durante e gera civil reciente den Liberia. No obstante, e awa africano a resulta di ser mashá productivo. Awor tin mas cu 400.000 Testigo di Jehova den tur e continente inmenso.

Nos Tur ta Participa

10. Pakico i di ki manera pionero ta haci un trabao encomendable?

¹⁰ Sin embargo, nos tin cu reconoce cu aunque tin varios di miles di misionero den stranhería, awor tin miyones di publicador local i pionero.b Nan ta haci e mayor parti dje trabao di predica mundialmente. Na 1991 tabatin un promedio di mas cu 550.000 pionero i predicador biahero. Esei ta un cantidad impresionante ora nos ta corda cu tur fiel Testigo di Jehova asina ta haci un esfuerzo special pa participa den e gran piscamento, dedicando un promedio di entre 60 i 140 ora ne predicacion tur luna. Hopi ta haci esei apesar di gran sacrificio i gasto personal. Pero, pakico? Pasobra nan ta stima Jehova nan Dios cu tur nan curazón, mente, alma, i forza, i ta stima nan próhimo mescos cu nan mes.—Mateo 22:37-39.

11. Ki evidencia sigur tin di cu e spiritu di Jehova ta obra den su pueblo?

¹¹ Kico nos por bisa dje mas cu tres miyón i mei otro Testigo di Jehova cu no ta den e sirbishi di tempo completo pero toch ta haci cuanto cu nan por den e sirbishi di Jehova, segun nan circunstancia? Algun ta esposa, asta mama cu ta atende na mucha chikito, cu toch ta dedica un parti di nan tempo balioso ne piscamento mundial. Hopi ta esposo of tata cu trabao seglar di tempo completo; pero, nan ta aparta tempo na fin di siman i den atardi pa siña e berdad na hende cu nan no conoce. Anto tin un multitud grandi di soltero i soltera i hovenan cu ta participa den e predicacion i cu ta recomenda e berdad cu nan conducta. Cua otro grupo religioso tin mas cu cuater miyón trahador boluntario cu tur luna ta predica e bon nobo dje gobernacion dje Reino di Dios? Siguramente esei ta evidencia dje obramento dje spiritu di Jehova Dios!—Salmo 68:11; Echo 2:16-18; compara cu Zacarías 4:6.

Factor cu ta Contribui ne Aumento

12. Pakico hende ta reacciona favorablemente ne berdad, i ki aumento tabatin?

¹² E gran trabao di predica ta produci resultado sobresaliente tur aña. Na aña 1991 mas cu 300.000 testigo nobo a bautiza bao di awa. Esei ta igual cu mas cu 3.000 congregacion di 100 testigo cada un! Con nan ta haci tur esei? Láganos corda loke Jesús a bisa: “Ningun hende por bini cerca mi amenos cu e Tata cu a mandámi ta atraele . . . Ta pará skirbí den e Profetanan, ‘I nan tur lo ser siñá pa Jehova.’ Tur hende cu a tende for dje Tata i a siña ta bini cerca mi.” P’sei, no ta pa medio di esfuerzo humano so cu hende ta reacciona ne piscamento mundial. Jehova Dios ta mira e condicion dje curazón i ta atraé na su mes hende merecedor.—Juan 6:44, 45; Mateo 10:11-13; Echo 13:48.

13, 14. Hopi testigo a manifesta cua actitud excelente?

¹³ Sin embargo, piscador humano ta agente cu Jehova Dios ta usa pa atraé hende na dje. P’sei, nan actitud en cuanto hende i e territorio unda nan ta pisca ta importante. Ta ki animador pa mira cu e gran mayoría ta tuma na pecho e palabra di Pablo pa cristian galatio: “Pues, láganos no bandona e hacimento di loke ta excelente, pasobra ne debido tempo nos lo cosechá si nos no entrega na cansancio.”—Galatio 6:9.

¹⁴ Hopi fiel Testigo di Jehova a predica binti of mas aña, mientras cu nan ta observa cuidadosamente suceso mundial. Nan a mira e subimento i caimento di nazismo, facismo, i otro sistema totalitario. Algun a presenciá e cantidad di gera cu tabatin desde 1914. Nan a mira lider di mundo pone nan confianza den e Liga di Nacion i despues den Naciones Unidas. Nan a mira e trabao di Jehova Dios prohibí i legalizá despues den hopi país. Durante tur esei, Testigo di Jehova no a entrega den e hacimento di loke ta excelente, incluyendo e trabao di sirbi como piscador di hende. Ki un registro sobresaliente di integridad!—Mateo 24:13.

15. (a) Kico ta yúdanos adapta ne necesidad di nos territorio mundial? (b) Di ki manera literatura a yuda den bo asignacion?

¹⁵ Tin otro factor cu a contribui ne aumento mundial. Uno di nan ta e actitud flexible di piscador di hende en cuanto necesidad dje territorio. Debí ne migracion di hende di diferente cultura, religion, i idioma, Testigo di Jehova a ampliá nan comprendimento di diferente punto di bista di tal hende. I e congregacion mundial a yuda mashá preparando Bijbel i literatura bíblica den mas cu 200 idioma. E Traducción del Nuevo Mundo de las Santas Escrituras, completo of en parti, awor ta na 13 idioma, incluyendo checo i slovaco. E foyeto Disfruta di bida riba tera pa semper! ta disponibel awor na 198 idioma, for di albanés te na zulu, cu un publicacion di 72 miyón ehemplar. E buki E homber mas importante cu hamás a biba ta disponibel caba na 69 idioma. El hombre en busca de Dios, publicá na 29 idioma, ta yuda hende comprende e origen i creencia di sistema religioso principal di mundo i ta resulta di ser un yudanza singular den e piscamento mundial.

16. Con algun ruman a reacciona na necesidad den otro país?

¹⁶ Kico mas a yuda aumenta e piscamento mundial? Miles di ruman a keda dispuesto pa acepta e ‘yamada macedonio.’ Mescos cu Pablo tabata dispuesto pa muda for di Asia Menor te na Macedonia den Europa, ora Dios a yamé, hopi Testigo di Jehova a muda na país i territorio unda tin e mayor necesidad pa predicador di Reino, i també pa anciano i sirbidor ministerial. Nan ta mescos cu piscador literal cu ta haya e awa local bon piscá i ta muda na otro awa unda cu tin menos boto i hopi piscá.—Echo 16:9-12; Lucas 5:4-10.

17. Cua ehempel nos tin di esnan cu a responde ne ‘yamada macedonio’?

¹⁷ Klas mas reciente dje scol misional di Galad a inclui studiante di varios país europeo cu a siña inglés anto a ofrece nan mes pa sirbishi den otro país i cultura. Di igual manera, mediante e Scol di Entrenamento Ministerial, hopi ruman soltero ta ser duná dos luna di entrenamento intenso anto ta ser mandá na otro nacion pa fortalece congregacion i circuito. Otro awa singular pa pisca ta den territorio cu ta habriendo awor den Oosteuropa i loke na antes tabata república soviética.—Compara cu Romano 15:20, 21.

18. (a) Pakico pionero generalmente ta predicador efectivo? (b) Con nan por yuda otro ruman den e congregacion?

¹⁸ Un otro yudanza den e piscamento mundial ta e Scol di Sirbishi di Pionero na locual pionero regular ta asisti. Mediante dos siman di estudio intenso dje publicacion Resplandeciendo como iluminadores en el mundo, prepará exclusivamente pa pionero, nan ta mehora nan aptitud ministerial considerando tópico tal como “Sigi den e camina di amor,” “Sigi Jesús como modelo,” i “Desaroya e arte di siña.” Ki agradicido tur congregacion ta keda di tin tal equipo di piscador capacitá cu ta predica di cas pa cas i cu por entrena hopi otronan den e gran trabao di piscamento!—Mateo 5:14-16; Filipense 2:15; 2 Timoteo 2:1, 2.

Nos por Mehora?

19. Mescos cu apóstol Pablo, con nos por mehora den nos ministerio?

¹⁹ Mescos cu Pablo, nos kier tene un actitud positivo i optimista. (Filipense 3:13, 14) El a adapta su mes na tur sorto di hende i circunstancia. E tabata sa con pa descubri terreno común cu hende i razona abase di actitud i cultura local. Nos por cuminza estudio bíblico door di keda alerto na reaccion di doño di cas ne mensahe di Reino, anto adapta nos presentacion ne necesidad dje persona. Ya cu nos tin un gran variedad di literatura pa yuda studia e Bijbel, nos por ofrece esun cu ta apropiado pe punto di bista dje persona. Factor importante den piscamento productivo ta pa nos keda flexible i alerto.—Echo 17:1-4, 22-28, 34; 1 Corintio 9:19-23.

20. (a) Pakico nos piscamento ta tanto importante awor? (b) Cua responsabilidad nos tin awor individualmente?

²⁰ Pakico e trabao singular di piscamento mundial ta tanto importante awor? Pasobra den bista di suceso cu a cumpli i ta cumpli cu profecía bíblica, ta keda bisto cu e sistema mundial di Satanás ta na rumbo pa un culminacion desastroso. Pues, kico nos mester haci como Testigo di Jehova? E tres artículo di estudio den e revista aki ta destacá nos responsabilidad di ser diligente i celoso den nos piscamento den nos parti dje awa mundial. Nos tin e siguranza sólido dje Bijbel di cu Jehova Dios lo no lubida nos piscamente diligente. Pablo a bisa: “Dios no ta inhusto pé lubida boso trabao i e amor cu boso a mustra pa su nomber, pasobra boso a sirbi e santonan i ta sigi sirbi. Pero nos ta deseá pa cada un di boso mustra e mesun diligencia afin di tene plena siguranza dje speranza te na fin.”—Hebreo 6:10-12.

[Nota]

Bo ta Corda?

◻ Pakico Testigo di Jehova ta considera tur e mundo como awa pa nan piscamento?

◻ Galad, e scol di misionero, ta cua clase di bendicion pe piscamento?

◻ Menciona algun factor cu a con­tribui ne bon éxito di Testigo di Jehova.

◻ Con nos individualmente por mehora den nos ministerio cristian?

[Tabèl na página 24]

E RESULTADO DI PISCAMENTO INTERNACIONAL

Aña País Testigonan

1939 61 71,509

1943 54 126,329

1953 143 519,982

1973 208 1,758,429

1983 205 2,652,323

1991 211 4,278,820

[Plachi na página 25]

E trabao di duna testimonio ta ser hací ainda den piscador galileo