‘Mi Mester Bautiza?’

DI TUR decision cu nos tin cu tuma durante nos bida, kizás ningun ta mas importante cu esaki: ‘Mi mester bautiza?’ Pakico esei ta tanto importante? Pasobra nos decision en relacion cu e pregunta no solamente ta toca directamente e rumbo di nos bida actual sino també ta toca nos bienestar eterno.

Tal decision ta enfrentábo? Kizás bo a studia e Bijbel cu Testigo di Jehova pa basta tempo. Of kizás bo mayornan a siñábo e Scritura desde infancia. Awor bo a yega e punto unda bo tin cu decidi loke bo mester haci. Pa bo tuma e decision correcto, bo tin cu comprende loke bautismo ta encerra i ken mester bautiza.

Loke Bautismo ta Encerra

Bautismo ta un ceremonia cu ta solemnizá un relacion, di algun manera parecido di casamento. Den e caso di casamento, e novio i novia comprometí a cultiva caba un relacion estrecha. E ceremonia matrimonial solamente ta haci público loke tabata comprometí na privá, esta, cu nan dos ta drenta den e union dje matrimonio. També e ta permiti e pareha disfruta di privilegio i ta trece responsabilidad cu nan mester cumplí den nan bida matrimonial hunto.

E situacion ta parce hopi e relacion despues di bautismo. Ora nos ta studia e Bijbel, nos ta siña di cosnan amoroso cu Jehova Dios a haci pa nos. E no solamente a dúnanos nos bida i tur loke nos mester pa sostené sino també el a duna su Yiu unigénito pa habri camina pa humanidad pecaminoso por drenta den un relacion cunÉ i gana bida eterna den Paradijs riba tera. Ora nos ta corda tur esei, nos no ta síntinos motivá pa actua?

Kico nos por haci? Jesucristo, e Yiu di Dios, ta bísanos: “Ken cu kier sigi tras di mi mester nenga su mes i coge su staca di tormento i sigími continuamente.” (Mateo 16:24) Sí, nos por bira disípel di Jesucristo, sigiendo su ehempel sirbiendo interés di su Tata, Jehova Dios. Pero, pa nos haci esei, ta necesario pa nos ‘nenga nos mes,’ es decir, determina boluntariamente pa pone e boluntad di Dios promé cu nos mes boluntad; locual kier men ofrece, of dedica, nos bida ne hacimento di su boluntad. Pa duna di conoce tal decision boluntario i privá, tin un ceremonia público. Bautismo bao di awa ta e ceremonia pa simboliza públicamente nos dedicacion na Dios.

Ken Mester Bautiza?

Jesucristo a manda sigidor di dje pa ‘bai i haci disípel di hende di tur nacion, bautizandonan den e nomber dje Tata i dje Yiu i dje spiritu santo, siñando nan pa warda tur loke el a mándanan.’ (Mateo 28:19, 20) Claramente, un grado di madurez mental i emocional ta necesario pa hende cu ta bautiza. Mediante nan estudio personal dje Palabra di Dios, nan ta yega di reconoce e necesidad di ‘arrepenti i conberti’ for di nan moda di biba di antes. (Echo 3:19) Anto, nan ta mira e necesidad di participa den e trabao di evangelizá cu Jesucristo a haci, birando disípel di dje. Tur esei ta tuma lugar promé cu e paso di bautismo.

Bo a yega ne paso ei den bo desaroyo spiritual? Bo tin un deseo pa sirbi Dios? Si bo tin, considera cu oracion e relato bíblico dje eunuco etiopio, cu ta pará skirbí den Echo capítulo 8. Ora profecía tocante Jesús e Mesías tabata splicá ne homber, el a scudriña su mente i curazón, anto a puntra: “Kico ta strobámi di bautiza?” Ta parce cu no tabatin ningun strobanza; pues el a bautiza.—Echo 8:26-38.

Awe hopi hende ta haci e mesun pregunta: “Kico ta strobámi di bautiza?” Como resultado, 300.945 hende recién dedicá a bautizá na 1991. Esei a duna gran gozo na tur e pueblo di Jehova Dios, i anciano den tur congregacion ta keda contentu pa yuda otro hende sincero progresá i cumpli cu requisito pa bautismo.

Sin embargo, tal bez anciano den bo congregacion ta sugeri pa bo spera. Of, si bo ta hoven, bo mayornan por bisábo spera. Anto, kico lo bo haci? No desanima. Tene presente cu drentamento den un relacion personal cu e Haltísimo ta un asunto mashá serio. Bo tin cu cumpli cu norma halto i mantenénan. Pues, scucha sugerencia duná i aplicánan cu tur bo curazón. Si bo no ta comprende completamente e motibo cu nan ta ser duná, no tene ripara, sino haci pregunta te cu bo realmente ta comprende cua preparacion bo tin cu haci.

En cambio, algun hende por vacila pa dal e paso grandi, locual nan ta yamé. Bo ta un hende asina? Naturalmente, bo por tin cierto motibo pakico bo mester tarda pa dedica i bautiza. Pero si bo ta cumpli cu tur requisito i toch ta hala atrás, ta bon pa bo puntra bo mes: “Kico ta strobámi di bautiza?” Analiza bo situacion cu oracion i mira si en berdad tin motibo válido pa bo sigi evita di acepta e invitacion di Jehova Dios di drenta den un relacion personal cuné.

‘Mi ta Mashá Hoven Ainda’

Si bo ta un hoven, tal bez bo ta pensa, ‘Mi ta mashá hoven ainda.’ Ta cierto cu tan tempo cu hovenan ta keda obediente i sumiso na nan mayornan cristian i ta aplica e Scritura lo mihor posibel, nan por tene confianza di cu Jehova Dios ta consideránan como “santo.” Realmente, e Bijbel ta bísanos cu e aprobacion divino di mayornan husto ta extende na yiu cu ta depende di nan. (1 Corintio 7:14) Sin embargo, e Bijbel no ta pone ningun límite pe edad di yiu ora e tempo di dependencia ta termina. P’sei, ta importante pa hovenan cristian considera seriamente e pregunta: ‘Mi mester bautiza?’

E Bijbel ta anima hovenan pa ‘corda nan Gran Creador den e dianan di nan hubentud.’ (Eclesiastés 12:1) En cuanto esei, nos tin ehempel dje hoven Samuel, cu “tabata sirbi dilanti Jehova, como un mucha.” També, tin ehempel di Timoteo, cu desde infancia a tuma na pecho e berdad cu su mama i abuela a siñé.—1 Samuel 2:18; 2 Timoteo 1:5; 3:14, 15.

Den e dia djawe, també, hopi hoven a dedica nan bida pa sirbi Jehova Dios. Akifusa, di 15 aña di edad, a bisa cu un parti den e Reunion di Sirbishi a yudé tuma su decision pa bautiza. Ayumi a bautiza ora e tabatin diez aña di edad. El a deseá di sirbi Jehova Dios pasobra e realmente a yega di stimé. Awor e tin 13 aña di edad i a caba di tene experencia di mira su studiante di Bijbel, cu també a yega di stima Jehova, bautiza ne edad di 12. Hikaru, e ruman menor di Ayumi, també a bautiza ne edad di diez aña. E ta corda: “Algun hende a bisa cu mi tabata mucho hoven, pero Jehova sa con mi a sintími. Mi a keda determiná di bautiza ya cu mi a decidi di dedica mi bida pa sirbié di tur mi curazón.”

Ehempel di mayornan també ta un factor, manera bo por mira den e experencia di un hermanita. Su tata a prohibi su mama di studia e Bijbel cuné i cu su ruman homber i muher. El a zútanan i a kima nan buki. Pero debí ne awante i fe di nan mama, e yiunan por a mira e importancia di sirbi Jehova Dios. E hovencita a bautiza ne edad di 13 aña, i su ruman homber i muher menor a sigi su ehempel.

‘Mi ta Mucho Bieu’

E salmista a bisa: “Boso, e bieunan hunto cu mucha . . . alaba e nomber di Jehova.” (Salmo 148:12, 13) Sí, hende di mas edad també tin cu reconoce e necesidad di pónenan di parti di Jehova Dios. No obstante, algun hende di mas edad tin e tendencia di evita hacimento di cambio. Nan ta kere cu “bo no por logra haci hende bieu cambia di idea.” Pero, corda cu fiel Abraham tabatin 75 aña di edad ora Jehova a bisé: “Sali for di bo tera i for di bo parientenan i bai ne tera cu mi ta mustrábo.” (Echo 7:3; Génesis 12:1, 4) Moisés tabatin 80 aña di edad ora Jehova a comisioné: “Saca mi pueblo . . . for di Egipto.” (Éxodo 3:10) Eseinan i otro homber tabatin raíz hundo den nan moda di biba ora Jehova a pídinan demonstra nan amor i dedicacion na dje. Nan no a vacila pa responde ne invitacion di Jehova.

Kico djawe? Shizumu tabata budista pa 78 aña ora el a cuminza studia e Bijbel. Su famía a oponé i ni sikiera a lagué studia den su mes cas. Despues di un aña so, el a mira e necesidad di dediqué na Jehova Dios, i el a bautiza. Pakico el a haci e cambio? El a bisa: “Religion falso a gañámi pa hopi aña, i awor mi kier sigi recibi e berdad di Jehova Dios pa semper.”

‘Loke ta Salbando Boso Awor’

Tempo ta cabando. Bida ta den peliger, incluyendo bo bida. Ta urgente pa bo considera seriamente e asunto di dedicacion na Jehova Dios i simboliza esei cu bautismo bao di awa. Apóstol Pedro a enfatiza esei, bisando: “Esei també ta salba boso awor, esta, bautismo.” El a sigi splica cu bautismo no ta “eliminacion di sushidad di carni” (hende ta haci esei caba promé cu nan por bautiza) “sino e peticion na Dios pa un bon concenshi.”—1 Pedro 3:21.

Ya cu nan ta cumpli cu requisito di ­Jehova Dios, disípel bautizá ta yega di obtene un bon concenshi. Si nan ta sigi haci nan posibel den e sirbishi di Jehova Dios, nan ta disfruta di paz mental i satisfaccion. (Santiago 1:25) Sobre todo, cu confianza nan por spera bendicion sin fin foi Jehova Dios den e binidero sistema nobo. Laga esei ser bo recompensa ora bo ta responde positivamente ne pregunta: ‘Mi mester bautiza?’

[Plachi na página 21]

Samuel a sirbi dilanti Jehova Dios como un mucha

[Plachi na página 22]

Moisés tabatin 80 aña di edad ora Jehova a comisioné

[Plachi na página 23]

Awe, tanto hende hoven como bieu cu ta bautiza por spera bendicion sin fin den e sistema nobo di Dios