Anciano—Delega Responsabilidad!

E TABATA un homber cu pacenshi i humildad, cu un sintimento intenso di husticia cu su experencia a templa durante su bida. P’sei, mas cu tres miyón homber, muher, i mucha a acudi na dje cu confianza en busca di direccion. El a purba di no desilusionánan. Di maínta te atardi el a scucha nan problema i cu pacenshi a yúdanan mira con pa aplica e ley di Dios den nan caso. Sí, pa un tempo breve Moisés so a huzga e 12 tribu di Israel mas cu 3.500 aña pasá.

Sin embargo, Jetró, suegro di Moisés, tabata preocupá. Con Moisés por sigi haci tanto trabao? P’sei, Jetró a bisa: “E manera cu bo ta haci esei no ta bon. Siguramente bo ta bai cansa, tanto abo como e pueblo cu ta cu bo, pasobra e tarea ei ta un carga mucho grandi pa bo. Bo no por hacié bo so.” (Éxodo 18:17, 18) Cua solucion tabatin? Jetró a conseha Moisés pa delega algun responsabilidad di dje na otronan. (Éxodo 18:19-23) Bon conseho!

Den e congregacion cristian djawe, tin hopi anciano, mescos cu Moisés, cu nan so ta purba di atende na mucho cos. Nan ta organiza reunion i ta prepara partinan pa presenta despues programa na moda ordená i eficaz. (1 Corintio 14:26, 33, 40; 1 Timoteo 4:13) Anciano també ta atende na necesidad di miembro individual dje congregacion. (Galatio 6:1; 1 Tesalonicense 5:14; Santiago 5:14) Nan ta hiba delantera den e trabao importantísimo di predica e bon nobo di Reino. (Mateo 24:14; Hebreo 13:7) Nan ta percura, també, pa literatura ser disponibel den e congregacion pa partimento cu público.

Además, algun anciano ta haya asignacion riba programa di asamblea di circuito i di districto. Nan ta traha den organizacion di asamblea i den comité di enlace cu hospital. Algun ta yuda cu construccion di Salón di Reino. I tur esei ta agregá na nan responsabilidad di famía i nan necesidad di alimento spiritual. (Compara cu Hosué 1:8; Salmo 110:3; 1 Timoteo 3:4, 5; 4:15, 16.) Con homber cristian asina ta haci tur esei? Mescos cu Moisés, nan mester haya yudanza. Nan mester siña delega responsabilidad. Realmente, hende cu no sa delega responsabilidad no ta un bon organizador.

E Bentaha di Entrená Otronan

Tin mas motibo pa delega responsabilidad. Den e comparacion di Jesús tocante talento, promé cu e doño a haci un biahe largu el a yama su esclabonan i a delega na nan diferente grado di responsabilidad. (Mateo 25:14, 15) Ora el a haci esei, e doño por a cumpli cu varios propósito. Promé, durante su ausencia, su esclabo a traha den lugar di dje i trabao necesario no a para ora e no tabatei. Di dos, siendo cu accion ta bisa mas cu palabra, e doño por a ripara e capacidad i lealtad di cada esclabo. Di tres, e doño a duna esclabo di dje oportunidad di gana experencia tanto necesario.

E comparacion tin un nificacion pa nos djawe. Ora Jesús a bandona e tera, el a asigna responsabilidad na disípel ungí di dje. E resto di eseinan ta responsabel ainda pa interés mundial dje Reino. (Lucas 12:42) Durante e mayordomía actual di esnan ungí, ta keda bisto cu e bendicion di Jehova ta riba su organizacion, i esei a resulta den un aumento maraviyoso. Sí, den e último cinco aña so, hopi mas cu un miyón hende nobo a simbolizá nan dedicacion cu bautismo bao di awa! Esei a resulta den miles di congregacion nobo i cientos di circuito nobo.

Mescos cu Jesucristo a delega responsabilidad ne “esclabo fiel i prudente,” nan també ta asigna responsabilidad di congregacion na anciano i sirbidor ministerial dje “otro carnénan.” (Mateo 24:45-47; Juan 10:16) No obstante, mas homber dedicá ta necesario pa atende ne aumento tremendo. Di unda nan lo bini? Anciano tin cu entrenánan. Pero, con anciano por entrená homber asina si nan no ta delega responsabilidad apropiado na homber cu ta parce capaz? Di ki otro manera anciano tin oportunidad di ripara e capacidad i lealtad di homber mas hoven?

Kico Kier Men Delega Responsabilidad?

Pa algun hende, “delega” kier men librábo di responsabilidad, evita, neglisha, of renuncia responsabilidad. Pero ora “delega” ta ser usá correctamente, esei realmente ta un manera pa cumpli cu responsabilidad. E nificacion dje verbo “delega” na papiamento ta: “Confia na otro persona; nombra como bo representante; asigna responsabilidad of autoridad.” Sin embargo, esun cu ta delega na otro ta keda finalmente responsabel pa loke ta ser hací.

Por ta cu algun ta nenga di delega responsabilidad pasobra nan tin miedu cu nan lo perde control. Pero, delegacion di responsabilidad no ta indica perdimento di control. Aunque Cristo Jesús ta invisibel i ta goberna foi cielo, e tin pleno control dje congregacion cristian. En buelta, e ta confiá na homber di experencia e cuido dje congregacion.—Efesio 5:23-27; Colosense 1:13.

Kizás otronan ta prefera di no delega responsabilidad pasobra nan ta kere cu nan mes por haci e trabao mas lihé. Pero, Jesús a mira e bentaha di entrena otronan. Ningun hende riba tera a siña mas efectivo cu Jesús. (Juan 7:46) Pero, despues di a duna instruccion na 70 disípel di dje, el a mándanan pa bai predica. Aunque nan capacidad di siña no tabata igual cu esei di Jesús, nan a bolbe yen di gozo riba nan bon éxito. Jesús a alegra cu nan i a encomendánan, pasobra e tabata sa cu nan lo sigi haci e trabao hopi tempo despues cu el a bai i despues por haci hopi mas cu loke e por trahando so.—Lucas 10:1-24; Juan 14:12.

Delegacion també kier men haya yudanza pa atende na detaye necesario. E dia promé cu e morto di Jesús, el a asigna Pedro i Juan pa haci preparacion necesario pe último cena di pascu. (Lucas 22:7-13) Jesús no tabatin cu preocupa pa cumpra lamchi, biña, pan sin zuurdeeg, i yerba amarga; ni e no tabatin cu percura cos di cushina pa cushiná. Pedro i Juan a atende na tal de­taye.

Anciano djawe por disfruta di beneficio similar si nan ta imita ehempel di Jesús. Por ehempel, nan por pidi e ruman cu ta atende na literatura bestel literatura necesario pa un binidero campaña. Nan por instruyé pa check cuenta pa determina cuanto literatura nan a usa den campaña anterior. També, e por tuma na cuenta e situacion den e territorio dje congregacion promé cu e ta yena e formulario di pedido. Anto e por pasa e formulario ne secretario dje congregacion pe repasé. Despues cu e sirbidor di literatura ta siña su trabao, no ta necesario mas pe secretario bolbe controla e cuenta tan tempo cu e total riba e pedido ta razonabel. Sin duda, e simple acto di delega responsabilidad ta haci mas fácil i senciyo e pedido di literatura pa tur hende con­cerní.

Den bista di posibel beneficio asina, con bo por delega responsabilidad efectiva­mente?

Con pa Delega Responsabilidad

Splica e trabao. Promé cu tur, haci claro e resultado cu bo ta spera. “Haci negoshi te cu mi bini” ta loke e “homber di categoría” a bisa e diez esclabo den e comparacion di Jesús tocante mina. (Lucas 19:12, 13) E doño a spera pa esclabo negociá i gana placa cu su mina, anto informé di nan ganashi ora el a bolbe. Nan tabata sa loke nan mester a haci. Con e principio ei por aplica den un proyecto di construccion di Salón di Reino djawe? Por ehempel, e ruman asigná pa drecha e dak lo ser bisá normalmente cua material pa usa, unda pa háyanan, i ki ora pa cuminza traha, tumando na cuenta e clima. Instruccion específico asina ta percura pa un bon organizacion.

Ta importante pa splica no solamente e alcance dje trabao sino també cua decision un persona ta autorizá pa tuma i cua asunto ta bao di otro persona. Moisés a bisa huez cu el a nombra cu nan por huzga caso chikito, pero caso dificultoso tabatin cu bini dilanti dje.—Éxodo 18:22.

Ora bo ta asigna responsabilidad, percura pa no duna e mesun trabao na dos persona. Tin confusion ora mas cu un persona ta ser asigná ne mesun trabao. Imaginábo loke lo pasa na un asamblea grandi di Testigo di Jehova si e departamento di limpieza i també e servicio di cuminda tabata duná e responsabilidad di tene limpi e lugar di sirbi cuminda, of si departamento di usher i també e departamento di bautismo tabata asigná pa dirigi hende observador durante bautismo.

Scoge homber capaz. Jetró a conseha Moisés: “Scoge for di pueblo homber capaz, temeroso di Dios; homber di confianza, enemigo di ganashi ilegal, i pónenan riba e pueblo.” (Éxodo 18:21, Bover-Cantera) Claramente, hende mester tin calidad spiritual promé. Pa determina si un hende ta “capaz” pa haci e trabao necesario, bo mester tuma na cuenta factor tal como rasgo di personalidad, experencia, entrenamento, i talento. Pues, homber cristian cu tin un disposicion specialmente amistoso, agradabel i cu ta gusta yuda, probablemente por traha bon como sirbidor di revista of usher. Di igual manera, ora bo ta scoge un persona pa yuda e secretario dje congregacion, lógicamente bo tin cu tuma na cuenta si e ta ordená. E ta atende na detaye, e ta confiabel, i por warda cos confidencial? (Lucas 16:10.) Pa yudábo scoge e homber ideal pe trabao, ta importante pa considera tal factor además di calidad spiritual necesario.

Percura recurso necesario. Sirbidor tin mester di cierto recurso na nan disposicion pa haci e trabao asigná. Kizás e tin mester di herment, fondo, of yudanza. Asigna suficiente recurso. Por ehempel, un ruman por ta pidí pa haci cierto mantenecion necesario riba Salón di Reino. Claramente, bo mester bisé loke mester ta hací, pero també kizás e tin mester di placa pa cumpra material necesario. Kizás e tin mester di yudanza. Pues, anciano por pidi otronan yudé of haci anuncio den e congregacion bisando cu Ruman Fulano ta bai haci tal i tal trabao riba salón, i kizás lo e pidi algun di boso pa yudé.’ Percuracion asina por evita dunamento di asignacion sin percura recurso necesario. “No asigna na mitá,” ta loke un consehero di administracion a bisa tocante esei.

Ora bo ta asigna responsabilidad, informa otro hende cu tal persona ta actua den lugar di bo. E autoridad pa actua pa bo també ta un recurso. Hosué tabata comisioná como e lider nobo di Israel dilanti “tur e asamblea.” Moisés tabata mandá pa “pone algun di [bo] dignidad riba dje.” (Número 27:18-23) Den e organizacion dje congregacion, bo por haci mescos pa medio di simplemente pone riba borchi di informacion un lista di esnan cu tin asignacion.

Apoya nan decision. Awor esun asigná por pone man na obra. Pero, no lubida cu bo por ta un berdadero fuente di animacion pe si bo ta apoya bon decision cu e ta tuma. Por ehempel, kizás como anciano bo tin bo mes preferencia en cuanto unda bo ta pone microfón i muebel riba plataforma di Salón di Reino, tal bez un poco diferente di loke e ruman asigná ta haci. Pero, si e ruman cu ta atende ne plataforma ta ser duná algun libertad pa haci e trabao, probablemente lo e gana confianza i experencia. Además, e asta por mehora e situacion. Un consehero di comerciante a bisa: “Delegá e trabao, no delega con e mester ta hací. . . . Hopi bez bo ta duna rienda liber na talento creativo.”

Además, e ruman cu ta haci e trabao personalmente, hopi bez ta mas cerca e situacion cu abo i p’sei por comprende mihor e problemanan relacioná cuné. Probablemente lo e trata cu tal problema cu solucion cu berdaderamente ta práctica. També e por trata cu factor cu otro hende no ta mira. P’sei, manera un superintendente cristian a bisa di un asistente cu experencia: “Si e ta bisa cu el a topa cu problema, mi tin cu confia loke e ta bisa.”

Sí, e recurso di mas balor pa anciano cristian ta hende homber i muher cu ta dedicá i capaz pa yuda di cualkier manera cu bo ta bísanan. Anciano, probecha di tal recurso balioso! Delegacion di responsabilidad ta un indicacion di modestia i por minimizá presion i frustracion. Dje manera ei, bo no solamente por haci mas, sino bo ta duna na otronan e oportunidad di gana experencia necesario.