Pastoreando Tiernamente Jehova Su Carnénan Precioso

E ANCIANONAN a scucha cu sumo atencion. Nan a biaha rond di 50 km for di Efeso te Mileto pa ricibí instruccion for di apostel Pablo. Awor nan tabata tristu pa tende cu esaki lo tabata e último biaha cu nan lo a mir’é. Pues nan tabata sa cu e siguiente palabranan lo tabata di masha importancia: “Presta atencion na boso mes i na tur e tou, entre cua e spiritu santu a nombra boso como superintendente, pa pastoreá e congregacion di Dios, cua el a cumpra cu e sanger di su propio Yu.”—Echo 20:25, 28, 38.

Pablo su referencia breve na wardadornan siguramente a transmití un rikesa di informacion n’e ancianonan efeso ei. Nan tabata conocí cu e trabou di cuida carné den cunucu den becindario. Nan tabata conocí tambe cu e hopi referencianan na wardadornan den e Scritura Hebreo. I nan tabata sa cu Jehova a compará su mes cu un Wardador di su pueblo.—Isaías 40:10, 11.

Pablo a papia di nan como “superintendente” entre “e tou,” i como “wardadornan” dje “congregacion.” Miéntras cu e término “superintendente” ta indicá kico nan asignacion ta, e palabra “wardador” ta describí con nan tin cu cumpli cu tal superintendencia. Sí, superintendentenan mester a cuida cada miembro dje congregacion den e mésun manera amoroso cu un wardador lo a atendé su tou di carné.

Awe, poco anciano tin experencia di bida real den cuida carné literal. Pero Bijbel ta haci asina tantu referencia na tantu carné como wardador, specialmente den sentido figurativo, cu e palabranan di Pablo tin un impacto eterno. I nos por siña hopi for di relato di wardadornan cu Dios a faborecé den tempu antiguo. Nan ehempel notabel por yuda ancianonan di tempu moderno mira ki cualidadnan nan mester desaroyá pa por pastoreá e congregacion di Dios.

David, e Wardador Sin Miedu

Ora nos pensa di wardadornan di tempu bíblico, muy probablemente nos lo corda David, pasobra el a cuminsá como wardador di carné. Un dje promé lesnan cu nos ta siña for dje bida di David ta cu e posicion di wardador no ta unu di prominencia. Realmente, ora profeta Samuel a yega pa ungi un yu di Jesse como e futuro rey di Israel, e hóben David a ser pasá por haltu henteramente na promé instante. Tabata solamente despues cu Jehova a rechasá su siete rumannan mas grandi cuné, cu David a ser mencioná, kende tabata pafó den cunucu ta ‘duna yerba na carné.’ (1 Samuel 16:10, 11) No obstante, e añanan cu David a pasa como wardador a prepar’é p’e trabou exigente di pastoreá e nacion di Israel. “[Jehova] a scoge David su sirbidor i a tum’é for di curá di carné . . . pa ta un wardador riba Jacob, su pueblo,” segun Salmo 78:70, 71. Apropiadamente, David a skirbi e bunita i bon-conocí Salmo 23, cuminsando cu e palabranan: “Jehova ta mi Wardador.”

Mescos cu David, ancianonan den e congregacion cristian mester sirbi como sub-wardadornan humilde i no busca indebido prominencia. Manera apostel Pablo a skirbi na Timoteo, esnan cu ta forsa pa alcansá e responsabilidad di pastoreá aki ta “deseoso pa un obra excelente,” no prominencia.—1 Timoteo 3:1.

Aunke David su trabou como wardador literal tabata humilde, tin biaha el a exigí hopi curashi. Por ehempel, ora na un ocasion un leon, i na un otro ocasion un oso a lastra carné dje tou di David su tata bai cuné, sin miedu el a confrontá i a mata e bestianan salbahe. (1 Samuel 17:34-36) Esaki tabata un manifestacion notabel di curashi si bo considerá cu un leon por mata bestia muchu mas grandi cu su mes curpa. I e oso maron sirio cu tabata biba na Palestina, cu por pisa te 140 kg, por mata un biná cu un solo golpi di su pata fuerte.

David su interes yen di curashi den e carnénan di su tata ta un ehempel excelente pa wardadornan den e congregacion cristian. Apostel Pablo a spierta e ancianonan di Efeso contra “lobonan opresivo” cu lo “no trata e tou cu ternura.” (Echo 20:29) Den tempu moderno tambe, lo presentá ocasionnan ora wardadornan cristian tin cu mustra curashi afin di protehá e bienestar spiritual dje carnénan di Jehova.

Aunke e carnénan tin cu ser protehá cu curashi, nan mester ser tratá tambe cu e máximo ternura, na imitacion dje wardador amoroso, David, i e Wardador Excelente, Jesucristo. (Juan 10:11) Sabiendo cu e tou ta pertenecé na Jehova, ancianonan nunca mester ta opresivo riba e carnénan, “birando señor riba esnan cu ta herencia di Dios.”—1 Pedro 5:2, 3; Mateo 11:28-30; 20:25-27.

Rindiendo Cuenta

Patriarca Jacob tabata un otro wardador bon-conocí. El a considerá su mes personalmente responsabel pa cada carné individual confiá na su cuido. Pues el a percurá fielmente p’e tounan di su suegro, Laban, cu despues di 20 aña den su servicio, Jacob por a bisa: “Bo carnénan hembra i bo cabritunan hembra no a sufri di aborto, i e chubatunan di carné di bo tou mi nunca a come. Ningun animal habracá na pida mi a trece pa bo. Mi mes lo a sufri e pérdida di dje. Si un a ser hortá di dia of a ser hortá den anochi, lo bo a demand’é di mi man.”—Génesis 31:38, 39.

Superintendentenan cristian ta manifestá un interes asta mas grandi p’e carnénan cu e Wardador di nos alma, Jehova Dios, “a cumpra cu e sanger di su propio Yu.” (Echo 20:28; 1 Pedro 2:25; 5:4) Pablo a enfatisá e responsabilidad pisá aki ora el a recordá e cristiannan hebreo cu e hombernan cu ta hiba delantera den e congregacion “ta vigilando riba boso alma como esnan cu tin cu rindi cuenta.”—Hebreo 13:17.

E ehempel di Jacob tambe ta mustra cu e trabou di un wardador no tin límite di tempu. E ta un trabou di dia-i-anochi i hopi biaha ta rekerí sacrificio propio. El a bisa Laban: “Tabata mi experencia cu di dia calor a caba cu mi, i anochi e frialdad, i mi soño tabata hui di mi wowonan.”—Génesis 31:40.

Esaki siguramente ta e caso cu hopi anciano cristian amoroso awe, manera e siguiente experencia ta ilustrá. Un ruman a ser tumá den e unidad di cuido intensivo di un hospital despues cu un exámen di tumor di celebro a resultá den complicacion. Su famia a haci areglo pa ta cerca dje den e hospital dia i anochi. Pa duna sosten moral i animacion necesario, un dje ancianonan local a ahustá su programa ocupá p’e por a bishitá e homber enfermo i su famia tur dia. Ma pa motibu dje tratamentu diario intensivo dje hospital, no tabata semper posibel p’e haci bishita durante dia. Esaki a nificá cu e anciano hopi biaha tabatin cu bai hospital masha lat anochi. Pero gustosamente el a bai tur anochi. E anciano a bisa: “Mi a realisá cu lo mi mester a haci bishita na un ora cumbiniente p’e pashent, no un ora cumbiniente pa mi.” Ora e ruman a recuperá suficientemente pa ser trasladá pa un otro área dje hospital, e anciano a sigui cu su bishitanan diario animador.

Loke Moises A Siña como Wardador

Bijbel ta describí Moises como “pa hopi e homber di mas mansu cu tur cu tabatin riba superficie dje suela.” (Número 12:3) Sin embargo, e registro ta mustra cu esaki no semper tabata e caso. Como yoncuman, el a mata un egipcio dor cu e último aki a dal un compañé israelita. (Éxodo 2:11, 12) Esaki siguramente no tabata accion di un persona mansu! Tog, despues Dios lo a usa Moises pa guia e nacion di miyones di hende atraves dje desierto n’e Tera Primintí. Claramente, n’e tempu ei, Moises tabatin mester di mas entrenamentu.

Aunke Moises a ricibí caba entrenamentu seglar “den tur e sabiduria dje egipcionan,” mas tabata necesario p’e pastoreá e tou di Jehova. (Echo 7:22) Ki forma e entrenamentu adicional aki lo por a tuma posiblemente? Wel, pa 40 aña Dios a permití Moises sirbi como un wardador humilde den e tera di Madian. Segun cu el a cuida e tounan di su suegro, Jetro, Moises a desaroyá cualidadnan excelente manera pacenshi, pa ser mansu, humildad, gran pacenshi, genio suave i dominio propio. Tambe el a siña spera riba Jehova. Sí, cuidando carné literal a cualificá Moises pa ta un wardador capas dje nacion di Israel.—Éxodo 2:15–3:1; Echo 7:29, 30.

Esakinan no ta net e cualidadnan cu un anciano mester pa cuida e pueblo di Dios awe? Sí, pasobra Pablo a recordá Timoteo cu “un esclabo dje Señor . . . mester ta amabel pa cu tur, cualificá pa siña, manteniendo su mes restringí bou di maldad, instruyendo cu suavedad esnan cu no ta favorablemente dispuesto.”—2 Timoteo 2:24, 25.

Kisas tin biaha un anciano ta sinti su mes desapuntá debí cu e tin dificultad pa desaroyá e cualidadnan aki na plenitud. No obstante, e no mester entregá. Mescos cu Moises, lo por tuma un tempu largu pa desaroyá completamente e cualidadnan necesario pa un persona por ta un bon wardador. Sin embargo, cu tempu, tal esfuerso sincero lo ser recompensá.—Compará cu 1 Pedro 5:10.

Como anciano, talbes bo no ta ser usá mes tantu cu otronan. Por ta asina cu, mescos cu Moises, Jehova ta permitiendo bo desaroyá cierto cualidadnan importante mas plenamente? Nunca lubidá cu Jehova “ta interesá den bo.” Sin embargo, tambe nos mester tene na mente e necesidad pa ‘faha nos mes cu humildad di mente un pa cu otro, pasobra Dios ta oponé esnan cu pechu haltu pero ta duna bondad inmerecí na esnan humilde.’ (1 Pedro 5:5-7) Si bo ta haci esfuerso i ta aceptá e entrenamentu cu Jehova ta permití, bo por ta mas útil p’e, mescos cu Moises tabata.

Tur Jehova su Carnénan Ta Precioso

Wardadornan amoroso i confiabel di tempu bíblico tabatin un sentido di responsabilidad pa cu cada carné individual. Mescos mester ta cierto di wardadornan spiritual. Esaki ta claro for di Pablo su palabranan: “Presta atencion na . . . tur e tou.” (Echo 20:28) Ken lo ta incluí den “tur e tou”?

Jesus a duna un ilustracion tocante un homber cu tabatin cien carné pero cu mesora a busca un cu a dwal afin di trec’é bek n’e tou. (Mateo 18:12-14; Lucas 15:3-7) Di igual manera un superintendente mester tin interes den cada miembro dje congregacion. Inactividad den e ministerio of den asistencia na reunionnan cristian no ta nificá cu e carné no ta parti mas dje tou. E ta keda parti di “tur e tou” pa kende e ancianonan mester “rindi cuenta” na Jehova.

Un cuerpo di anciano a bira basta preocupá cu algun cu a asociá cu e congregacion, a drif bai den inactividad. Nan a prepará un lista dje personanan aki i a haci esfuerso special pa bishitá nan i yuda nan regresá n’e curá di carné di Jehova. Ki agradecido na Dios e ancianonan aki tabata cu durante un periodo di dos aña i mei, nan por a yuda mas cu 30 persona bira activo den sirbishi di Jehova atrobe. Un di esnan cu a ser yudá asina tabata inactivo pa rond di 17 aña!

E peso dje responsabilidad aki ta ser imprimí mas aleu riba superintendentenan p’e echo cu e carnénan a ser “cumprá cu e sanger di [Dios su] propio Yu.” (Echo 20:28) Ningun prijs mas haltu por a ser pagá p’e carnénan precioso aki. I pensa di tur e tempu i esfuerso cu ta ser dedicá den e ministerio pa localisá i yuda cada persona semehante na carné! No mester haci un esfuerso similar pa tene nan tur den e curá di carné di Dios? Siguramente, cada carné den e congregacion ta precioso.

Asta ora un miembro dje tou bira enbolbí den malecho serio, e responsabilidad dje ancianonan no ta cambia. Nan ta sigui ser wardadornan interesá, haciendo tiernamente i suavemente tur esfuerso posibel pa salba e malechor. (Galatio 6:1, 2) Lamentablemente, den cierto caso ta bira bisto cu un miembro dje congregacion ta falta duele piadoso pa picá serio cu el a cometé. E ora ei wardadornan amoroso tin un responsabilidad bíblico pa protehá e resto dje tou contra e influencia contaminador aki.—1 Corintio 5:3-7, 11-13.

Asina mes, Jehova Dios ta pone e ehempel perfecto di extendé misericordia na carné cu ta dwal. Nos Wardador compasivo ta bisa: “Esun perdí lo mi busca, i esun plamá lo mi trece bek, i esun kibrá lo mi mara cu verband i esun enfermo lo mi fortalecé.” (Ezekiel 34:15, 16; Jeremías 31:10) Imitando e ehempel magnífico aki, un areglo amoroso a ser hací pa wardadornan spiritual di tempu moderno bishitá personanan expulsá, kendenan kisas ta repondé awor na nan yudansa. E esfuersonan misericordioso aki pa recobrá tal carné perdí a producí bon fruta. Un ruman muher cu a ser restorá a bisa: “Ora e ancianonan a bishitá mi, tabata e animacion cu mi tabatin mester pa bini bek.”

No cabe duda cu e palabranan di Pablo n’e ancianonan efeso na Mileto tabata cargá cu nificacion—pa nan i pa superintendente awe. Su referencia na wardadornan tabata un recordatorio dje cualidadnan atractivo cu mester ta bisto den superintendente—cualidadnan manera humildad i curashi, segun e ehempel cu e wardador-rey David a pone; un sentido personal di responsabilidad i cuido protectivo, bisto den e sirbishi di dia-i-anochi di Jacob; i un boluntad pa aceptá mas entrenamentu cu pacenshi, manera Moises a mustra. En berdad, e ehempelnan bíblico aki lo yuda ancianonan di congregacion desaroyá i manifestá e cualidadnan necesario afin cu nan por ‘pastoreá tiernamente e congregacion di Dios, cua el a cumpra cu e sanger di su propio Yu.’