Amor pa Próhimo Ta Posibel

E ILUSTRACION di Jesucristo dje samaritano a mustra loke berdadero amor pa próhimo realmente kier men. (Lucas 10:25-37) Jesus a siña tambe: “‘Bo mester stima Jehova bo Dios cu tur bo curason i cu tur bo alma i cu tur bo mente.’ Esaki ta e mandamentu di mas grandi i esun promé. E di dos, mescos cuné, ta esaki, ‘Bo mester stima bo próhimo mescos cu bo mes.’”—Mateo 22:37-39.

Bo ta haña ta difícil, manera hopi hende, pa stima bo próhimo di un grupo étnico cu no ta esun di bo? Talbes esaki ta asina pasobra bo a siña tocante of a experenciá personalmente discriminacion i inhusticia. Kisas abo of bo stimánan asta a sufri di abusu na man di hende di un otro grupo.

Ya cu Jesus a indicá cu un di Dios su mandamentunan ta pa nos stima nos próhimo, mester ta posibel pa vence sintimentu fuerte asina. E clave pa haci esei ta pa mira hende mescos cu Dios i Cristo ta mira nan. Tocante esaki laga nos considerá e ehempel di Jesus i e promé cristiannan.

Ehempel Excelente di Jesus

Hudiu di promé siglo tabatin sintimentu fuerte contra e samaritanonan, un pueblo cu tabata biba den un área entre Hudea i Galilea. Na un ocasion opositornan hudiu a puntra Jesus cu desprecio: “Nos no ta bisa corectamente, Bo ta samaritano i tin demoño?” (Juan 8:48) Sintimentu anti-samaritano tabata asina fuerte cu algun hudiu asta a maldicioná e samaritanonan públicamente den sinagoga i a resa diariamente p’e samaritanonan no haña bida eterno.

Conocimentu dje odio profundo aki sin duda a insta Jesus pa duna e ilustracion tocante e samaritano kende a proba di ta un berdadero próhimo dor di percurá p’e homber hudiu batí pa ladron. Con Jesus por a contestá ora e homber hudiu versá den e ley di Moises a puntra: “Ken realmente ta mi próhimo?” (Lucas 10:29) Wel, Jesus por a contestá directamente dor di bisa: ‘Bo próhimo ta incluí no solamente bo compañé hudiu sino tambe otro hende, asta un samaritano.’ Sin embargo, hudiu lo a haña esei difícil pa aceptá. Pues el a conta e ilustracion tocante un hudiu kende a ricibí misericordia di un samaritano. Asina Jesus a yuda e oyentenan hudiu saca e conclusion cu berdadero amor pa próhimo lo a extendé na hende no-hudiu.

Jesus no tabatin sintimentu anti-samaritano. Biahando dor di Samaria na un ocasion, el a sosegá cerca un pos miéntras su disipelnan a bai n’e stad cercano pa cumpra cuminda. Ora un muher samaritano a bin pa saca awa, Jesus a bisa: “Duná mi awa pa bebe.” Ya cu hudiu no tabatin trato cu samaritano, e muher a puntra: “Con bini cu abo, apesar di ta un hudiu, ta pidí mi awa pa bebe, siendo cu mi ta un muher samaritano?” Anto Jesus a dun’é testimonio, asta declarando abiertamente cu e tabata e Mesías. E muher a reaccioná dor di bai den e stad i yama otronan pa bin i scucha Jesus. E resultado? “Hopi dje samaritanonan for dje stad ei a pone fe den dje.” Ki un bunita resultado pa motibu cu Jesus no tabata mará dor dje actitud predominante di su contemporáneonan hudiu!—Juan 4:4-42.

Dios No Ta Parcial

Tabata Dios su propósito pa Jesus predicá principalmente n’e hudiunan, “e carnénan perdí dje cas di Israel.” (Mateo 15:24) P’esei, su promé siguidornan tabata di antecedencia hudiu. Pero djis tres aña despues dje dramamentu di spiritu santu na Pentecoste 33 E.C., Jehova a haci cla cu e tabata kier pa creyentenan hudiu extendé e trabou di haci disipel na hende dje nacionnan, e gentilnan.

P’e mente hudiu, pa stima un samaritano mescos cu bo mes lo tabata bastante difícil. Lo tabata asta mas difícil pa mustra amor pa próhimo na gentil incircuncidá, hendenan cu tabatin ménos en comun cu hudiu cu loke e samaritanonan tabatin. Comentando riba e actitud di hudiu pa cu gentil, The International Standard Bible Encyclopaedia ta declará: “Nos ta haña, den tempu di T[estament] N[obo], e repugnancia, desprecio i odio di mas extremo. Nan [gentil] a ser considerá como impuru, cu ken tabata ilegal pa tene cualkier relacion amistoso. Nan tabata e enemigunan di Dios i di Su pueblo, na ken e conocimentu di Dios a ser nengá aménos cu nan a combertí, i asta e ora ei, nan lo no por a ser admití na compañerismo completo, manera den tempu di antigua. Hudiu a ser prohibí pa consehá nan, i si nan a puntra tocante cosnan divino nan mester a ser maldicioná.”

Aunke hopi tabatin tal punto di bista, Jehova a laga apostel Pedro experenciá un vision den cua el a ser bisá pa ‘stop di yama contaminá e cosnan cu Dios a haci limpi.’ Anto Dios a dirigi’é n’e cas dje gentil Cornelio. Pedro a duna un testimonio tocante Cristo na Cornelio, su famia i otro gentilnan. Pedro a bisa, “Cu siguransa mi ta percibí cu Dios no ta parcial, sino cu den tur nacion, esun cu ta tem’é i ta obra husticia ta aceptabel p’e.” Miéntras Pedro tabata predicando ainda, spiritu santu a drama riba e creyentenan nobo, kendenan a bautisá e ora ei i a bira e promé siguidornan gentil di Cristo.—Echo, capítulo 10.

E siguidornan hudiu a aceptá e desaroyo aki, realisando cu Jesus su mandamentu pa “haci disipel di hende di tur nacion” no tabata limitá na hudiu den tur pais sino a incluí e gentilnan. (Mateo 28:19, 20; Echo 11:18) Venciendo cualkier sintimentu anti-gentil cu nan por tabatin, nan a organisá celosamente un campaña di predicacion pa haci disipel entre e nacionnan. Ménos cu 30 aña despues, por a bisa cu e bon nobo a ser predicá “den tur creacion cu tin bou di cielu.”—Colosense 1:23.

Esun cu a encabesá e trabou di predicacion aki tabata apostel Pablo, e mes, un cristian di antecedencia hudiu. Promé cu el a bira un siguidor di Cristo, e tabata un miembro celoso dje secta religioso di fariseo. Nan a despreciá no solamente e gentilnan sino asta hende comun di nan mes nacionalidad. (Lucas 18:11, 12) Pero Pablo no a laga tal punto di bista strob’é di mustra amor pa próhimo na otronan. Mas bien, el a bira “un apostel p’e nacionnan [gentil],” dedicando su bida n’e trabou di haci disipel atrabes dje paisnan mediteráneo.—Romano 11:13.

Durante e curso di su ministerio, Pablo a ser piedrá, batí i encarcelá. (Echo 14:19; 16:22, 23) Tal experencia brutal a pon’é bira amargá i concluí cu e tabata desperdiciando su tempu entre cierto nacion i grupo étnico? Di ningun manera. E tabata sa cu tabatin personanan di curason onrado plamá entre e hopi gruponan étnico di su dia.

Segun Pablo a haña gentilnan dispuesto pa siña e camindanan di Dios, el a yega na stima nan. Por ehempel, n’e tesalonicensenan el a skirbi: “Nos a bira amabel meimei di boso, manera ora un mama cu yu na pechu ta cariciá su mes yunan. Pues, teniendo tierno cariño pa boso, cu hopi agrado nos a compartí cu boso, no solamente e bon nobo di Dios, sino tambe nos mes alma, pasobra boso a bira nos stimánan.” (1 Tesalonicense 2:7, 8) E palabranan sincero aki ta mustra cu Pablo berdaderamente a stima e tesalonicensenan gentil i no a permití nada daña e goso di un bon relacion cu nan.

Amor pa Próhimo na Accion

Awe, mescos cu den e promé siglo, esnan cu ta pega nan mes n’e congregacion cristian ta cultivá amor pa próhimo pa hende di tur grupo étnico. Dor di desaroyá un punto di bista mescos cu di Dios di otronan i dor di compartí e bon nobo di Reino cu nan, berdadero cristiannan a amplia nan comprendimentu di hende cu nan kisas nunca lo a yega na conocé. Nan asta tin amor fraternal pa nan. (Juan 13:34, 35) Esaki por ta bo experencia tambe.

Tal amor ta existí entre Testigonan di Jehova, aunke nan ta ser hañá den 229 pais i ta representá “tur nacion i tribu i pueblo i lenga.” (Revelacion 7:9) Como un hermandad mundial, nan ta uní den e adoracion di Jehova, den nan nengamentu pa tuma parti den conflicto i rivalidad étnico, i den nan rechaso di prehuicio cu ta horta hende di un relacion caluroso cu nan próhimo.

Asociá cu e Testigonan, i lo bo observá con hende di tur antecedencia étnico ta haciendo e boluntad di Dios. Lo bo mira amor pa próhimo na accion segun cu nan ta proclamá e bon nobo dje Reino di Dios. Sí, i den nan congregacionnan, lo bo topa hende bondadoso i sincero kendenan ta mustra mediante nan bida cu nan berdaderamente a siña stima nan próhimo.

[Picture on page 6]

Den e congregacionnan di Testigo di Jehova lo bo haña hende felis di tur rasa

[Picture Credit Line on page 4]

Yegada dje Bon Samaritano n’e Posada/The Doré Bible Illustrations/Dover Publications, Inc.