Un Herencia Cristian Precioso
SEGUN CU BLOSSOM BRANDT A CONTÉ
Sneu a cai den San Antonio, Texas, dia 17 di Januari di 1923, e dia cu mi a nace. A haci friu pafó, pero braza caloroso di mayornan cristian amoroso a recibími, esta, Judge i Helen Norris. Segun mi memoria di mas promé, tur loke mi mayornan a haci a concentra riba nan adoracion di Jehova Dios.
NA 1910, ora mi mama tabatin ocho aña di edad, su mayornan a muda for di cerca Pitsburgo, Pensilvania, na un farm cerca Alvin, Texas. Nan a alegra pa siña e berdad bíblico for di nan beciña ei. Mama a dedica e resto di su bida haciendo esfuerzo pa interesá hende den e speranza dje Reino. El a bautiza na 1912 despues cu su famía a muda na Houston, Texas.
Mama i su mayornan a conoce Charles T. Russell, e promé presidente dje Sociedad Watch Tower, ora el a bishita nan congregacion den Houston. Hopi bez mi famía a recibi den nan cas representante biahero dje Sociedad, cu tabata yamá peregrino ne tempo ei. Un poco aña despues, Mama a muda cu su mayornan na Chicago, Illinois, i ruman Russell a bishita e congregacion ei també.
Na 1918, Madushi a haya grip spañol i debi ne efecto debilitador riba su salud, docter a recomenda pe biba den un clima mas caloroso. Siendo cu Padushi a traha pe compañía Pullman di trein, na 1919 el a haya un transferencia na Texas atrobé. Den San Antonio, Texas, Mama a conoce un miembro hoven i celoso dje congregacion yamá Judge Norris. Nan a gusta otro un bez, i cu tempo nan a casa, i Judge a bira mi tata.
Papa a siña e berdad
Judge (huez) tabata duná su nomber raro ora el a nace. Ora su tata a miré pe promé bez, el a bisa: “E mucha ei ta mes serio cu un huez,” i esei a bira su nomber. Na 1917, ora Papa tabatin 16 aña di edad, e tabata duná dos tratado titulá na inglés Unda ta hende morto? i Kico ta e alma? cu e Sociedad di Bijbel i Tratado Watch Tower a publica. E tata di Papa a muri dos aña promé, i e dos tratado a duné e contesta cu e tabata busca tocante estado di hende morto. Un poco despues el a cuminza asisti na reunion di Studiante di Bijbel, e nomber di Testigo di Jehova ne tempo ei.
Mesora Papa kier a participa den actividad dje congregacion. El a obtene territorio unda e por a predica, i despues di scol el a bai na dje cu su bicicleta i a parti tratado. El a bira totalmente ocupá den compartimento di speranza dje Reino, i dia 24 di Mart di 1918, el a bautiza bao di awa pa simboliza su dedicacion na Jehova Dios.
E sigiente aña ora Mama a muda na San Antonio, e atencion di Papa tabata halá na loke el a yama “e sonrisa di mas dushi i wowo di mas blau” cu el a yega di mira. Pronto, nan a duna di conoce cu nan kier a casa, pero nan tabatin un tempo dificultoso convenciendo e mayornan di Mama. Sin embargo, dia 15 di April di 1921, nan casamento a tuma lugar. Nan dos tabatin como nan meta e ministerio di tempo completo.
Comienzo pronto den e ministerio
Ora Mama i Papa tabata ocupá planeando pa asisti ne asamblea na 1922 den Cédar Point, Ohío, nan a descubri cu Mama tabata na estado. Un poco tempo despues di mi nacimento, ora Papa tabatin 22 aña di edad so, e tabata nombrá como director di sirbishi dje congregacion. Esei kier men cu el a haci tur arreglo pe sirbishi di feld. Den poco siman so, Mama a hibámi den e ministerio di cas pa cas. Realmente, mi abuelo i abuela també a gusta hibámi den e ministerio cu nan.
Ora mi tabatin dos aña di edad so, mi mayornan a muda na Dallas, Texas, i nan a cuminza e ministerio di tempo completo como pionero tres aña despues. Anochi nan a drumi riba cama portátil cant’i camina i a ponémi riba asiento patrás di auto. Naturalmente, mi a goza esei, pero pronto a sali na cla cu nan no tabata prepará pe bida di pionero ainda. P’sei, Papa a cuminza un negoshi. Cu tempo el a traha un caravana chikito como preparacion pa bira pionero di nobo.
Promé cu mi a cuminza scol, Mama a siñámi leza i skirbi, i mi tabata sa e “tafelnan” di un te cuater. Semper su doel tabata pa yudámi siña. El a ponémi para riba un stoel cant’i dje pa seca tayó ora el a lábanan i el a siñámi texto bíblico di memoria i canta cantica di alabanza.
Sirbiendo Dios cu mi mayornan
Na 1931 nos tur a asisti ne asamblea emocionante den Columbus, Ohío, unda nos a recibi e nomber Testigo di Jehova. Aunque mi tabatin ocho aña di edad so, mi a kere cu esei tabata e nomber di mas bonita cu mi a yega di tende. Un poco tempo despues cu nos a yega cas, candela a destrui e negoshi di Papa, i Papa i Mama a mira esei como e “boluntad di Señor” indicando pa nan cuminza traha como pionero di nobo. P’sei, cuminzando den e berano di 1932, nos a disfruta di hopi aña dje ministerio di tempo completo.
Mi famía a traha como pionero den central di Texas pa keda cerca e mayornan di Mama cu a biba den San Antonio ainda. Mudando di un asignacion pa otro a nifica cu mi a cambia scol basta hopi. Tabatin bez cu amigo a puntra sin pensa, “Pakico boso no ta establece boso den un solo lugar pe yiu ei biba,” como si nan no a atende na mi adecuadamente. Pero, mi a kere cu nos bida tabata excitante i cu mi tabata yuda Papa i Mama den nan ministerio. Realmente, mi tabata entrená i prepará pa loke despues a bira mi mes moda di biba.
Pa hopi luna mi a sigi bisa Papa i Mama cu mi kier bautiza, i hopi bez nan a papia cu mi tocante dje. Nan kier a haci sigur cu mi a comprende ki serio mi decision tabata. Riba 31 di December di 1934, e dia a yega pe suceso importante den mi bida. Sin embargo, e anochi promé, Papa a haci sigur cu mi a haci oracion na Jehova Dios. Anto el a haci un cos bonita. El a haci nos tur baha na rudía, i el a haci oracion. El a bisa Jehova cu e tabata mashá contentu cu e decision di su yiu di dedica su bida na Dje. Bo por keda sigur cu, durante tur tempo di futuro, lo mi nunca lubida e anochi ei!
Entrenamento di parti di mi abuelo i abuela
Entre 1928 i 1938, mi a pasa hopi tempo bishitando mi abuelo i abuela den San Antonio. E rutina cerca nan tabata casi mescos cu e bida di mi tata i mama. Mi abuela tabata un colporteur, locual nan a yama pionero den e tempo ei, anto el a bira pionero di tempo parcial. Mi abuelo tabata nombrá como pionero den December di 1929, pues e sirbishi di feld tabata un actividad regular di tur dia.
Mi abuelo a tenémi den su braza anochi i a siñámi nomber di strea. El a repiti poesía pa mi for di su memoria. Mi a haci hopi biaha cuné riba trein ora el a traha pe compañía di trein. E semper tabata un persona cu mi por a acudi na dje ora mi tabatin problema; el a consolámi i a seca mi lágrima. Pero, ora mi a haya disiplina pa mal conducta i a acudi na dje pa busca consuelo, e simplemente a bisa (palabra cu mi no a comprende ne tempo ei, pero cu tabatin tono mashá claro): “Dushi, e camina di pecador ta mashá duro.”
Añanan di persecucion
Na 1939, Gera Mundial II a cuminza, i e pueblo di Jehova a sufri di persecucion i di atake di multitud desordená. Na fin di 1939, Mama tabata masha malu i despues tabatin mester di operacion, p’sei nos a bolbe biba den San Antonio.
Multitud desordená a forma ora nos a ofrece revista riba caya di San Antonio. Pero tur siman, como un famía, nos tabatei, cada un ne skina di caya asigná na nos. Hopi bez mi a wak ora nan a lastra Papa i a hibé na warda di poliz.
Papa a purba di sigi traha como pionero aunque Mama tabatin cu kita. Pero, e no por a gana suficiente placa trahando tempo parcial, p’sei e tabatin cu kita també. Mi a caba scol na 1939, i també a busca empleo.
E nomber Judge (huez) di Papa a resulta di ser útil den e tempo ei. Por ehempel, un grupo di ruman a bai pa duna testimonio den un pueblo net panort di San Antonio, i recherche a cuminza encarcela nan tur. El a detene rond di 35 ruman, incluyendo mi abuelo i abuela. Nan a manda responde pa Papa, i el a bai ei den su auto. El a drenta den e oficina dje recherche i a bisa: “Mi ta huez Norris di San Antonio.”
“Sí, Señor Huez,” e recherche a bisa, “Na bo ordu.”
“Mi a bini pa percura pe hendenan aki sali for di prisón,” Papa a bisa. Cu esei e recherche a laga nan tur bai sin fianza—i no a haci ningun pregunta mas!
Papa a gusta duna testimonio den oficina di centro comercial, i a gusta specialmente pa bishita huez i abogado. El a bisa recepcionista: “Mi ta Huez Norris, i mi a bini pa mira Huez Tal i Tal.”
Anto, ora el a contra cu e huez, e semper a bisa promé: “Awor, promé cu mi papia tocante e propósito di mi bishita, mi kier splica cu mi tabata huez pa mas tempo cu abo. Mi tabata huez pa tur mi bida.” Anto el a splica con el a haya su nomber. Esei a sirbi como un introduccion amistoso i el a cultiva hopi bon relacion cu huez den e tempo ei.
Agradicido pa instruccion di mayornan
Mi tabata na edad emocional di tiener, i mi sa cu Papa i Mama a keda mashá ansioso mientras cu nan a wak i a puntra kico lo mi haci despues. Mescos cu tur yiu, mi a pone Papa i Mama na prueba hopi biaha, pidiendo di haci algo of bai un camina sabiendo di antemano cu nan contesta lo ta No. Aveces mi a yora. Realmente, lo mi a keda destrosá si nan a bisa: “Bai numa, haci loke bo kier. No ta importános.”
Mi a haya un sintimento di siguridad sabiendo cu mi no por influenciánan pa cambia nan norma. Realmente, esei a haci mas fácil pa mi ora otro hovenan a sugeri diverticion imprudente, pasobra mi por a bisa: “Mi tata no ta lagámi bai.” Ora mi a haci 16 aña di edad, Papa a haci sigur cu mi a siña stuur i cu mi a haya rijbewijs. Además, rond dje tempo ei el a dunámi yabi di cas. Mi a keda tanto impresioná pasobra el a confiámi. Mi a sintími tanto adulto, i esei a dunámi un sintimento di responsabilidad i un deseo pa no traiciona nan confianza.
Den e tempo ei hopi instruccion no tabata duná tocante casamento, pero Papa a conoce e Bijbel i loke e ta bisa tocante casamento “solamente den Señor.” (1 Corintio 7:39) El a haci bon cla cu si mi hamás invita mucha homber di mundo pa conoce mi mayornan, of sikiera wak uno, su desilusion lo aplasté. Mi tabata sa cu e tabatin razón, pasobra mi a mira e felicidad i unidad di nan matrimonio pasobra nan sí a casa “den Señor.”
Na 1941, ora mi tabatin 18 aña di edad, mi a pensa cu mi tabata enamorá cu un hoven den e congregacion. E tabata un pionero i tabata studia pa bira abogado. Mi tabata excitá. Ora nos a bisa nos mayornan cu nos kier a casa, en bez di mustra desaprobacion of desanimános, nan a bisa simplemente: “Nos ta pidi un solo cos di bo, Blossom. Nos ta kere cu bo ta mucho hoven, i nos kier pa bo spera un aña. Si bo realmente ta stimé, un aña lo no haci ningun diferencia.”
Mi ta keda mashá agradicido cu mi a scucha nan conseho sabí. Durante e aña, mi a madura mas i a cuminza mira cu e hoven no tabatin calidad necesario pa un bon casá. Despues, el a bandona e organizacion [di Jehova Dios], i mi a scapa for di loke por a ser un desaster den mi bida. Ki maraviyoso ta mayornan sabí cu tin sano huicio cu bo por confiá!
Casamento i e sirbishi biahero
Den winter di 1946, despues cu mi a dedica seis aña ne sirbishi di pionero i a traha tempo parcial, e hoven di mas excelente cu mi a yega di conoce a drenta nos Salón di Reino. Gene [Eugene] Brandt tabata asigná como compañé di nos superintendente di circuito. Tabatin un atraccion mutuo, i dia 5 di Augustus di 1947, nos a casa.
Un poco tempo despues, Papa i Gene a habri un oficina di accounting. Pero Papa a bisa Gene: “E dia cu e oficina aki ta stróbanos di asisti na reunion of cumpli cu asignacion teocrático, mi ta cera e porta na yabi i tiré afó.” Jehova Dios a bendiciona tal punto di bista spiritual, i e oficina a percura suficiente pa nos necesidad material i a permiti tempo pa nos ser pionero. Papa i Gene tabata bon comerciante, i nos por a bira ricu fácilmente, pero esei nunca tabata nan meta.
Na 1954, Gene tabata invitá pa drenta den e trabao di circuito, locual a nifica un cambio grandi den nos bida. Con mi mayornan a reacciona? Un biaha mas, nan interés no tabata den nan mes sino den interés dje Reino di Dios i den e bienestar spiritual di nan yiunan. Nan nunca a púntranos: “Pakico boso no ta dúnanos nietonan?” Mas bien, tabata semper: “Kico nos por haci pa yuda boso den e sirbishi di tempo completo?”
Pues, ora e dia a yega pa nos bai, tabatin solamente palabra di animacion i alegría riba nos gran privilegio. Nan nunca a hácinos sinti cu nos tabata bandonánan, sino a dúnanos pleno apoyo. Despues cu nos a bai, nan a keda ocupá den e trabao di pionero pa diez aña mas. Papa tabata nombrá como superintendente dje stad di San Antonio, cua puesto el a ocupa pa 30 aña. El a alegra pa mira e crecimento di un congregacion den e stad entre 1920 i 1930 bira 71 congregacion promé cu el a muri na 1991.
Pa Gene i mi, bida tabata yen di excitacion. Nos tabatin e gozo ricu di sirbi nos rumanan stimá den mas cu 31 estado i, probablemente e gozo principal tabata e privilegio di asisti ne klas di 29 dje Scol Bíblico di Galad di Watchtower na 1957. Despues, nos a bolbe ne trabao biahero. Na l984, despues di 30 aña den e trabao di circuito i districto, e Sociedad bondadosamente a dúnanos e asignacion di un circuito den San Antonio, siendo cu mi mayornan a pasa 80 aña caba i nan salud tabata den mal estado.
Atendiendo na mi mayornan
Tabata solamente un aña i mei despues cu nos a bolbe na San Antonio cu Mama a bai den semicoma i a muri di enfermedad di Parkinson. Esei a sosode asina lihé cu mi no a yega di bisa algun cos cu mi kier a bisé. Esei a siñámi papia hopi cu Papa. Despues di 65 aña di bida matrimonial, el a sinti hopi falta di Mama, pero nos tabatei pa duna amor i apoyo.
E ehempel di Papa di asisti na reunion cristian, studiá, i e sirbishi di feld pa tur su bida a sigi te na su morto. El a gusta leza. Siendo cu e tabatin cu keda so ora nos tabata den e sirbishi di feld, mi a bini cas i a puntré, “Papa a sinti solitario?” El a keda asina ocupá cu su lezamento i studiamento, e ni sikiera a corda mes cu e tabata so.
Tabatin un otro costumber bieu cu nos a sigi. Papa semper a insisti pe famía come hunto, specialmente na desayuno pa nos considera e texto bíblico diario. Ora mi tabata mucha, nan nunca a permitími sali for di cas sin haci esei. Tabatin bez cu mi a bisa: “Pero Papa, mi ta yega laat pa scol.”
El a bisa: “E texto diario no ta hacíbo laat; bo no a lanta na ora.” I mi tabatin cu keda i scuché. El a percura pe bon ehempel sigi te ne último dianan di su bida. Esei ta un otro herencia cu el a laga pa mi.
Papa a keda alerto mentalmente te na fin. Loke a haci atendiendo na dje mas fácil ta cu e nunca a bira fastioso ni no a keha. Sí, tabatin bez cu el a menciona su artritis, pero mi a hacié corda cu loke e realmente tabatin tabata “adamitis” (imperfeccion heredá for di Adam, locual ta resulta den behez i hopi dolor hunto cuné), i el a hari. Mientras cu Gene i mi a sinta cant’i dje, Papa a bai drumi ketu den maínta di 30 di November di 1991.
Awor mi tin mas cu 70 aña di edad i ainda mi ta beneficiá dje bon ehempel di mi mayornan cristian amoroso. I mi oracion sincero ta cu lo mi haci esfuerzo pa duna prueba di mi pleno aprecio pa mi herencia door di usé correctamente durante tur e siglonan cu ta bini.—Salmo 71:17, 18.
[Picture on page 5]
Mama cu mi
[Picture on page 7]
1. Mi promé asamblea: San Marcos, Texas, September di 1923
2. E último asamblea di Papa: Fort Worth, Texas, Juni di 1991 (Papa ta sintá)
[Picture on page 9]
Gene i Blossom Brandt