Feliz Ta Hende Humilde

“Dios ta opone hende halzá, pero ta duna bondad inmerecida na hende humilde.”—1 PEDRO 5:5.

E ESTADO di ser feliz i di ser humilde ta relacioná? Den su sermón di mas famoso, Jesucristo, e homber di mas importante cu hamás a biba, a duna detaye di nuebe felicidad. (Mateo 5:1-12) Jesús a relacioná felicidad cu humildad? Sí, el a hacié, pasobra humildad ta enbolbí den varios felicidad cu el a mencioná. Por ehempel, hende tin cu ser humilde pa ser consiente di nan necesidad spiritual. Solamente hende humilde tin hamber i sed pa husticia. I hende orguyoso no tin genio suave ni no ta misericordioso, ni no ta hacidor di paz.

² Hende humilde ta feliz pasobra ta husto i onrado pa ser humilde. Además, hende humilde ta feliz pasobra ta sabí pa ser humilde; esei ta contribui na bon relacion cu Jehova Dios i cu otro hende cristian. Además, hende humilde ta feliz pasobra humildad ta un expresion di amor di nan parti.

³ Pakico onradez ta exigi pa nos ser humilde? Entre otro cosnan, pa motibo cu nos tur a hereda imperfeccion i nos ta sigi haci equibocacion. Apóstol Pablo a bisa lo sigiente tocante su mes: “Mi sa cu den mi, esta, den mi carni, no ta biba nada bon; pasobra e facultad di deseá ta presente cu mi, pero e facultad di obra loke ta excelente no ta presente.” (Romano 7:18) Sí, nos tur a peca i no ta alcanza e gloria di Dios. (Romano 3:23) Franqueza por hácinos evitá di ser orguyoso. Humildad ta necesario pa nos admiti nos falta, i onradez por yúdanos acepta e culpa ora nos ta haci equibocacion. Siendo cu continuamente nos no ta alcanza loke nos ta purba di haci, nos tin un motibo firme pa keda humilde.

⁴ Apóstol Pablo a dúnanos un otro motibo di pakico onradez mester hácinos humilde. El a bisa: “Ken ta haci boso distinto di otro? En berdad, kico bo tini cu bo no a recibi? Anto, si bo berdaderamente a recibié, pakico bo ta broma como si bo no a recibié?” (1 Corintio 4:7) No cabe duda en cuanto esei, pa nos acepta gloria pa nos mes, pa síntinos orguyoso di nos propiedad, nos capacidad, of logramento, esei no ta onrado. Onradez ta contribui na mantenecion di un bon concenshi dilanti Dios, di manera cu nos por “comportános onradamente den tur cos.”—Hebreo 13:18.

⁵ Onradez ta yúdanos keda humilde ora nos ta haci equibocacion. E ta hácinos keda mas cla pa acepta e culpa, en bez di purba di hustifica nos mes of pone culpa riba otro hende. Sí, aunque Adam a culpa Eva, David no a culpa Bat-seba, e no a bisa, ‘E no mester a baña su curpa na plena bista. No ta mi falta cu el a tentámi.’ (Génesis 3:12; 2 Samuel 11:2-4) Realmente, nos por bisa cu di un banda, e calidad di onradez ta yúdanos ser humilde; di otro banda, e calidad di humildad ta yúdanos ser onrado.

Fe den Jehova ta yúdanos keda humilde

⁶ Fe den Jehova Dios també por yúdanos ser humilde. Aprecio dje berdadero grandeza dje Creador, e Soberano Universal, por evitános di tuma nos mes mucho na serio. Isaías ta hácinos corda esei! Nos ta leza den Isaías 40:15, 22: “Mira! E nacionan a ser calculá manera un gota for di emmer; i a ser calculá manera un tiki stof riba balanza. . . . Tin Uno cu ta biba mas halto cu círculo dje tera, habitante di locual ta manera sprinkhan.”

⁷ Fe den Jehova por yúdanos també ora nos ta kere cu nos tabatin cu wanta inhusticia. En bez di noha riba e asunto, nos lo spera humildemente riba Jehova, manera e salmista ta hácinos corda den Salmo 37:1-3, 8, 9. Apóstol Pablo a comproba e mesun punto: “No vinga boso, stimánan, sino laga lugar pe rabia; pasobra ta pará skirbí: ‘Vinganza ta di mi; lo mi paga,’ Jehova ta bisa.”—Romano 12:19.

Humildad—e camina di sabiduría

⁸ Tin hopi motibo pakico sigimento di humildad ta e camina di sabiduría. Un motibo, manera nos a indica caba, ta cu humildad ta contribui na bon relacion cu nos Creador. E Palabra di Dios ta bisa claramente den Proverbio 16:5: “Tur hende cu ta orguyoso di curazón ta algo abominabel pa Jehova.” Nos ta leza també den Proverbio 16:18: “Orguyo ta promé cu caída, i un spiritu halzá promé cu trompicamento.” Tardi of temprán hende orguyoso ta yora malai. Realmente mester ta asina debí na loke nos ta leza den 1 Pedro 5:5: “Boso tur faha boso curpa cu humildad di mente un en cuanto otro, pasobra Dios ta opone hende halzá, pero ta duna bondad inmerecida na hende humilde.” Bo por haya e mesun punto den e comparacion cu Jesús a duna di fariseo i cobrador di belasting cu tabata haci oracion ne mesun tempo. E cobrador di belasting humilde tabata esun cu a resulta di ser mas husto.—Lucas 18:9-14.

⁹ Humildad ta e camina di sabiduría pasobra humildad ta haci mas fácil pa nos obedece e conseho skirbí den Santiago 4:7: “Pues, somete boso na Dios.” Si nos ta humilde, nos lo no rebela ora Jehova ta permitínos sufri di oposicion. Humildad ta haci posibel pa nos keda contentu cu nos circunstancia i wanta. Hende orguyoso ta keda malcontentu, semper kier mas, i ta rebelá den circunstancia penoso. En cambio, hende humilde ta wanta dificultad i prueba, mescos cu Job. Job a wanta pérdida di tur su propiedad i tabata infectá cu un maleza doloroso, anto su esposa asta a consehé pa sigi e camina di orguyo, bisando: “Plega Dios i muri!” Con Job a contesta? E relato bíblico ta bísanos: “El a bisé: ‘Bo ta papia manera muher bobo també. Nos tin cu simplemente acepta loke ta bon for di e Dios berdadero i no acepta també loke ta malu?’ Den tur esei Job no a peca cu su lip.” (Job 2:9, 10) Pa motibo cu Job tabata humilde, e no a rebela sino a somete sabiamente na tur loke Jehova a permiti bini riba dje. Pero al fin y al cabo, el a recibi un recompensa ricu.—Job 42:10-16; Santiago 5:11.

Humildad ta contribui na bon relacion cu otro hende

¹⁰ Humildad ta e camina di sabiduría pasobra e ta contribui na bon relacion cu otro hende cristian. Apóstol Pablo a dúnanos bon conseho: “[No] haci nada debí na pleitamento ni debí na halzamento, sino considerando cu humildad di mente cu e otronan ta superior cu boso, no vigilando cu interés personal den boso mes asuntonan so, sino també cu interés personal den asunto dje otronan.” (Filipense 2:3, 4) Humildad por kítanos sabiamente for di competencia cu otronan of di purba di briya mas cu otronan. Tal actitud mental ta causa problema pa nos i pa otro hende cristian.

¹¹ Bez tras bez humildad por yúdanos evita di haci equibocacion. Di ki manera? Pasobra humildad ta kítanos for di demasiado confianza. Mas bien, nos lo aprecia e conseho di Pablo den 1 Corintio 10:12: “Laga ken cu ta kere cu e ta pará tene cuidao pe no cai.” Hende orguyoso tin demasiado confianza den nan mes, di manera cu nan ta keda incliná di haci equibocacion bao di influencia exterior of debí na nan mes debilidad.

¹² Humildad por yúdanos cumpli cu e requisito di keda sumiso. Nos ta recibi e sigiente conseho den Efesio 5:21: “Keda sumiso un na otro den temor di Cristo.” Realmente, nos tur no tin cu keda sumiso? Yiu tin cu keda sumiso na nan mayornan, esposa keda sumiso na nan esposo, esposo keda sumiso na Cristo. (1 Corintio 11:3; Efesio 5:22; 6:1) Anto, den tur congregacion cristian, tur hende, incluyendo sirbidor ministerial, tin cu demonstra sumision na anciano. No ta cierto també cu tur anciano ta keda sumiso ne grupo di esclabo fiel, specialmente door di nan representante e superintendente di circuito? Anto, també, e superintendente di circuito tin cu keda sumiso ne superintendente di districto, i e superintendente di districto ta keda sumiso ne Comité di Sucursal dje país unda nan ta sirbi. Kico di miembro dje Comité di Sucursal? Nan mester keda “sumiso un na otro” i també ne Cuerpo Gobernante representando e grupo di esclabo fiel i prudente, locual, també, tin cu rindi cuenta na Jesús, e Rey entronizá. (Mateo 24:45-47) Mescos cu den tur cuerpo di anciano, miembro dje Cuerpo Gobernante tin cu respeta punto di bista di otro. Por ehempel, uno por kere cu e tin un bon idea. Pero, amenos cu un cantidad suficiente di otro miembro ta di acuerdo cu su sugerencia, e tin cu lubidé. En berdad, nos tur tin cu keda humilde, pasobra nos tur ta den sumision.

¹³ Humildad ta ser mirá specialmente como e camina di sabiduría pasobra humildad ta haci mas fácil pa nos acepta conseho i disiplina. Nos tur tin mester di disiplina aveces, i nos mester sigi e conseho den Proverbio 19:20: “Scucha conseho i acepta disiplina, pa bo bira sabí den bo futuro.” Tabata bon bisá cu hende humilde no ta síntinan ofendí of infeliz ora nan ta haya disiplina. Además, apóstol Pablo, den Hebreo 12:4-11, ta consehános tocante e sabiduría di somete humildemente na disiplina. Dje manera ei so nos por spera di dirigi nos camina sabiamente den futuro i en buelta gana e premio di bida eterna. Esei lo tá ki un resultado feliz!

¹⁴ En cuanto esei, nos por siñalá na ehempel di apóstol Pedro. El a recibi conseho severo for di apóstol Pablo, manera nos ta leza den e relato di Galatio 2:14: “Ora mi a mira cu nan no tabata anda drechi di acuerdo cu e berdad dje bon nobo, mi a puntra Céfas [Pedro] dilanti nan tur: ‘Si abo, aunque bo ta hudío, ta biba manera e nacionan ta biba, i no manera hudío ta haci, pakico bo ta obliga hende dje nacionan di biba conforme cu práctica hudío?’” Apóstol Pedro a ofende? No pa hopi tempo, of nada mes, manera nos por mira den su mencion despues di “nos ruman stimá Pablo” den 2 Pedro 3:15, 16.

¹⁵ Tin també e asunto di keda satisfecho, contentu. Nos simplemente no por ser feliz si nos no ta keda contentu cu nos suerte, nos privilegio, i nos bendicionan. Cristian humilde ta adopta e actitud: “Si Dios permitié, mi por wanté,” locual realmente ta loke apóstol Pablo a bisa, segun cu nos ta leza den 1 Corintio 10:13: “Ningun tentacion a tuma boso fuera di loke ta común pa tur hende. Pero Dios ta fiel, i lo e no laga boso ser tentá mas ayá cu loke boso por wanta, sino hunto cu e tentacion lo e habri camina també pa boso por wanté.” Asina nos ta mira di nobo di ki manera humildad ta e camina di sabiduría, pasobra e ta yúdanos ser feliz sea loke sea nos suerte.

Amor por yúdanos ser humilde

¹⁶ Mas cu tur otro cos, amor sin egoísmo, a·gaʹpe, por yúdanos ser humilde. Pakico Jesús por a wanta asina humildemente su experencia riba e staca di tormento cu Pablo a detayá pa Filipense? (Filipense 2:5-8) Pakico e no a duna ningun consideracion di ser igual cu Dios? Pasobra, manera Jesús mes a bisa: “Mi ta stima e Tata.” (Juan 14:31) P’sei, na tur tempo el a dirigi gloria i onor na Jehova, su Tata celestial. Pues, na otro ocasion el a enfatizá cu su Tata celestial so ta bon.—Lucas 18:18, 19.

¹⁷ Ilustrando tal punto ta un incidente den e bida di un poëta americano di promé, John Greenleaf Whittier. E homber tabatin un enamorá ora e tabata hoven, i un biaha den un spelwedstrijd, e mucha muher a spel e palabra correcto, pero John a haci fout. E mucha muher a sintié mashá malu tocante dje. Pakico? Manera e poëta ta corda, e mucha muher a bisa: “Ta duelmi cu mi a spel e palabra. Mi no ta gusta bai mas halto cu bo . . . pasobra, bo sa, mi ta stimábo.” Sí, si nos ta stima un hende, nos kier pe persona ser mas halto, no mas abao, cu nos pasobra amor ta humilde.

¹⁸ Esei ta un bon les pa tur hende cristian, specialmente rumanan. Den e asunto di un privilegio special di sirbishi, nos ta alegrá cu nos ruman ta recibié en bez di nos, of nos ta sinti e pica di jaluz i envidia? Si nos berdaderamente ta stima nos ruman, nos lo alegrá cu el a recibi e asignacion special of reconocimento of privilegio di sirbishi. Sí, humildad ta haci fácil pa nos obedece e conseho: “Hiba delantera mustrando onor un na otro.” (Romano 12:10) Un otro traduccion ta bisa: “Onra otro mas tanto cu bo mes.” (New International Version) Anto també, apóstol Pablo ta consehános: “Mediante amor traha como esclabo un pa otro.” (Galatio 5:13) Sí, si nos tin amor, nos ta keda contentu pa keda na ordu di nos rumanan, trahando como esclabo pa nan, poniendo nan interés i bienestar promé cu esnan di nos, locual ta exigi humildad. Humildad també ta wárdanos di broma i asina evita di lanta den otro e spiritu di jaluzí of envidia. Apóstol Pablo a skirbi cu amor “no ta gaba, no ta hincha cu orguyo.” Pakico no? Pa motibo cu e motibo tras dje gabamento i hinchamento cu orguyo ta egoísta, egotísta, pero amor ta esencia mes di inegoísmo.—1 Corintio 13:4.

¹⁹ E relacion di David cu rey Saul i su yiu Jonatán ta un ehempel notable dje manera cu amor i humildad ta camna mano a mano i dje manera cu orguyo i egoísmo també ta camna mano a mano. Pa motibo dje bon éxito di David den bataya, hende muher di Israel a canta: “Saul a mata miles, i David diez di miles.” (1 Samuel 18:7) Siendo cu Saul no tabata ni un tiki humilde, sino, mas bien, consumí cu orguyo, dje tempo ei padilanti el a cria un odio fatal pa David. Ki distinto esei tabata dje spiritu di su yiu Jonatán! Nos ta leza cu Jonatán a stima David manera su mes alma. (1 Samuel 18:1) Pues, con Jonatán a reacciona ora, den transcurso di suceso, a keda bisto cu Jehova Dios tabata bendiciona David i cu David en bez di Jonatán lo ser sucesor di Saul como rey di Israel? Jonatán a sintié jaluz of envidioso? Di ningun manera! Pa motibo di su gran amor pa David, Jonatán por a bisa, manera nos ta leza den 1 Samuel 23:17: “No tene miedu; pasobra e man di Saul mi tata lo no hayábo, i bo mes lo ser rey riba Israel, i mi mes lo bira segundo na bo; i Saul mi tata també tin conocimento asina en efecto.” E gran amor di Jonatán pa David a hacié acepta humildemente loke el a mira di ser e boluntad di Dios en cuanto ken lo ser sucesor di su tata como rey di Israel.

²⁰ Dunando mas énfasis ne relacion entre amor i humildad ta loke a sosode durante e último anochi cu Jesucristo a pasa cu su apóstolnan promé cu el a muri. Den Juan 13:1, nos ta leza cu Jesús, “a stima esnan di dje den mundo, a stímanan te na fin.” Despues di esei, nos ta leza cu Jesús a laba e pia di su apóstolnan, mescos cu un criá. Ki un les fuerte di humildad!—Juan 13:1-11.

²¹ Berdaderamente, tin hopi motibo pa ser humilde. Humildad ta e cos correcto, e cos onrado pa haci. Esei ta e camina di fe. E ta contribui na bon relacion cu Jehova Dios i cu otro hende creyente. Esei ta e camina di sabiduría. Sobre todo, esei ta e camina di amor i ta resulta den berdadero felicidad.

Con Bo Ta Contestá?

◻ Di ki manera onradez ta yuda hende ser humilde?

◻ Pakico fe den Jehova Dios por yúdanos ser humilde?

◻ Kico ta mustra cu humildad ta e camina di sabiduría?

◻ Pakico amor ta specialmente útil pa nos ser humilde?

[Study Questions]

1, 2. Con Jesús den su Sermón di Monte a relacioná e asunto di ser feliz cu e asunto di humildad?

3. Pakico onradez ta obligános di ser humilde?

4. Cua motibo obligatorio tin den 1 Corintio 4:7 pa nos ser humilde?

5. Con onradez també por yúdanos ora nos ta haci equibocacion?

6, 7. Con fe den Dios ta yúdanos ser humilde?

8. Pakico humildad ta contribui na bon relacion cu Jehova Dios?

9. Humildad ta duna cua yudanza den tempo di oposicion?

10. Con humildad ta mehora nos relacion cu otro hende cristian?

11. Pakico humildad por yúdanos evita di haci equibocacion?

12. Humildad por conmovénos pa cumpli cu cua obligacion bíblico?

13, 14. (a) Den cua circunstancia special humildad por yúdanos? (b) Cua ehempel Pedro a pone en cuanto aceptacion di conseho?

15. Cua relacion tin entre nos humildad i nos felicidad?

16, 17. (a) Cua ehempel bíblico ta enfatiza e calidad principal pa yúdanos ser humilde? (b) Cua ehempel di mundo també ta ilustra e punto?

18. Humildad por yúdanos obedece cua conseho bíblico?

19. Cua ehempel bíblico ta ilustra cu humildad i amor ta camna mano a mano, mescos cu orguyo i egoísmo?

20. Con Jesús a mustra e relacion estrecha entre amor i humildad?

21. Como sumario, pakico nos mester ta humilde?

[Picture on page 21]

Job a somete su mes humildemente na Jehova Dios. E no a “plega Dios i muri”

[Picture on page 23]

Pedro humildemente a sometele ora Pablo a consehé den público