Confia den Jehova!

“Confia den Jehova cu tur bo curason.”—PROVERBIO 3:5.

UN MISIONERO di hopi aña ta skirbi: “‘CONFIA DEN SEÑOR CU TUR BO CURASON; I NO LEN RIBA BO MES COMPRENDIMENTU.’ E palabranan ei for di Bijbel, cologá den leshi na muraya di un cas cu mi tabata bishitando, a capta mi atencion. P’e resto dje dia ei mi a meditá riba nan. Mi a puntra mi mes, lo mi por confia Dios cu tur mi curason?” E persona aki tabatin 21 aña di edad n’e tempu ei. Cu 90 aña di edad i sirbiendo ainda fielmente como anciano na Perth, Australia, e por mira bek riba un bida enrikesé cu e fruta di confiansa di henter curason den Jehova, incluyendo 26 aña rigoroso di trabou di pionero den campo misionero nobo na Ceylon (awor Sri Lanka), Burma (awor Myanmar), Malaya, Tailandia, India i Pakistan.a

² “Confia den Jehova cu tur bo curason”—e palabranan aki di Proverbio 3:5, manera e Traducción del Nuevo Mundo ta traduci’é, mester motivá nos tur pa sigui dedicá nos bida di henter curason na Jehova, cu confiansa cu e por fortalecé nos fe, asta te n’e punto di vence obstáculo mes grandi cu ceru. (Mateo 17:20) Awor laga nos examiná Proverbio 3:5 den su contexto.

Instruccion Paternal

³ E nuebe capítulonan di apertura dje buki bíblico di Proverbio ta briya cu instruccion paternal, conseho sabí di Jehova pa tur cu ta mira padilanti pa disfrutá di un relacion di tata-cu-yu den cielu of e “glorioso libertad dje yunan di Dios” den un paradijs terenal. (Romano 8:18-21, 23) Aki tin conseho sabí cu mayornan por usa den lantamentu di yu. Sobresaliente ta e conseho di Proverbio capítulo 3, cu ta cuminsá cu e spiertamentu: “Mi yu, no lubidá mi ley, i laga bo curason warda mi mandamentunan.” Segun cu e último dianan dje mundu malbado di Satanas ta avansá pa nan fin, laga nos sigui presta atencion asta mas estrecho n’e recordatorionan di Jehova. E caminda por a parce largu, pero e promesa na tur cu wanta ta cu “largura di dianan i añanan di bida i pas lo ser agregá na bo”—bida eterno den Jehova su sistema nobo.—Proverbio 3:1, 2.

⁴ Un relacion felis entre tata i yu por ta masha precioso. Nos Creador, Jehova Dios, a percurá pa ta asina. Cristo Jesus a bisa di su mes relacion íntimo cu Jehova: “E Yu no por haci ni un solo cos di su mes iniciativa, sino solamente loke e mira e Tata haci. Pasobra cualkier cos cu Esun ei haci, e cosnan aki e Yu tambe ta haci di igual manera. Pasobra e Tata tin cariño p’e Yu i ta mustr’é tur loke e mes ta haci.” (Juan 5:19, 20) Jehova a proponé pa un intimidad similar existí entre e mes i tur su famia riba tera, i tambe entre tatanan humano i nan yunan.

⁵ Un relacion di famia cu confiansa a ser animá den Israel di antigua. Jehova a consehá tatanan aya: “Boso mester aplicá e palabranan aki di mi na boso curason i boso alma i mara nan como siñal na boso man, i nan mester sirbi boso como banchi frontal meimei di boso wowo. Tambe boso mester siña nan na boso yunan, pa papia di nan ora boso ta sinta den boso cas i ora boso ta cana riba caminda i ora boso ta drumi i ora boso ta lanta. I boso mester skirbi nan riba kozijn dje portanan di boso cas i riba boso entradanan di curá, pa boso dianan i e dianan di boso yunan sea hopi riba e suela cu Jehova a hura na boso antepasadonan cu lo e duna nan, manera e dianan di cielu riba tera.” (Deuteronomio 11:18-21) E Palabra inspirá di nos Gran Instructor, Jehova Dios, en berdad por sirbi pa enlac’é íntimamente cu mayornan i nan yunan, i tambe cu tur otro persona cu ta sirbiend’e den e congregacion cristian.—Isaías 30:20, 21.

⁶ Conseho paternal sabí p’e pueblo di Dios, bieu i hóben, ta sigui den versículo 3 i 4 di Proverbio capítulo 3: “Laga bondad amoroso i apego n’e berdad mes no bandoná bo. Mara nan rond di bo garganta. Skirbi nan riba e tabla di bo curason, i asina haña fabor i bon perspicacia den bista di Dios i di homber terenal.” Jehova Dios mes ta sobresalí den manifestá bondad amoroso i apego n’e berdad. Manera Salmo 25:10 ta declará, “tur e camindanan di Jehova ta bondad amoroso i apego n’e berdad.” Den imitacion di Jehova, nos mester atesorá e cualidadnan aki i nan poder protectivo, balorando nan manera nos lo balorá un cadena precioso i grabando nan permanentemente riba nos curason. Nos por resa fervientemente e ora ei: “O Jehova, . . . laga bo bondad amoroso i bo apego n’e berdad mes salbaguardiá mi constantemente.”—Salmo 40:11.

Un Confiansa Permanente

⁷ Confiansa ta ser definí dor di Webster’s Ninth New Collegiate Dictionary como “dependencia sigur riba e carácter, abilidad, fortalesa of berdad di un persona of algu.” Jehova su carácter ta firmemente ancrá den su bondad amoroso. I nos por tin confiansa completo den su abilidad di haci loke el a primintí, pasobra su nomber mes, Jehova, ta identifik’é como e Dios di gran Propósito como e gran Propósitor. (Éxodo 3:14; 6:2-8) Como Creador, e ta e Fuente di fortalesa i energia dinámico. (Isaías 40:26, 29) E ta e personificacion di berdad, pasobra “ta imposibel pa Dios gaña.” (Hebreo 6:18) Pues, nos ta ser animá pa pone confiansa absoluto den Jehova, nos Dios, e gran Fuente di tur berdad, kende tin e poder todopoderoso pa protegá esnan cu ta confia den dje i pa trece tur su gran propósitonan na éxito glorioso.—Salmo 91:1, 2; Isaías 55:8-11.

⁸ Den e mundu degradá rond di nos, lamentablemente no tin confiansa. Mas bien, nos ta haña golosidad i corupcion tur caminda. E kaft dilanti dje revista World Press Review, edicion di mei 1993 a ser dorná cu e mensahe: “EXPLOSION DI CORUPCION—Placa Shushi den e Ordu di Mundu Nobo. E industria di corupcion ta extendé for di Brazil te Alemania, for di Merca te Argentina, for di Spaña te Perú, for di Italia te México, for di Vaticano te Rusia.” Basá manera e ta riba odio, golosidad i desconfiansa, hende su asina yamá ordu di mundu nobo ta cosechá nada mas cu escalacion di miseria pa humanidad.

⁹ Na contraste cu nacion político, Testigonan di Jehova ta felis pa ta “e nacion kende su Dios ta Jehova.” Nan so por bisa berdaderamente, “Den Dios nos ta confia.” Cada un di nan por sclama gososamente: “Den union cu Dios lo mi alabá su palabra. . . . Den Dios mi a cifra mi confiansa. Lo mi no tin miedu.”—Salmo 33:12; 56:4, 11.

¹⁰ Na un pais asiático unda miles di hóben Testigo a sufri di sota severo i encarcelamentu, confiansa den Jehova a permití e gran mayoria pa wanta. Un anochi den prison, un hóben Testigo kende a experimentá tortura horibel a sinti cu e no por a soportá mas. Pero un otro hóben a bini secretamente cerca dje den sombra di scuridad. El a fluister: “No entregá; ami a comprometé i no a haña ningun pas mental desde e tempu ei.” E promé hóben e renobá su determinacion pa para firme. Nos por tin confiansa completo den Jehova cu lo e yuda nos vence cualkier i tur esfuerso di Satanas pa caba cu nos integridad.—Jeremías 7:3-7; 17:1-8; 38:6-13, 15-17.

¹¹ E promé mandamentu ta bisa en parte: “Bo mester stima Jehova bo Dios cu henter bo curason.” (Marco 12:30) Segun cu nos ta meditá riba e Palabra di Dios, e berdadnan magnífico cu nos ta siña ta sink profundamente den nos curason di manera cu nos ta ser motivá pa dedicá nos mes henteramente den e sirbishi di nos Dios maraviyoso, Señor Soberano Jehova. Ta cu un curason yená te na rand cu aprecio p’e—pa tur loke el a siña nos, a haci pa nos, i lo haci ainda pa nos—cu nos ta ser stimulá pa confia absolutamente den su salbacion.—Isaías 12:2.

¹² E confiansa aki por ser cultivá atrabes di añanan. Un Testigo di Jehova humilde kende a sirbi fielmente pa mas cu 50 aña n’e oficinanan central dje Sociedad Watch Tower na Brooklyn, cuminsando su servicio na april 1927, a skirbi: “Na fin dje luna ei mi a ricibí un compensacion di US$5,00 cerá den un envelop cu un tarheta masha bunita riba cua tabata skirbí e texto bíblico di Proverbio 3:5, 6 . . . Tabatin tur motibu pa confia Jehova, pasobra n’e oficinanan central pronto mi a bin realisá cu Jehova tabatin un ‘esclabo fiel i discreto’ percurando fielmente pa tur interes di Reino aki riba tera.—Mateo 24:45-47.”b E curason dje cristian aki tabata fihá, no riba amor pa placa, sino riba ganamentu di “un tesoro den cielu cu nunca ta faya.” Di igual manera awe, e miles di rumannan cu ta sirbi n’e casnan di Betel dje Sociedad Watch Tower rond e tera ta haci esei bou di un tipo di voto legal di pobresa. Nan ta confia den Jehova pa percurá pa nan necesidadnan di tur dia.—Lucas 12:29-31, 33, 34.

Len Riba Jehova

¹³ Nos Tata celestial ta spierta nos: “No len riba bo mes comprendimentu.” (Proverbio 3:5) Consehero i sicólogonan mundano nunca por spera di yega cerca e sabiduria i comprendimentu cu Jehova ta desplegá. “Su comprendimentu ta fuera di loke nos por conta.” (Salmo 147:5) En bes di len rib’e sabiduria di hende prominente dje mundu aki of riba nos mes emocionnan ignorante, laga nos mira na Jehova, su Palabra i e ancianonan den e congregacion cristian pa conseho maduro.—Salmo 55:22; 1 Corintio 2:5.

¹⁴ Sabiduria humano of orguyo di posicion lo no yuda nos den e dia di prueba severo cu ta acercando lihé. (Isaías 29:14; 1 Corintio 2:14) Na Hapon durante Guera Mundial II, un wardador capas pero orguyoso dje pueblo di Dios a dicidí di len riba su mes comprendimentu. Bou di presion el a bira apóstata, i mayoria dje tou tambe a stop cu nan actividad bou di persecucion. Un ruman muher hapones leal, kende cu curashi a sobrebibí trato teribel den cel di prison shushi, a comentá: “Esnan cu a keda fiel no tabatin ningun abilidad special i no tabata notabel. Siguramente nos tur mester confia semper den Jehova cu henter nos curason.”c

¹⁵ Confiansa den Jehova, en bes di den nos mes comprendimentu, ta enbolbé humildad. Ki importante e cualidad aki ta pa tur cu kier agradá Jehova! Sí, asta nos Dios, aunke e ta Señor Soberano di tur e universo, ta manifestá humildad den su trato cu su creacion inteligente. Nos por ta gradicidu pa esei. “E ta rebahando su mes pa mira riba cielu i tera, lantando esun di condicion humilde for di stof mes.” (Salmo 113:6, 7) Debí na su gran misericordia, e ta pordoná nos nos debilidadnan riba base di su mayor regalo na humanidad, e precioso sacrificio di rescate di su Yu stimá, Cristo Jesus. Ki agradecidu nos mester ta p’e bondad inmerecí aki!

¹⁶ Jesus mes ta recordá nos: “Ken cu ta halsa su mes lo ser humiyá, i ken cu ta humiyá su mes lo ser halsá.” (Mateo 23:12) Den humildad, rumannan homber bautisá mester extendé nan mes pa responsabilidad den e congregacion cristian. Sin embargo, superintendentenan mester considerá nan nombramentu, no como un símbolo di posicion, sino como e oportunidad pa efectuá un trabou, humildemente, apreciativamente, ansiosamente, manera Jesus a haci, kende a bisa: “Mi Tata a sigui traha te awor, i ami ta sigui traha.”—Juan 5:17; 1 Pedro 5:2, 3.

¹⁷ Laga nos semper apreciá humildemente i piadosamente cu nos no ta nada mas cu stof den Jehova su bista. Ki contentu nos por ta, e ora ei, cu “e bondad amoroso di Jehova ta di tempu indefiní pa tempu indefiní pa cu esnan cu ta tem’é, i su husticia p’e yunan dje yunan”! (Salmo 103:14, 17) P’esei nos tur mester ta studiantenan diligente dje Palabra di Dios. E tempu cu nos ta dedicá na studio personal i di famia, i na reunion di congregacion, mester ta entre nos oranan di mas precioso cada siman. Den e manera aki nos ta edificá “conocimentu di Esun Santísimo.” Esei ta “loke comprendimentu ta.”—Proverbio 9:10.

“Den Tur Bo Camindanan . . .”

¹⁸ Dirigiendo nos na Jehova, e Fuente divino di comprendimentu, Proverbio 3:6 ta declará siguientemente: “Den tur bo camindanan tuma nota di dje, i e mes lo haci bo bereanan stret.” Tumando nota di Jehova ta enbolbé keda cerca dje den oracion. Unda cu nos por ta i sin importá e situacion cu por surgi, nos tin acceso inmediato na dje den oracion. Segun cu nos ta haci nos tareanan diario, segun cu nos ta prepará pa sirbishi di veld, segun cu nos ta bai di cas pa cas proclamando su Reino, nos oracion constante por ta p’e bendicioná nos actividad. Pues, nos por tin e privilegio i goso incalculabel di ‘cana cu Dios,’ cu e confiansa cu lo e ‘haci nos bereanan stret,’ manera el a haci pa Enoc, Noe i e fiel israelitanan temedor-di-Dios, manera Hosué i Daniel.—Génesis 5:22; 6:9; Deuteronomio 8:6; Hosué 22:5; Daniel 6:23; mira tambe Santiago 4:8, 10.

¹⁹ Ora nos ta haci nos peticionnan conocí na Jehova, nos por tin confiansa cu ‘e pas di Dios cu ta surpasá tur pensamentu lo warda nos curason i nos facultadnan mental mediante Cristo Jesus.’ (Filipense 4:7) E pas di Dios aki, reflehá den un aparencia contentu, por recomendá nos mensahe n’e doñonan di cas cu nos ta topa durante nos trabou di predicá. (Colosense 4:5, 6) Tambe e por animá esnan cu kisas ta afligí dor dje tension of inhusticianan asina comun den e mundu djawe, manera e siguiente relato ta mustra.d

²⁰ Max Liebster, un hudiu natural kende dor di un aparente milager a sobrebibí e Holocausto, a describí su biahe pa un campo nazista di exterminacion den e palabranan aki: “Nos a ser cerá den wagon cu a ser transformá den hopi cel chikitu pa dos persona. Bentá cu skop den un di nan, mi a topa cara cara cu un prisonero kende su wowonan a reflehá serenidad. E tabata ei den debí na su respet p’e ley di Dios, scogiendo prison i un posibel morto mas bien cu drama sanger di otro hende. E tabata un Testigo di Jehova. Su yunan a ser kitá for di dje i su casá a ser ehecutá. E tabata sperando e mesun destino. E biahe di 14 dia a trece un contesta riba mi oracionnan, pasobra tabata durante e biahe pa morto aki mes cu mi a haña e speransa di bida eterno.”

²¹ Despues di su liberacion for dje “cueba di leon” di Auschwitz, manera el a yam’é, i su bautismo, e ruman homber aki a casa cu un Testigo di Jehova kende tambe a ser encarcelá i kende su tata a sufri den e campo di concentracion na Dachau. Miéntras cu su tata tabata aya, e tata a tende cu su esposa i yu muher hóben tambe a ser arestá. El a describí su reaccion: “Mi tabata profundamente preocupá. Anto un dia miéntras mi tabata pará den rij pa dal un baño, mi a tende un bos cita Proverbio 3:5, 6 . . . El a resoná manera un bos biniendo for di cielu. E tabata net loke mi tabatin mester pa recobrá mi balansa.” En realidad, e bos tabata di un otro prisonero cu a cita e texto aki, pero e incidente ta enfatisá cuantu poder e Palabra di Dios por ehercé riba nos. (Hebreo 4:12) Laga Jehova su bos papia poderosamente na nos awe mediante e palabranan di nos texto di aña pa 1994: “Confia den Jehova cu tur bo curason”!

[Footnotes]

En Resúmen

◻ Ki clase di conseho ta ser presentá den Proverbio?

◻ Con confiansa den Jehova ta beneficiá nos?

◻ Kico ta enbolbé den len riba Jehova?

◻ Pakico nos mester tuma nota di Jehova den tur nos camindanan?

◻ Con Jehova ta haci nos bereanan stret?

[Study Questions]

1. Con Proverbio 3:5 a impresioná un homber hóben, i cu ki resultado di largu-alcanse?

2. Ki confiansa Proverbio 3:5 mester crea den nos?

3. (a) Ki animacion nos ta haña den e promé nuebe capítulo di Proverbio? (b) Pakico nos mester presta sumo atencion na Proverbio 3:1, 2?

4, 5. (a) Ki relacion felis ta ser describí na Juan 5:19, 20? (b) Con e conseho na Deuteronomio 11:18-21 ta aplicá te den nos dia?

6. Con nos por haña fabor cerca Dios i hende?

7. Den ki manera Jehova a mustra cu e ta digno di confiansa?

8, 9. Pakico lamentablemente no tin confiansa den mundu, i con Jehova su pueblo ta para na contraste cu esei?

10. Kico a fortalecé hopi cristian hóben pa mantené integridad?

11. Con nos ta ser stimulá pa confia den Jehova?

12. Atrabes di añanan, con hopi cristian a demostrá nan confiansa den Jehova?

13, 14. (a) Unda so nos por haña conseho maduro? (b) Kico nos mester evitá pa por sobrebibí persecucion?

15. Ki cualidad piadoso ta esencial si nos kier agradá Jehova?

16. Con ruman homber por extendé nan mes pa privilegio den e congregacion?

17. Kico nos tur mester apreciá, hibando na cua actividad?

18, 19. Con nos por aplicá Proverbio 3:6 den nos bida, i cu ki resultado?

20, 21. (a) Durante e teror nazista, con e integridad di Testigonan di Jehova a animá otro hende? (b) Ki determinacion e bos di Jehova mester lanta den nos?

[Picture on page 15]

E mensahe di Reino gososo ta atraé hende di curason onrado