Disfruta Di Beneficio Di Siñanza Divino

“Ami, Jehova, ta bo Dios, Esun cu ta siñábo saca probecho.”​—⁠ISAÍAS 48:⁠17.

JEHOVA DIOS sa loke ta mihor. Ningun hende ta surpasé den pensamento, palabra, of accion. Como nos Creador, e ta reconoce nos necesidad i ta percuránan na abundancia. Siguramente e sa con pa instruínos. I si nos ta aplica siñanza divino, nos ta beneficiá nos mes i ta disfruta di berdadero felicidad.

² Siñanza divino ta revela e deseo sincero di Dios pa sirbidor di dje evita calamidad i disfruta di bida obedeciendo su ley i principionan. Si e pueblo di Jehova di antigua a scuché, nan por a disfruta di bendicion ricu, pasobra el a bísanan: “Ami, Jehova, ta bo Dios, Esun cu ta siñábo saca probecho, Esun cu ta hacíbo camna den e camina den cua bo mester camna. O si bo realmente ta presta atencion na mi mandamento! Anto bo paz lo bira mescos cu rio, i bo husticia mescos cu ola di lamá.”​—⁠Isaías 48:​17, 18.

³ E pueblo di Dios di antigua por a saca probecho si nan a presta atencion na mandamento i instruccion di Dios. En bez di sufri di calamidad den man di Babilonia, nan por a disfruta di paz i prosperidad tanto completo, profundo, i eterno como un rio. Además, nan obra husto por a ser tanto incontable como ola di lamá. Di igual manera, si nos ta aplica siñanza divino den nos bida, nos por disfruta di tur beneficio di dje. Cua ta algun beneficio?

E ta cambia e bida di hende

⁴ Siñanza divino a beneficiá hopi hende cambiando nan bida pa un bida mihor. Hende cu ta aplica e instruccion di Jehova Dios ta bandona “obra di carni,” tal como conducta inmoral, idolatría, spiritismo, contencion, i envidia. Mas bien, nan ta manifesta e fruta di spiritu, tal como amor, gozo, paz, gran pacenshi, bondad, husticia, fe, suavidad, i dominio propio. (Galatio 5:​19-23) Nan també ta sigi e conseho di Efesio 4:​17-24, unda Pablo a urgi otro creyente pa no camna manera e nacionan ta camna, den e inutilidad di nan mente i den scuridad mental, alehá for dje bida cu ta pertenece na Dios. Ya cu hende cristian no ta laga curazón estúpido guíanan, nan ta ‘kita e personalidad cu ta conforme cu nan moda di anda di antes i ta ser renobá den e forza cu ta impulsa nan mente.’ Nan ‘ta bisti e personalidad nobo creá conforme cu e boluntad di Dios den berdadero husticia i lealtad.’

⁵ Un beneficio excelente dje aplicacion di siñanza divino ta cu e ta mústranos con pa camna cu Dios. Si nos ta camna cu Jehova Dios, mescos cu Noé, nos ta sigi e camina di bida cu nos Magnífico Instructor a menciona. (Génesis 6:9; Isaías 30:​20, 21) Hende dje nacionan “ta camna den e banidad di nan mente,” manera apóstol Pablo a bisa. I ki inútil ta algun skirbimento di nan mente! Notando e skirbimento di hende riba muraya di Pompeya, un observador mes a skirbi: “Ta straño, O muraya, cu bo no a cai ainda bao dje peso di tanto stupidez skirbí.” Pero, no tin stupidez den e “siñanza di Jehova” ni den e trabao di predicacion dje Reino cu e ta haci posibel. (Echo 13:12) Pa medio di tal trabao, hende amante dje berdad ta ser duná sano huicio. Nan ta wordu siñá con pa no sigi anda den nan camina pecaminoso, den ignorancia dje propósito di Dios. Nan no ta den scuridad mental mas, ni no ta ser impulsá pa curazón bobo cu ta busca meta inútil.

⁶ Siñanza divino també ta beneficiános pasobra e ta dúnanos di conoce Jehova Dios i su tratamento. Tal conocimento ta hálanos mas cerca Dios, ta aumenta nos amor pe, i ta intensifica nos deseo pa obedecé. Segun 1 Juan 5:3: “Esaki ta loke e amor di Dios ta nifica, pa nos warda su mandamento; i toch su mandamento no ta un carga pisá.” Nos també ta cumpli cu e mandamento di Jesús pasobra nos sa cu su siñanza ta di Dios. (Juan 7:​16-18) Tal obedencia ta protehános di daño spiritual i ta promove nos felicidad.

Un berdadero propósito den bida

⁷ E siñanza di Jehova Dios ta beneficioso mustrando nos con pa usa nos bida di manera útil. Realmente, siñanza divino ta mústranos con pa conta nos dianan di manera special. Un expectacion di un bida di 70 aña ta ofrece mas cu 25.550 dia. Hende di 50 aña a pasa 18.250 dia caba, i e 7.300 dia cu nan ta spera ta kédanan ta parce mashá poco en berdad. Nan por aprecia specialmente mas plenamente pakico profeta Moisés a pidi Dios den Salmo 90:12: “Mústranos precisamente con pa conta nos dianan di tal manera cu nos ta haci drenta un curazón di sabiduría.” Pero, kico Moisés kier men cu esei?

⁸ Moisés no kier men cu Dios lo revela e cantidad exacto di dianan cu a keda den e bida di cada israelita. Segun Salmo 90, versículo 9 i 10, e profeta hebreo a reconoce cu e duracion di bida por ta rond di 70 of 80 aña​—⁠cortico en berdad. P’sei, evidentemente e palabra di Salmo 90:12 a expresa e deseo anheloso di Moisés pa Jehova mustra, of siña, é i Su pueblo eherce sabiduría pa ebaluá ‘dia di nan añanan’ i úsanan di manera cu Dios ta aproba. Pues, anto, kico di nos? Nos ta aprecia cada dia precioso? Nos ta haci drenta un curazón di sabiduría haciendo esfuerzo pa dedica tur dia na moda cu ta bale la pena pe gloria di nos Magnífico Instructor, Jehova Dios? Siñanza divino ta yúdanos haci precisamente esei.

⁹ Si nos ta siña conta nos dianan pe gloria di Jehova, tal bez nos por sigi conta numa, pasobra siñanza divino ta duna conocimento pa bida eterna. Jesús a bisa: “Esaki ta nifica bida eterna, nan ganando conocimento di bo, e único Dios berdadero, i di esun cu bo a manda, Jesucristo.” (Juan 17:⁠3) Naturalmente, si nos ta gana tur conocimento di mundo cu ta disponibel, esei no por híbanos na bida eterna. Pero, nos por recibi bida eterna si nos ta gana i ta aplica conocimento exacto dje dos persona di mas importante den e universo i realmente ta eherce fe.

¹⁰ Maske cuanto tempo nos a biba caba, láganos corda e sigiente beneficio notable di siñanza divino: E ta duna hende cu ta apliqué un berdadero propósito den bida. The World Book Encyclopedia ta bisa: “Educacion mester yuda hende bira miembro útil dje arreglo social. També, e mester yúdanan desaroya un aprecio di nan herencia cultural i hiba un bida mas satisfactorio.” Siñanza divino ta beneficioso pasobra e ta yúdanos hiba un bida satisfactorio. E ta desaroya den nos un aprecio intenso pa nos herencia spiritual como e pueblo di Dios. I siguramente e ta hácinos bira miembro útil dje arreglo social, pasobra e ta haci posibel pa nos hunga un papel vital satisfaciendo e necesidad di hende mundialmente. Pakico nos por bisa esei?

Un programa mundial di siñamento

¹¹ Distinto di tur otro programa di instruccion, siñanza divino ta satisface e necesidad educativo di hende. Thomas Jefferson, cu a bira e tercer presidente di Estados Unidos, a tuma nota dje necesidad di siña hende. Den un carta di 13 di Augustus di 1786 dirigí na George Wythe, un amigo i cofirmador dje Declaracion di Independencia, Jefferson a skirbi: “Mi ta kere cu e ley di hopi mas importancia den tur nos lista di ley ta pe plamamento di conocimento den e pueblo. Ningun otro fundeshi sigur por ta inventá, pe conserbacion di libertad i felicidad. . . . Mi estimado señor, predica un campaña vigoroso contra ignorancia; establece i mehora e ley pe educacion dje pueblo. Laga compatriota di nos sa . . . cu e belasting cu lo ser pagá pe propósito [di educacion] no ta mas cu un mil parti dje salario pagá na rey, sacerdote, i aristocrat cu lo lanta den nos si nos ta laga e pueblo den ignorancia.”

¹² Leu di laga den ignorancia hende dispuesto na husticia, e siñanza di Jehova Dios ta percura e mihor programa pa educacion mundial pa nan beneficio. Durante e bringamento di Gera Mundial II 50 aña pasá, e Comité Americano pa Reconstruccion Educativo a mira un necesidad urgente pa “educacion mundial.” Tal necesidad ta existi ainda, pero siñanza divino ta e único programa exitoso pa educacion mundial. Además, e ta esun di mas beneficioso pasobra e ta hiza hende for di desesperacion, ta lántanan moral i spiritualmente, ta sálbanan for dje orguyo i prehuicio di mundo, i ta duna conocimento pa bida eterna. Sobre todo, e programa ta beneficiá hende na tur parti, siñando nan pa sirbi Jehova Dios.

¹³ Multitud di hende cu ta bira sirbidor di Dios awor ta disfruta di beneficio di siñanza divino. Nan ta conciente di nan necesidad spiritual i ta reconoce plenamente cu e dia di Jehova ta cerca. (Mateo 5:3; 1 Tesalonicense 5:​1-6) Awor aki, “den e parti final dje dianan,” tal hende di tur nacion ta corre cerca e montaña di Jehova, su adoracion puro. E ta firmemente establecí i ta ser halzá mas halto cu tur adoracion cu ta contrario cu e boluntad di Dios. (Isaías 2:​2-4) Si bo ta un testigo dedicá di Jehova, bo no ta keda encantá di ser den e multitud semper aumentante cu ta adoré i beneficiá dje siñanza divino? Ta ki maraviyoso pa ser hunto cu esnan cu ta sclama: “Boso alaba Jah!”​—⁠Salmo 150:⁠6.

Efecto beneficioso riba nos spiritu

¹⁴ Entre e cantidad di beneficio di siñanza divino ta e efecto excelente cu e por tene riba nos pensamento i spiritu. E ta impulsános pa pensa riba cosnan husto, decente, birtuoso, i digno di alabanza. (Filipense 4:⁠8) E siñanza di Jehova Dios ta yúdanos sigi e conseho di Pablo: “Sea baby en cuanto maldad; ma bira hende hecho den facultad di comprendimento.” (1 Corintio 14:20) Si nos ta aplica tal conseho, nos lo no busca conocimento di maldad. Pablo a skirbi també: “Boso kita tur amargura malicioso i rabiamento i furia i gritamento i zundramento hunto cu tur maldad.” (Efesio 4:31) Obedencia na tal conseho por yúdanos evita inmoralidad i otro picá grosero. Aunque esei por ta beneficioso fisical i mentalmente, e specialmente por dúnanos e gozo di sa cu nos ta agrada Dios.

¹⁵ Pa nos keda birtuoso di pensamento, un yudanza ta di evita ‘mal asociacion cu ta daña costumber útil.’ (1 Corintio 15:33) Como hende cristian, nos no mag keda den compañía di fornicador, adúltero, i otro malechor. Lógicamente, anto, nos no mag asociá cu tal hende, lezando tocante nan pa placer sensual of mirando nan na television of den cine. Curazón ta traicionero, i por fácilmente cria deseo pa mal cosnan, i por ta tentá pa hácinan. (Jeremías 17:⁠9) P’sei, láganos evita tal tentacion pegando na siñanza divino. Esei por afecta e pensamento di “amante di Jehova” te na un grado asina beneficioso cu nan ta “odia loke ta malu.”​—⁠Salmo 97:⁠10.

¹⁶ Pablo a bisa Timoteo, su colaborador: “Señor sea cu e spiritu cu bo ta manifesta. Su bondad inmerecida sea cu boso.” (2 Timoteo 4:22) E apóstol a deseá pa Dios, mediante Señor Jesucristo, aprobá dje forza impulsador cu a motivá Timoteo i otro hende cristian. E siñamento di Dios ta yúdanos manifesta un spiritu amoroso, bondadoso, i suave. (Colosense 3:​9-14) I ki diferente esei tá di hopi hende den e último dianan aki! Nan ta halzá, malagradicido, sin cariño natural, no ta dispuesto pa ningun acuerdo, cabezura, amante di placer, i ta falta berdadero debocion religioso. (2 Timoteo 3:​1-5) Sin embargo, mientras cu nos ta sigi aplica e beneficio di siñanza divino den nos bida, nos ta manifesta un spiritu cu Dios i nos próhimo ta aprecia.

Beneficioso den relacion humano

¹⁷ E siñanza di Jehova Dios ta yúdanos mira e beneficio di cooperacion humilde cu otro adorador. (Salmo 138:⁠6) Distinto di hopi hende djawe, nos no ta viola principio husto sino ta dispuesto pa yega un acuerdo. Por ehempel, tin hopi bon resultado pasobra superintendente nombrá ta dispuesto pa yega un acuerdo durante reunion di anciano. Homber asina por papia trankilamente den interés dje berdad, sin laga emocion domina loke ta lógico ni causa desunion. Tur miembro dje congregacion ta saca probecho dje spiritu di unidad cu nos ta experimentá si nos tur ta sigi aplica siñanza divino.​—⁠Salmo 133:​1-3.

¹⁸ Además, siñanza divino ta beneficioso yudando nos tene un punto di bista correcto di otro hende creyente. Jesús a bisa: “Ningun hende por bini cerca mi amenos cu e Tata cu a mandámi ta atraele.” (Juan 6:44) Desde 1919 specialmente, Jehova a laga sirbidor di dje proclama su huicio, i tal advertencia mundial a haci e sistema mundial di Satanás tembla i sagudi. Ne mesun tempo, hende temeroso di Dios​—⁠“e cosnan deseabel”​—⁠Dios a hala cerca dje pa nan separánan for dje nacionan i participa cu cristian ungí den e yenamento dje cas di adoracion di Jehova cu gloria. (Ageo 2:⁠7) Siguramente, nos mester considerá tal hende deseabel cu Dios ta atraé como compañénan stimá.

¹⁹ Pa motibo cu nos tur ta imperfecto, cosnan naturalmente lo no sigi suavimente cada bez. Ora Pablo tabata cla pa sali pa haci su segundo biahe como misionero, Barnabás a keda determiná di hiba Marco cu nan. Pablo no tabata di acuerdo pasobra Marco “a apartá foi nan den Pamfilia i no a bai cu nan ne trabao. Anto a sosode un atake intenso di rabia.” Barnabás a hiba Marco cuné na Chipre, pero Pablo a scoge Silas pa compañé pa pasa door di Siria i Cilicia. (Echo 15:​36-41) Despues, ta parce cu e choque a drecha, pasobra Marco tabata cu Pablo den Roma, i e apóstol a mencioné favorablemente. (Colosense 4:10) Un beneficio di siñanza divino ta cu e ta mústranos con pa resolve dificultad personal entre hende cristian, sigiendo conseho tal como loke Jesús a duna den Mateo 5:​23, 24 i Mateo 18:​15-17.

Semper beneficioso i triunfante

²⁰ Asta den nos consideracion breve di algun beneficio i triunfo di siñanza divino, sin duda nos tur por mira e necesidad di persevera den e aplicacion di dje den nos bida. Pues, cu e spiritu di oracion, láganos sigi siña for di nos Magnífico Instructor. Pronto, siñanza divino lo triunfa como nunca na antes. Lo e ser triunfante ora hende intelectual di mundo ta hala nan último rosea. (Compara cu 1 Corintio 1:19.) Además, mientras cu miyones mas ta siña i ta haci e boluntad di Dios, e conocimento di Jehova Dios lo yena e tera mescos cu awa ta yena lamá mes. (Isaías 11:⁠9) Di ki un manera magnífico esei lo beneficiá humanidad obediente i vindica Jehova Dios como Soberano Universal!

²¹ E siñanza di Jehova Dios semper lo ser beneficioso i triunfante. Bo ta sigi beneficiá di dje como un studiante ardiente dje gran Buki di Siñanza di Dios? Bo ta biba na armonía cu e Bijbel i ta compartí su berdad cu otro hende? Si bo ta hacié, bo por spera di mira e triunfo completo di siñanza divino, pe gloria di nos Magnífico Instructor, Señor Soberano Jehova Dios.

[Study Questions]

1. Kico lo pasa nos si nos ta aplica siñanza divino den nos bida?

2, 3. (a) E pueblo di Dios di antigua por a saca cua probecho si nan a obedece su mandamento? (b) Kico lo pasa si nos ta aplica siñanza divino den nos bida djawe?

4. Di ki manera siñanza divino a afecta e bida di hopi hende?

5. Con e siñanza divino ta afecta e manera cu hende ta anda?

6. Cua relacion tin entre nos obedencia ne siñanza di Jehova i nos felicidad?

7, 8. (a) Con nos mester comprende Salmo 90:12? (b) Con nos por haci drenta un curazón di sabiduría?

9. Kico nos por spera si nos ta siña conta nos dianan pe gloria di Jehova?

10. Kico un enciclopedia ta bisa tocante educacion, i con esei ta compara cu e beneficio di siñanza divino?

11. Ki énfasis Thomas Jefferson a duna ne necesidad di un educacion adecuado?

12. Pakico nos por bisa cu siñanza divino ta e programa mas exitoso i beneficioso pa educacion mundial?

13. Di ki manera Isaías 2:​2-4 ta ser cumplí awe?

14. Ta di ki probecho pa nos sigi e conseho di Pablo den 1 Corintio 14:⁠20?

15. Kico por yúdanos keda birtuoso den pensamento?

16. Con e siñanza di Dios por afecta e spiritu cu nos ta manifesta?

17. Pakico cooperacion humilde ta tanto importante?

18. Siñanza divino ta yúdanos mantene cua punto di bista di otro hende creyente?

19. Kico e siñanza di Dios ta revela tocante di resolve dificultad personal cu otro hende cristian?

20, 21. Nos consideracion di siñanza divino mester conmovénos pa haci kico?

[Caption on page 15]

Siñanza divino ta mústranos con pa camna cu Dios, mescos cu Noé

[Caption on page 17]

Hende di tur nacion ta bini na cantidad ne montaña di Jehova Dios

[Caption on page 18]

Kico bo a siña?

◻ Siñanza divino por tene cua efecto riba nos bida?

◻ Di ki manera e siñanza di Jehova Dios ta satisface e necesidad di educacion?

◻ Cua efecto beneficioso siñanza divino por tene riba nos pensamento i actitud?

◻ Di ki manera e siñanza di Dios ta resulta di ser beneficioso en cuanto relacion humano?