Confia Cu Jehova Lo Cumpli Cu Su Proposito
“E hustunan mes lo poseé e tera, i nan lo biba pa semper riba dje.” —SALMO 37:29.
ORA Jehova a crea nos promé mayornan, Adam i Eva, el a traha nan perfecto. I el a crea nan di manera cu nan lo por a biba pa semper riba e tera aki—si nan a obedecé su leynan. (Génesis 1:26, 27; 2:17) Ademas, Dios a pone nan den un ambiente paradísico. (Génesis 2:8, 9) Jehova a bisa nan: “Sea fructífero i bira hopi i yena e tera i domin’é.” (Génesis 1:28) Pues, cu tempu nan yunan lo a plama riba henter e tera i e planeta aki lo a bira un paradijs yená cu un rasa di humanidad perfecto i felis. Ki un comienso excelente e famia humano tabatin! “Dios a mira tur loke el a traha i, mira! e tabata hopi bon.”—Génesis 1:31.
2 Sin embargo, e estado di asuntunan humano cu a existí pa miles di aña no ta parce e propósito original di Dios na nada. Humanidad ta hopi alehá for di perfeccion i definitivamente no ta felis. Condicionnan di mundu ta angustioso i segun profecia, nan a empeorá dramáticamente den nos tempu. (2 Timoteo 3:1-5, 13) Pues con nos por tin confiansa cu e propósito di Dios pa hende lo ser realisá den e futuro cercano? Lo pasa mas periodonan largu di tempu cu condicionnan continuo di angustia?
Kico A Bai Robes?
3 Esnan cu tin conocimentu exacto dje Palabra inspirá di Dios sa pakico Jehova a permití e mal condicionnan aki riba tera. Nan sa tambe kico lo e haci tocante nan. For dje relato di Bijbel, nan a siña cu nos promé mayornan a malusá e don maraviyoso di boluntad liber cu Dios a duna hende. (Compará cu 1 Pedro 2:16.) Incorectamente nan a scoge e curso di independencia fo’i Dios. (Génesis, capítulo 2 i 3) Nan rebelion a lanta preguntanan dje mayor magnitud, tal como: E Soberano Universal tin e derecho pa goberná riba hende? Su mando gobiernu ta lo mihó pa nan? Gobernacion humano por tin éxito sin e supervision di Dios? E manera sigur pa haña contesta rib’e preguntanan aki tabata pa laga siglonan di gobernacion humano pasa. E resultadonan lo a mustra fuera di tur duda si hende por ta exitoso separá di nan Creador.
4 Ora Adam i Eva a bandoná Dios, e no a sostené nan mas den perfeccion. Sin su sosten, nan a deteriorá. E resultado tabata imperfeccion, biehes i finalmente morto. Mediante ley di herencia, nos promé mayornan a pasa e característicanan negativo ei na tur nan desendientenan, incluyendo nos. (Romano 5:12) I kico dje resultado di miles di aña di gobiernu humano? E tabata catastrófico, net manera Eclesiastés 8:9 ta declará ciertamente: “Hende a dominá hende pa su perhuicio.”
5 E pasamentu di tempu a demostrá fuera di tur duda cu hende no ta capas pa dirigí nan asuntunan exitosamente separá di nan Creador. E escritor di Bijbel inspirá, Jeremías, a declará: “Mi wel sa bon, O Jehova, cu na hende terenal no ta pertenecé su caminda. No ta pertenecé na hende cu ta cana pa ni sikiera dirigí su paso.”—Jeremías 10:23; Deuteronomio 32:4, 5; Eclesiastés 7:29.
E Propósito di Dios No A Cambia
6 E pasamentu di miles di aña di historia humano—yená cu asina tantu maldad i sufrimentu—a cambia e propósito di Dios? Su Palabra ta declará: “Esaki ta loke Jehova a bisa, e Creador di cielu, E, e Dios berdadero, e Formador dje tera i e Trahador di dje, E, Esun cu a establec’é firmemente, cu no a cre’é simplemente pornada, cu a form’é asta p’e ser habitá.” (Isaías 45:18) Pues Dios a forma e tera pa hende habit’é, i esei ainda ta su propósito.
7 Jehova no solamente a crea e tera pa ser habitá sino tambe el a proponé p’e bira un paradijs pa hende perfecto i felis disfrutá di dje. Ta p’esei e Bijbel a profetisá cu lo tin “un tera nobo,” un sociedad humano nobo, den cua “husticia lo biba.” (2 Pedro 3:13) I na Revelacion 21:4, e Palabra di Dios ta bisa nos cu den su mundu nobo, “lo e seca tur lágrima di nan [humanidad su] wowo, i lo no tin morto mas, ni tampoco lo existí yoramentu ni sclamacion ni dolor mas.” Pa tal motibu Jesus por a papia dje binidero mundu nobo ei riba tera como “Paradijs.”—Lucas 23:43.
8 Siendo cu Jehova ta e Creador todopoderoso i omnisapiente di universo, ningun persona por stroba su propósito. “Jehova di ehércitonan a hura, bisando: ‘Siguramente net manera mi a calculá, asina mester sosodé; i net manera mi a consehá, esei ta loke lo ser realisá.’ ” (Isaías 14:24) Pues, ora Dios ta bisa cu lo e haci e tera aki un paradijs habitá pa hende perfecto, esei ta loke lo sosodé. Jesus a bisa: “Felis ta hende di genio suave, ya cu nan lo heredá e tera.” (Mateo 5:5; compará cu Salmo 37:29.) Nos por conta rib’e cumplimentu di tal promesa. En realidad, nos por risca nos bida p’e promesa ei.
Nan A Confia Jehova
9 Hopi hende temeroso di Dios atrabes di historia a risca nan bida p’e propósito di Dios p’e tera debí cu nan tabata convencí cu lo e cumpli cuné. Aunke nan conocimentu kisas tabata limitá, nan a confia Dios i a edificá nan bida rib’e hacimentu di su boluntad. Por ehempel, tabatin Abraham, kende a biba rond di 2.000 aña promé cu Jesus a cana rib’e tera—hopi promé cu e Bijbel a cuminsá ser skirbí. El a confia cu Jehova lo cumpli cu Su promesanan. Probablemente, Abraham a siña tocante e Creador for di Sem, su antepasado fiel, kende a ser siñá dor di Noe. Pues ora Dios a bisa Abraham pa muda for dje stad próspero di Ur dje caldeonan pa e tera desconocí i peligroso di Canaan, e patriarca ei tabata sa cu e por a confia Jehova, i p’esei el a bai. (Hebreo 11:8) Cu tempu, Jehova a bis’é: “Lo mi haci di bo un nacion grandi.”—Génesis 12:2.
10 Kico a sosodé despues cu Abraham a haña Isaac? Jehova a indicá na Abraham cu tabata mediante Isaac cu su desendientenan lo a desaroyá pa bira un gran nacion. (Génesis 21:12) Pues, mester a parce un gran contradiccion ora Jehova a bisa Abraham, como prueba di su fe, pa sacrificá su yu Isaac. (Génesis 22:2) Sin embargo, cu pleno confiansa den Jehova, Abraham a dal paso pa obedecé, en realidad hisando su cuchú pa mata Isaac. Na último momento, Dios a manda un angel pa frena Abraham.—Génesis 22:9-14.
11 Pakico Abraham tabata asina obediente? Hebreo 11:17-19 ta revelá: “Pa medio di fe Abraham, ora el a ser probá, casi a ofrecé Isaac, i e homber cu gustosamente a ricibí e promesanan a purba ofrecé su yu unigénito, aunke el a ser bisá: ‘Loke lo ser yamá “bo simia” lo ser mediante Isaac.’ Pero el a considerá cu Dios por a lant’é asta for di morto; i el a ricibi’é djei tambe den un manera di ilustracion.” Romano 4:20, 21 di igual manera ta declará: “Debí n’e promesa di Dios, [Abraham] no a vacilá den un falta di fe, . . . kedando plenamente convencí cu loke [Dios] a primintí e tabata capas pa haci tambe.”
12 Abraham a ser recompensá pa su fe no solamente p’e echo cu Isaac a ser di spar i p’e echo cu un “gran nacion” a ser formá mediante dje, sino tambe den un otro manera. Dios a bisa Abraham: “Pa medio di bo simia tur nacion dje tera siguramente lo bendicioná nan mes debí n’e echo cu bo a scucha mi bos.” (Génesis 22:18) Con? E Rey dje Reino celestial di Dios lo a bini mediante e liña di desendencia di Abraham. E Reino ei lo eliminá for di existencia e mundu malbado aki bou di Satanas. (Daniel 2:44; Romano 16:20; Revelacion 19:11-21) E ora ei, den un tera limpi bou di gobernacion di Reino, Paradijs lo ser desaroyá mundialmente, i hende for di “tur nacion” cu ta haci e boluntad di Dios lo disfrutá di salú perfecto i bida pa semper. (1 Juan 2:15-17) I aunke Abraham a poseé solamente conocimentu limitá dje Reino, el a confia Dios i a spera cu anhelo su establecimentu.—Hebreo 11:10.
13 Varios cien aña despues, tabatin Job, kende a biba entre siglo 17 i 16 P.E.C. na loke awor ta Arabia. E tambe a biba promé cu e Bijbel a cuminsá ser skirbí. Job “a resultá di ta sin culpa i recto, i temeroso di Dios i apartá for di maldad.” (Job 1:1) Ora Satanas a afligí Job cu un malesa repugnante i doloroso, e homber fiel ei “no a expresá ningun palabra pecaminoso” atrabes di su prueba. (Job 2:10, The New English Bible) Job a confia Dios. I aunke e no tabata sa e detayenan dje motibu pakico e tabata sufri asina tantu, el a risca su bida pa Dios i Su promesanan.
14 Job tabata sa cu asta si el a muri, un dia Dios lo por restor’é na bida pa medio dje resureccion. El a indicá e speransa aki ora el a bisa Jehova Dios: “O, cu bo scondé mi den Sheol [graf], . . . cu bo fiha un límite di tempu pa mi i bo corda riba mi! Si un homber físicamente capacitá muri, e por bolbe biba? . . . Lo bo yama, i ami mes lo respond’é bo.” (Job 14:13-15) Aunke Job tabata den agonia, el a demostrá fe den e soberania di Jehova, declarando: “Te ora cu mi muri lo mi no kita mi integridad fo’i mi mes!”—Job 27:5.
15 Rond di seis siglo despues di Job i mas o ménos un mil aña promé cu Jesus a bini na tera, David a expresá su confiansa den un mundu nobo. El a bisa den e salmonan: “Esnan cu ta spera riba Jehova ta esnan cu lo poseé e tera. I solamente un poco tempu mas, i e malbado lo no tei mas . . . Pero e mansunan mes lo poseé e tera, i nan berdaderamente lo haña nan deleite exkisito den e abundancia di pas. E hustunan mes lo poseé e tera, i nan lo biba pa semper riba dje.” Debí n’e speransa firme aki, David a insta: “Confia den Jehova . . . Tambe deleitá bo exkisitamente den Jehova, i lo e duná bo e peticionnan di bo curason.”—Salmo 37:3, 4, 9-11, 29.
16 Atrabes dje siglonan, homber i muhernan fiel tabatin e mésun speransa aki di bida eterno riba tera. En realidad, nan a forma ‘un nubia grandi di testigo’ kendenan den un manera masha literal a risca nan bida p’e promesanan di Jehova. Hopi dje antiguo testigonan di Jehova ei a ser torturá i matá pa causa di nan fe, “afin cu nan por alcansá un mihó resureccion.” Con asina? Den e mundu nobo, Dios lo recompensá nan cu un mihó resureccion i e prospecto di bida eterno.—Juan 5:28, 29; Hebreo 11:35; 12:1.
Testigonan Cristian Ta Confia den Dios
17 Den e promé siglo E.C., Jehova a revelá n’e congregacion cristian recien establecí mas detaye tocante e Reino i su mando gobernacion riba tera. Por ehempel, su spiritu a inspirá apostel Juan pa skirbi cu e cantidad di esnan pa ser uní cu Jesucristo den e Reino di cielu lo ta 144.000. Esakinan lo ta fiel sirbidornan di Dios kendenan a ser “cumprá for di entre humanidad.” (Revelacion 7:4; 14:1-4) Nan lo goberná riba e tera “como reynan” huntu cu Cristo den cielu. (Revelacion 20:4-6) E cristiannan ei di promé siglo a confia asina firmemente cu Jehova lo cumpli cu su propósito p’e Reino celestial i su dominio terenal cu nan tabata dispuesto pa muri pa nan fe. Hopi di nan a haci precisamente esei.
18 Awe, casi cincu miyon Testigo di Jehova tin e mésun confiansa den Dios manera nan semehantenan tabatin kendenan a biba siglonan mas promé cu nan. E Testigonan aki di awendia tambe a risca nan bida p’e promesanan di Dios. Nan a dedicá nan bida na dje i tin e Bijbel completo pa fortalecé nan fe. (2 Timoteo 3:14-17) E Testigonan di Jehova aki di dia moderno ta imitá Jesus su siguidornan di promé siglo kendenan a declará cu nan lo “obedecé Dios como gobernante mas bien cu hende.” (Echo 5:29) Den e siglo aki hopi dje Testigonan cristian aki a ser persiguí cruelmente. Algun asta a ser matá pa motibu di nan fe. Otronan a muri di enfermedad, accidente of biehes. Sin embargo, mescos cu fiel testigonan di pasado, nan a confia Dios pasobra nan tabata sa cu lo e restorá nan na bida den su mundu nobo pa medio dje resureccion.—Juan 5:28, 29; Echo 24:15; Revelacion 20:12, 13.
19 Testigonan di Jehova ta comprendé cu e echo cu nan a ser trecé for di tur nacion den un solo hermandad mundial, a ser profetisá hopi tempu pasá den profecia di Bijbel. (Isaías 2:2-4; Revelacion 7:4, 9-17) I Jehova ta laga nan haci un trabou mundial di predicacion pa reuní den su fabor i proteccion ainda mas hende di curason onrado. (Proverbio 18:10; Mateo 24:14; Romano 10:13) Tur esakinan ta pone nan pleno confiansa den Jehova, sabiendo cu pronto lo e introducí su maraviyoso mundu nobo.—Compará cu 1 Corintio 15:58; Hebreo 6:10.
20 Profecianan di Bijbel ta indicá cu e mundu di Satanas ta den su último dianan pa casi 80 aña awor, desde e aña crucial di 1914. E mundu aki ta acercando su fin. (Romano 16:20; 2 Corintio 4:4; 2 Timoteo 3:1-5) P’esei Testigonan di Jehova tin curashi i determinacion debí cu nan ta realisá cu pronto Dios su Reino lo tuma control completo di tur asuntu dje tera. Dor di caba cu e mundu malbado actual i introducí su hustu mundu nobo, Dios lo eliminá completamente e mal situacion cu a existí riba tera pa asina tantu siglo.—Proverbio 2:21, 22.
21 Despues, pa tur eternidad, Dios lo mustra su gran percuracion pa nos dor di drama bendicionnan cu lo haci hopi mas cu compensá cualkier daño cu nos a ricibí den pasado. Asina tantu bon cos lo sosodé cu nos den e mundu nobo cu nos problemanan anterior lo desparcé for di memoria. Ta ki un consuelo pa sa cu e ora ei Jehova lo ‘habri su man i satisfacé e deseo di tur cos bibiente.’—Salmo 145:16; Isaías 65:17, 18.
22 Den e mundu nobo, humanidad fiel lo mira e cumplimentu di Romano 8:21: “E creacion mes tambe lo ser librá for di sclabitud na corupcion i tene e glorioso libertad dje yunan di Dios.” Nan lo mira cumplimentu dje oracion aki cu Jesus a siña su siguidornan: “Laga bo reino bini. Laga bo boluntad cumpli, mescos cu den cielu, tambe riba tera.” (Mateo 6:10) Pues pone bo pleno confiansa den Jehova pasobra su promesa infalibel ta: “E hustunan mes lo poseé e tera, i nan lo biba pa semper riba dje.”—Salmo 37:29.
[Study Questions]
1. Kico ta Jehova su propósito pa hende i p’e tera aki?
2. E estado di asuntunan humano ta lanta cua preguntanan?
3. Pakico Jehova no a caba mesora cu e rebelion di humanidad?
4, 5. (a) Kico tabata e resultado dje rechaso humano dje mando di Dios? (b) Kico e pasamentu di tempu a demostrá fuera di tur duda?
6, 7. (a) Miles di aña di historia a cambia e propósito di Dios? (b) Kico ta incluí den e propósito di Jehova?
8. Pakico nos por ta sigur cu Jehova lo cumpli cu su propósito?
9. Kico Abraham a haci cu a mustra su confiansa den Jehova?
10, 11. Pakico Abraham tabata dispuesto pa ofrecé Isaac, su yu unigénito?
12. Con Abraham a ser recompensá pa su fe?
13, 14. Pakico Job a confia Dios?
15. Con David a expresá su confiansa den e propósito di Jehova?
16. Ki speransa ‘un nubia grandi di testigo’ tabatin?
17. Con firmemente e cristiannan di promé siglo a confia Jehova?
18. Con Testigonan di Jehova awe ta imitá nan semehantenan di hopi tempu pasá?
19, 20. Kico nos ta reconocé en cuanto profecia di Bijbel pa nos dia?
21. Pakico nos por alegrá apesar di problemanan actual?
22. Pakico nos mester pone nos confiansa den Jehova?
[Caption on page 16]
Dios a crea hende pa biba pa semper den felicidad riba un tera paradísico
[Caption on page 18]
Abraham a pone su confiansa den Jehova su capacidad pa resucitá e mortonan
[Caption on page 20]
Con Lo Bo Contestá?
◻ Kico ta Jehova su propósito pa hende i p’e tera aki?
◻ Pakico Dios a permití condicionnan malu riba tera?
◻ Con hende fiel di pasado a mustra nan confiansa den Jehova?
◻ Pakico e sirbidornan di Dios awe ta confia den Jehova?