Proclamador Di Reino Activo Den Tur E Mundo

“Boso lo ser testigo di mi . . . te ne parti mas lehano dje tera.”​—⁠ECHO 1:⁠8.

ORA Jesús a detayá e trabao cu Jehova Dios a manda su Yiu na mundo pa haci, el a bisa: “Mi mester declara e bon nobo dje reino di Dios.” (Lucas 4:43) Di igual manera, ora el a menciona e trabao cu disípel di dje lo haci riba tera ora e bolbe cu autoridad real, Jesús a bisa: “E bon nobo di reino lo ser predicá den tur e tera habitá como testimonio pa tur nacion; anto e fin lo yega.”​—⁠Mateo 24:⁠14.

² Pakico noticia tocante e Reino di Dios ta tanto importante? Pakico e Reino ta exigi tanto publicidad extenso? Pasobra esei ta e Reino Mesiánico cu lo vindica e soberanía universal di Jehova Dios. (1 Corintio 15: 24-28) Pa medio di dje, Jehova lo ehecuta huicio contra e sistema di cosnan actual di Satanás i cumpli cu su promesa di bendiciona tur famía dje tera. (Génesis 22:​17, 18; Daniel 2:44) Cu e dunamento di testimonio tocante e Reino, Jehova Dios a localiza hende cu el a ungi despues pa ser coheredero cu su Yiu. Pa medio di proclamacion dje Reino, un trabao di separacion també ta ser hací awe. (Mateo 25:​31-33) Jehova Dios kier pa hende di tur nacion ser informá di su propósito. E kier pa nan haya oportunidad di scoge bida como ciudadano bao di su Reino. (Juan 3:16; Echo 13:47) Bo ta tene un parti completo den e proclamacion di su Reino?

Den anticipacion dje fin di tempo gentil

³ Ayá na 1880, Charles Taze Russell, e promé redactor dje revista Toren di Vigilancia na inglés, a haci biahe através dje nortoost di Estados Unidos pa estimula formacion di grupo pa estudio bíblico. Apropiadamente, e tema cu el a splica tabata “Cosnan perteneciendo ne Reino di Dios.” Manera número di Watch Tower a publica den número anterior, Studiante di Bijbel (e nomber di Testigo di Jehova ayá) a realiza cu pa nan resulta di ser digno di tene parti den e Reino di Dios, nan tabatin cu pone e Reino como nan interés primario, usando cu gusto nan bida, nan capacidad, i nan recurso den e sirbishi di dje. Tur otro cos den bida tabatin cu ocupa un lugar segundario. (Mateo 13:​44-46) Nan responsabilidad a inclui e proclamacion na otro hende e bon nobo dje Reino di Dios. (Isaías 61:​1, 2) Te na ki grado nan a haci esei promé cu e fin dje tempo gentil na 1914?

⁴ Desde 1870 te na 1914, tabatin relativamente poco Studiante di Bijbel. Na 1914, solamente rond di 5.100 tabata participa activamente den e dunamento di un testimonio público. Pero, ki un testimonio extraordinario esei tabata! Na 1881, solamente dos aña despues di comienzo di publicacion di Watch Tower, nan a cuminza distribucion dje publicacion di 162 bladji na inglés Alimento pa cristian pensativo. Den poco luna so, nan a distribui 1.200.000 copia. Den poco aña, diez di miyones di tratado a wordu distribui tur aña den hopi idioma.

⁵ Además, cuminzando na 1881, algun a ofrece nan sirbishi como evangelizador di tempo completo. Eseinan tabata precursor di pionero djawe (evangelizador di tempo completo). Algun evangelizador a bai na pia of cu bicicleta, dunando testimonio personalmente den casi tur parti dje país unda nan a biba. Otronan a alcanza territorio den stranhería i tabata e proménan pa hiba e bon nobo na lugar tal como Finlandia, Barbados, i Birma (yamá awor Myanmar). Nan a manifesta celo di misionero manera e celo di Jesucristo i di su apóstolnan.​—⁠Lucas 4:43; Romano 15:​23-25.

⁶ Ruman Russell mes a biahá extensivamente pa plama e berdad. El a bai na Canadá varios bez; a predica den Panamá, Jamaica, i Cuba; a haci 12 bishita na Europa; a pasa rond di mundo na un biahe evangelizador. Además, el a manda otro homber pa iniciá i hiba delantera den e predicacion dje bon nobo den territorio di stranhería. Adolf Weber tabata mandá na Europa rond di 1895, i su ministerio a extende for di Suiza te na Francia, Italia, Alemania, i Bélgica. E. J. Coward tabata mandá na territorio di Caribe. Robert Hollister tabata asigná na Oriente na 1912. Ayá, tratado special tabata prepará na diez idioma, i distribuidor natural dje tera a parti miyones di copia di eseinan den tur India, China, Hapón, i Corea. Si bo tabata na bida ne tempo ei, bo curazón lo a conmovébo pa haci un esfuerzo sincero pa alcanza otro hende den bo becindario i mas ayá cu e bon nobo?

⁷ Ora tempo gentil a yega cerca su fin, corant tabata usá pa publica sermón bíblico cu ruman Russell a pronunciá. Nan énfasis primario no tabata riba e aña di 1914 sino, mas bien, riba e propósito di Dios i e garantía di su cumplimento. Tanto como 2.000 corant alabez, alcanzando 15.000.000 lector, a publica cu regularidad tal sermón. Anto, ora e aña 1914 a yega, e Sociedad a cuminza su hungamento público dje cine “Photo-Drama of Creation.” Den cuater presentacion di 2 ora largu, el a presenta berdad bíblico for dje creacion te ne mil aña. Dentro di un aña so, auditorio di un total di mas cu nuebe miyón hende na Nortamérica, Europa, Australia, i Nueva Zelandia a miré.

⁸ Segun registro disponibel, ya caba cerca e fin di 1914, e grupo di evangelizador celoso a plama nan proclamacion dje Reino di Dios den 68 país.a Pero esei tabata solamente un principio!

Proclamacion celoso dje Reino establecí

⁹ Ora Studiante di Bijbel a reuni den Cédar Point, Ohio, na 1919, J. F. Rutherford, cu tabata presidente dje Sociedad Watch Tower ne tempo ei, a declará: “Nos vocacion tabata i tá pa anuncia e glorioso reino entrante dje Mesías.” Den e segundo asamblea na Cédar Point, na 1922, ruman Rutherford a enfatizá e echo cu ne fin di tempo gentil, na 1914, ‘e Rey di gloria a cuminza usa su gran poder i a cuminza reina.’ Sigientemente, el a presenta e cuestion directamente ne auditorio, bisando: “Boso ta kere cu e Rey di gloria a cuminza su gobernacion? Anto bolbe ne campo, O boso yiunan di Dios Haltísimo! . . . Proclama e mensahe na tur parti. Mundo tin cu sa cu Jehova ta Dios i cu Jesucristo ta Rey di reynan i Señor di señornan. Esaki ta e tempo mas importante cu tur. Mira, e Rey ta reina! Boso ta proclamador di dje.”

¹⁰ Mas cu 70 aña a pasa desde tal asamblea den Cédar Point​—⁠casi 80 aña desde cu Jehova a cuminza expresa su soberanía mediante e gobernacion mesiánico di su Yiu. Te na ki grado Testigo di Jehova realmente a cumpli cu e trabao asigná na nan den e Palabra di Dios? Cua parti bo personalmente tin den dje?

¹¹ Un poco despues di 1920, radio a bira disponibel como un instrumento pa usa pa duna proclamacion extenso ne mensahe di Reino. Despues di 1930, discurso di asamblea presentando e Reino como e speranza di mundo tabata transmiti via red di radio of transmision via stacion en cadena i liña di telefón cu a pasa rond di mundo. Auto equipá cu loudspeaker tabata usá també pa pronunciá discurso bíblico grabá den lugar público. Anto, na 1936, den Glasgow, Escocia, nos rumanan a cuminza colga poster dilanti i patrás ora nan a marcha door di centro comercial pa anuncia discurso público. Tur esei tabata un manera efectivo pa duna testimonio na hopi hende ne tempo ei ora e cantidad di rumanan tabata poco.

¹² Naturalmente, e Scritura ta haci claro cu como hende cristian nos individualmente tin e responsabilidad di duna testimonio. Nos no por laga artículo di corant of transmision di radio so haci e trabao. Miles di hende cristian leal​—⁠homber, muher, i hovenan​—⁠ta acepta tal responsabilidad. Como resultado, predicacion di cas pa cas a bira e marca di identificacion di Testigo di Jehova.​—⁠Echo 5:42; 20:⁠20.

Alcanzando tur e tera habitá

¹³ Sabiendo cu e mensahe di Reino tin cu ser predicá den tur e tera habitá, algun Testigo di Jehova a considera seriamente loke nan por haci personalmente pa alcanza territorio mas ayá cu nan mes becindario.

¹⁴ Hopi hende a siña e berdad despues di a muda for dje lugar di nan nacimento. Aunque nan por a muda pa probecha di bentaha material, nan a haya algo mas precioso, i algun a sinti impulso di bolbe ne país of becindario di nan nacimento pa nan comparti e berdad. Dje manera ei, pronto den e siglo aki e predicacion dje bon nobo a extende te na Scandinavia, Grecia, Italia, país di Oosteuropa, i hopi otro país. Asta awor, despues di 1990, e mensahe di Reino ta plama di igual manera.

¹⁵ Aplicando e conseho dje Palabra di Dios den nan bida, algun ruman por a haci nan mes disponibel pa sirbishi den lugar unda nan nunca a biba na antes. W. R. Brown (yama hopi bez “Bible Brown”) tabata un hende asina. Na 1923, pa expande e trabao di evangelizá, el a muda for di Trinidad te na Westáfrica. Despues di 1930, Frank i Gray Smith, Robert Nisbet, i David Norman tabata entre esnan cu a hiba e mensahe di Reino panort riba costa di oost di Africa. Otronan a yuda cultiva e campo di Suramérica. Pronto despues di 1920, George Young, un canadés, a participa den e trabao den Argentina, Brasil, Bolivia, Chile, i Perú. Juan Muñiz, cu a sirbi den Spaña, a sigi haci e trabao despues den Argentina, Chile, Paraguay, i Uruguay. Tur eseinan a manifesta un spiritu manera esun expresá den Isaías 6:8: “Atámi aki! Mandámi.”

¹⁶ E predicacion dje bon nobo tabata alcanzando asta territorio remoto. Barcu cu tripulacion di Testigo di Jehova tabata bishita tur haf remoto di oost di Canadá, e costa di Norwega te na Artica, isla di Lamá Pacífico, i haf di Zuidoost di Asia.

¹⁷ Asombrosamente, ya caba na aña 1935, Testigo di Jehova tabata ocupá predicando den 115 país, i nan a alcanza otro 34 país sea cu expedicion pa duna testimonio of pa literatura cu nan a manda pa post. Sin embargo, e trabao no a caba. E aña ei Jehova Dios a habri nan wowo na su propósito di recoge “un multitud grandi” cu por sobrebiba i drenta den su mundo nobo. (Revelacion 7:​9, 10, 14) Ainda tabatin hopi testimonio pa ser duná!

¹⁸ Asta ora Gera Mundial II a domina mundo i tabatin prohibicion dje literatura of actividad di Testigo di Jehova den mas cu 40 país, e Scol Bíblico di Galad di Watchtower a cuminza entrená misionero prospectivo pa cumpli cu un trabao asta mas grandi di proclamacion internacional di Reino. Te ne tempo actual, graduado di Galad a sirbi den mas cu 200 país. Nan a haci mas cu parti literatura anto sigi na un otro territorio. Nan a conduci estudio bíblico, a organizá congregacion, i a entrená hende pa acepta responsabilidad teocrático. Mas recientemente, anciano i sirbidor ministerial cu a graduá for dje Scol di Entrenamento Ministerial també a yuda satisface necesidad vital en relacion cu e trabao aki riba seis continente. Un fundeshi firme a ser poní pa aumento continuo.​—⁠Compara cu 2 Timoteo 2:⁠2.

¹⁹ Otronan por yuda atende na algun territorio cu no a ser cubrí? Na 1957, den asamblea rond di mundo, rumanan i nan famía​—⁠Testigo di Jehova maduro​—⁠tabata animá pa considera di mudá na territorio unda tin mas necesidad pa establece residencia i cumpli cu nan ministerio ei. E invitacion a parce hopi esun cu Dios a duna apóstol Pablo, cu a mira den un vision un homber cu a pidi: “Pasa na Macedonia i yúdanos.” (Echo 16:​9, 10) Promé cu 1960 algun a dal tal paso, otronan a bai despues. Tanto como mil Testigo di Jehova a muda na Irlanda i Colombia; cientos a bai na hopi otro lugar. Diez di miles a muda na territorio cu tabatin mas necesidad den nan mes país.​—⁠Salmo 110:⁠3.

²⁰ Cu e bendicion di Jehova riba su pueblo, e trabao di proclamacion di Reino ta sigi progresá na velocidad extraordinario. Desde 1935 e cantidad di publicador a aumenta casi 80 porciento, i e grado di aumento den e cantidad di pionero ta 60 porciento mas cu e grado di aumento den e cantidad di publicador. E arreglo di estudio bíblico di cas a cuminza despues di 1930. Awor nan ta conduci un promedio di mas cu cuater i mei miyón estudio bíblico di cas tur luna. Desde 1935 mas cu 15 mil miyón ora a ser dedicá ne trabao di proclamacion dje Reino. Predicacion regularmente dje bon nobo ta ser hací awor den 231 país. Mientras cu territorio di Oosteuropa i Africa a habri pa mas libertad di predica e bon nobo, asamblea internacional ta ser usá efectivamente pa desplega e mensahe di Reino prominentemente dilanti di público. Manera Jehova Dios a primintí leu atrás, den Isaías 60:​22, e siguramente ta ‘acelera e trabao na su debido tempo.’ Ki un privilegio grandi nos tin di participa den dje!

Alcanzando tur hende posibel cu e bon nobo

²¹ Señor no a bisa ainda cu e trabao a caba. Hopi miles di hende ainda ta acepta e adoracion berdadero. P’sei e pregunta ta presenta, Nos ta haci tur loke ta posibel pa probecha dje tempo cu e pacenshi di Jehova ta permiti pe trabao?​—⁠2 Pedro 3:⁠15.

²² Tur hende no por muda na territorio poco trahá. Pero bo ta probecha plenamente di oportunidad cu ta presentá? Bo ta duna testimonio na compañé di trabao? na maestro i compañé di scol? Bo a cambia pa conforma cu diferente situacion den bo territorio? Como resultado di cambio di moda di trabao, si masha poco hende ta na cas durante di dia, bo a cambia bo orario afin di bishitánan den atardi? Si hende straño no por drenta den edificio, bo ta usa telefón of post pa duna testimonio? Bo ta bolbe bishita hende cu ta mustra interés i ta ofrece di conduci un estudio bíblico? Bo ta cumpli cu bo ministerio cabalmente?​—⁠Compara cu Echo 20:21; 2 Timoteo 4:⁠5.

²³ Laga nos tur cumpli cu nos ministerio di tal manera cu esei ta mustra Jehova Dios cu nos berdaderamente ta aprecia e gran privilegio di ser testigo di dje den e tempo importante aki. Nos ta spera e privilegio di ser testigo ocular ora Jehova Dios ta ehecuta huicio riba e sistema bieu i corrupto aki i ta introduci e glorioso Reino di mil aña di Jesucristo!

[Footnotes]

[Study Questions]

1. Jesús a bisa cu sigidor di dje lo proclama cua mensahe den nos tempo?

2. (a) Pakico ta tanto importante pa proclama e mensahe di Reino na tur parti? (b) Nos tin cu haci nos mes cua pregunta?

3. (a) Apropiadamente, cua tema C. T. Russell a enfatizá durante un biahe na principio pa organiza grupo pa estudio bíblico? (b) Studiante di Bijbel di promé a realiza cu e Reino di Dios mester ocupa cua lugar den nan bida?

4. Te na ki grado e grupito di Studiante di Bijbel a distribui literatura bíblico promé cu 1914?

5. Ken tabata evangelizador den e tempo ayá, i nan a manifesta cua clase di spiritu?

6. (a) Ki extenso tabata biahamento di ruman Russell pa plama berdad bíblico? (b) Kico mas a wordu hací pa promove e predicacion dje bon nobo den campo di stranhería promé cu e fin di tempo gentil?

7. (a) Con nan a usa corant pa intensifica e testimonio? (b) Kico tabata e “Photo-Drama of Creation,” i cuanto hende a miré den un aña so?

8. Te na 1914 caba, Studiante di Bijbel a alcanza cuanto país cu e bon nobo?

9. Den asamblea na Cédar Point, con e trabao di duna testimonio dje Reino a recibi estímulo special?

10, 11. Con nan a usa radio, loudspeaker riba auto, i poster efectivamente pa alcanza e pueblo cu e berdad dje Reino?

12. Manera e Scritura ta mustra, cua ta un manera di mas efectivo pa nos individualmente duna un testimonio?

13, 14. (a) Pakico algun testigo ta muda na otro pueblo, asta na otro país, pa cumpli cu nan ministerio? (b) Con interés amoroso den hende dje tera di bo nacimento ta yuda plama e bon nobo?

15. Entre 1920 i 1940, esnan cu tabatin un actitud manera esun expresá den Isaías 6:8 a logra kico?

16. Además di centro principal di poblacion, unda dunamento di testimonio a wordu duná promé cu e gera?

17. (a) Te na 1935 caba, Testigo di Jehova a alcanza cuanto país? (b) Pakico e trabao no a caba ne tempo ei?

18. Den e trabao di proclamacion dje Reino, e Scol di Galad i e Scol di Entrenamento Ministerial a hunga cua papel?

19. Te na ki grado sirbidor di Jehova a responde ne invitacion di sirbi den territorio unda cu tin mas necesidad?

20. (a) Desde 1935, kico a ser lográ na cumplimento dje profecía di Jesús den Mateo 24:14? (b) Durante añanan reciente, di ki manera tabatin un aceleracion dje trabao?

21, 22. Kico nos por haci personalmente pa ser un testigo mas efectivo unda cu nos ta sirbi?

23. Mientras cu Jehova ta observa loke nos ta haci den su sirbishi, kico mester keda bisto den nos caso?

[Box on page 16, 17]

Testigo Di Jehova Proclamador dje Reino di Dios

Na cientos di asamblea rond di mundo durante 1993-1994, e anuncio a wordu hací tocante presentacion di un buki nobo titulá Los testigos de Jehová, proclamadores del Reino de Dios. Esei ta un historia mashá informativo, i comprensivo di Testigo di Jehova. E ta un buki di 752 bladji, cu plachi bonita, cu mas cu mil portret recogí for di 96 diferente país. Na fin di 1993, el a ser publicá caba na 25 idioma i ta ser traducí den mas.

Kico ta haci tal buki oportuno? Den añanan reciente miyones di hende mundialmente a bira Testigo di Jehova. Nan tur mester ta bon informá tocante e historia dje organizacion cu locual nan ta asociá. Además, nan predicacion i moda di adora a penetra grupo nacional i racial mundialmente i hende hoven i bieu a aceptánan, na tur nivel económico i educacional. Como resultado, hopi hende cu ta ripara loke ta pasando tin pregunta pa haci tocante Testigo di Jehova​—⁠no solamente tocante nan kerimento sino també tocante nan origen, nan pasado, nan organizacion, nan meta. Otro hende a skirbi tocante nan, aunque no cada bez sin discriminacion. Sin embargo, ningun hende ta conoce e historia di tempo moderno di Testigo di Jehova mihor cu e testigonan mes. Redactor dje buki a haci esfuerzo pa presenta tal historia di manera obhetivo i franco. Haciendo esei, nan també a documentá e cumplimento actual dje mashá significante aspecto dje siñal dje presencia di Cristo cu ta pará skirbí den Mateo 24:​14, i nan a hacié cu detaye cu solamente hende profundamente enbolbí den e trabao profetizá por percura.

E buki ta partí den siete seccion principal:

Seccion 1: E parti ei ta explora raíz histórico di Testigo di Jehova. E ta inclui repaso breve i informativo di nan historia moderno desde 1870 através di 1992.

Seccion 2: Esei ta un repaso revelador dje desaroyo progresivo di kerimento cu ta distingi Testigo di Jehova for di otro grupo religioso.

Seccion 3: E parti ei dje buki ta examina e desaroyo dje estructura di nan organizacion. E ta relatá echo interesante tocante nan reunion di congregacion i asamblea, i també e manera cu nan ta traha Salón di Reino, Salón di Asamblea mas grandi, i facilidad pa publicacion di literatura bíblico. E ta comunica e celo cu locual Testigo di Jehova ta proclama e Reino di Dios i e amor cu ta bisto mientras cu nan ta atende un na otro den tempo di crisis.

Seccion 4: Den dje bo por haya detaye fasinante tocante con e proclamacion dje Reino di Dios a alcanza país principal i isla remoto rond di mundo. Imaginábo​—⁠predicando den 43 país na aña 1914, pero na 229 país na 1992! Experencia di esnan cu a participa den tal expansion mundial ta berdaderamente animador.

Seccion 5: Hacimento di tur e trabao di proclamacion dje Reino a exigi desaroyo di facilidad internacional pa publicacion di Bijbel i també literatura bíblico den mas cu dos cien idioma. Den dje bo por siña tocante tal aspecto di nan trabao.

Seccion 6: Testigo di Jehova també a enfrenta dificultad​—⁠algun debí na imperfeccion humano, otronan debí na rumanan falso, i asta mas debí na persecucion directo. E Palabra di Dios ta adverti cu esei lo ser e caso. (Lucas 17:​1; 2 Timoteo 3:12; 1 Pedro 4:12; 2 Pedro 2:​1, 2) E seccion aki dje buki ta duna relato bibo di loke realmente a sosode i con e fe di Testigo di Jehova a haci posibel pa nan sali victorioso.

Seccion 7: Na conclusion, e buki ta considera pakico Testigo di Jehova ta keda firmemente convencí di cu Dios berdaderamente ta guia e organizacion di locual nan ta un parti. E ta considera també pakico nan ta sinti e necesidad, organizacional i individualmente, di sigi vigila.

Además di lo anterior, e volumen cu dibuho atractivo ta inclui un seccion di 50 bladji di portret bonita i mashá informativo na color mustrando e centro mundial i també facilidad di sucursal cu Testigo di Jehova ta usa mundialmente.

Si bo no a obtene i a leza un copia caba dje publicacion fasinante, siguramente ta di probecho pa bo hacié.

Comentario di algun hende cu a lezé

Cua reaccion tabatin di parti di esnan cu a leza e buki caba? Lo sigiente ta un poco:

“Mi a caba di completa lezamento dje documentario bibo i fasinante di Los testigos de Jehová, proclamadores del Reino de Dios. Solamente un organizacion leal i humildemente comprometí ne berdad por skirbi cu tanto franqueza, curashi, i sintimento.”

“Lezamento di dje ta manera lezamento dje buki di Echo, cu su onradez i franqueza.”

“Ki un publicacion nobo intrigante! . . . E ta un obra maestro histórico.”

Despues di a leza rond di mitá dje buki, un homber a skirbi: “Mi a keda asombrá, pasmá, i cerca di yora. . . . Den tur mi añanan, ningun otro publicacion a dalmi un golpi emocional asina.”

“Mi curazón ta yena cu gozo cada bez cu mi ta corda con e buki por fortalece e fe tanto di hende hoven como di hende nobo cu ta drenta den e organizacion awe.”

“Mi semper a apreciá e berdad, pero lezamento dje buki a habri mi wowo i a yudámi realiza mas cu nunca cu e spiritu santo di Jehova ta responsabel pe ‘berdad’ i tur loke ta relacioná cuné.”

[Caption on page 18]

E mensahe di Reino a alcanza hopi hende asta ora e testigonan tabata poco

[Caption on page 20]

Un repaso

◻ Pakico e predicacion dje mensahe di Reino ta tanto importante?

◻ Te na ki grado e bon nobo tabata predicá te na 1914?

◻ Desde establecimento dje Reino, un testimonio ki intenso a ser duná?

◻ Kico por haci nos mes parti den e ministerio mas productivo?