Bo Por Tene Pacenshi?
JEHOVA a bisa Abram: “Bai bo caminda for di bo pais . . . n’e pais cu lo mi mustrá bo; i lo mi haci for di bo un nacion grandi i lo mi bendicioná bo i lo mi haci bo nomber grandi.” (Génesis 12:1, 2) Abram tabatin 75 aña di edad n’e tempu ei. El a obedecé i sabiamente a tene pacenshi p’e resto di su bida, sperando riba Jehova.
Cu tempu, Dios a haci e promesa aki na Abraham (Abram) cu pacenshi: “Siguramente, bendicionando lo mi bendicioná bo, i multiplicando lo mi multiplicá bo.” Apostel Pablo a agregá: “I asina, despues cu Abraham a mustra pacenshi, el a obtené e promesa aki.”—Hebreo 6:13-15.
Kico ta pacenshi? Diccionarionan ta defini’é como e abilidad “pa spera cu calmu riba algu” of manifestá “tolerancia bou di provocacion of tension.” Pues bo pacenshi ta ser poní na prueba ora bo mester spera riba un hende of algu, of ora bo ser provocá of ta bou di tension. Den tal situacionnan e persona paciente ta keda calmu; esun impaciente ta bira intrankil i krepchi.
Nos Mundu Moderno Impaciente
Specialmente den hopi área di stad, énfasis ta ser poné no riba pacenshi sino riba rapides. Pa miyones di hende cu ta biba den stadnan hopi poblá, cada dia ta cuminsá ora e wekker di mainta zona. Esei ta cuminsá e careda frenético—pa bai un caminda, pa topa un persona, pa logra algu. Ta algu straño cu hopi hende ta tenso i impaciente?
Bo ta bira molestiá ora bo hañá bo enfrentá cu e limitacionnan di otronan? “Mi no gusta un falta di puntualidad,” Albert ta bisa. Mayoria hende ta di acuerdo cu spera riba un persona cu ta lat ta trece tension, specialmente si mester cumpli cu un ‘deadline.’ En cuanto e Duke di Newcastle, un político británico di siglo 18, hende a bisa: ‘E ta perde mei ora parti mainta, cua e ta core tras di dje p’e resto dje dia sin por alcans’é.’ Si bo mester a dependé di un persona asina dia tras dia, lo bo keda paciente?
Ora di manehá un auto, bo ta rabia lihé, no dispuesto pa warda, of tentá pa core muchu duru? Den circunstancia asina, impaciencia hopi biaha kier men desaster. Durante 1989, den loke e tempu ei tabata West Alemania, mas cu 400.000 accidente di caretera a resultá den herida of morto. Di esakinan, 1 di cada 3 a ser causá dor di core sea muchu duru of muchu pegá cu e vehículo dilanti. P’esei, por lo ménos te na cierto grado, ser impaciente tabata responsabel p’e herida of morto di mas cu 137.000 persona. Ki un prijs pa paga pa impaciencia!
“Mi ta haña ta difícil pa keda paciente ora un hende ta interumpí cada bes,” Ann ta keha, “of ora un hende ta broma hopi.” Karl-Hermann ta admití cu su pacenshi ta ser desafiá pa “esnan mas hóben cu no tin respet pa esnan di edad.”
E situacionnan aki i otronan por hací bo impaciente. Con, anto, bo por cultivá mas pacenshi?
Jehova Por Fortificá Bo Pacenshi
Hopi hende ta pensa cu pacenshi ta indicá un estado di indecision of debilidad. Sin embargo, pa Jehova, e ta carga e stempel di fortalesa. E mes “ta paciente . . . pasobra e no ta deseá pa ningun ser destruí sino ta deseá pa tur alcansá repentimentu.” (2 Pedro 3:9) P’esei, pa fortalecé bo mes tolerancia, pega estrechamente na Jehova i confia riba dje cu tur bo curason. Fortaleciendo bo relacion cu Dios ta e paso mas importante den direccion di desaroyá un disposicion di pacenshi.
Ademas, ta vital pa conocé Jehova su propósitonan p’e tera i pa humanidad. Abraham “tabata sperando e stad cu tin berdadero fundeshi [Reino di Dios], e edificador i trahador di tal stad ta Dios.” (Hebreo 11:10) Di igual manera, lo ta beneficioso pa mantené un bista claro dje promesanan divino i pa keda contentu pa spera riba Jehova. Lo bo realisá e ora ei cu pacenshi, leu for di indicá indecision, en realidad ta gana hende na adoracion berdadero. P’esei, “considerá e pacenshi di nos Señor como salbacion.”—2 Pedro 3:15.
Kico si bo mes circunstancianan personal ta pone bo pacenshi na un prueba casi insoportabel? Esnan incrédulo ta poné bo bou di presion iritante ferfelu? Bo ta malu pa loke ta parce un tempu interminablemente largu? Den un caso asina, tuma na pechu loke disipel Santiago a skirbi. Despues di a referí n’e patronchi cu e profetanan a suministrá den ehercé pacenshi, el a revelá e secreto di keda calmu bou di tension severo. Santiago a bisa: “Tin algun cu ta sufri di maldad den boso? Lagu’e ocup’é cu oracion.”—Santiago 5:10, 13.
Pidi Dios sinceramente den oracion pa fortalecé bo pacenshi i yudá bo controlá bo spiritu bou di prueba. Acudí na Jehova repetidamente, i lo e yudá bo identificá e circunstancianan of e custumbernan di otronan cu ta presentá un menasa particular pa bo trankilidad. Hacimentu di oracion promé cu situacionnan potencialmente difícil por yudá bo keda calmu.
Un Punto di Bista Apropiado di Bo Mes i Otronan
Pa mantené un disposicion trankil, bo mester mira bo mes i otronan den un manera apropiado. Esaki ta posibel mediante un studio di Bijbel, pasobra e ta mustra cu tur hende a heredá imperfeccion i p’esei tin su flakesanan. Ademas, conocimentu bíblico lo yudá bo crece den amor. E cualidad aki ta esencial afin di manifestá pacenshi pa cu otronan.—Juan 13:34, 35; Romano 5:12; Filipense 1:9.
Amor i un anhelo pa pordoná por calmá bo ora bo bira agitá. Si un persona tin custumbernan cu ta traha riba bo nervio, amor lo recordá bo cu ta e custumbernan bo ta haña desagradabel, no e persona. Considerá cuantu biaha bo mes debilidadnan mester ta pone Dios su pacenshi na prueba i mester ta consumí otronan.
Un punto di bista corecto di bo mes tambe lo yudá bo spera cu pacenshi. Por ehempel, bo a extendé bo mes pa privilegionan den Jehova su sirbishi, solamente pa keda desapuntá? Bo ta sinti cu bo pacenshi ta cabando como si fuera e ta den garganta di un botter. Si esei ta asina, anto corda cu hopi impaciencia tin rais den orguyo. “Esun cu tin pacenshi ta mihó cu esun cu ta soberbe di spiritu,” Salomon a bisa. (Eclesiastés 7:8) Sí, orguyo ta un strobansa principal pa cultivá pacenshi. No ta cierto cu e persona humilde ta haña ta mas fácil pa spera cu calmu? P’esei, cultivá humildad, i lo bo ta mihó capas pa aceptá tardansa cu pas mental.—Proverbio 15:33.
Pacenshi Ta Paga Recompensa Ricu
Abraham ta conocí principalmente pa su fe. (Romano 4:11) Pero, pacenshi a haci su fe duradero. Kico tabata su recompensa pa spera riba Jehova?
Abraham a ricibí Jehova su confiansa aumentante. Asina Abraham su nomber a bira grandi i su desendientenan un nacion poderoso. Tur nacion dje tera por bendicioná nan mes mediante su simia. Abraham a sirbi como bocero pa Dios i asta como un representante típico dje Creador. Por tabatin cualkier recompensa mas grandi pa Abraham su fe i pacenshi?
“Jehova ta masha tierno den cariño” pa cu cristiannan kendenan cu pacenshi ta wanta prueba. (Santiago 5:10, 11) Tal personanan ta disfrutá di un concenshi limpi pa motibu di hacimentu di su boluntad. Den bo caso, anto, si bo spera riba Jehova i wanta prueba cu pacenshi, bo tolerancia lo resultá den Jehova su aprobacion i bendicion.
Pacenshi ta sirbi e pueblo di Dios masha bon den tur aspecto di bida. Dos sirbidor di Jehova, yamá Christian i Agnes, a descubrí esaki ora nan a dicidí di namorá. Nan a posponé e namoracion debí na respet p’e mayornan di Christian, kendenan tabatin mester di tempu pa conocé Agnes. Ki efecto e gesto aki tabatin?
“Solamente despues nos a realisá cuantu nos pacenshi a nificá pa mi mayornan,” Christian ta splica. “Nos wardamentu cu pacenshi no a kibra e relacion entre ami cu mi casá. Pero e tabata e promé bloki di construccion den nos relacion cu mi mayornan.” Sí, pacenshi ta duna dividendo ricu.
Tambe, pacenshi ta promové pas. Famia i amigunan lo ta gradicidu cu bo no ta coge cuestion riba tur nan pifionan. Bo estado calmu i comprensivo ora otronan ta cometé falta lo prevení esenanan bergonsoso. Un proverbio chines ta bisa: “Pacenshi den un momentu di rabia lo scapá bo cien dia di ansiedad.”
Pacenshi ta mehorá bo personalidad, realmente cubriendo otro cualidadnan excelente cu un vernis cu ta tene nan den bon condicion. E ta haci bo fe i bo pas duradero, i bo amor insagudibel. Siendo paciente lo yudá bo ser gososo miéntras bo ta practicá bondad, amabilidad i suavedad. Eherciendo pacenshi ta edificá e fortalesa esencial pa cultivá gran pacenshi i dominio propio.
Spera cu pacenshi p’e cumplimentu di Jehova su promesanan anto, i bo ta sigur di un futuro maraviyoso. Mescos cu Abraham, ‘mediante fe i pacenshi boso heredá e promesanan.’—Hebreo 6:12.
[Caption on page 23]
Un relacion íntimo cu Jehova lo yudá bo manifestá pacenshi, mescos cu Abraham a manifestá
[DO NOT SET] References
1. The Watchtower, (magazine; Brooklyn, NY), November 1, 1991, p. 11;
The Watchtower, August 1, 1952, pp. 457-8.
2. Collins Cobuild English Language Dictionary, 1987, (William Collins Sons & Co. Ltd., London), p. 1053; [Translator: Entry is “patience 1.2.”]
Webster’s Ninth New Collegiate Dictionary, 1990, (Merriam-Webster, Springfield, MA), p. 863. [Translator: Entry is “1patient 2.”]
3. Brother Klaus Albert Burger, a member of the Bethel family in Selters.
4. The Great Separation, by Donald Barr Chidsey, 1965, (Crown Publishers, Inc., NY), pp. 18, 20, 22. [Translator: Quote is from chapter 3, “The Lucky Card Player,” and is located on p. 22.]
5. Handbuch für Verkehrssicherheit (“Handbook for Road Safety”), 1991, (Deutsche Verkehrswacht e.V. and the Deutsche Verkehrssicherheitsrat).
6. Sister Wendy Ann Burger, a member of the Bethel family in Selters.
7. Brother Karl-Hermann Dieter Nicolai, a member of the Bethel family in Selters, said: “Respektlose Äußerungen und Benehmen von jüngeren gegenüber älteren . . . [sind] eine Herausforderung an Geduld und Selbstbeherrschung.”
8. The Watchtower, April 1, 1961, p. 208;
The Watchtower, July 15, 1962, p. 420.
9. The Watchtower, July 15, 1962, p. 420.
10. The Watchtower, April 15, 1976, p. 230.
11. The Watchtower, February 1, 1977, p. 86.
12. The Watchtower, August 1, 1969, p. 468.
13. The Watchtower, August 15, 1958, p. 485;
The Watchtower, July 1, 1983, p. 16.
14. The Watchtower, April 15, 1976, p. 230.
15. Brother Oliver Christian Latham and his wife Donna Marie Agnes, members of the Bethel family in Selters.
16. The Dragon’s Almanac: Chinese, Japanese and other Far Eastern Proverbs, by Justin Wintle, 1983, (Routledge & Kegan Paul plc, Melbourne, Victoria, Australia), p. 31, no. 186.
17. The Watchtower, July 15, 1966, p. 425.