“Mi A Observa E Fe”

SEGUN E RELATO DI AMIGA DI BRUNELLA INCONDITI

“DIASABRA tabata un dia cu a pasa poco poco i solitario. Mi tabata so den e cuarto, i a sintími desesperá. Tabata como si fuera mi tabata pasa door di un gang. Tur cos tabata bai bon, i di ripiente, un hende a cera e porta duro net den mi cara, i no tabatin salida, apesar di ki duro mi a purba.”

Desilusion extremo a pone hopi peso riba e curazón di Brunella Inconditi di 15 aña di edad. E dia di mas importante di su bida hoven tabata cabando. Mas promé den e aña ei su amor aumentante pa Jehova Dios i e Bijbel a conmové pa dedica su bida na dje. Den Juli di 1990 el pone fecha pa bautiza ne Asamblea di Districto di Testigo di Jehova “Idioma Puro” den Montreal, Canadá. En bez di esei, Brunella tabata cerca di enfrenta un prueba di su fe cu por dura pe resto di su bida.

Dos dia promé cu el a spera di simboliza su dedicacion cu bautismo bao di awa, Brunella a tende cu e tabatin leukemia. Docter ne hospital local pa muchanan kier a cuminza tratamento un bez, di manera cu Brunella a keda den e hospital.

Su mes palabra a conmove e docternan

Brunella tabata sa cu sanger ta sagrado pa Jehova Dios. (Levítico 17:11) Su mayornan, Edmondo i Nicoletta, a stipula pa no usa ningun transfusion di sanger den tratamento di nan yiu. Su tata ta corda: “Brunella tabata kier pe docternan tende for di dje també, aunque e tabata menor di edad. El a bísanan firmemente cu e no tabata kier tratamento cu ta viola e mandamento bíblico di ‘abstene di sanger.’ ”​—⁠Echo 15:⁠20.

Riba dia 10 di Juli di 1990, tres docter i un trahador social a reuni cu e mayornan di Brunella i dos anciano dje congregacion local di Testigo di Jehova. Examinacion a confirma cu Brunella tabatin leukemia linfoblástico severo. E docternan a splica nan plan pa combati e maleza. Cu tacto nan a splica cu ta mashá dificultoso pa trata cuné. Un anciano dje congregacion a corda cu “E conducta di Brunella i su determinacion di obedece Dios a toca e docternan i e trahador social. Nan a keda impresioná cu e amor di su mayornan i cu e amor di amigo dje congregacion cristian. Nan a apreciá també e manera cu nos a comprende i a respeta nan posicion.”

E docternan tabatin e intencion di evita transfusion di sanger. Brunella lo recibi quimoterapia extensivo, pero lo ser menos agresivo cu costumber. Esei por a reduci daño na cel di sanger cu e tratamento por a causa. Nicoletta a splica cu “E docternan a tuma na consideracion e necesidad fisical, emocional, i spiritual di Brunella. Ora nos a pídinan consulta cu un specialista cu tabatin experiencia den e tratamento di leukemia di mucha sin usa sanger, nan a conbini.” Brunella i personal dje hospital a forma un enlace caloroso di cariño.

Meta spiritual

Aunque e tratamento inicial a produci algun bon resultado, esei tabata solamente e principio dje experencia penoso di Brunella. Den November di 1990 su maleza tabata mengua, di manera cu el a bautiza sin tarda. Reflehando riba e lunanan cu a pasa, Brunella a admiti: “E no tabata fácil di ningun manera. Bo tin mester di hopi fortaleza, i bo tin cu pensa positivamente. . . . Mi fe tabata poní na prueba, pero mi a para firme, i ainda mi plan tá pa un vocacion como pionero regular [evangelizador di tempo completo].”

Pronto den 1991, Brunella a sufri di un recaída. E casi a muri ora e tabata tuma quimoterapia, pero pe sorpresa i gozo di tur, el a recobra. Den Augustus e tabata suficiente bon pa pasa un luna den e ministerio público como un pionero auxiliar. Su maleza a empeora di nobo, i den November di 1991 su curpa den varios lugar a manifesta cáncer. Un otro equipo di docter den un otro hospital a cuminza duné terapia di bestraling.

Asta den circunstancia tanto dificultoso, Brunella a para firme i a pone meta spiritual pa su mes. Ora el a tende na principio tocante leukemia, nan a bisé cu e por biba seis luna so. Awor, casi un aña i mei despues, Brunella tabata traha plan ainda pe futuro. Un anciano dje congregacion a bisa: “E no a perde tempo trahando pa alcanza su meta. E fe di Brunella den e Paradijs cu Dios a priminti a sostené durante su dificultad penoso. El a crece te na madurez cristian aunque e tabata hoven di edad. Su conducta i actitud a inspira e congregacion i a gana e curazón di esnan cu a conocé, incluyendo e personal dje hospital.” Su mama ta corda: “E nunca a keha. Ora un hende a puntré con el a sintié, el a contestá cu ‘Bon’ of, ‘No malu, i kico di bo?’ ”

Un futuro sigur

Brunella a planea pa asisti ne Congreso di Districto di Testigo di Jehova “Cargadornan di Luz” den Juli di 1992. Sin embargo, ne tempo dje asamblea Brunella tabata hospitalizá, i su bida tabata cabando. No obstante, el a asisti ne asamblea den rolstoel, ansioso pa mira e drama Haciendo loke ta correcto den bista di Jehova.

El a bai cas cerca su famía pe último dianan di su bida. Segun Nicoletta, “Te ne fin, el a preocupá mas tocante otronan cu tocante su mes. El a animánan pa studia e Bijbel, bisando nan, ‘Nos lo ta hunto den e Paradijs.’ ”

Brunella a muri dia 27 di Juli di 1992, firme den su speranza di un resureccion na bida den Paradijs riba tera. E solamente a haci comienzo sigiendo tras di su meta, pero el a planeá pa sigi su camina di dedicacion despues di su resureccion. Un poco dia so promé cu el a muri, Brunella a skirbi e sigiente carta, cu nan a leza na su entierro.

“Querido Amigonan:

“Danki pa boso asistencia. Boso presencia ta nifica hopi pa mi famía.

“Pe hendenan cu tabata cerca mi​—⁠nos a wanta hopi cos. Nos tabatin hopi tempo malu, pero tabatin algun tempo di gozo també. E tabata un lucha duro i largu, pero mi no ta kere cu mi a faya. Manera e Scritura ta bisa, ‘Mi a lucha e lucha excelente, mi a corre e carreda te na fin, mi a observa e fe.’​—⁠2 Timoteo 4:⁠7.

“Ami també a siña hopi cos, i mi a crece hopi, i mi amigonan i esnan cu tabata rond di mi a mira e cambio. Mi kier gradici tur hende cu a dunámi nan apoyo.

“Boso cu ta kere den e sistema nobo i den Jehova Dios sa cu lo tin un resureccion, net manera Juan 5:​28, 29 ta bisa. Pues, keda fuerte den e berdad, i nos por mira otro di nobo.

“Mi ta gradici e hendenan cu sa loke mi a wanta. Mi ta duna cada un di boso un abrazo i zunchi. Mi ta stima boso tur.”

Brunella no a laga su hubentud ni su enfermedad tarda su dedicacion na Dios. Su ehempel di fe i determinacion ta anima tanto hende hoven como bieu pa kita cualkier cos cu por stróbanan di corre e carreda pa bida.​—⁠Hebreo 12:⁠1.