Testigonan di Jehova Rond Mundu​—Colombia

COLOMBIA ta un pais sur americano único. Tantu e océano Atlántico como Pacífico ta brasa e costanan dje pais aki cubrí cu volcan. E clima ta varia for dje calor di zonanan tropical abou cantu di costa i e vayenan te n’e frialdad dje puntanan haltu dje Cerunan di Andes cubrí cu sneu.a

Aunke Colombia ta conocí pa oro i esmeralda, e pueblo ta su posesion di mas precioso. Awe, Jehova ta yenando su cas spiritual cu gloria. Adoradornan bunita i deseabel ta drentando den dje na tur parti dje tera, incluyendo Colombia.​—⁠Ageo 2:⁠7.

Ehecutivonan di Negoshi Impresioná

Djadumingu, 1 di november, 1992, a marca e dedicacion dje oficina di sucursal i facilidad di imprenta nobo dje Sociedad Watch Tower na Facatativá, 42 kilometer nortwest di Bogotá. Tournan n’e sucursal a haci un impacto grandi riba bishitantenan. Ora un bishitante a regresá n’e fábrica caminda e ta traha, cu entusiasmo el a insta su hefenan pa bai i observá un organisacion cu ta ‘un milager di eficiencia, órden i actitud positivo di empleado.’ Durante e tour cu e ehecutivonan a haci despues, nan a mustra interes intenso i a haci hopi pregunta.

E ehecutivonan aki kier a manda nan directornan, supervisornan i hefenan​—⁠en realidad, tur nan trahadornan​—⁠riba un tour. Cada siman, nan lo a programá 15 pa 25 empleado pa un tour te ora henter e personal di 1.300 empleado por a observá tal eficiencia den organisacion.

Cientos di nan trahadornan a haña tour dje facilidadnan di sucursal i a observá e video Los testigos de Jehová​—⁠la organización tras el nombre. Impresioná p’e magnitud dje organisacion i e alcance mundial dje trabou di predicacion di Reino, nan a keda asombrá cu e nivel haltu dje tecnologia cu ta ser usá den e operacionnan dje Sociedad. Ora nan tabata bayendo, e rumannan a tende hopi di nan bisa cu nan ta sinti como si nan tabata ‘bandonando Paradijs pa bai bek den un mundu desorganisá.’

E Berdad Ta Alcansá Tur Clase

E bon nobo ta alcansando tur clase di persona. (1 Timoteo 2:​3, 4) Por ehempel, un ex-compositor i lider di un banda di ‘heavy-metal rock’ a aceptá berdad di Bijbel, haci cambio den su bida, i pronto a bira un pionero regular. Despues el a ser nombrá como sirbidor ministerial. Varios individuo cu tabata miembro di gruponan subversivo a siña pone nan confiansa i speransa den Jehova su Reino. Awor nan ta activamente enbolbí den predicá e mensahe di un mundu nobo pacífico.

Adictonan na droga i narcotraficantenan tambe a acudí n’e berdad. Un yoncuman kende awor ta un Testigo tabata manehá un plantacion di droga i un laboratorio di cocaina den selva pa cincu aña promé cu el a bandoná e clase di bida ei. El a haña felicidad ora el a siña i practicá principio bíblico. Den un prizon asesinonan condená, conmoví pa un studio sincero di Bijbel ta haciendo oracion sinceramente pa Jehova pordoná nan picánan i aceptá nan como su sirbidornan.

Den e manera ei tur clase di hende ta respondiendo n’e mensahe di Reino. Na Colombia, i otro caminda, Jehova ta yenando su cas asina cu gloria.

[Footnotes]

[Caption on page 8]

DETAYENAN DJE PAIS

Aña di Sirbishi di 1993

MAXIMO CANTIDAD DI PUBLICADOR: 60.854

PROMEDIO: 1 Testigo pa 558

ASISTENCIA NA MEMORIAL: 249.271

PROMEDIO DI PUBLICADOR PIONERO: 8.487

PROMEDIO DI STUDIO DI BIJBEL: 100.927

CANTIDAD BAUTISA: 5.183

CANTIDAD DI CONGREGACION: 751

OFICINA DI SUCURSAL: FACATATIVÁ

[Caption on page 9]

Personal di oficina di sucursal i misioneronan na 1956

[Caption on page 9]

Un bistaso aéreo dje oficina di sucursal