Sirbiendo Cu E Organizacion Di Mas Progresivo

SEGUN E RELATO DI ROBERT HATZFELD

Awe mashá hopi hende ta cende television usando control remoto pa wak e noticia di ora na color bibo, casi sin considera cu esei ta algo extraordinario. Pero ta parce cu ayera mes cu mi tabata un mucha di 12 aña di edad cu wowo hanchu habrí mirando riba pantaya di cine e imagen di un homber mas grandi cu e homber mes, i e tabata papia!

BO POR kere cu no tin nada importante den esei. Pero, esei siguramente a parce un milagro moderno ayá na 1915, na principio di película mudo blancu i pretu. E homber solem cu barba cu a presentá riba e pantaya i a bisa: “E Photo-Drama of Creation ta un presentacion di I.B.S.A., e Asociacion Internacional di Studiante di Bijbel.” Pe sigiente dos ora, e relato bíblico a pasa dilanti nos bista. Su mensahe bíblico tabata claro i refrescante. Pero, e película, hunto cu slides na color, i e papiamento sincronizá cuné ta loke realmente a hala mi atencion.

Mi no tabata sa ne tempo ei, pero e entusiasmo di mi hubentud en cuanto tal sosodimento importante di tecnología tabata un introduccion na un ofishi pe resto di mi bida den e organizacion di mas progresivo riba e tera.

Na principio

Na 1891 mi tata a bini di Dillenburg, Alemania, pa biba den un comunidad alemán den Allegheny, Pennsylvania, U.S.A. Despues el a conoce un mucha muher di un famía alemán ei, i nan a casa. Mi a nace dia 7 di Juli di 1903, i a lanta papiando alemán i inglés. Net promé cu Gera Mundial I a cuminza na 1914, un epidemia di tuberculosis a causa e morto di mi dos mayornan i a lagámi huérfano. E tata di mi mama a muri di un atake rond dje mesun tempo.

Mi tía, Minna Boemer, bondadosamente a adoptámi den su famía. El a bisa, “Mi tin cinco yiu. Mi por wel haya uno mas.” Aunque mi a sinti falta di mi mayornan, mi a sintími na cas cerca tía Minna.

Mi tía tabata un miembro pa mashá tempo dje Congregacion di Allegheny di Studiante di Bijbel (e nomber di Testigo di Jehova den e tempo ei). Promé cu 1909, ruman C. T. Russell, presidente dje Sociedad Watch Tower ne tempo ei, també a asisti ne congregacion ei. Tía Minna a hibámi reunion. Aunque nos famía no a haci un esfuerzo pa studia of predicá ne tempo ei, tur loke nos a tende den reunion, nos a comparti informalmente cu hende cu nos a conoce.

Tabata durante e tempo ei cu e “Photo-Drama” a yenámi cu asombro. Siendo cu mi tabatin inclinacion di mecánico, técnica fotográfico nobo i sincronizacion di sonido cu película a fasinámi, mescos cu fotografía di lapso di tempo. Mirando habrimento di flor sacá den fotografía di lapso di tempo den e photo-drama tabata excitante!

Na 1916 e morto di ruman Russell a desconsolános. Siendo cu nos a biba den Allegheny mes, nos a asisti na su entierro den Carnegie Hall. Esei tabata e salón unda ruman Russell a debati cu E. L. Eaton na 1903. Mi a tende cuenta tocante e pastor anglo-metodista cu a desafiá C. T. Russell pa un debate di seis dia, cu e speranza di desacredita e conocimento bíblico di ruman Russell. En bez di esei, segun cu nan a bisa, Russell ‘a paga e candela di fiernu cu un slang.’ Sara Kaelin, un evangelizador di tempo completo bon conocí den Pittsburgh, a conoce Sr. i Sra. Russell personalmente. Ne entierro el a mira María Russell pone flor den e caha cu e nota, “Pa mi estimado esposo.” Aunque el a separa foi dje algun aña promé, María a reconocé ainda como su esposo.

Cu e pasamento di tempo, mi tabatin hopi oportunidad pa desaroya mi talento técnico útil pa mi ofishi di futuro. Mi tío cu tabata mi voogd tabata un contratista di construccion. Durante vacantie di scol, el a lagámi traha cu electricien di dje, instalando corriente den cas bieu cu a usa gas en bez di corriente. Na 1918 alumno di nos scol a traha aparato di radio-telégrafo amateur. Nos a reuni den anochi pa studia i haci experimento di campo cu electricidad i magnetismo. Na 1926 un amigo cu mi a decidi di cumpli cu un soño di nos hubentud​—⁠traha na bordo di barcu i mira e mundo. Nos a matricula den un scol di Radio Corporation of America pa operador di radio-telégrafo.

Un bida nobo den Betel

E scol di radio unda nos a matricula tabata den e stad di New York, di manera cu mi a cruza e rio na Brooklyn pa reunion di Studiante di Bijbel, cu nan a celebra den un Tempel Masónico cu nan a huur. Den e tempo ayá, tabatin un solo congregacion den henter e stad di New York. Ora ruman di Betel (cas dje famía dje oficina central di Studiante di Bijbel) a tende cu mi tabata studia pa diploma di radio comercial, nan a puntra: “Pakico bai lamá? Nos tin un radio emisora aki mes i tin mester di un operador.” Nan a invitámi pa bini ne oficina pa un entrevista. Mi no tabata sa nada di Betel, solamente cu e tabata e oficina central di Studiante di Bijbel.

E rumanan a entrevistámi i a recomenda pa mi caba scol, obtene vergunning, anto bini na Betel. Despues di a gradua, en bez di borda un barcu rumbo lamá grandi, mi a paketá e poco paña cu mi tabatin i a subi trein bao di tera rumbo Betel. Aunque mi tabata dedicá na Jehova Dios i a participa den e trabao di predica pa hopi aña, mi no tabata bautizá te cu December di 1926, dos siman despues di a yega Betel. Esei no tabata straño den e tempo ei.

Cu 150 miembro, Betel tabata mas cu yen den e tempo ei. Tabatin cuater homber den cada camber. Pronto mi a yega di conoce e mayor parti di nan, siendo cu nos tur a come, traha, i a drumi den un solo compleho, i naturalmente, nos tur a asisti ne solo congregacion den e stad di New York. E cas di Betel nobo tabata completá na 124 Columbia Heights na 1927, i nos por a biba dos den un solo camber.

També, na 1927 un fábrica nobo na 117 Adams Street a habri. Mi a yuda hiba mashín dje fábrica bieu na 55 Concord Street ne nobo. Además dje aparato di radio, den e fábrica tabatin lift, mashín di druk, mashín di lavandería, fornu di petroleo​—⁠si e tabatin waya di corriente, mi a instalé.

Pero, Betel tabata mas cu un fábrica. Teniendo parti den e produccion di tur buki, tur tratado, i tur revista, tabatin un grupo di sirbidor humilde di Dios, trahando duro. Nan no tabata busca fama den e mundo. Mas bien, nan simplemente kier a haci e trabao di Señor​—⁠i tabatin basta pa haci!

Asociacion cu ruman Rutherford

Mi a beneficiá mashá dje privilegio di traha cu Joseph F. Rutherford, e segundo presidente dje Sociedad. E tabata un homber grandi, 183 cm halto, i no tabata gordu, sino robusto. Hopi ruman mas hoven den Betel tabatin un poco miedu di dje te cu nan a yega di conocé. E tabata studia constantemente, preparando informacion por escrito.

Ruman Rutherford tabatin un bon sentido di humor. Tabatin dos hermana di mayor edad den e famía di Betel cu tabatei desde e tempo di ruman Russell. Nan tabata basta serio i a kere cu tabata incorrecto pa hari abiertamente aunque un cos tabata pret. Aveces durante cena ruman Rutherford a conta cuenta pa haci tur hende hari, locual a molestiá e dos hermana. Pero, hopi bez ruman Rutherford a hiba delantera den conbersacion bíblico serio durante comemento.

Ruman Rutherford tabata un bon koki i a gusta prepara cuminda pa amigo. Un biaha koki di Betel a kibra wesu di galiña ora nan tabata preparánan pa cushiná. Ruman Rutherford a bai lihé ne cushina i a mústranan con pa corta galiña. E no a gusta pida di wesu di galiña den su cuminda!

Hopi bez mi tabata cerca ruman Rutherford den situacion informal, tal como den nos radio emisora, WBBR, of den su estudio na Staten Island. E tabata un homber asina bondadoso i a practica loke el a predica. E no a spera nada di otro hende cu e mes no kier haci. Distinto di hende responsabel den hopi otro organizacion religioso, ruman Rutherford tabatin e carácter spiritual i moral di mas halto. E claramente a biba pe Reino di Jehova.

Tempo dificultoso financiero

Un poco aña despues cu mi a yega Betel, mundo a drenta den e Depresion Grandi económico despues di 1930. E mercado financiero a faya, mescos cu prijs di mercancía. Empleo tabata scars, placa tabata limitá. Betel a funcioná riba contribucion financiero, i Jehova semper a haci sigur cu tabatin basta pa haci e trabao. Nos nunca tabata sin cuminda, aunque e no tabata exactamente loke cada un a deseá. Nos a biba mas económicamente posibel, i rumanan pafó di Betel a yúdanos materialmente segun cu nan por.

Na 1932, ruman Robert Martin, e fiel superintendente dje fábrica, a muri. Nathan Knorr di bintisiete aña di edad tabata nombrá den su lugar. E tabata un hoven mashá capaz. Mi no ta corda cu ningun hende tabatin dificultad di acepté como superintendente dje fábrica. Otro ruman fiel, entre locual tabatin John Kurzen, George Kelly, Doug Galbraith, Ralph Leffler, i Ed Becker​—⁠tur estimado compañé di trabao di mi​—⁠a dedica boluntariamente nan abilidad i talento ne sirbishi di Reino.​—⁠Compara cu Éxodo 35:​34, 35.

Trahando cu e radio

Nos organizacion a haci dedicacion del alma ne plamamento dje bon nobo usando cualkier medio disponibel. Tur e mundo tabatin cu sa tocante e Reino, pero nos tabata solamente un poco mil Testigo di Jehova. E tecnología di radio tabata den su infancia despues di Gera Mundial I. Sin embargo, rumanan cu discernimiento a kere cu tal manera di comunicacion tabata loke Jehova Dios a percura ne tempo ei. Pues, na 1923 nan a cuminza traha radioemisora WBBR na Staten Island, uno di cinco districto dje stad di New York.

Aveces mi tabata e único operador den nos emisora. Mi a biba ei riba Staten Island pero mi a haci biahe di tres ora via ferry i trein bao di tera te na fábrica den Brooklyn pa haci trabao eléctrico of mecánico. Pa haci nos radioemisora esencialmente independiente, nos a instala un planta di corriente di diesel. Riba Staten Island nos també tabatin nos mes poz di awa i un hofi cu a produci cuminda pe personal chikito ei, i també pe famía di Betel den Brooklyn.

Te cu mas yudanza a bini despues, e responsabilidad di trabao di radio a limitá mashá mi asistencia na reunion i sirbishi di feld. No tabatin ningun tempo pa actividad social of biahe di weekend fuera di nos vacantie anual. Un biaha un persona a puntrámi: “Cu un orario asina exigente, bo nunca a pensa di bandona Betel?” Onradamente, mi tabatin cu bisa: “No.” Tabata un privilegio i gozo pa biba i traha hunto cu tanto rumanan homber i muher dedicá. I semper tabatin trabao cu mester ta hací, algun proyecto nobo pa completa.

Nos a produci i a transmiti drama conmovedor di radio. Sin ningun grabacion di sonido special disponibel, nos tabatin cu inventa nos mes manera. Nos a traha un mashín cu por a produci sonido di un brisa suave of un horcán feroz. E sonido di mitá di casca di coco riba tabla furá a produci e sonido di pata di cabai riba caya di piedra. Cada drama tabata un esfuerzo espectacular. I hende a scucha. Den e tempo ei di poco diverticion, hopi hende a sinta i a presta atencion ne radio.

Entre 1925 i 1935, e Sociedad a logra algo sin igual den comunicacion via radio, bez tras bez conectando e red di mas grandi di radioemisora via telefón pa un solo programa. Asina e bon nobo di Reino a alcanza miyones di hende mundialmente.

E tocadisco

Entre 1935 i 1943, nos a inventa i a traha tocadisco, i otro aparato di sonido. Cu un draibank special, nos a graba disco maestro di was di abeha liso manera spiel. Anto nos a examina cada disco maestro cu sumo cuidao bao di microscop pa haci sigur cu e tabata sin defecto. Si tabatin defecto, e sesion di grabacion tabatin cu ser repití i otro grabacion hací cu draibank. Anto nos a manda e disco maestro di was di abeha ne compañía di disco, cu a produci disco pa tocadisco i transcripcion.

Un suceso excitante cu mi ta corda mashá bon tabata e discurso di ruman Rutherford na 1933 titulá “Efecto dje Aña Santo riba paz i prosperidad.” E papa a declara 1933 di ser un “aña santo,” i via transmision di radio i tocadisco, nos a denuncié i a mustra cu nada santo lo resulta di dje. Loke a sosode, Hitler a subi na mando na 1933 cu apoyo dje Iglesia Católico, di manera cu cualkier speranza pa paz a desparce.

Na América, e organizacion Accion Católico tabata formá pa haci loke e iglesia tabata kier. Nan a pone nan mes compinchi den directiva di corant principal, di revista, i di publicador di buki. Nan a métenan den político i a menazá di boicoteá cualkier radioemisora cu a transmiti nos discurso bíblico. Multitud desordená di grupo di Accion Católico a ataca hopi Testigo di Jehova, specialmente den New Jersey, cerca New York. E tempo ei tabata excitante!

Trabao gozoso den e feld

Rond di 1955, e cantidad aumentante di publicador di Reino tabata alcanza mas hende den nan mes cas. Esei a resulta di ser hopi mas efectivo cu e radio pa yuda hende comprende e berdad bíblico. Pues, na 1957 nan a decidi di bende WBBR i dirigi nos recurso pa expande e trabao di misionero den otro país.

Na 1955, mi tabata asigná ne congregacion di Bedford den Brooklyn, unda mi a dirigi estudio di Toren di Vigilancia regularmente. E Sociedad també a mandámi como orador biahero na nort dje estado di New York, na Pennsylvania, Connecticut, i New Jersey. Ora nan a asignámi ne congregacion di Bedford, mi a pensa, ‘Mi tin mas cu 50 aña di edad. Mihor mi participa tanto posibel den e sirbishi di feld awor aki. Despues mi por haya dolor di lomba i no gozé asina tanto.’

Despues di a traha tanto aña den e parti técnico di sembra simía di Reino via radio, mi a haya cu tabata un berdadero placer pa planta i muha simía di berdad bíblico directamente den hende. Mi realmente a goza trahando cu e congregacion. Diferente rumanan a adoptámi como miembro di nan famía i a hacími sintími na cas. Algun dje muchanan, cu ta grandi awor, ainda ta yamámi padushi. Pa 30 aña nos a pasa bon tempo hunto den e sirbishi di feld, te cu problema cu mi pia a lagámi incapaz pa subi trapi of haci biahe den trein bao di tera. Na 1985, mi a cambia pe congregacion di Brooklyn Heights, cu ta reuni den Betel mes.

Mientras cu e organizacion di Jehova Dios a disfruta di hopi aumento, mi tabatin e privilegio personal di mira su bendicion den campo di stranhería ora mi a asisti na asamblea grandi di Testigo di Jehova den país leu. Mi por a haci biahe rond di mundo toch! Cuminzando despues di 1950 algun betelita a yega di haya bista di Londres, París, Roma, Nuremburg, i Copenhagen. Nos a haci biahe den avion ex-bombadero, bapor, i trein. Naturalmente, biahe asina tabatin bista bonita, pero e bista mas emocionante cu tur tabata e multitud di nos rumanan cariñoso cu a recibínos. Durante décadanan despues nos a haci biahe ne Oriente, Westeuropa atrobé, i mas recientemente na Oosteuropa. Asamblea maraviyoso den Polonia, Alemania, i Checoslovakia tabata sobresaliente. Cuanto nos famía teocrático a crece desde cu mi a bira un parti di dje na principio!

Guía divino

Loke a parce di ser paso chikito dje organizacion a resulta di ser paso gigante despues. Ora nos tabata traha riba proyecto nobo, simplemente herment pa yúdanos haci e trabao di duna testimonio, ken por a anticipa e aumento tremendo? Nos a bai dilanti cu fe, respondiendo ne guía di Jehova.

E organizacion progresivo no ta tene miedu di utiliza e tecnología mas reciente disponibel ni pa crea su mes tecnología pa atende ne campo mundial. Entre método usá pe progreso di proclamacion dje Reino ta e predicacion di cas pa cas, uso di red di radioemisora, dunamento di testimonio cu tocadisco, i un programa di conduci estudio bíblico den cas di hende. Establecimento di nos mes drukkerij na principio i awor usando fotocomposicion cu computer i drukmento offset na hopi idioma no ta un logramento chikito. E Scol Bíblico di Galad di Watchtower, e Scol di Ministerio Teocrático, i asamblea cu regularidad ta hunga un papel den dunamento di gloria na Jehova Dios i na su Yiu. Mi tabatin e privilegio di observa i participa personalmente den tur suceso asina.

Pa mi ta keda claro cu e organizacion di Jehova Dios riba tera, dirigí pa su spiritu, ta recibi guía en cuanto kico pa haci i con pa hacié. Tur su organizacion universal, visibel i invisibel, ta traha hunto.

Nunca a duelmi cu mi a bandona mi plan como un hoven pa bai nabega riba lamá. Sí, suceso di mas excitante i significante den mundo ta sosode aki mes den e organizacion di Jehova Dios! Pues, mi andar riba e camina pe “yamada djariba” a ser marcá cu masha hopi gozo i bendicion sin ningun malai.​—⁠Filipense 3:​13, 14.

Semper mi ta bisa hovenan pa corda 1914​—⁠es decir, Salmo 19:​14, cu ta bisa: “Laga palabra di mi boca i meditacion di mi curazón bira agradabel dilanti bo, O Jehova mi Barranca i mi Redentor.” Nos kier agrada Jehova den tur cos i pidi mescos cu David: “Hacími conoce bo mes camina, O Jehova; siñámi bo mes berea. Hacími camna den bo berdad i siñámi, pasobra bo ta mi Dios di salbacion. Mi a spera den bo tur e dia largu.” (Salmo 25:​4, 5) Tin hopi nificacion den e palabra ei. Cordamento di nan por yúdanos sigi riba e camina correcto, sigiendo den e direccion correcto, den paso cu e organizacion progresivo di Jehova Dios.

[Caption on page 23]

Ruman Rutherford a gusta prepara cuminda pa amigonan

[Caption on page 25]

Robert Hatzfeld na pánel di control di radioemisora WBBR

[Caption on page 26]

Un portret reciente di ruman Hatzfeld