Pakico e Testigonan Ta Sigui Pasa?

‘ATA nan atrobe! Pero ta solamente un par di siman pasá nan tabata aki!’ Esei ta pasa dor di bo mente ora un Testigo di Jehova bishitá bo? Miyones di hende awe ta ser bishitá regularmente dor di Testigonan di Jehova. Kisas bo ta puntra, Pakico nan ta persistí ora nan sa cu mayoria hende tin nan propio religion of no ta interesá? E pregunta ei merecé un contesta.

Responsabilidad Dilanti Dios

Testigonan di Jehova a siña for dje Scritura cu desde 1914, e aña cu Guera Mundial I a cuminsá, sucesonan mundial a bin ta cumpli cu profecianan bíblico relacioná cu e fin dje sistema di mundu actual i e gobernacion entrante dje Reino di Dios riba e tera aki. Casi un siglo di violencia, dramamentu di sanger i odio ta parce di a laga humanidad mas leu cu nunca for di un solucion político pa nan problemanan. E gueranan i terorismo cu ainda ta afligí e famia humano ta proba [activá for di sus pa vb] cu gobernacion humano a fracasá pa cambia curason, mente i actitud di hende. Rencor profundo riba sucesonan cu a tuma lugá den pasado ainda ta venená e relacionnan entre gruponan étnico, racial i religioso. Esei ta e caso den áreanan masha leu for di otro manera Afganistan, India, Medio Oriente, Nort Irlanda, Sur Africa i e antiguo Yugoslavia. Kico, anto, ta e único solucion permanente?

Kico Ta Motivá e Testigonan?

Testigonan di Jehova ta reconocé cu e solucion di Dios​—⁠su promesa di un gobernacion di Reino dor di Cristo Jesus​—⁠ta e único solucion factibel. Jesus asta a incluí un peticion p’e gobernacion di Reino ei den su famoso oracion modelo: “Boso mester resa anto, asina aki: ‘Nos Tata den cielu, laga bo nomber ser santificá. Laga bo reino bini. Laga bo boluntad tuma lugá, mescos cu den cielu, tambe riba tera.’ ” E Testigonan ta kere cu e oracion aki realmente ta pidi pa Dios su intervencion den asuntunan di humanidad.​—⁠Mateo 6:​9, 10.

Pues pakico Testigonan di Jehova ta sinti e necesidad constantemente pa bai di cas pa cas pa purba transmití e mensahe ei? Debí na dos mandamentu cu Jesus a resaltá: “ ‘Bo mester stima Jehova bo Dios cu tur bo curason i cu tur bo alma i cu tur bo mente.’ Esaki ta e mandamentu di mas grandi i esun promé. E segundo, mescos cuné, ta esaki, ‘Bo mester stima bo próhimo mescos cu bo mes.’ ”​—⁠Mateo 22:​37-39.

E Testigonan kier e bendicion di Dios pa nan mes, i debí cu nan ta stima nan próhimo, nan kier e mésun bendicion ei pa nan. Pues, siguiendo Jesus su ehempel, nan ta sinti nan impulsá pa amor inegoista pa bishitá nan próhimo. Nan kier por lo ménos ofrecé nan próhimo e oportunidad di haña sa kico “e Dios felis” a primintí pa humanidad obediente riba un tera limpi.​—⁠1 Timoteo 1:11; 2 Pedro 3:⁠13.

E misionero cristian Pablo a kere den e promesanan di Dios i asina por a skirbi: “Pablo, un esclabo di Dios i un apostel di Jesucristo segun e fe dje scogínan di Dios i e conocimentu exacto dje berdad cu ta armonisá cu debocion piadoso riba e base di un speransa dje bida eterno cu Dios, kende no por gaña, a primintí promé cu tempu di duracion largu.” Sí, Dios, “kende no por gaña,” “a primintí” bida eterno na esnan cu humildemente ta busca pa conoc’é i sirbi’é.​—⁠Tito 1:​1, 2; Sofonías 2:⁠3.

E Testigonan Ta Ser Pagá?

Algun persona sa pretendé tin biaha cu e Testigonan ta ser pagá pa nan ministerio. Nada por ta mas leu for dje berdad! Nan ta tuma mashá na serio e palabranan di Pablo n’e congregacion den Corinto: “Nos no ta bendedó dje palabra di Dios manera hopi hende ta, sino como impulsá pa sinceridad, sí, como mandá di Dios, bou di bista di Dios, den compania cu Cristo, nos ta papiando.”

Algun lider religioso ta predicá pa placa, sea ta pago pa servicionan religioso of promocion di empresanan comercial den nan programanan di predicashi na television. Mayoria religion tin cleronan pagá.​—⁠2 Corintio 2:⁠17.

Na contraste, e Testigonan no tin cleronan pagá, i hopi biaha nan literatura bíblico ta ser ofrecé grátis na buscadornan sincero di berdad, aunke hopi di esakinan ta ser impulsá pa haci donacionnan boluntario. Esakinan ta ser usá pa carga e gastunan dje trabou mundial aki di predicacion. Na armonia cu e conseho di Jesus, “Boso a ricibí grátis, duna grátis,” e Testigonan ta gasta nan recursonan libremente, incluyendo tempu i energia, pa dedicá miyones di ora cada aña n’e sirbishi di Dios. Asina, nan ta siña personanan interesá di cas pa cas i pa medio di studio di Bijbel na cas.​—⁠Mateo 10:8; 28:​19, 20; Echo 20:​19, 20.

E echonan ta proba cu e Testigonan di Jehova como individuo, nan congregacionnan local of e Sociedad Watch Tower, no ta tras di placa. Ningun persona ta ricibí cualkier pago pa bai di cas pa cas. Con anto e trabou ta ser financiá? Dor di contribucionnan boluntario for di hende apreciativo rond mundu. No sa tin pasamentu di colecta.

E Impacto di Nan Dunamentu di Testimonio

E ministerio di cas-pa-cas i e predicacion informal dje Testigonan tin un impacto riba e conciencia público? E evidencia den medio di comunicacion ta duna un sí resonante n’e pregunta ei. Testigonan di Jehova a ser mencioná durante programanan di television i películanan ora nan ta mustra un hende batiendo na porta. Revistanan di caricatura a mencioná e Testigonan. Nan actividad celoso ta asina bon-conocí cu caricaturistanan rond mundu a incluí referencianan na Testigonan di Jehova. Esakinan por parce di haci bofon, pero nan ta basá generalmente riba un echo fundamental positivo​—⁠cu e Testigonan ta conocí pa nan predicacion persistente di cas-pa-cas.​—⁠Echo 20:⁠20.

Un caricatura recien a mustra un homber subiendo un ceru pa consultá cu un “guru.” El a bisa: “Papiá mi dje cosnan maraviyoso pa bini!” Con e “guru” a contestá? “Laga nos mira . . . Lo tin scarcedad di cuminda, pest i temblor. Solo lo ser combertí den scuridad i luna na sanger.” E homber a puntra: “Kico ta e bon nobo?” Riba cua e “guru” a respondé: “Dios lo seca tur lágrima . . . i lo no tin morto mas ni tristesa ni dolor!” E bishitante a puntra: “Con bo por sa dje cosnan ei?” E contesta? “Ningun hende ta scapa di Testigonan di Jehova!” I esei mester tabata e caso cu e artista dje caricatura mes tambe!

E importancia dje caricatura aki i otronan manera e ta cu e ta revelá no solamente e constancia dje bishitanan di Testigonan sino tambe e consistencia di nan mensahe. Den djis un par di palabra, e artista a duna un parti clave di nan testimonio di cas-pa-cas i a cita textonan.​—⁠Compará cu Mateo 24:​7, 29; Revelacion 21:​3, 4.

E echo cu mayoria hende ta rechasá nan mensahe no ta desanimá e Testigonan of disminuí nan celo. Apostel Pedro a spierta: “Den e último dianan lo bini mofadornan cu nan mofa, andando segun nan mes deseonan i bisando: ‘Unda e presencia primintí di dje ta? Sí, desde e dia cu nos antepasadonan a bai drumi den morto, tur cos ta siguiendo exactamente manera desde principio di creacion.’ ” Apesar di esaki, motivá pa amor, e Testigonan ta sigui bishitá nan próhimo i lo haci esei te ora Dios trece un fin n’e sistema corupto actual.​—⁠2 Pedro 3:​3, 4.

Jesus a bisa cu den e último dianan, e bon nobo lo mester ser predicá promé. Pa un examinacion mas aleu di pakico i con e bon nobo ta ser predicá, mira e dos artículonan cu ta sigui.​—⁠Marco 13:⁠10.

[Caption on page 9]

Testigonan di Jehova no tin un clase di clero cu salario​—⁠tur ta ministernan boluntario