Sufrimentu Humano

Pakico Dios ta permiti’é?

NA CUMINSAMENTU di historia di humanidad, simplemente no tabatin lágrima di tristesa of di dolor. No a existí sufrimentu humano. Humanidad a ricibí un comienso perfecto. “Dios a wak tur loke el a traha i, mira! e tabata masha bon.”​—⁠Génesis 1:31.

Pero algun ta oponé, ‘E historia di Adam i Eva den e hofi di Eden ta djis un relato simbólico.’ Lamentablemente, hopi clero di cristiandad ta bisa esaki. Sin embargo, asta un autoridad manera Jesucristo mes a confirmá e sucesonan den Eden como histórico. (Mateo 19:​4-6) Ademas, e único manera pa comprendé pakico Dios a permití sufrimentu humano ta di examiná e sucesonan aki di humanidad su principio.

E promé homber, Adam, a haña e trabou satisfaciente di percurá p’e hofi di Eden. Tambe, Dios a pone dilanti dje e meta di expandé su hogar edénico den un hofi mundial di placer. (Génesis 1:28; 2:15) Pa yuda Adam cumpli cu e tarea grandi aki, Dios a dun’é un partner matrimonial, Eva, i a bisa nan pa nan ta fructífero i pa multiplicá i dominá e tera. Sin embargo, algu mas tabata necesario pa garantisá e éxito dje propósito di Dios p’e tera i pa humanidad. Siendo trahá den e imágen di Dios, hende tabatin un boluntad liber; p’esei, tabata necesario pa hende su boluntad nunca drenta den conflicto cu esun di Dios. Di otro manera, lo tabatin desordu den e universo, i e propósito di Dios pa yena e tera cu un famia humano pacífico lo no a ser realisá.

Sumision na gobernacion di Dios no tabata automático. E mester tabata un expresion amoroso di hende su boluntad liber. Por ehempel, nos ta lesa cu ora Jesucristo a enfrentá un prueba severo, el a resa: “Tata, si bo kier, kita e copa aki for di mi. No obstante, laga, no mi boluntad, sino esun di bo tuma lugá.”​—⁠Lucas 22:42.

Di igual manera, a dependé di Adam i Eva pa proba si nan lo kier a someté nan mes n’e gobernacion di Dios. P’e propósito aki, Jehova Dios a prepará un prueba simpel. Un dje palunan den e hofi a ser yamá “e palu di conocimentu di bon i malu.” El a representá Dios su derecho pa determiná e normanan di conducta corecto. Den un forma cla, Dios a prohibí comementu di fruta for dje palu particular aki. Si Adam i Eva a desobedecé, lo el a resultá den nan morto.​—⁠Génesis 2:​9, 16, 17.

E Principio di Sufrimentu Humano

Riba un dia un yu spiritual di Dios a tribi di lanta duda tocante Dios su manera di goberná. Usando un colebra como portabos, el a puntra Eva: “Ta realmente asina cu Dios a bisa cu boso no mag come di tur palu dje hofi?” (Génesis 3:⁠1) Pues un simia di duda a ser plantá den mente di Eva en cuanto si Dios su manera di goberná tabata bon of no.a Respondiendo, Eva a duna e contesta corecto, cua el a siña for di su casá. Sin embargo, e ora ei e criatura spiritual a contradecí Dios i a gaña tocante e consecuencianan di desobedencia, bisando: “Boso positivamente lo no muri. Pasobra Dios sa cu net riba e dia cu boso come di dje boso wowo mester habri i boso mester bira manera Dios, conociendo bon i malu.”​—⁠Génesis 3:​4, 5.

Lamentablemente, Eva a ser gañá pa kere cu desobedencia lo a resultá, no den sufrimentu humano, sino den un mihó bida. Mas el a wak e fruta, mas deseabel el a parce, i el a cuminsá com’é. Mas despues, el a persuadí Adam pa com’é tambe. Trágicamente, Adam a scoge pa retené e fabor di su casá mas bien cu esun di Dios.​—⁠Génesis 3:6; 1 Timoteo 2:​13, 14.

Dor di instigá e rebelion aki, e criatura spiritual a combertí su mes den un opositor di Dios. Asina, el a cuminsá ser yamá Satanas, for dje palabra hebreo nificando “opositor.” Tambe el a gaña tocante Dios, haciendo su mes un calumniador. P’esei, e ta ser yamá Diabel tambe, for di un palabra griego nificando “calumniador.”​—⁠Revelacion 12:⁠9.

Asina sufrimentu humano a cuminsá. Tres criatura di Dios a malusá nan don di boluntad liber, scogiendo un forma egoista di bida den oposicion cu nan Creador. E pregunta a lanta awor, Con Dios lo bai trata cu e rebelion aki den un manera hustu cu lo restorá e confiansa dje resto di su creacion inteligente, incluyendo angelnan fiel den cielu i futuro desendientenan di Adam i Eva?

Dios Su Contesta Sabí

Algun hende por argumentá cu lo tabata mihó si Dios a destruí Satanas, Adam i Eva mesora. Pero esei lo no a resolvé e cuestionnan cu e rebelion a lanta. Satanas a cuestioná Dios su manera di goberná, insinuando cu hende lo a disfrutá di un mihó bida independiente di Dios su gobernacion. Tambe, su éxito den haci e promé dos hendenan bai contra Dios su gobernacion a lanta otro cuestionnan. Siendo cu Adam i Eva a peca, esaki a nificá cu tabatin algu robes cu e manera cu Dios a crea hende? Dios lo por tabatin cualkier hende riba tera cu lo a permanecé fiel na dje? I kico tocante Jehova su yunan angelical kendenan tabata testigo dje rebelion di Satanas? Nan lo a sostené e husticia di Su soberania? Claramente, suficiente tempu tabata necesario pa resolvé e cuestionnan aki. Esei t’e motibu pakico Dios a permití Satanas existí te den nos tempu.

Pa loke ta Adam i Eva, riba e dia di nan desobedencia, Dios a sentenciá nan na morto. Asina e proceso di murimentu a cuminsá. Nan desendientenan, kendenan a ser concibí despues cu Adam i Eva a peca, a heredá picá i morto for di nan mayornan imperfecto.​—⁠Romano 5:14.

Satanas a cuminsá cu e promé dos hendenan na su banda dje cuestion. El a usa e tempu cu a ser permití na dje pa purba tene tur desendiente di Adam bou di su control. Tambe el a logra seducí un cantidad di angel pa uni cuné den su rebelion. Sin embargo, e mayoria dje yunan angelical di Dios a sostené lealmente e husticia di Jehova su gobernacion.​—⁠Génesis 6:​1, 2; Hudas 6; Revelacion 12:​3, 9.

E cuestion bou di discusion tabata e gobernacion di Dios contra esun di Satanas, un cuestion cu tabata masha vigente den e tempu di Job. E homber fiel aki a proba mediante su conducta cu el a preferá e gobernacion hustu di Dios riba independencia satánico, manera hombernan temeroso di Dios tal como Abel, Enoc, Noe, Abraham, Isaac, Jacob i Josef a haci caba. Job a bira e tópico di un combersacion cu a tuma lugá den cielu enfrente dje angelnan fiel di Dios. Confirmando Su gobernacion hustu, Dios a bisa Satanas: “Bo a fiha bo curason riba mi sirbidor Job, cu no tin ningun manera e riba tera, un homber sin culpa i recto, temeroso di Dios i apartá di loke ta malu?”​—⁠Job 1:​6-8.

Nengando pa admití derota, Satanas a pretendé cu Job a sirbi Dios solamente pa motibunan egoista, ya cu Dios a bendicioná Job ricamente cu prosperidad material. Pues Satanas a acusá: “Pa un cambio, saca bo man, por fabor, i mishi cu tur loke e tin i mira si lo e no maldicioná bo den bo cara mes.” (Job 1:​11) Satanas a bai asta mas aleu, cuestionando e integridad di tur criatura di Dios. “Tur loke un hende tin lo e duna na fabor di su alma,” el a acusá. (Job 2:⁠4) E atake calumniador aki a enbolbé no solamente Job sino tur fiel adorador di Dios den cielu i riba tera. Satanas a insinuá cu nan lo kibra nan relacion cu Jehova si nan bida ta na peliger.

Jehova Dios tabatin pleno confiansa den Job su integridad. Pa duna evidencia di esei, el a permití Satanas trece sufrimentu humano riba Job. Dor di su fieldad Job no solamente a libra su mes nomber dje acusacion sino, mas importante, a sostené e husticia di Jehova su soberania. E Diabel a resultá di ta un mentiroso.​—⁠Job 2:10; 42:⁠7.

Sin embargo, e mihó ehempel di fieldad bou di prueba tabata Jesucristo. Dios a transferí e bida dje Yu angelical aki for di cielu n’e matris di un bírgen. P’esei Jesus no a heredá picá i imperfeccion. Mas bien el a crece bira un homber perfecto, e ekivalente exacto dje promé homber, promé cu esun ei a perde su perfeccion. Satanas a haci Jesus un blanco special, treciendo hopi tentacion i prueba riba dje, culminando den un morto humiyante. Pero Satanas a faya pa kibra Jesus su integridad. Den un manera completo Jesus a sostené e husticia dje gobernacion di su Tata. El a proba tambe cu e homber perfecto Adam no tabatin excuus pa uni cu e rebelion di Satanas. Adam por a keda fiel bou di su prueba muchu mas chikitu.

Kico Mas A Ser Probá?

Rond di 6.000 aña di sufrimentu humano a pasa desde e rebelion di Adam i Eva. Durante e tempu aki Dios a permití humanidad experenciá cu hopi diferente forma di gobiernu. E registro horibel di sufrimentu humano ta proba cu hende no ta capas pa goberná su mes. En realidad, awor anarkia ta prevalecé den hopi área dje mundu. Independencia for di Dios, manera Satanas ta boga p’e, ta calamitoso.

Jehova no tabatin nodi proba nada pa su mes. E sa cu su forma di goberná ta hustu i den e mihó interesnan di su criaturanan. Sin embargo, pa contestá tur e cuestionnan cu e rebelion di Satanas a lanta satisfactoriamente, el a duna su criaturanan inteligente oportunidad pa mustra nan preferencia pa su gobernacion hustu.

E recompensanan cu ta bini di stima Dios i keda fiel na dje ta pisa hopi mas cu e periodo temporario di sufrimentu na man dje Diabel. E caso di Job ta ilustrá esaki. Jehova Dios a cura Job for dje enfermedad cu e Diabel a trece riba dje. Ademas, Dios “a bendicioná e fin di Job despues mas cu su principio.” Finalmente, despues di un extension di 140 aña di bida, “Job a muri, bieu i satisfecho di dianan.”​—⁠Job 42:​10-17.

E escritor cristian di Bijbel, Santiago, ta hala atencion na esaki, bisando: “Boso a tende dje awante di Job i a mira e resultado cu Jehova a duna, cu Jehova ta masha tierno den cariño i compasivo.”​—⁠Santiago 5:​11, nota na pia di página.

Tempu a caba awor pa Satanas i su mundu. Pronto, Dios lo eliminá tur e sufrimentu cu e rebelion di Satanas a trece riba humanidad. Asta e mortonan lo ser lantá. (Juan 11:25) E ora ei, hombernan fiel manera Job lo tin e oportunidad di gana bida eterno riba un tera paradísico. E futuro bendicionnan aki cu Dios lo drama riba su sirbidornan lo vindik’é pa semper hamas como un Soberano hustu kende en berdad ta “masha tierno den cariño i compasivo.”

[Footnotes]

[Box/Pictures on page 8]

DIOSNAN CRUEL DI HENDE

DIOSNAN di pasado hopi biaha a ser pintá como gustadó di sanger i yen di deseo carnal. Pa agradá nan, mayornan asta a kima nan yunan bibu den candela. (Deuteronomio 12:31) N’e otro extremo, filósofonan pagano a siña cu Dios tabata sin sintimentu manera rabia of piedad.

E puntonan di bista inspirá pa demoño dje filósofonan aki a influenciá e hudiunan cu a yama nan mes e pueblo di Dios. E filósofo hudiu Filo, un contemporáneo di Jesus, a declará cu Dios “no ta incliná na ningun emocion en absoluto.”

Ni sikiera e secta hudiu estricto di fariseo no a scapa dje influencia di filosofia griego. Nan a adoptá e siñansanan di Plato cu hende ta consistí di un alma inmortal atrapá den un curpa humano. Ademas, segun e historiadó di promé siglo Josefo, e fariseonan a kere cu alma di hende malbado “ta sufri castigu eterno.” Sin embargo, Bijbel no ta duna base pa un punto di bista asina.​—⁠Génesis 2:7; 3:19; Eclesiastés 9:5; Ezekiel 18:⁠4.

Kico dje siguidornan di Jesus? Nan a permití nan mes ser influenciá pa filosofia pagano? Reconociendo e peliger aki, apostel Pablo a spierta compañénan cristian: “Tene cuidou: talbes por tin un hende cu lo hiba boso como su víctima mediante e filosofia i engaño bano segun e tradicion di hende, segun e cosnan elementario dje mundu i no segun Cristo.”​—⁠Colosense 2:8; mira tambe 1 Timoteo 6:20.

Lamentablemente, un cantidad di superintendente cu a yama nan mes cristian di siglo dos i tres a ignorá e spiertamentu ei i a siña cu Dios no tin sintimentu. The Encyclopedia of Religion ta declará: “Den su totalidad, hende a comprendé Dios su atributonan mes tantu cu nan a ser afirmá den pensamentu hudiu i filosófico dje tempu . . . E idea cu Dios e Tata por tabatin sintimentunan manera piedad . . . a ser considerá generalmente como inaceptabel por lo ménos te n’e siglo binti numa.”

Asina, cristiandad a adoptá e siñansa falsu di un dios cruel cu ta castigá pecadornan dor di laga nan sufri tormento conciente pa semper. N’e otro banda, Jehova Dios ta bisa claramente den su Palabra, e Bijbel, cu “e salario cu picá ta paga ta morto,” no tormento conciente eterno.​—⁠Romano 6:⁠23.

Ariba: Acropolis Museum, Grecia

Cortesia di The British Museum

[Caption on page 7]

E propósito di Dios pa transformá e tera den un paradijs edénico mester ser realisá!