“Si Bo Debe Belasting, Paga Belasting”

“DEN e mundu aki e único dos cosnan sigur ta morto i belasting.” Asina e estadista i inventor mericano di siglo 18 Benjamin Franklin a bisa. Su palabranan, citá asina frecuentemente, ta mustra no solamente ki inevitabel belasting ta, sino tambe e sintimentu di temor cu e ta causa. Pa hopi hende, pagamentu di belasting ta mes malu cu muri.

Sin embargo, maske ki desagradabel pagamentu di belasting por ta, esaki ta un obligacion cu cristiannan berdadero ta tuma masha na serio. Apostel Pablo a skirbi n’e congregacion cristian na Roma: “Duna tur hende loke bo ta deb’é: Si bo debe belasting, paga belasting; si ta ganashi, anto ganashi; si ta respet, anto respet; si ta onor, anto onor.” (Romano 13:​7, New International Version) I Jesucristo a referí specíficamente na belasting ora el a bisa: “Paga bek na César loke ta di César, pero na Dios loke ta di Dios.”​—⁠Marco 12:​14, 17.

Jehova a permití pa “autoridadnan superior” gubernamental existí i ta rekerí pa su sirbidornan ta den sumision relativo na nan. Pakico anto Dios ta insistí pa su adoradornan paga belasting? Pablo ta mencioná tres motibu básico: (1) e “rabia” dje “autoridadnan superior” ora nan ta castigá violadornan di ley; (2) un cristian su concenshi, cua lo no ta limpi si e ta cometé fraude cu su belasting; (3) e necesidad pa paga e “sirbidornan público” aki p’e servicionan cu nan ta presta i pa mantené un midí di ordu. (Romano 13:​1-7) Kisas hopi hende no ta gusta paga belasting. Sin embargo, siguramente nan lo no kier biba tampoco den un pais sin polis of proteccion contra candela, sin mantencion di caya, sin scol público i sin servicio postal. E hurista mericano Oliver Wendell Holmes a yega di bis’é asina’ki: “Belasting ta loke nos ta paga pa un sociedad civilisá.”

Pagamentu di belasting no ta nada nobo pa sirbidornan di Dios. Habitantenan di Israel antiguo a paga un forma di belasting pa sostené nan reynan, i algun dje gobernantenan ei a pone un carga pisá riba e pueblo mediante un cobransa irazonabel di belasting. Tambe e hudiunan a paga tributo i belasting n’e gobiernunan stranhero cu a dominá nan, manera Egipto, Persia i Roma. Pues e cristiannan den Pablo su tempu tabata sa hopi bon kico e tabata papiando di dje ora el a mencioná e pagamentu di belasting. Nan tabata sa cu sea e belastingnan tabata razonabel of no, i sin importá con e gobiernu kisas ta gasta e placa aki, nan mester a paga cualkier belasting cu nan a debe. Mescos ta aplicá na cristiannan awe. Sin embargo, ki principionan por guia nos miéntras nos ta paga nos belastingnan den e tempu complicá aki?

Cincu Principio Guiador

Ser ordená. Nos ta sirbi i ta imitá Jehova, kende ta “un Dios, no di desordu, sino di pas.” (1 Corintio 14:33; Efesio 5:⁠1) Ser ordená ta crucial ora ta trata di paga belasting. Bo registronan ta completo, exacto i organisá? Generalmente, un sistema costoso di warda documento no ta necesario. Bo por tin un map cu etiketa pa cada tipo di registro (por ehempel recibunan cu ta specificá bo vários gastunan). Lo por ta suficiente pa agrupá esakinan den mapnan mas grandi pa cada aña. Den hopi pais ta necesario pa warda tal archivonan pa un cantidad di aña por si a caso cu e gobiernu dicidí na examiná registronan di pasado. Pues no tira nada afó te ora bo ta sigur cu e no ta necesario mas.

Ser onrado. Pablo a skirbi: “Ocupá boso den oracion pa nos, pasobra nos ta confia cu nos tin un concenshi onrado, ya cu nos ta deseá na comportá nos mes onradamente den tur cos.” (Hebreo 13:18) Un deseo sincero pa ta onrado mester guia tur decision cu nos ta tuma ora nos ta paga nos belastingnan. Na promé lugá, considerá belastingnan cu hende tin cu paga riba entrada cu mester ser declará na gobiernu. Den hopi pais, mester paga belasting riba entrada adicional​—⁠for di tip, ‘bij-job,’ benta​—⁠asina cu e surpasá un cierto montante. Un cristian cu un “concenshi onrado” lo busca pa sa kico ta forma e entrada ‘belastbaar’ [entrada riba cua e belasting ta wordu calculá] caminda e ta biba i lo paga e belasting relevante.

Na di dos lugá, tin e asuntu di deduccionnan. Generalmente gobiernunan ta permití pagadónan di belasting deducí cierto gastunan for di nan entrada ‘belastbaar.’ Den e mundu desonrado aki, hopi hende no ta mira nada malu den ser “creativo” of “imaginativo” ora di presentá reclamá tal deduccionnan. Segun informe, un homber na Merca a cumpra un jas di lana costoso pa su casá, anto a cologu’é den su lugá di negoshi pa ún dia di manera cu e por a deduci’é como un forma di “decoracion” p’e lugá di trabou! Un otro homber a presentá e gastunan di casamentu di su yu muher como gastunan di negoshi. Un otro mas a purba deducí e gastunan di biahe di su casá huntu cuné pa lunanan largu den Lehano Oriente, aunke e casá en realidad tabatei principalmente pa propósitonan social i recreativo. Ta parce cu no tin fin na tal casonan. Bisá den un manera simpel, yamando algu un deduccion di negoshi ora e realmente no ta, ta un forma di gañamentu​—⁠algu cu nos Dios, Jehova, ta odia intensamente.​—⁠Proverbio 6:​16-19.

Ser cauteloso. Jesus a insta su siguidornan pa ta “cauteloso manera colebra i tog inocente manera palomba.” (Mateo 10:16) E conseho ei por aplicá hopi bon na nos prácticanan di paga belasting. Particularmente den paisnan desaroyá, awendia mas i mas hende ta paga un compania di accountant of un profesional pa prepará nan formulario di declaracion pa belasting. Despues nan simplemente ta firma e formularionan i ta manda e chek. Esaki ta un bon ocasion pa tuma nota dje palabra di cautela registrá na Proverbio 14:15: “Cualkier inexperto ta pone fe den tur palabra, pero esun spiertu ta considerá su pasonan.”

Hopi pagadó di belasting a haña nan cu problema cu gobiernu pasobra nan a ‘pone fe den tur palabra’ di un accountant sin escrúpulo of un consehero di belasting inexperto. Ta cuantu mas mihó pa ta spiertu! Considerá bo pasonan dor di lesa cuidadosamente cualkier documento promé cu bo firm’é. Si cualkier detaye, omision of deduccion ta parcé bo straño, pidi un splicacion​—⁠repetidamente si ta necesario​—⁠te ora bo ta satisfecho cu e asuntu ta onrado i legal. Ta cierto cu den hopi pais leynan di belasting a bira sumamente complicá, pero te n’e grado posibel, ta sabí pa comprendé delaster un cos cu bo ta firma. Den algun caso, kisas bo por haña cu un compañé cristian cu conocé ley di belasting bon, por duná bo algun idea. Un anciano cristian kende ta atendé cu asuntunan di belasting como abogado a bis’é cu poco palabra: “Si bo accountant proponé bo algu cu ta zona demasiado bon pa ta berdad, e ora ei probablemente e no ta onrado!”

Ser responsabel. “Cada un lo hiba su mes carga,” apostel Pablo a skirbi. (Galatio 6:⁠5) Ora ta trata di paga belasting, cada cristian mester asumí e responsabilidad di ser onrado i cumplidor cu ley. Esaki no ta un asuntu den cua e ancianonan di congregacion ta supervisá e tou bou di nan cuido. (Compará cu 2 Corintio 1:24.) Nan no ta enbolbé nan mes den asuntunan di belasting aménos cu un caso di malecho serio, talbes enbolbiendo escándalo den e comunidad, yega na nan atencion. Generalmente, esaki ta un área den cua e cristian individual ta responsabel pa usa su concenshi debidamente entrená den aplicacion di principionan bíblico. (Hebreo 5:14) Esaki ta incluí ser conciente cu firmando un documento di belasting​—⁠sin importá ken a prepar’é​—⁠por encerá en berdad un declaracion legal cu bo a lesa e documento i ta kere cu loke e ta contené ta cierto.a

Ser ireprensibel. Superintendentenan cristian mester ta “ireprensibel” afin di cualificá pa nan puesto. Di igual manera, henter e congregacion mester ta ireprensibel den bista di Dios. (1 Timoteo 3:2; compará cu Efesio 5:27.) P’esei nan ta forsa pa mantené un bon reputacion den e comunidad, asta ora ta trata di pagamentu di belasting. Jesucristo mes a pone e ehempel den esaki. Nan a puntra su disipel Pedro si Jesus a paga e belasting di tempel, un asuntu menor cu a enbolbé dos dracma. Realmente, Jesus tabatin dispensacion dje belasting aki, siendo cu e tempel tabata e cas di su Tata i ningun rey ta imponé un belasting riba su mes yu. Jesus a bisa esei; tog el a paga e belasting ei. En realidad, el a asta usa un milager pa producí e placa necesario! Pakico paga un belasting pa cua e tabatin un debido dispensacion? Manera Jesus mes a bisa, esei tabata “pa nos no pone nan trompecá.”​—⁠Mateo 17:​24-27.b

Mantené un Reputacion cu Ta Onra Dios

Testigonan di Jehova awe di igual manera ta preocupá pa nan no pone otronan trompecá. No ta un sorpresa anto, cu como grupo, nan ta disfrutá di un bon reputacion rond mundu como ciudadanonan onrado i pagadó di belasting. Por ehempel, e corant spañó El Diario Vasco a comentá riba e evasion di belasting (belastingontduiking) plamá na Spaña, pero a skirbi: “E único excepcion [ta] Testigonan di Jehova. Ora nan ta cumpra of bende, e balor [dje propiedad] cu nan ta declará ta e berdad absoluto.” Di igual manera, e corant mericano San Francisco Examiner a remarcá algun aña pasá: “Bo por considerá [Testigonan di Jehova] como ciudadanonan ehemplar. Nan ta paga belasting diligentemente, nan ta cuida hende enfermo, nan ta lucha contra analfabetismo.”

Ningun cristian berdadero lo kier haci nada cu lo por mancha e reputacion aki pa cua nan a traha asina duru. Si bo mester scoge, lo bo risca ser conocí como estafador di belasting djis pa bo por spar poco placa? No. Siguramente lo bo preferá di perde placa cu mancha bo bon nomber i exponé bo balornan i asta bo adoracion di Jehova den un mal lus.

Ta cierto cu pa bo mantené un reputacion como un persona hustu i onrado por wel costá bo placa tin biaha. Manera e filósofo griego antiguo Plato a observá rond di 24 siglo pasá: “Ora tin un belasting riba entrada, e homber hustu lo paga mas i e inhustu ménos riba e mésun montante di entrada.” E por a agregá cu e homber hustu nunca ta lamentá cu e ta pagando e prijs pa ta hustu. Asta e echo cu bo tin un reputacion asina ta bale la pena. Esaki ta siguramente cierto di cristiannan. Nan bon reputacion ta precioso pa nan pasobra esei ta onra nan Tata celestial i por yuda atraé otronan na nan moda di biba i na nan Dios, Jehova.​—⁠Proverbio 11:30; 1 Pedro 3:⁠1.

Sin embargo, mas importante cu tur cos, cristiannan berdadero ta duna balor na nan mes relacion cu Jehova. Dios ta mira tur loke nan ta haci, i nan ta deseá di agrad’é. (Hebreo 4:13) P’esei, nan ta rechasá e tentacion di purba horta gobiernu. Nan ta reconocé cu Dios tin deleite den conducta onesto i recto. (Salmo 15:​1-3) I ya cu nan kier haci e curason di Jehova alegrá, nan ta paga tur belasting cu nan debe.​—⁠Proverbio 27:11; Romano 13:⁠7.

[Footnotes]