Determinando Debilidad, Maldad i Repentimentu

PICA ta algu cu cristiannan ta odia​—⁠un faltamentu cu e normanan hustu di Jehova. (Hebreo 1:⁠9) Desafortunadamente, nos tur ta peca de bes en cuando. Nos tur ta lucha cu debilidad i imperfeccion inherente. Sin embargo, den mayoria caso, si nos confesá nos picánan na Jehova i sinceramente ta purba pa no ripití nan, nos por acerk’é cu un concenshi limpi. (Romano 7:​21-24; 1 Juan 1:​8, 9; 2:​1, 2) Nos ta gradicí Jehova cu, riba e base dje sacrificio di rescate, e ta aceptá nos sirbishi sagrado apesar di nos debilidadnan.

Si un hende cai den picá serio debí na debilidad carnal, e tin mester di pastoreo urgentemente na armonia cu e procedura describí na Santiago 5:​14-16: “Tin algun cu ta [spiritualmente] enfermo den boso? Lagu’e yama e ancianonan dje congregacion cerca dje . . . Si el a cometé picá, lo e ser pordoná. P’esei confesá abiertamente boso picánan un na otro i haci oracion un pa otro, pa boso por ser saná.”

P’esei, ora un cristian dedicá cometé un picá grave, algu mas cu confesion personal na Jehova ta necesario. E ancianonan mester dal cierto pasonan, ya cu e limpiesa of e pas dje congregacion ta ser menasá. (Mateo 18:​15-17; 1 Corintio 5:​9-11; 6:​9, 10) Ancianonan lo mester determiná: E individuo ta repentí? Kico a hiba n’e picá? Esei tabata e resultado di un momento isolá di debilidad? Esei tabata un practicamentu di picá? E evaluacion ei no ta semper fácil of claro i ta exigí bastante dicernimentu.

Sin embargo, kico si e picá ta debí na siguimentu tras di un curso di malecho i mal conducta? E ora ei, e responsabilidad dje ancianonan ta claro. Ora apostel Pablo a duna instruccion con pa trata un asuntu serio den e congregacion corintio, el a bisa: “Saca e malbado for di meimei di boso.” (1 Corintio 5:13) No tin lugá pa hende malbado den e congregacion cristian.

Evaluando Debilidad, Maldad i Repentimentu

Con ancianonan por sa ora un persona ta repentí?a Esaki no ta un pregunta simpel. Pensa, por ehempel, riba Rey David. El a cometé adulterio i despues, en efecto, asesinato. Tog, Jehova a permiti’é sigui biba. (2 Samuel 11:​2-24; 12:​1-14) Anto pensa riba Ananías i Safira. Falsamente nan a purba engañá e apostelnan, pretendiendo hipócritamente di ta mas generoso cu nan realmente tabata. Serio? Sí. Mes malu cu asesinato i adulterio? Apénas! Tog, Ananías i Safira a paga cu nan bida.​—⁠Echo 5:​1-11.

Pakico e huicionan ta distinto? David a cai den picá serio debí na debilidad carnal. Ora el a ser confrontá cu loke el a haci, el a repentí, i Jehova a pordon’é​—⁠aunke el a ser disipliná severamente relacioná cu problemanan den su cas. Ananías i Safira a peca ora nan a gaña hipócritamente, purbando pa engañá e congregacion cristian i asina a ‘trata e spiritu santu i Dios cu engaño.’ Esei a resultá di ta evidencia di un curason malbado. P’esei, nan a ser husgá mas severamente.

Den ámbos caso Jehova a haci e husgamentu, i su husgamentu tabata corecto pasobra e por examiná curason. (Proverbio 17:⁠3) Ancianonan humano no por haci esei. Pues con ancianonan por dicerní si un picá serio ta mas un evidencia di debilidad cu di maldad?

En realidad, tur picá ta malu, pero no tur pecador ta malbado. E mésun picánan por ta evidencia di debilidad cerca un persona i di maldad cerca un otro. En berdad, pecamentu generalmente ta enbolbé un midí di tantu debilidad como maldad di parti dje pecador. Un factor determinante ta con e pecador ta mira loke el a haci i kico e tin intencion di haci tocante dje. E ta mustra un spiritu di repentimentu? Ancianonan mester di dicernimentu pa percibí esaki. Con nan por haña tal dicernimentu? Apostel Pablo a primintí Timoteo: “Pensa constantemente riba loke mi ta bisando; e Señor realmente lo duná bo dicernimentu den tur cos.” (2 Timoteo 2:⁠7) Si ancianonan humildemente ta “pensa constantemente” riba e palabranan inspirá di Pablo i dje otro escritornan di Bijbel, nan lo haña e dicernimentu necesario pa mira apropiadamente esnan cu ta peca den e congregacion. Anto, nan decisionnan lo reflehá Jehova su pensamentu, no di nan mes.​—⁠Proverbio 11:2; Mateo 18:18.

Con esaki ta ser hací? Un manera ta pa examiná con Bijbel ta describí hende malbado i mira si e descripcion ta aplicá n’e individuo cu kende ta ser tratá.

Cargando Responsabilidad i Repentí

E promé sernan humano cu a scoge un curso di maldad tabata Adam i Eva. Apesar cu nan tabata perfecto i tabatin pleno conocimentu di Jehova su ley, nan a rebelá contra soberania divino. Ora Jehova a confrontá nan cu loke nan a haci, nan reaccionnan tabata digno pa tuma nota di dje​—⁠Adam a culpa Eva, i Eva a culpa e colebra! (Génesis 3:​12, 13) Compará esaki cu e humildad profundo di David. Ora el a ser enfrentá cu su picánan grave, el a aceptá responsabilidad i a roga pa pordon, bisando: “Mi a peca contra Jehova.”​—⁠2 Samuel 12:13; Salmo 51:​4, 9, 10.

Ancianonan ta haci bon pa considerá e dos ehempelnan aki ora di trata casonan di picá serio, specialmente di parti di un adulto. E pecador ta aceptá francamente​—⁠mescos cu David ora el a ser convencí di su picá​—⁠e culpa i cu repentimentu a acudí na Jehova pa yudansa i pordon, of e ta purba minimisá loke el a haci, talbes culpando un otro hende? Ta cierto cu e persona cu ta peca lo kier splica kico a hiba na su echonan, i kisas tin circunstancianan, sea di pasado of actual, cu ancianonan lo mester considerá ora di dicidí con pa yud’é. (Compará cu Oséas 4:14.) Pero e mester aceptá cu e ta esun cu a peca i cu e ta responsabel dilanti Jehova. Corda: “Jehova ta cerca di esnan cu ta kibrá di curason; i esnan cu ta aplastá di spiritu e ta salba.”​—⁠Salmo 34:18.

Practicando Loke Ta Malu

Den e buki di Salmo, tin hopi referencia na hende malbado. Textonan asina por yuda ancianonan mas ainda pa dicerní si un persona ta básicamente malbado of débil. Por ehempel, considerá e oracion inspirá di Rey David: “No lastrá mi huntu cu hende malbado i cu practicante di loke ta perhudicial, esnan cu ta papiando pas cu nan compañénan pero den kende nan curason tin loke ta malu.” (Salmo 28:⁠3) Ripará cu hende malbado ta ser mencioná huntu cu “practicante di loke ta perhudicial.” Un persona cu ta peca debí na debilidad carnal probablemente lo stop asina cu e bini na su sano huicio. Sin embargo, si un hende ta ‘practicá’ loke ta malu di manera cu esei ta bira un parti di su bida, esaki por ta un evidencia di un curason malbado.

David a mencioná un otro característica di maldad den e versículo ei. Mescos cu Ananías i Safira, e persona malbado ta papia bon cosnan cu su boca pero tin mal cosnan den su curason. E por ta un hipócrita​—⁠mescos cu e fariseonan den tempu di Jesus cu ‘di pafó en berdad a parce hustu na hende pero di paden tabata yen di hipocresia i maldad.’ (Mateo 23:28; Lucas 11:39) Jehova ta odia hipocresia. (Proverbio 6:​16-19) Si un persona hipócritamente ta purba nenga su picánan serio asta ora e ta papia cu e comité hudicial, of ta admití cu mala gana solamente loke ya caba ta conocí pa otronan, nengando di confesá completamente, esaki por ta masha bon evidencia di un curason malbado.

Menosprecio Arogante di Jehova

Otro cosnan cu ta caracterisá un persona malbado ta ser describí den Salmo 10. Ei nos ta lesa: “Den su arogancia e malbado ta sigui fuertemente tras di esun afligí; . . . el a falta respet pa Jehova.” (Salmo 10:​2, 3) Con nos mester mira un cristian dedicá cu ta arogante i ta falta respet pa Jehova? Siguramente, esaki ta un actitud mental malbado. Un persona cu ta peca debí na debilidad, una bes cu e realisá su mes di su picá of otronan trece esei na su atencion, lo repentí i lo lucha duru pa cambia su curso di accion. (2 Corintio 7:​10, 11) Na contraste, si un hende peca debí na un falta fundamental di respet pa Jehova, kico lo strob’é di bolbe atrobe bes tras bes na su curso pecaminoso? Si e ta arogante apesar di a ser consehá den un spiritu di suavedad, con e por tin e humildad necesario pa repentí sinceramente i berdaderamente?

Considerá awor David su palabranan un poco mas aleu den e mésun salmo: “Pa ki motibu e malbado a falta respet pa Dios? El a bisa den su curason: ‘Lo bo no rekerí un rindimentu di cuenta.’ ” (Salmo 10:13) Formando parti dje congregacion cristian, e hende malbado sa e diferencia entre bon i malu, pero e no ta duda pa haci malu si e ta pensa cu e por scapa castigu. Tanten cu no tin temor pa ser descubrí, e ta duna rienda liber na su inclinacionnan pecaminoso. Distinto for di David, si su picánan sali na cla, lo e inventá algu pa evitá disiplina. Un hende asina tin gran falta di respet pa Jehova. “No tin miedu di Dios dilanti su bista. . . . Loke ta malu e no ta rechasá.”​—⁠Salmo 36:1, 4.

Perhudicando Otronan

Generalmente, mas cu un persona ta ser afectá dor di un picá. Por ehempel, un adúltero ta peca contra Dios; su esposa i yunan ta bira víctima; si e hende cu e ta cometé adulterio cuné ta casá, e hende su famia ta bira víctima; i e ta mancha e bon nomber dje congregacion. Con e ta mira tur esei? E ta demostrá un duele sincero huntu cu repentimentu genuino? Of e ta manifestá e spiritu describí den Salmo 94: “Tur e practicantenan di loke ta perhudicial ta sigui broma tocante nan mes. Bo pueblo, O Jehova, nan ta sigui aplastá, i bo herencia nan ta sigui afligí. E biuda i e residente stranhero nan ta mata, i e huérfanonan di tata nan ta asesiná. I nan ta sigui bisa: ‘Jah no ta mira; i e Dios di Jacob no ta comprend’é’ ”?​—⁠Salmo 94:​4-7.

Probablemente, e picánan cu ta ser tratá den un congregacion no ta enbolbé asesinato i matamentu. Sin embargo, e spiritu manifestá aki​—⁠e spiritu di ta cla pa perhudicá otronan pa beneficio personal​—⁠por bira bisto segun cu e ancianonan ta investigá malecho. Esaki tambe ta arogancia, e marca di un hende malbado. (Proverbio 21:⁠4) E ta totalmente contrario cu e spiritu di un cristian berdadero, kende ta dispuesto pa sacrificá su mes pa su ruman.​—⁠Juan 15:​12, 13.

Aplicando Principionan Piadoso

E par di instruccionnan aki no ta intencioná pa pone regla. Sin embargo, nan tá duna un idea di algun cos cu Jehova ta mira como realmente malu. Tin un nengamentu pa aceptá responsabilidad p’e malecho cu a ser cometí? Esun cu a peca a yega di ignorá conseho duná anteriormente riba e mésun asuntu aki di un manera sin bergwensa? Tin un practicamentu regular di malecho serio? E malechor ta manifestá un menosprecio flagrante pa Jehova su ley? El a haci esfuerso deliberá pa sconde e malecho, talbes corumpiendo otronan n’e mésun tempu? (Hudas 4) E esfuersonan ei solamente ta intensificá ora e malecho sali na cla? E malechor ta demostrá un indiferencia total p’e daño cu el a ocasioná na otronan i n’e nomber di Jehova? Kico di su actitud? Despues cu conseho bíblico a ser duná bondadosamente, e ta altanero of arogante? E ta falta un deseo sincero pa evitá di ripití e malecho? Si e ancianonan percibí cosnan asina, cuanan ta indicá fuertemente un falta di repentimentu, nan por concluí cu e picánan cometí ta duna evidencia di maldad mas bien cu simplemente debilidad di carni.

Asta ora di trata cu un persona cu ta parce di tin mal inclinacionnan, ancianonan no mester stop di spiert’é p’e sigui tras di husticia. (Hebreo 3:12) Individuonan malbado lo por repentí i cambia. Si esei no tabata e caso, pakico Jehova a urgi e israelitanan: “Laga e malbado bandoná su caminda, i e hende perhudicial su pensamentunan; i lagu’e bolbe na Jehova, kende lo tin misericordia di dje, i na nos Dios, pasobra lo e pordoná den un gran manera”? (Isaías 55:⁠7) Talbes, durante un audiencia hudicial, e ancianonan lo percibí un cambio notabel den su condicion di curason segun cu esei ta ser reflehá den un comportacion i actitud repentí.

Asta ora di expulsá un individuo, e ancianonan, como wardadornan lo inst’é p’e repentí i purba bini bek den e fabor di Jehova. Corda e “malbado” den Corintio. Evidentemente el a cambia su manera, i Pablo mas despues a recomendá p’e ser restorá. (2 Corintio 2:​7, 8) Considerá tambe Rey Manases. En berdad e tabata masha malbado, pero ora e finalmente a repentí, Jehova a aceptá su repentimentu.​—⁠2 Rey 21:​10-16; 2 Crónica 33:​9, 13, 19.

Ta cierto cu tin un picá cu lo no ser pordoná​—⁠picá contra e spiritu santu. (Hebreo 10:​26, 27) Jehova so ta determiná ken a cometé e picá ei. Sernan humano no tin autoridad pa haci esei. E responsabilidad dje ancianonan ta pa tene e congregacion limpi i pa yuda restorá pecadornan repentí. Si nan haci esei cu dicernimentu i humildad, lagando nan decisionnan reflehá Jehova su sabiduria, e ora ei Jehova lo bendicioná e aspecto aki di nan pastoreamentu.

[Notanan]

[Plachi na página 29]

Ananías i Safira hipócritamente a trata e spiritu santu cu engaño, mustrando maldad di curason