El A Aceptá Instruccion Divino
SUPONE cu bo a haña e encargo pa cuida un yu perfecto i cu a ser sperá di bo pa cri’é apropiadamente. Ki un desafio! Con cualkier ser humano imperfecto por a haci esei? Solamente dor di aceptá instruccion divino i aplik’é den bida diario.
Esei ta net loke José, e tata di criansa di Jesus, a haci. Na contraste cu e siñansa apócrifo detayá tocante José, Bijbel ta bisa masha poco tocante su papel humilde den e promé añanan di Jesus su bida. Nos sa cu José i su esposa, Maria, a cria Jesus, cuater otro yu homber i tambe yu muhernan.—Marco 6:3.
José tabata un desendiente di Rey David di Israel atrabes dje liña di Sálomon. E tabata yu di Jacob i suegro di Heli. (Mateo 1:16; Lucas 3:23) Como carpinté den e stad di Názaret den Galilea, José tabatin poco recurso financiero. (Mateo 13:55; Lucas 2:4, 24; compará cu Levítico 12:8.) Pero e tabata ricu spiritualmente. (Proverbio 10:22) Esaki siguramente tabata e caso pasobra el a aceptá instruccion divino.
Sin duda, José tabata un hudiu mansu i humilde kende tabatin fe den Dios i a deseá na haci loke tabata corecto. E poco incidentenan di su bida registrá den e Scritura ta mustra cu e semper tabata obediente n’e mandamentunan di Jehova. Esaki tabata asina sea cu nan tabata hañá den e Ley of cu José a ricibí nan directamente mediante angel.
Un Homber Hustu Cu Problema
Kico un persona piadoso mester haci ora e ser confrontá cu un problema serio? Wel, e mester ‘tira su carga riba Jehova’ i sigui instruccion divino! (Salmo 55:22) Esei ta net loke José a haci. Miéntras e tabata comprometí cu Maria, “[Maria] a resultá di ta na estado dor di spiritu santu promé cu nan a uni.” Dor cu José ‘tabata hustu i no kier a haci un espectáculo público di dje, e tabatin intencion di divorci’é secretamente.’ Despues cu José a pensa riba e asuntu, e angel di Jehova a aparecé na dje den un soño i a bisa: “José, yu di David, no tene miedu di hiba Maria bo esposa cas, pasobra loke a ser engendrá den dje ta pa medio di spiritu santu. Lo e duna lus na un yu, i bo mester yam’é Jesus, pasobra lo e salba su pueblo di nan picánan.” Ora José a spierta, el “a haci manera e angel di Jehova a instruy’é, i el a hiba su esposa cas. Pero e no tabatin relacion cuné te ora el a duna lus na un yu homber; i el a yam’é Jesus.” (Mateo 1:18-25) José a aceptá instruccion divino.
César Augusto a decretá p’e pueblo registrá nan mes den nan propio stad. Den obedencia, José i Maria a bai Betlehem den Hudea. Ei Maria a duna lus na Jesus i tabatin cu pon’e den un pesebre pasobra no tabatin otro acomodacion disponibel. E anochi ei wardadornan cu a tende un anuncio angelical dje nacementu special aki a bini pa mira e criatura. Rond di 40 dia despues, José i Maria a cumpli cu e Ley presentando Jesus n’e tempel den Jerusalem huntu cu un ofrenda. Nan tur dos a keda asombrá segun cu nan a tende Simeon di edad avansá su palabranan profético tocante e cosnan grandi cu Jesus lo haci.—Lucas 2:1-33; compará cu Levítico 12:2-4, 6-8.
Aunke Lucas 2:39 por parce di indicá cu José i Maria a bai Názaret djis despues cu nan a presentá Jesus n’e tempel, e texto aki ta parti di un relato abreviá. Ta parce cu ta basta tempu despues dje presentacion n’e tempel, astrólogonan oriental (magonan) a bishitá Maria i Jesus den un cas na Betlehem. Intervencion divino a prevení p’e bishita aki causa morto di Jesus. Despues cu e magonan a bai, Jehova su angel a aparecé na José den un soño i a bis’é: “Herodes ta cla pa busca e mucha chikitu pa destruy’é.” Manera tabata su custumber, José a obedecé instruccion divino i a hiba su famia Egipto.—Mateo 2:1-14.
Ora Herodes a muri, un angel a aparecé na José na Egipto den un soño, bisando: “Lanta ariba, tuma e mucha chikitu i su mama i coge bo caminda p’e tera di Israel.” Tendiendo cu Arkelao, yu di Herodes, tabata reinando na lugá di su tata, José tabatin miedu di regresá Hudea. Obedeciendo spiertamentu divino duná den un soño, el a bai den e teritorio di Galilea i a establecé su mes den e stad di Nazaret.—Mateo 2:15-23.
Un Homber Spiritual
José a percurá pa su famia obedecé ley divino i ser alimentá spiritualmente. Cada aña el a hiba henter su famia cuné n’e celebracion di Pascu na Jerusalem. Na un dje ocasionnan aki, José i Maria tabata regresando Názaret i a cubri e distancia di un dia for di Jerusalem ora nan a descubrí cu Jesus di 12 aña di edad no tabata cu nan. Bayendo bek pa Jerusalem, nan a busca diligentemente i finalmente a hañ’é n’e tempel, scuchando i puntrando e maestronan einan.—Lucas 2:41-50.
Ta parce cu José a laga su esposa tuma e iniciativa den algun cos. Por ehempel, ora nan a regresá Jerusalem i a haña Jesus den e tempel, tabata Maria kende a papia cu su yu hóben tocante e asuntu. (Lucas 2:48, 49) Miéntras e tabata creciendo como “yu dje carpinté,” Jesus a ricibí instruccion spiritual. Tambe José a siñ’é e trabou di carpinté, pasobra Jesus a ser yamá “e carpinté yu di Maria.” (Mateo 13:55; Marco 6:3) Mayornan piadoso awe mester saca pleno probecho di oportunidadnan similar pa instruí nan yunan, specialmente dunando nan entrenamentu spiritual.—Efesio 6:4; 2 Timoteo 1:5; 3:14-16.
José Su Prospectonan
E Scritura no ta duna informacion tocante e morto di José. Pero ta notabel cu Marco 6:3 a yama Jesus “yu di Maria,” no José. Esaki ta indicá cu José tabata morto p’e tempu ei. Ademas, si José a biba te 33 E.C., no ta probabel cu Jesus clabá na staca lo a encargá apostel Juan cu e cuido di Maria.—Juan 19:26, 27.
José, anto, lo ta entre e mortonan cu lo tende e bos dje Yu di hende i sali den un resureccion. (Juan 5:28, 29) Siñando di Jehova su provision pa bida eterno, indudablemente José gustosamente lo haci uso di dje i lo ta un súbdito obediente dje gran Rey celestial, Jesucristo, mescos cu el a obedecé instruccion divino mas cu 1.900 aña pasá.
[Plachi na página 31]
José a duna Jesus instruccion spiritual i tambe a siñ’é e trabou di carpinté