Dedica​—Na Ken?

“Tur loke Jehova a papia nos ta dispuesto pa haci i ser obediente.”​—EXODO 24:7.

1, 2. (a) Na kico algun hende ta deboto? (b) Dedicacion ta limitá na solamente esnan cu afiliacion religioso?

NA FEBRUARI 1945, e pilotonan dje avion militar ‘Zero-fighter’ di Hapon su Forsa Aéreo Yatabe a ser reuní den un sala. Cada un a haña un pida papel pa skirbi ariba si e lo kier a ofrecé su mes como miembro dje forsa di atake [suicidio] ‘kamikaze.’ “Mi a pensa cu tabata mi yamamentu pa sacrificá mi mes den un tempu di crísis nacional,” un oficial kende tabata presente n’e tempu ei a bisa. “Emocionalmente obligá pa haci mi mes disponibel, mi a ofrecé mi mes p’e comision.” El a ser entrená pa operá i piloteá un Ohka (un avion cohete di suicidio) i pa dal cuné den un barcu di guera enemigu. Sin embargo, e guera a caba promé cu el a haña un oportunidad pa haci esei i asina muri pa su pais i su emperador. Ora Hapon a perde e guera, su fe den e emperador a ser desbaratá.

² Un tempu, hopi hende na Hapon tabata deboto n’e emperador, kende segun nan tabata un dios bibiente. Den otro paisnan, tabatin i te ainda tin otro obhetonan di debocion. Miyones di hende ta deboto na Maria, Buda of otro divinidadnan​—⁠hopi biaha representá pa ídolonan. Influenciá dor di papiamentu elocuente i sensacional, algun ta basha nan placa cu nan a traha duru p’e den sacu di tele-evangelistanan como apoyo di henter alma, algu cu ta ekivalente na debocion. Despues dje guera, haponesnan decepcioná a busca un obheto nobo na cua nan por a dedicá nan bida. Pa algun, empleo a bira e obheto ei. Sea den Oriente of Occidente, hopi hende ta dedicá nan bida n’e acumulacion di rikesa. Hóbennan ta haci cierto músiconan e enfoke of obheto central di nan bida, kende nan estilo di bida nan ta imitá. Un gran cantidad di hende awe a bira adorador di nan mes, haciendo nan propio deseonan e obheto di nan debocion. (Filipensenan 3:19; 2 Timoteo 3:⁠2) Pero cosnan of hende asina realmente ta bal e debocion di henter alma di un persona?

3. Con algun obheto di debocion a resultá di ta sin balor?

³ Ora nan haña nan enfrentá cu e realidad, adoradornan di ídolo hopi biaha ta bira desilusioná. Debocion na ídolonan ta resultá den frustracion ora e adoradornan realisá cu nan ídolonan no ta mas cu “e obra di man di hende terenal.” (Salmo 115:⁠4) Ora escándalonan cu ta enbolbé evangelistanan prominente ta ser desenmascará, hende sincero ta sinti nan desapuntá. Ora e economia “frágil” a cai den otro, trahadornan a experenciá trastorno mental segun cu nan a haña nan nomber riba e lista di esnan cu lo ser kitá for di trabou. Recesionnan recien a causa un golpi severo na adoradornan di Mamon. Debenan hací cu e speransa di gana bastante placa a bira un carga cu tiki posibilidad di por paga e debe bek. (Mateo 6:​24, nota) Ora streanan di rock i otro artistanan cu hende tin como ídolo muri of gradualmente perde popularidad, nan adoradornan ta ser lagá bandoná. I esnan cu a sigui un moda di biba di satisfaccion propio hopi biaha ta cosechá fruta marga.​—⁠Galationan 6:⁠7.

4. Kico ta impulsá hende pa dedicá nan bida na cosnan sin balor?

⁴ Kico ta impulsá hende pa dedicá nan mes na tal banidad? Principalmente, esei ta e spiritu dje mundu bou di Satanas e Diabel. (Efesionan 2:​2, 3) E influencia dje spiritu aki ta ser mirá den vários manera. Un individuo kisas ta ser controlá dor di tradicion di famia cu a ser transmití for di su antepasadonan. Educacion i criansa por influenciá moda di pensa fuertemente. E atmósfera dje lugá di empleo por pone trahadornan competitivo di empresa bira adicto na trabou, algu cu por menasá nan bida. Un deseo pa mas ta ser engendrá dor dje actitud materialista dje mundu. Curason di hopi hende ta ser corumpí, impulsando nan pa dedicá nan mes na nan propio deseonan egoista. Nan no ta examiná si e empeñonan aki merecé tal debocion.

Un Nacion Dedicá

5. Ki dedicacion na Jehova a ser hací mas cu 3.500 aña pasá?

⁵ Mas cu 3.500 aña pasá, un nacion di hende a haña un obheto di debocion di muchu mas balor. Nan a dedicá nan mes n’e Dios soberano, Jehova. Como grupo, e nacion di Israel a declará su dedicacion na Dios den e desierto di Sínai.

6. Kico e nificacion dje nomber di Dios mester a bira p’e israelitanan?

⁶ Kico a impulsá e israelitanan pa actua den e manera aki? Ora nan tabata den sclabitud na Egipto, Jehova a comisioná Moises pa guia nan na libertad. Moises a puntra con e mester a identificá e Dios cu a mand’é, i Dios a revelá su mes como “lo mi resultá di ta loke lo mi resultá di ta.” El a instruí Moises pa bisa n’e yunan di Israel: “Lo mi resultá di ta a mandá mi cerca boso.” (Exodo 3:​13, 14) E expresion aki a indicá cu Jehova ta bira tur loke ta necesario afin di cumpli cu su propósitonan. Lo el a revelá su mes como e Cumplidor di promesa den un manera cu e antepasadonan dje israelitanan nunca a conocé.​—⁠Exodo 6:​2, 3.

7, 8. Ki evidencianan israelita tabatin cu Jehova tabata un Dios digno di nan debocion?

⁷ E israelitanan tabata testigo dje afliccion dje tera di Egipto i su pueblo dor dje Dies Plaganan. (Salmo 78:​44-51) E ora ei, posiblemente mas cu tres miyon di nan, incluyendo hende muher i mucha, sin tarda a bai i a sali for dje tera di Gosen den un solo anochi, locual riba su mes tabata un hazaña remarcabel. (Exodo 12:​37, 38) Despues, na Laman Corá, Jehova a revelá su mes como “un persona baronil di guera” ora el a salba su pueblo for dje forsanan militar di Fárao dor di dividí e laman pa laga e israelitanan pasa i despues cer’é pa hoga e egipcionan cu a persiguí nan. Como resultado, “Israel tambe a yega na mira e gran man cu Jehova a pone na accion contra e egipcionan; i e pueblo a cuminsá teme Jehova i pone fe den Jehova.”​—⁠Exodo 14:31; 15:3; Salmo 136:​10-15.

⁸ Como si ainda nan tabata falta evidencia di loke e nomber di Dios ta nificá, e israelitanan a murmurá contra Jehova i su representante Moises tocante scarcedad di cuminda i awa. Jehova a manda sloke [patrishi], a laga mana cai fo’i cielu i a haci awa brota na abundancia for di un baranca na Mériba. (Exodo 16:​2-5, 12-15, 31; 17:​2-7) Tambe Jehova a rescatá e israelitanan for dje atake dje amalekitanan. (Exodo 17:​8-13) Di ningun manera e israelitanan por a nenga loke Jehova a declará despues na Moises: “Jehova, Jehova, un Dios misericordioso i yen di gracia, tardá pa rabia i abundante den bondad amoroso i berdad, preservando bondad amoroso pa miles, pordonando eror i falta i picá.” (Exodo 34:​6, 7) En berdad, Jehova a proba di ta un obheto digno di nan debocion.

9. Pakico Jehova a duna e israelitanan e oportunidad pa expresá nan dedicacion pa sirbi’é, i con nan a reaccioná?

⁹ Aunke Jehova tabatin e derecho di poseé e israelitanan debí cu el a cumpra nan bek for di Egipto, e, como e Dios bondadoso i misericordioso, a duna nan e oportunidad pa nan boluntariamente expresá nan deseo di sirbi’é. (Deuteronomio 7:​7, 8; 30:​15-20) Tambe el a describí e condicionnan pa e pacto entre e i e israelitanan. (Exodo 19:​3-8; 20:​1–23:33) Ora e condicionnan aki a ser relatá dor di Moises, e israelitanan a declará: “Tur loke Jehova a papia nos ta dispuesto pa haci i ser obediente.” (Exodo 24:​3-7) Di nan propio boluntad liber, nan a bira un nacion dedicá n’e Señor Soberano Jehova.

Aprecio Ta Hiba na Dedicacion

10. Riba kico nos dedicacion na Jehova mester ta basá?

¹⁰ Jehova, e Creador, ta sigui ser digno di nos debocion di henter alma. (Malakías 3:6; Mateo 22:37; Revelacion 4:11) Sin embargo, nos dedicacion no mester ta basá riba credulidad, emocionnan pasahero of forsá dor di otronan​—⁠ni sikiera mayornan. E mester ta basá riba un conocimentu exacto dje berdad tocante Jehova i un aprecio pa loke Jehova a haci pa nos. (Romanonan 10:2; Colosensenan 1:​9, 10; 1 Timoteo 2:⁠4) Mescos cu Jehova a duna e israelitanan e oportunidad pa nan boluntariamente expresá nan dedicacion, asina e ta duna nos un chens pa nos boluntariamente dedicá nos mes i haci e dedicacion ei público.​—⁠1 Pedro 3:⁠21.

11. Kico nos studio di Bijbel a revelá tocante Jehova?

¹¹ Mediante un studio di Bijbel, nos a yega na conocé Dios como persona. Su Palabra ta yuda nos dicerní su cualidadnan manera nan ta ser reflehá den e creacion. (Salmo 19:​1-4) Nos por mira for di su Palabra cu e no ta un Trinidad misterioso cu hende no por comprendé. E no ta sufri derota den guera i pues no tin nodi renunciá su Divinidad. (Exodo 15:11; 1 Corintionan 8:​5, 6; Revelacion 11:​17, 18) Debí cu el a cumpli cu su promesanan, nos ta ser recordá di loke su nomber excelente, Jehova, ta representá. E ta Esun Magnífico Cu Ta Proponé. (Génesis 2:​4, nota; Salmo 83:18; Isaías 46:​9-11) Dor di studia Bijbel, nos ta yega na comprendé claramente con fiel i digno di confiansa e ta.​—⁠Deuteronomio 7:9; Salmo 19:​7, 9; 111:⁠7.

12. (a) Kico ta atraé nos na Jehova? (b) Con experencianan di bida real registrá den Bijbel ta impulsá un persona pa deseá di sirbi Jehova? (c) Con abo ta sinti tocante sirbi Jehova?

¹² Loke specialmente ta atraé nos na Jehova ta su personalidad amoroso. Bijbel ta demostrá con amoroso, pordonador i misericordioso e ta den su trato cu sernan humano. Pensa riba con el a bendicioná Job despues cu Job a warda su integridad fielmente. Job su experencia ta resaltá cu “Jehova ta masha tierno den cariño i misericordioso.” (Santiago 5:11; Job 42:​12-17) Pensa riba con Jehova a trata cu David ora el a cometé adulterio i homicidio. Sí, Jehova ta cla pa pordoná asta picánan serio ora e pecador acerk’é cu “un curason kibrá i aplastá.” (Salmo 51:​3-11, 17) Pensa dje manera cu Jehova a trata cu Saulo di Tarso, kende na principio tabata un persiguidor dicididu dje pueblo di Dios. E ehempelnan aki ta resaltá Dios su misericordia i boluntad generoso pa usa esnan repentí. (1 Corintionan 15:9; 1 Timoteo 1:​15, 16) Pablo a sinti cu e por a risca asta su bida mes pa sirbi e Dios amoroso aki. (Romanonan 14:⁠8) Abo ta sinti mescos?

13. Cua gran expresion di amor di parti di Jehova ta obligá esnan di curason recto pa dedicá nan mes na dje?

¹³ P’e israelitanan, Jehova a percurá salbacion for di sclabitud na Egipto, i el a prepará un medio pa salba nos for di sclabitud na picá i morto​—⁠e sacrificio di rescate di Jesucristo. (Juan 3:16) Pablo ta bisa: “Dios ta recomendá su propio amor na nos den e echo cu, miéntras cu nos tabata pecador ainda, Cristo a muri pa nos.” (Romanonan 5:⁠8) E areglo amoroso aki ta obligá esnan di curason recto pa dedicá nan mes na Jehova mediante Jesucristo. “Pasobra e amor cu Cristo tin ta obligá nos, pasobra esaki ta loke nos a husga, cu un homber a muri pa tur; asina, anto, tur a muri; i el a muri pa tur esnan cu ta biba no biba mas pa nan mes, sino pa esun cu a muri pa nan i a ser lantá.”​—⁠2 Corintionan 5:​14, 15; Romanonan 8: 35-39.

14. Conocimentu so di Jehova su trato ta suficiente pa impulsá nos pa dedicá nos bida na dje? Splica.

¹⁴ Tog, teniendo conocimentu di Jehova su personalidad i su trato cu humanidad no ta suficiente. Nos tin cu cultivá aprecio personal pa Jehova. Con nos por haci esei? Dor di aplicá e Palabra di Dios den nos bida i mira pa nos mes cu e principionan hañá den dje ta berdaderamente probechoso. (Isaías 48:17) Nos mester sinti cu Jehova a salba nos for dje lodo dje mundu malbado aki bou di mando di Satanas. (Compará cu 1 Corintionan 6:11.) Den nos lucha pa haci loke ta corecto, nos ta siña dependé riba Jehova, i nos ta experenciá pa nos mes cu Jehova ta e Dios bibu, e “Tendedor di oracion.” (Salmo 62:8; 65:⁠2) Den poco tempu nos ta sinti nos hopi yegá na dje i ta capas pa confia nos sintimentunan di mas profundo na dje. E sintimentu caluroso di amor pa Jehova ta crece den nos. Esaki sin duda lo hiba nos na dedicá nos bida na dje.

15. Kico a motivá un homber, anteriormente dedicá na trabou, pa sirbi Jehova?

¹⁵ Hopi persona a yega na conocé Jehova, e Dios amoroso aki, i a dedicá nan bida na sirbi’é. Tuma por ehempel un electrishen kende tabatin un negoshi floreciente. Tabatin tempu cu e tabata cuminsá traha mainta i sigui traha henter dia stret te anochi, yegando cas cinc’or di mardugá e siguiente mainta. Despues di sosegá pa rond di un ora, e tabata sali bai n’e siguiente trabou. “Mi tabata dedicá na mi trabou,” e ta corda. Ora su esposa a cuminsá studia Bijbel, el a uni cuné. E ta bisa: “Tur e diosnan cu mi a conocé te cu e tempu ei tabata djis warda pa ser sirbí, sin haci nada pa beneficiá nos. Pero Jehova a tuma e iniciativa i a manda su Yu unigénito na tera como un gran sacrificio personal.” (1 Juan 4:​10, 19) Dentro di dies luna, e homber aki tabata dedicá na Jehova. Despues di esei, el a concentrá riba sirbi e Dios bibu. El a cuminsá e ministerio di tempu completo i a muda pa sirbi caminda e necesidad tabata mas grandi. E, mescos cu e apostelnan, ‘a bandoná tur cos i a sigui Jesus.’ (Mateo 19:27) Despues di dos luna, e i su esposa a ser invitá pa sirbi n’e sucursal di Watch Tower Bible and Tract Society den e pais caminda nan tabata biba, di manera cu e por a yuda cu trabounan di electricidad. Pa mas cu 20 aña, e ta trahando n’e sucursal, haciendo e trabou cu e ta stima​—⁠no pa su mes sino pa Jehova.

Haci Bo Dedicacion Público

16. Cua ta algun paso cu un persona lo tuma den hacimentu di un dedicacion na Jehova?

¹⁶ Despues di studia Bijbel pa un tempu, tantu hóben como bieu lo yega na apreciá Jehova i loke el a haci pa nan. Esaki mester impulsá nan pa dedicá nan na Dios. Abo por ta un di esakinan. Con bo por dedicá bo mes na Jehova? Despues di gana conocimentu exacto for di Bijbel, bo mester actua riba e conocimentu ei i ehercé fe den Jehova i Jesucristo. (Juan 17:⁠3) Repentí i bira lomba pa cualkier curso pecaminoso di pasado. (Echonan 3:19) E ora ei lo bo yega n’e paso di dedicacion, expresando esei den palabranan solem di oracion na Jehova. E oracion aki sin duda lo laga un impresion duradero riba bo mente, pasobra lo e ta e cuminsamentu di un relacion nobo cu Jehova.

17. (a) Pakico e ancianonan ta repasá preguntanan prepará cu esnan recien dedicá? (b) Ki paso importante un persona mester dal pronto despues di su dedicacion, i cu ki propósito?

¹⁷ Mescos cu Moises a splica e israelitanan e condicionnan pa drenta un relacion di pacto cu Jehova, ancianonan den e congregacionnan di Testigonan di Jehova ta yuda esnan cu recientemente a haci un dedicacion pa examiná exactamente loke esei ta enbolbé. Nan ta usa preguntanan prepará pa confirmá cu cada persona ta comprendé completamente e siñansanan básico di Bijbel i ta conciente di loke ta encerá ser un Testigo di Jehova. Despues, un ceremonia pa haci e dedicacion público ta masha apropiado. Naturalmente, e persona recien dedicá ta ansioso pa laga otronan sa cu el a drenta den e relacion privilegiá aki cu Jehova. (Compará cu Jeremías 9:24.) Esaki ta ser hací apropiadamente dor di un bautismo bou di awa como símbolo di dedicacion. Siendo mandá bou di awa i despues hisá ariba ta simbolisá cu e ta renunciá su curso di bida egoista di ántes i cu e ta ser hisá na un moda nobo di biba, esun di haci e boluntad di Dios. Esei no ta un sacramento, tampoco e ta un ritual manera e rito di Shinto di misogi den cua un persona supuestamente mester ser limpiá dor di awa.a Mas bien, bautismo ta e declaracion público di un dedicacion cu ya a ser hací den oracion.

18. Pakico nos por tin sigur cu nos dedicacion lo no ta en bano?

¹⁸ E ocasion solem aki ta un experencia inolvidabel, recordando e sirbidor nobo di Dios dje relacion duradero cu e tin awor cu Jehova. Diferente for dje dedicacion cu e piloto ‘kamikaze’ a haci na su pais i emperador, e dedicacion aki na Jehova lo no ta en bano, pasobra e ta e eterno Dios todopoderoso kende ta cumpli cu tur loke el a proponé pa haci. E, i e so, ta digno di nos debocion di henter alma.​—⁠Isaías 55:​9-11.

19. Kico lo ser considerá den e siguiente artículo?

¹⁹ Sin embargo, mas ta enbolbí den dedicacion. Por ehempel, con dedicacion ta afectá nos bida diario? Esaki lo ser considerá den e siguiente artículo.

[Notanan]

Bo Ta Corda?

◻ Pakico dedicacion manera e ta sosodé den e mundu ta caba den decepcion?

◻ Kico a impulsá e israelitanan pa dedicá nan mes na Jehova?

◻ Kico ta impulsá nos pa dedicá nos mes na Jehova awe?

◻ Con nos ta dedicá nos mes na Dios?

◻ Kico ta e nificacion di bautismo bou di awa?

[Plachi na página 10]

Israel na Sínai ta dedicá su mes na Jehova