Lo Bo Alabá Jehova?

“MESCOS cu bo nomber, O Dios, asina bo alabansa ta te n’e fronteranan dje tera.” Esakinan ta palabranan for di un cantica profético dje yunan di Core. (Salmo 48:10) Awe, un coro poderoso di miyones di Testigo di Jehova ta alabando Dios i ta haciendo su nomber conocí dor di predicá e bon nobo di su Reino. Haciendo esaki den 232 tera i isla di laman i na mas cu 300 idioma, nan ta alcansando literalmente “e fronteranan dje tera.”

Kico ta loke ta impulsá hende di diferente antecedencia cultural, social i lingwístico pa alabá Jehova? Nan gratitud pa un conocimentu exacto dje Palabra di Dios, e Bijbel, ta un motibu principal. Berdad spiritual a libra nan for di supersticion i for di creencia religioso esclabisador manera tormento eterno. (Juan 8:32) E berdad tambe ta yuda nan apreciá e cualidadnan maraviyoso di Dios, manera su amor, poder, sabiduria i husticia cu ta ser templá cu misericordia. Yegando na un comprendimentu di con Dios a ofrecé su Yu unigénito, Jesucristo, como un sacrificio di rescate pa humanidad ta motivá hende recto pa alabá i sirbi Jehova.

Segun e buki bíblico di Revelacion, un coro celestial ta sclama: “Bo ta digno, Jehova, asta nos Dios, pa ricibí gloria i onor i poder, pasobra bo a crea tur cos, i pa causa di bo boluntad nan a existí i a ser creá.” (Revelacion 4:11) Tal alabansa no ta resultá for di un simpel sintimentu di obligacion. Mas bien, e ta brota for di reverencia pa Jehova.

Alabando Dios dor di Declará e Bon Nobo

Alabando Jehova, un persona ta imitando e ehempel estupendo di Jesucristo, e alabador principal di Dios. Siguiendo den e pasonan di Jesus ta incluí participá den e trabou di predicá e bon nobo dje Reino di Dios. (Mateo 4:17, 23; 24:14) E actividad di predicá aki a bira e esfuerso mundial di mas grandi pa alabá Jehova.

E trabou di predicacion aki ta asina importante cu Bijbel claramente ta conect’é cu salbacion. Romanonan 10:13-15 ta bisa: “ ‘Tur hende cu ta inbocá e nomber di Jehova lo ser salbá.’ Sin embargo, con nan lo inbocá esun den ken nan no a pone fe? Con, en buelta, nan lo pone fe den esun di ken nan no a tende? Con, en buelta, nan por tende sin ningun hende pa predicá? Con, en buelta, nan por predicá aménos cu nan a ser mandá? Net manera ta pará skirbí: ‘Ki bunita ta e pianan di esnan cu ta declará e bon nobo di bon cosnan!’ ”

Aña pasá so, Testigonan di Jehova a dedicá mas cu un biyon ora n’e trabou di predicacion. I ki bon resultado tabatin for dje alabansa aki di Dios! Rond di 314.000 persona a uni cu e coro di alabadornan simbolisando nan dedicacion na Jehova mediante bautismo bou di awa.

Sin embargo, kico por ser bisá tocante e 12.288.917 personanan cu a asistí n’e Memorial dje morto di Cristo di 1994? Entre nan tabatin mas cu 7.000.000 cu ainda no ta alabadornan di Jehova como predicadornan dje bon nobo. Pero nan presencia n’e ocasion importante aki cu tempu por resultá den aumento dje coro di alabadornan cu miyones di persona mas. Kico por ser hací pa yuda esnan interesá aki bira alabadornan di Jehova?

Yudansa Disponibel

Hopi hende interesá kisas tin e deseo di alabá Jehova pero ta sinti cu nan no por cumpli cu e rekisitonan. Ta bon pa nan corda e palabranan dje salmista: “Lo mi halsa mi wowonan n’e cerunan. Di unda mi yudansa lo bini? Mi yudansa ta bini di Jehova, e Formador di cielu i tera.” (Salmo 121:1, 2) Evidentemente, e salmista a halsa su wowonan n’e cerunan di Jerusalem caminda e tempel di Jehova i e asiento terenal dje gobiernu teocrático tabata situá. For di esaki nos por concluí corectamente cu yudansa necesario pa alabá Dios i declará e mensahe di Reino ta bini solamente for di Jehova i su organisacion.—Salmo 3:4; Daniel 6:10.

Awe, esnan cu ta deseá di alabá Jehova por spera yudansa amoroso for di su organisacion terenal. Por ehempel, Testigonan di Jehova ta ofrecé yudansa conduciendo studio di Bijbel grátis na cas cu hende interesá. E programa educacional aki ta incluí mas cu solamente siña doctrinanan di Bijbel. E ta yuda e studiante desaroyá un aprecio pa loke e ta siñando i p’e organisacion cu Jehova ta usando.

Na armonia cu esaki, e Testigo cu ta conducí e studio di Bijbel ta purba haci sigur pa e berdadnan recien hañá alcansá no solamente e mente sino tambe e curason. I e maestro no mester keda sin mustra e studiante con Jehova ta usando su organisacion pa cumpli cu Su propósito riba tera. E foyeto Testigonan di Jehova ta haci unidamente e boluntad di Dios den tur e mundo i e video Los testigos de Jehová—La organización tras el nombre hopi biaha a resultá di ta útil pa logra esaki.

Reunionnan cristian tambe ta hunga un papel vital den yuda alabadornan prospectivo di Jehova. N’e promé etapanan mes di un studio di Bijbel, e studiante por ser invitá pa asistí na reunionnan cristian. Cu tempu, lo e siña e importancia di asistencia regular na i participacion den tur reunion di congregacion. (Hebreonan 10:24, 25) Superintendentenan por percurá yudansa baliosísimo pa compañénan creyente i alabadornan prospectivo di Jehova dor di prepará reunionnan cu ta spiritualmente edificante i práctico.

Yuda Yunan Alabá Jehova

Yunan ta entre e hopi personanan cu por bira publicadornan dje bon nobo den e futuro cercano. Specialmente tatanan tin e responsabilidad bíblico pa lanta nan yunan “den e disiplina i reglamentu mental di Jehova.” (Efesionan 6:4) Ora nan ser entrená apropiadamente dor di mayornan piadoso, asta yunan hopi yong por desaroyá e deseo di alabá Jehova.

Un mucha muher chikitu na Argentina a acercá e ancianonan di congregacion bes tras bes pa vários luna, pidiendo nan yudansa pa asina e por a cualificá como publicador di Reino. Cu tempu, su mayornan i e ancianonan a bai di acuerdo pa permiti’é bira un publicador no-bautisá. Ya caba e ta presentá e mensahe di Reino eficasmente n’e portanan. Aunke e mucha muher chikitu aki ta solamente cincu aña bieu i no sa lesa, el a memorisá e lugá di algun texto bíblico. Despues cu e haña un texto, e ta pidi e doño di cas les’é, i despues e ta duna un splicacion.

Ta claro cu tantu ancianonan como mayornan por logra hopi beneficio dor di animá i yuda esnan cu ta progresá pa bira alabadornan di Jehova.—Proverbionan 3:27.

Un Relacion Eterno Cu Jehova

Sin embargo, kico si bo mes ta asociando cu Testigonan di Jehova pa algun tempu caba pero ainda no a uni cu nan den nan trabou di predicacion? Kisas ta probechoso pa haci bo mes e siguiente preguntanan, ‘Mi ta kere cu mi a haña e berdad i cu Jehova ta e único Dios berdadero? Mi ta convencí cu e Reino di Dios ta e único solucion pa problemanan di humanidad? Mi a bandoná tur religion falsu i custumber i prácticanan mundano cu ta ofendé Jehova? Mi tin un amor profundo pa Dios i pa su rekisitonan hustu?’ (Salmo 97:10) Si bo onestamente por contestá sí n’e preguntanan aki, kico ta prevení bo di alabá Jehova?—Compará cu Echonan 8:36.

Alabando Jehova ta enbolbé mas cu predicá e bon nobo. Si bo a gana conocimentu exacto, si bo tin berdadero fe i si bo ta armonisando bo bida cu rekisitonan divino, bo tin cu fortalecé bo relacion personal cu Dios. Con? Dor di haci un dedicacion na dje den oracion anto simbolisá esaki mediante bautismo bou di awa. Bida eterno ta den e wega. P’esei, actua awor riba e conseho di Jesus: “Drenta p’e porta smal; pasobra hanchu i spacioso ta e caminda cu ta hiba na destruccion, i hopi ta esnan cu ta drent’é; miéntras cu smal ta e porta i pertá e caminda cu ta hiba na bida, i poco ta esnan cu ta hañ’é.”—Mateo 7:13, 14.

Cu e sistema actual di cosnan yegando su fin catastrófico, esaki no ta tempu pa vacilá. Dal pasonan inmediato pa yega na un relacion eterno cu Jehova. En berdad, awor ta e tempu pa respondé positivamente n’e pregunta, Lo bo alabá Jehova?