Bo Ta Precioso den Bista di Dios!

“Cu un amor te na tempu indefiní mi a stimá bo. P’esei mi a atraé bo cu bondad amoroso.”—JEREMIAS 31:3.

1. Con e actitud di Jesus pa cu e pueblo comun di su dia tabata diferente for di esun dje fariseonan?

NAN por a mira esaki den su wowonan. E homber aki, Jesus, no tabata manera nan lidernan religioso; e tabatin interes den nan. El a sinti duele dje hendenan aki pasobra nan “tabata soyá i plamá manera carné sin wardador.” (Mateo 9:36) Nan lidernan religioso lo mester tabata wardadornan amoroso cu a representá un Dios amoroso i misericordioso. Na lugá di esei, nan a despreciá e pueblo comun como un simpel multitud desordená—i maldicioná!a (Juan 7:47-49; compará cu Ezekiel 34:4.) Claramente, un concepto trocí i no-bíblico asina tabata masha diferente for di Jehova su punto di bista di su pueblo. El a bisa su nacion, Israel: “Cu un amor te na tempu indefiní mi a stimá bo.”—Jeremías 31:3.

2. Con e tres compañénan di Job a purba convenc’é cu e no tabatin balor den bista di Dios?

² Sin embargo, e fariseonan siguramente no tabata e proménan pa purba convencé e carnénan stimá di Jehova cu nan no tabatin balor. Considerá e caso di Job. Pa Jehova e tabata hustu i sin culpa, pero e tres “consoladornan” a insinuá cu Job tabata un apóstata inmoral i malbado kende lo muri sin laga un rastro atras. Nan a declará cu Dios lo no a duna balor na ningun husticia di parti di Job, ya cu Dios no a confia ni su propio angelnan i a considerá cielu mes como impuru!—Job 1:8; 4:18; 15:15, 16; 18:17-19; 22:3.

3. Ki medionan Satanas ta usa awe pa purba convencé hende cu nan ta sin balor i no por ser stimá?

³ Awe, ainda Satanas ta usando e ‘obra mañoso’ aki pa purba convencé hende cu nan no ta ser stimá i cu nan no tin balor. (Efesionan 6:11, nota) Ta cierto cu hopi biaha e ta seducí hende dor di haci un apelacion na nan orguyo. (2 Corintionan 11:3) Pero tambe e tin deleite den aplastá e respet propio di esnan vulnerabel. Esaki ta particularmente e caso den e “último dianan” crítico aki. Awe hopi hende ta lanta den famianan unda no tin “cariño natural”; hopi hende tin cu anda diariamente cu esnan cu ta feros, egoista i terco. (2 Timoteo 3:1-5) Añanan di maltrato, racismo, odio of abusu por a convencé e personanan ei cu nan no tin balor i no por ser stimá. Un homber a skirbi: “Mi no ta sinti stimacion pa ningun hende ni mi no ta sinti cu ningun hende ta stimá mi. Mi ta haña ta masha difícil pa kere cu Dios ta interesá mes den mi.”

4, 5. (a) Pakico e idea di indignidad personal ta contrario cu e Scritura? (b) Kico ta un consecuencia peligroso di nos kerementu cu ningun di nos esfuersonan no ta bal nada?

⁴ E idea di indignidad personal ta penetrá yega te n’e curason dje berdad dje Palabra di Dios, e siñansa dje rescate. (Juan 3:16) Si Dios lo paga un prijs asina haltu—e bida precioso di su propio Yu—pa cumpra pa nos un oportunidad di biba pa semper, E siguramente mester ta stima nos; nos siguramente mester ta bal algu den Su bista!

⁵ Ademas, ki desanimador lo ta pa sinti cu Dios tin disgusto den nos, cu ningun di nos esfuersonan no ta bal nada! (Compará cu Proverbionan 24:10.) Cu e punto di bista negativo aki, asta animacion cu bon intencion, diseñá pa yuda nos progresá den nos sirbishi na Dios caminda ta posibel, pa algun hende por zona manera condenacion. E por parce di resoná nos mes conviccion interno cu kico cu nos haci no ta suficiente.

6. Kico ta e mihó remedi contra pensamentunan extremamente negativo tocante nos mes?

⁶ Si bo percibí tal sintimentunan negativo den bo mes, no desesperá. Hopi di nos ta irazonablemente crítico cu nos mes de bes en cuando. I corda, e Palabra di Dios ta diseñá pa “rectificá cosnan” i pa “tumba cosnan fuertemente fortalecí.” (2 Timoteo 3:16; 2 Corintionan 10:4) Apostel Juan a skirbi: “Den esaki nos lo sa cu nos ta originá cu e berdad, i nos lo sigurá nos curason dilanti dje en cuanto cualkier cos den cua nos curason por condená nos, pasobra Dios ta mas grandi cu nos curason i conocé tur cos.” (1 Juan 3:19, 20) Laga nos considerá anto, tres manera den cua Bijbel ta siña nos cu nos ta precioso pa Jehova.

Jehova Ta Considerá Bo di Masha Balor

7. Con Jesus a siña tur cristian tocante nan balor den bista di Dios?

⁷ Di promé, Bijbel ta siña directamente cu cada un di nos tin balor personal den bista di Dios. Jesus a bisa: “Cincu mofi ta ser bendí pa dos moneda di poco balor, no ta berdad? Tog ningun di nan ta ser lubidá dilanti Dios. Pero asta e cabeinan di boso cabes tur ta contá. No tene miedu; boso ta bal mas cu hopi mofi.” (Lucas 12:6, 7) Den e dianan ei, mofi tabata e para di mas barata cu a ser bendí como cuminda, tog ningun di nan a ser pasá por haltu dor di nan Creador. Asina e fundeshi ta ser establecí pa un contraste asombroso: Ora ta trata di ser humano—cu tin muchu muchu mas balor—Dios conocé tur detaye. Ta como si e cabeinan mes di nos cabes ta contá individualmente!

8. Pakico ta realístico pa pensa cu Jehova por conta e cabeinan di nos cabes?

⁸ E cabeinan ta contá? Si bo ta kere cu e aspecto aki di Jesus su ilustracion ta irealístico, considerá esaki: Dios ta corda su fiel sirbidornan asina completamente cu e ta capas pa resucitá nan—re-creá nan den tur detaye, incluyendo nan código genético complicá i tur nan añanan di memoria i experencia. Contando nos cabeinan (di cua un cabes promedio tin rond di 100.000) lo ta un hazaña simpel na comparacion!—Lucas 20:37, 38.

Kico Jehova Ta Mira den Nos?

9. (a) Cua ta algun cualidad cu Jehova ta considerá di masha balor? (b) Pakico bo ta pensa cu tal cualidadnan ta precioso p’e?

⁹ Di dos, Bijbel ta siña nos kico Jehova ta considerá di masha balor den nos. Senciyamente bisá, e tin deleite den nos cualidadnan positivo i den nos esfuersonan. Rey David a bisa su yu Sálomon: “Tur curason Jehova ta scudriñando, i tur inclinacion di pensamentu e ta dicerniendo.” (1 Crónicanan 28:9) Segun cu Dios ta scudriñá biyones di curason humano den e mundu violento aki, yená cu odio, ki contentu e mester ta ora e haña un curason cu ta stima pas, berdad i husticia! (Compará cu Juan 1:47; 1 Pedro 3:4.) Kico ta sosodé ora Dios haña un curason cu ta hincha cu amor p’e, cu ta busca pa siña tocante dje i pa compartí tal conocimentu cu otronan? Na Malakías 3:16, Jehova ta bisa nos cu e ta scucha esnan cu ta papia cu otronan tocante dje i cu asta e tin “un buki di recuerdo” pa tur “esnan den temor di Jehova i pa esnan cu ta pensa riba su nomber.” Tal cualidadnan ta precioso p’e!

10, 11. (a) Con algun persona por tin e tendencia di descartá evidencia cu Jehova ta duna balor na nan bon cualidadnan? (b) Con e ehempel di Abías ta mustra cu Jehova ta duna balor na bon cualidadnan den tur grado?

¹⁰ Sin embargo, e curason cu ta condená nos lo por resistí tal evidencia di nos balor den bista di Dios. E por fluister insistentemente, ‘Pero tin asina tantu otro persona cu ta mas ehemplar den e cualidadnan ei cu ami. Ki desapuntá Jehova lo mester keda ora e compará mi cu nan!’ Jehova no ta haci comparacion, ni e no ta un pensador rígido i exigente. (Galationan 6:4) Ta cu un perspicacia skerpi i penetrante e ta lesa nos curason, i e ta duna balor na bon cualidadnan den tur grado.

¹¹ Por ehempel, ora Jehova a decretá cu henter e dinastia apóstata di Rey Jeroboam mester a ser ehecutá i eliminá manera “mest,” El a ordená pa solamente un dje yunan dje rey, Abías, ser duná un entiero decente. Pakico? “Algu bon pa cu Jehova e Dios di Israel a ser hañá den dje.” (1 Reynan 14:10, 13) Esaki a nificá cu Abías tabata un fiel adorador di Jehova? No necesariamente, ya cu el a muri, mescos cu e resto di su famia malbado. (Deuteronomio 24:16) Tog, Jehova a duna balor n’e “algu bon” cu el a mira den curason di Abías i a actua di acuerdo cu esei. Matthew Henry’s Commentary on the Whole Bible ta observá: “Caminda tin maske ta algun cos bon dje clase ei, lo e ser hañá: Dios cu ta busk’é, ta reconoc’é, maske con chikitu e ta, i ta contentu cuné.” I no lubidá cu si Dios haña asta un grado menor di algun bon cualidad den bo, e por haci’é crece tanten cu bo ta haci esfuerso pa sirbi’é fielmente.

12, 13. (a) Con Salmo 139:3 ta mustra cu Jehova ta duna balor na nos esfuersonan? (b) Den ki sentido por ser bisá cu Jehova ta sefta nos actividadnan?

¹² Den un manera similar Jehova ta considerá nos esfuersonan di masha balor. Na Salmo 139:1-3, nos ta lesa: “O Jehova, bo a scudriñá mi completamente, i bo conocé mi. Bo mes a yega di conocé mi sintamentu i mi lantamentu. Bo a considerá mi pensamentu desde leu. Mi biahamentu i mi drumimentu extendí bo a midi, i bo a familiarisá bo mes asta cu tur mi camindanan.” Pues Jehova ta na haltura di tur nos actividadnan. Pero e ta muchu mas cu simplemente na haltura. Na hebreo e frase “bo a familiarisá bo mes asta cu tur mi camindanan” tambe por tin e nificacion di “bo ta atesorá tur mi camindanan” of “bo ta apreciá tur mi camindanan.” (Compará cu Mateo 6:19, 20.) Sin embargo, con Jehova por apreciá nos camindanan si nos ta asina imperfecto i pecaminoso?

¹³ Interesantemente, segun algun escolástico, ora David a skirbi cu Jehova a “midi” su biahenan i periodonan di descanso, e palabra hebreo a nificá literalmente “sefta” of “bienta.” Un obra di referencia a observá: “E ta nificá . . . bienta afó (separá) tur e bagas, i laga tur e grano—pa spar tur loke ta balioso. Pues aki e ta nificá cu Dios, na moda di papia, a sefta David. . . . El a plama tur loke tabata bagas, of tur loke tabata sin balor, i a mira loke a sobra cu tabata real i substancial.” E curason cu ta condená nos por sefta nos actividadnan den e manera contrario, reprendiendo nos sin misericordia pa erornan di pasado i descartando nos logronan como nada. Pero Jehova ta pordoná nos picánan si nos repentí sinceramente i haci un esfuerso diligente pa no ripití nos erornan. (Salmo 103:10-14; Echonan 3:19) E ta sefta afó i ta corda nos bon obranan. Realmente, e ta corda nan pa semper tanten cu nos keda fiel na dje. Lo e mir’é como un inhusticia pa lubidá esakinan, i e nunca ta inhustu!—Hebreonan 6:10.

14. Kico ta mustra cu Jehova ta considerá nos actividad den e ministerio cristian di masha balor?

¹⁴ Kico ta algun dje bon obranan cu Dios ta considerá di masha balor? Prácticamente cualkier cos cu nos haci den imitacion di su Yu, Jesucristo. (1 Pedro 2:21) Siguramente, un trabou masha importante, anto, ta e plamamentu dje bon nobo dje Reino di Dios. Na Romanonan 10:15, nos ta lesa: “Ki bunita ta e pianan di esnan cu ta declará bon nobo di bon cosnan!” Aunke normalmente nos kisas no ta pensa di nos pianan ordinario como “bunita,” e palabra cu Pablo a usa aki tabata e mésun palabra usá den e version Setenta Griego pa describí Rebeca, Raquel i Josef—di cua tur tres tabata conocí pa nan bunitesa. (Génesis 26:7; 29:17; 39:6) Pues nos participacion den e sirbishi di nos Dios, Jehova, ta masha bunita i precioso den su bista.—Mateo 24:14; 28:19, 20.

15, 16. Pakico Jehova ta considerá nos awante di masha balor, i con Rey David su palabranan na Salmo 56:8 ta enfatisá e echo aki?

¹⁵ Un otro cualidad cu Dios ta considerá di masha balor ta awante. (Mateo 24:13) Corda, Satanas kier pa bo bira lomba pa Jehova. Cada dia cu bo keda leal na Jehova ta un otro dia cu bo a yuda percurá un contesta pa Satanas su mofa. (Proverbionan 27:11) Tin biaha awante ta masha difícil. Problema di salú, calamidad financiero, angustia emocional i otro obstáculonan por haci cada dia cu ta pasa un prueba. Awante enfrentá cu tal pruebanan ta specialmente precioso pa Jehova. P’e motibu ei Rey David a pidi Jehova pa warda su lágrimanan den un “boter di cueru” figurativo, puntrando cu confiansa, “Nan no ta den bo buki?” (Salmo 56:8) Sí, Jehova ta atesorá i ta corda tur e lágrimanan i sufrimentu cu nos ta wanta den mantené nos lealtad na dje. Nan tambe ta precioso den su bista.

¹⁶ En bista di nos cualidadnan mas excelente i nos esfuersonan, ki claro ta keda cu Jehova ta haña hopi cos di balor den cada un di nos! Sin importá con e mundu di Satanas a trata nos, Jehova ta considerá nos como precioso i parti di “e cosnan deseabel di tur e nacionnan.”—Ageo 2:7.

Loke Jehova A Haci pa Demostrá Su Amor

17. Pakico e sacrificio di rescate di Cristo mester convencé nos cu Jehova i Jesus ta stima nos como individuo?

¹⁷ Di tres, Jehova ta haci hopi cos pa duna prueba di su amor pa nos. Siguramente, e sacrificio di rescate di Cristo ta e contesta di mas potente n’e mentira satánico cu nos no tin balor of no por ser stimá. Nunca nos mester lubidá cu e morto agonisante cu Jesus a sufri riba e staca di tormento i e agonia asta mas grandi cu Jehova a wanta den mira e morto di su Yu stimá tabata prueba di nan amor pa nos. Ademas, e amor ei ta aplicá na nos personalmente. Asina apostel Pablo a mir’é, pasobra el a skirbi: “E Yu di Dios . . . a stimá mi i a entregá su mes pa mi.”—Galationan 2:20.

18. Den ki sentido Jehova ta atraé nos na Cristo?

¹⁸ Jehova a duna prueba di su amor pa nos dor di yuda nos individualmente pa saca probecho dje beneficionan dje sacrificio di Cristo. Jesus a bisa na Juan 6:44: “Ningun hende por bini cerca mi aménos cu e Tata, kende a mandá mi, ta atra’é.” Pa medio dje trabou di predicacion, cua ta alcansá nos individualmente, i pa medio di su spiritu santu, cua Jehova ta usa pa yuda nos comprendé i aplicá berdadnan spiritual apesar di nos limitacion i imperfeccionnan, Jehova personalmente ta atraé nos na su Yu i e speransa di bida eterno. P’esei Jehova por bisa di nos mescos cu el a bisa di Israel: “Cu un amor te na tempu indefiní mi a stimá bo. P’esei mi a atraé bo cu bondad amoroso.”—Jeremías 31:3.

19. Pakico e privilegio di oracion mester convencé nos di Jehova su amor personal pa nos?

¹⁹ Pero, talbes ta mediante e privilegio di oracion cu nos ta experenciá e amor di Jehova den e manera di mas íntimo. E ta invitá cada un di nos pa “resa sin stop” na dje. (1 Tesalonicensenan 5:17) E ta scucha! E asta ta ser yamá e “Tendedor di oracion.” (Salmo 65:2) E no a delegá e cargo aki na ningun otro persona, ni na su propio Yu. Djis pensa: E Creador dje universo ta insta nos pa acerk’é den oracion, cu frankesa di expresion. Bo súplicanan por asta impulsá Jehova pa haci loke di otro manera lo e no a haci.—Hebreonan 4:16; Santiago 5:16; mira Isaías 38:1-16.

20. Pakico e amor di Dios pa nos no ta un excusa pa nos sinti nos importante of ser egotista?

²⁰ Ningun cristian balansá lo tuma tal evidencia di Dios su amor i aprecio como un excuus pa considerá su mes como mas importante cu e realmente ta. Pablo a skirbi: “Mediante e bondad inmerecí cu a ser duná na mi, mi ta bisa na cada hende cu ta ei entre boso pa no pensa mas di su mes cu ta necesario pa pensa; sino pensa p’e por tin sano huicio, cada un segun cu Dios a distribuí na dje un midí di fe.” (Romanonan 12:3) Pues miéntras nos ta disfrutá dje calor dje amor di nos Tata celestial, laga nos ser di sano huicio i corda cu e bondad amoroso di Jehova ta inmerecí.—Compará cu Lucas 17:10.

21. Cua mentira satánico nos mester resistí continuamente, i cua berdad divino nos mester meditá semper ariba?

²¹ Laga cada un di nos haci tur loke ta na nos alcanse pa resistí tur e ideanan cu Satanas ta promové den e mundu bieu muribundo aki. Esei ta incluí rechasá e pensamentu cu nos no tin balor of cu nos no ta stimá. Si bida den e sistema aki a siñá bo mira bo mes como un obstáculo muchu desanimador asta p’e inmenso amor di Dios superá, of bo bon obranan como muchu insignificante asta pa su wowonan cu ta mira tur cos observá, of bo picánan como muchu grandi asta p’e morto di su precioso Yu cubri, bo a ser siñá un mentira. Rechasá tal mentiranan cu tur e repugnancia cu nan ta merecé! Laga nos semper tene na mente e palabranan inspirá di apostel Pablo na Romanonan 8:38, 39: “Mi ta convencí cu ni morto ni bida ni angel ni gobiernu ni cosnan awor aki ni cosnan pa bini ni podernan ni haltura ni profundidad ni ningun otro creacion lo por separá nos for dje amor di Dios cu ta den Cristo Jesus nos Señor.”

[Notanan]

Kico Bo Ta Pensa?

◻ Pakico Satanas ta purba convencé nos cu nos no tin balor i no por ser stimá?

◻ Con Jesus a siña cu Jehova ta considerá cada un di nos di masha balor?

◻ Con nos sa cu Jehova ta apreciá nos bon cualidadnan?

◻ Con nos por ta sigur cu Jehova ta atesorá nos esfuersonan?

◻ Con Jehova a duna prueba di su amor pa nos como individuonan?

[Plachi na página 13]

Jehova ta observá i ta corda tur esnan cu ta pensa riba su nomber