Ta posibel pa alcansá berdad religioso?

NA Suecia, den e pueblo universitario Uppsala, un homber spiritualmente curioso a dicidí di studia e creencianan di e diferente religionnan den su pueblo, asta bishitando nan lugánan di adoracion. El a scucha segun cu nan cleronan a predicá i el a entrevistá algun di nan miembro. El a ripará cu solamente Testigonan di Jehova tabata parce di ta convencí cu nan a “haña e berdad.” En bista dje variedad di opinionnan religioso cu ta existí, el a puntra su mes con e Testigonan por haci tal alegacion.

Abo personalmente ta pensa cu ta posibel pa alcansá e berdad pa loke ta religion? Lo por ta sikiera posibel pa determiná loke por ser yamá e berdad absoluto?

Filosofia i e Berdad

Esnan cu a studia filosofia a desaroyá e punto di bista cu berdad absoluto ta fuera di alcanse di hende. Kisas bo sa cu filosofia a ser definí como “e ciencia cu ta trata na splica e orígen di existencia i bida.” Pero, en realidad, filosofia poco bes ta yega asina leu. Den Filosofins Historia (E Historia di Filosofia), e autor sueco Alf Ahlberg a skirbi: “Hopi pregunta filosófico ta di tal naturalesa cu no ta posibel pa duna un contesta definitivo na nan. . . . Hopi hende ta di opinion cu tur e problemanan metafísico [relacioná cu e principionan básico di cosnan] ta pertenecé n’e grupo . . . aki.”

Consecuentemente, esnan cu mediante filosofia a trata na haña un contesta n’e preguntanan vital di bida hopi bes a resultá desilusioná of den angustia. Den su buki Tankelinjer och trosformer (Pensamentunan i Creencia Religioso), e autor sueco Gunnar Aspelin a bisa: “Un cos cu nos ta mira ta cu naturalesa no ta mas interesá den hende cu den e barbulet i e sangura . . . Nos ta impotente, absolutamente impotente, enfrente dje podernan ei cu ta ehercé nan papel den e cósmos i den nos mundu interior. Esaki ta e prospecto di bida cu asina tantu biaha a parecé den e literatura n’e fin di un siglo den cua hende a pone nan fe den progreso i a soña di un mihó futuro.”

Un Revelacion dje Berdad Ta Necesario?

Ta bisto cu esfuersonan humano so no a logra haña e berdad tocante bida, i ta parce cu nan lo no logra nunca. Tin bon motibu, anto, pa concluí cu un of otro sorto di revelacion divino ta necesario. Loke hopi hende ta yama e buki di naturalesa ta proveé algun revelacion. Aunke e no ta duna detayenan conclusivo en cuanto e orígen di bida, e ta mustra sí cu tin algu cu ta muchu mas satisfactorio cu un splicacion di bida puramente materialístico. Un blachi di yerba cu ta crece bai haltu realmente ta sigui leynan cu ta diferente di esnan cu ta goberná un formacion di baranca den un buracu cu a cai den otro. Cosnan bibiente den naturalesa ta traha i ta organisá nan mes den un manera cu cosnan sin bida no ta haci. Un studiante notabel di ley i religion, pues, tabatin un base pa concluí: “[Dios] su cualidadnan invisibel ta ser mirá claramente desde e creacion di mundu padilanti, pasobra nan ta ser percibí mediante e cosnan trahá.”—Romanonan 1:20.

Pero afin di haña sa ken ta tras dje trahamentu i organisamentu aki, nos mester di mas revelacion. Nos no mester spera pa tal revelacion existí? Lo no ta razonabel pa spera cu Esun cu ta responsabel pa bida riba tera lo revelá su mes na su criaturanan?

Bijbel ta afirmá di ta e revelacion ei. Den e revista aki hopi bes nos a presentá bon motibunan pa aceptá esaki, i hopi hende pensativo a acept’é. E echo cu e hombernan cu a skirbi e Bijbel tabata ansioso pa haci claro cu loke nan a skirbi no tabata di nan mes, ta riba su mes bastante remarcabel. Mas cu 300 biaha, nos ta haña e profetanan di Bijbel usando expresionnan tal como, “Esaki ta loke Jehova a bisa.” (Isaías 37:33; Jeremías 2:2; Nahum 1:12) Probablemente bo sa cu homber i muhernan cu skirbi bukinan of artículonan mayoria bes ta bastante ansioso pa pone nan firma riba nan obranan. Sin embargo, esnan cu a skirbi e Bijbel a mantené nan mes den fondo; den algun caso ta difícil pa determiná ken a skirbi cierto partinan dje Bijbel.

Un otro aspecto dje Bijbel cu bo por haña significante ta su armonia interno. Esaki ta realmente remarcabel, considerando cu e 66 bukinan dje Bijbel tabata skirbí durante un periodo di 1.600 aña. Suponé bo ta bai un biblioteca público i ta scoge 66 buki religioso cu a ser skirbí durante un periodo di 16 siglo. Despues bo ta laga compilá e bukinan los ei den un volúmen. Lo bo spera pa e volúmen ei tin un tema comun i un mensahe armonioso? Siguramente cu no. Esei lo rekerí un milager. Considerá esaki: E bukinan dje Bijbel sí tin un tema comun i nan sí ta apoyá otro. Esaki ta demostrá cu mester tin un mente maestro, of autor, cu a dirigí loke e skirbidornan di Bijbel a registrá.

Sin embargo, lo bo haña un rasgo cu mas cu tur otro cos ta duna prueba dje orígen divino dje Bijbel. Profecianan—informacion skirbí di antemano tocante loke lo sosodé sin falta den futuro. Expresionnan manera, “Mester sosodé den e dia ei” i, “Mester sosodé den e parti final di dianan” ta ser hañá únicamente den Bijbel. (Isaías 2:2; 11:10, 11; 23:15; Ezekiel 38:18; Oséas 2:21-23; Zacarías 13:2-4) Hopi cientos di aña promé cu Jesucristo a parecé riba tera, profecianan den e Scritura Hebreo a duna detayenan tocante su bida—desde su nacementu te cu su morto. No por saca ningun otro conclusion razonabel di sino cu Bijbel ta e fuente dje berdad tocante bida. Jesus mes ta confirmá esaki cu e palabranan: “Bo palabra ta e berdad.”—Juan 17:17.

Religion i e Berdad

Asta hopi hende cu ta profesá di tin fe den Bijbel ta kere cu no ta posibel pa alcansá e berdad absoluto. E clero mericano John S. Spong a comentá: “Nos mester . . . cambia for dje pensamentu di cu nos tin e berdad i cu otronan mester yega na nos punto di bista pa e realisacion cu berdad absoluto ta fuera dje alcanse di nos tur.” Un autor católico romano, Christopher Derrick, ta duna un motibu pa tal punto di bista negativo en cuanto hañamentu dje berdad: “Cualkier mencion di ‘berdad’ religioso ta indicá algun clase di pretencion cu bo sa . . . Bo ta duna di comprendé cu un otro persona posiblemente lo ta robes; i esei lo ta absolutamente inaceptabel.”

Sin embargo, como un persona pensativo, lo ta bon pa bo considerá algun pregunta pertinente. Si e berdad ta inalcansabel, pakico Jesucristo lo a bisa: “Boso lo conocé e berdad, i e berdad lo haci boso liber”? I pakico un dje apostelnan di Jesus lo a bisa cu ta Dios su boluntad pa “tur sorto di hende ser salbá i yega na un conocimentu exacto dje berdad”? Pakico e palabra “berdad” ta parecé mas cu cien biaha den e Scritura Griego Cristian en coneccion cu fe? Sí, pakico, si e berdad ta inalcansabel?—Juan 8:32; 1 Timoteo 2:3, 4.

En realidad, Jesus no solamente a trece padilanti cu ta posibel pa alcansá e berdad, sino a mustra cu hañando e berdad ta ser rekerí si nos kier pa nos adoracion ser aprobá dor di Dios. Ora un muher samaritano kier a sa cua tabata e berdadero forma di adoracion—e adoracion cu e hudiunan tabata practicá den Jerusalem of esun dje samaritanonan riba e Ceru Gerizim—Jesus no a contestá bisando cu e berdad ta inalcansabel. Mas bien, el a bisa: “Berdadero adoradornan lo adorá e Tata cu spiritu i cu berdad, pasobra, en berdad, e Tata ta busca hende asina pa ador’é. Dios ta un Spiritu, i esnan cu ta ador’é mester ador’é cu spiritu i cu berdad.”—Juan 4:23, 24.

Hopi hende ta bisa, ‘Bijbel por ser interpretá den vários manera, pues no tin manera pa ta sigur di kico ta e berdad.’ Pero Bijbel realmente a ser skirbí di un manera asina vago cu bo no por ta sigur con e mester ser comprendé? Ta berdad cu cierto lenguahe profético i simbólico por ta difícil pa comprendé. Por ehempel, Dios a bisa e profeta Daniel cu su buki, conteniendo hopi lenguahe profético, no tabata pa ser comprendé completamente te cu “e tempu dje fin.” (Daniel 12:9) I ta evidente cu cierto comparacionnan i símbolonan mester ser interpretá.

Sin embargo, ta claro cu pa loke ta siñansanan cristian básico i balornan moral cu ta esencial pa adoracion di Dios den e berdad, Bijbel ta masha directo. E no ta laga lugá pa interpretacionnan contradictorio. Den e carta n’e efesionan, ta ser papiá dje fe cristian como siendo “un,” mustrando cu lo no mester tabatin vários fe. (Efesionan 4:4-6) Kisas bo por puntra bo mes, ‘Si Bijbel no por ser interpretá corectamente den diferente manera, pakico tin asina tantu diferente denominacion “cristian”?’ Nos ta haña e contesta si nos wak bek n’e tempu djis despues cu Jesus su apostelnan a muri i un apostasia for dje berdadero fe cristian a desaroyá.

‘E Trigu i e Mal Yerba’

Jesus a pronosticá e apostasia aki den su comparacion dje trigu i mal yerba. Jesus mes a splica cu “e trigu” ta representá cristiannan berdadero; “e mal yerba” ta representá cristiannan falsu of apóstata. “Miéntras hende tabata drumí,” Jesus a bisa, un “enemigu” lo a sembra mal yerba den e cunucu di trigu. E sembramentu aki a cuminsá despues cu e apostelnan a drumi den morto. E comparacion ta mustra cu e confusion aki di cristiannan berdadero i falsu lo a continuá te na “e conclusion dje sistema di cosnan.” Pues, atrabes dje siglonan, e identidad dje cristiannan berdadero a ser tapá debí cu e tereno religioso a ser dominá pa esnan cu tabata cristiannan solamente pa nomber. Sin embargo, na “e conclusion dje sistema di cosnan,” lo sosodé un cambio. “E Yu di hende” lo “manda su angelnan” pa separá cristiannan falsu for di cristiannan berdadero. Esaki a nificá cu e ora ei e congregacion cristian lo ta fácil pa reconocé, teniendo e status cu e tabatin den e tempu dje apostelnan.—Mateo 13:24-30, 36-43.

E profecianan di tantu Isaías como di Mikéas ta pronosticá tal recogimentu di adoradornan berdadero “den e parti final dje dianan.” Isaías ta bisa: “Mester sosodé den e parti final dje dianan cu e ceru dje cas di Jehova lo bira firmemente establecí mas haltu cu e top dje cerunan, i siguramente lo e ser halsá mas haltu cu e ceritunan; i na dje tur e nacionnan mester basha bai. I hopi pueblo siguramente lo bai i bisa: ‘Ban, i laga nos subi na e ceru di Jehova, n’e cas di e Dios di Jacob; i lo e instruí nos tocante su camindanan, i nos lo cana den su bereanan.’ ” Un bistaso franco n’e echonan ta mustra cu e profecia di Isaías ta cumpliendo den nos tempu.—Isaías 2:2, 3; Mikéas 4:1-3.

Sin embargo, e crecementu dje congregacion cristian no ta sosodiendo mediante algun esfuerso humano. Jesus a pronosticá cu lo e “manda su angelnan” pa efectuá un obra di recogimentu. Tambe el a indicá un propósito masha special pa esaki: “N’e tempu ei e hustunan lo resplandecé mes briyantemente cu e solo den e reino di nan Tata.” (Mateo 13:43) Esaki ta mustra cu un obra iluminador, of educacional, lo tuma lugá mundialmente dor dje congregacion cristian.

Testigonan di Jehova ta mira un cumplimentu dje profecianan aki den e obra educacional cu nan ta efectuando den 232 pais awe. Comparando e creencianan, normanan di conducta i organisacion dje Testigonan cu e Bijbel, hende imparcial por mira claramente cu esakinan ta armonisá cu esnan dje congregacion cristian dje promé siglo. E Testigonan ta papia di nan fe como “e berdad,” pero no pa motibu cu nan ta pretendé di tin superioridad personal. Mas bien, nan ta haci esei pasobra nan a studia Dios su Palabra, e Bijbel, extensivamente i nan ta sigui’é como e único norma a base di cua religion por ser midí corectamente.

E cristiannan di promé a referí na nan fe como “e berdad.” (1 Timoteo 3:15; 2 Pedro 2:2; 2 Juan 1) Loke tabata berdad pa nan mester ta berdad pa nos awe tambe. Testigonan di Jehova ta invitá tur hende pa haci sigur di esei pa nan mes dor di studia Bijbel. Nos ta spera cu haciendo esei bo tambe lo experenciá e goso cu ta bin, no solamente dor di a haña e religion cu ta surpasá otronan, sino dor di a haña e berdad!

[Kuadro na página 5]

ALGUN FILOSOFIA VERSUS E BERDAD

POSITIVISMO: E punto di bista cu tur idea di un naturalesa religioso ta nonsens cu no por ser verificá i cu e propósito di filosofia ta pa unificá e ciencianan positivo pa forma un conhunto.

EXISTENCIALISMO: Su apoyadornan a ser influenciá masha hopi dor dje horornan di Guera Mundial II i p’esei a yega na tin un punto di bista pesimista di bida. E ta enfatisá pa examiná hende su angustia enfrente di morto i e inutilidad di bida. E autor existencialista Jean-Paul Sartre a bisa cu, ya cu no tin Dios, hende a ser bandoná i ta existí den un universo cu ta absolutamente indiferente.

INCREDULIDAD: Ta afirmá cu ta imposibel pa a base di observacion i razonamentu yega na cualkier conocimentu obhetivo i universal—cualkier berdad—tocante existencia.

PRAGMATISMO: Ta calculá e berdadero balor di nos conviccionnan solamente a base di nan relevancia práctico na interesnan humano, tal como den reformacion di educacion, moralnan i política. E no ta considerá cu e berdad tin cualkier balor riba su mes.

[Plachi Rekonosementu na página 2]

Página 3: Di dos na banda robes: Cortesia di The British Museum; Na banda drechi: Universidad di Sung Kyun Kwan, Seúl, Corea