“Tumbá, Pero No Destrui”

MANERA ULF HELGESSON A RELATA

Na juli 1983, e dokternan cu tabata di buig over di mi cama a sclama: “E ta lantá!” Un tumor di 12 centimeter largu a ser sacá for dje tehido di nervio den mi wes’i lomba den un operacion complicá di 15 ora largu. Mi a keda totalmente paralisá.

UN PAR di dia despues, mi a ser trasladá pa un hospital casi 60 kilometer leu for di mi stad di residencia na Hälsingborg, den parti sur di Suecia. Aya mi a drenta un programa di rehabilitacion. E fisioterapeuta a bisa cu e tratamentunan lo tabata extremamente exigente, tog mi tabata ansioso pa cuminsá. Realmente mi kier a cana atrobe. Dor di sigui diligentemente un programa di ehercicio di cincu ora pa dia, mi a progresá rápidamente.

Un luna despues ora e superintendente di circuito a bishitá nos congregacion, e huntu cu e otro ancianonan cristian a haci e biahe largu pa tene e reunion di anciano di congregacion den mi kamber di hospital. Cuantu mi curason a alegrá p’e evidencia aki di amor fraternal! E verpleegsternan dje seccion ei dje hospital a sirbi henter e grupo te cu sandwich despues dje reunion.

Na promé instante e dokternan a keda asombrá cu mi progreso. Despues di tres luna mi por a lanta sinta den mi rolstoel i asta lanta para pa un ratu. Mi tabata contentu i plenamente determiná pa cana atrobe. Mi famia i compañeronan cristian a duná mi hopi animacion durante nan bishitanan. Asta mi tabata por a bai cas pa periodonan corticu.

Un Berdadero Contratempu

Sin embargo, despues di esei, mi no a haci ningun progreso mas. Pronto e fisioterapeuta a duná mi e mensahe doloroso: “Lo bo no bira mas mihó cu esaki!” E meta awor tabata pa fortalecé mi pa mi por move riba mi mes den un rolstoel. Mi a puntra mi mes kico lo para di mi. Con mi esposa lo haci? E mes a haci un operacion grandi i tabatin mester di mi yudansa. Lo mi a rekerí cuido permanente den un instituto?

Mi a bira profundamente deprimí. Mi forsa, curashi, i poder a disparcé gradualmente. Dianan a pasa, i mi a keda incapas pa move. No solamente mi tabata físicamente paralisá sino tambe mi tabata emocionalmente i spiritualmente lam. Mi tabata “tumbá.” Semper mi a considerá mi mes spiritualmente fuerte. Mi tabatin un fe firmemente ancrá den e Reino di Dios. (Daniel 2:44; Mateo 6:10) Mi tabata convencí dje promesa bíblico cu tur malesa i enfermedad lo ser curá den Dios su hustu mundu nobo i cu henter humanidad lo ser restorá na bida perfecto einan. (Isaías 25:8; 33:24; 2 Pedro 3:13) Awor mi a sinti mi mes paralisá no solamente físicamente sino tambe spiritualmente. Mi a sintí mi “destruí.”—2 Corintionan 4:9.

Promé cu mi bai mas aleu, laga mi contá bo un poco di mi pasado.

Un Famia Felis

Mi a nace na 1934, i mi salú semper tabata bon. Na cuminsamentu di añanan ’50, mi a topa Ingrid, i nos a casa na 1958 i nos a establecé den e stad di Östersund, den e parti central di Suecia. Un punto crucial den nos bida a bini na 1963 ora nos a cuminsá studia Bijbel cu Testigonan di Jehova. P’e tempu ei nos tabatin tres yu chikitu—Ewa, Björn i Lena. Pronto henter nos famia tabata studia Bijbel i a progresá bon den e conocimentu di berdadnan di Bijbel.

Djis despues cu nos a cuminsá studia, nos a muda pa Hälsingborg. Aya, ami cu mi esposa a dedicá nos mes na Jehova i a bautisá na 1964.

Nos felicidad a aumentá ora nos yu muher mayor, Ewa, a bautisá na 1968. Siete aña despues, na 1975, Björn i Lena tambe a bautisá, i e siguiente aña mi a ser nombrá como anciano den e congregacion cristian.

Mi trabou seglar a permití mi percurá bon p’e necesidadnan material di mi famia. I nos felicidad a crece ora Björn i Lena a cuminsá den e ministerio di tempu completo. Pronto Björn a ser invitá pa sirbi n’e oficina di sucursal di Testigonan di Jehova na Arboga. Cosnan tabata bai bon pa nos. Anto, na principio di 1980, mi a cuminsá sinti e efectonan físico dje tumor cu, cu tempu, a ser sacá den e operacion grandi ei na 1983.

Venciendo Parálisis Spiritual

Ora nan a bisá mi cu lo mi no por cana mas, bida a parce di basha den otro rond di mi. Con mi a recobrá fortalesa spiritual? Tabata mas fácil cu mi a pensa. Mi simplemente a coge mi Bijbel i a cuminsá lesa. Mas mi a lesa, mas fortalesa spiritual mi a ricibí. Mas cu tur cos mi a bin apreciá e balor di Jesus su Sermon riba Ceru. Mi a les’é bes tras bes i a meditá riba dje.

Mi punto di bista alegre pa cu bida a ser restorá. Mediante lesamentu i meditacion, mi a cuminsá mira oportunidadnan en bes di obstáculonan. Mi a recobrá mi deseo pa compartí berdadnan di Bijbel cu otronan, i mi a satisfacé e deseo aki dunando testimonio n’e personal di hospital i na otro hende cu mi a topa. Mi famia a sostené mi completamente i nan a ricibí entrenamentu con pa cuidá mi. Finalmente mi por a bandoná hospital.

Por fin mi tabata na cas. Ki un dia felis esei tabata pa nos tur! Mi famia a areglá un programa cu a incluí mi cuido. Mi yu homber, Björn, a dicidí di bandoná e trabou na oficina di sucursal di Testigonan di Jehova, i el a bin cas pa yuda cuidá mi. Tabata un gran consuelo pa ta e obheto di asina tantu amor i interes di mi famia.

Enfrentando un Otro Contratempu cu Exito

Sin embargo, cu pasamentu di tempu mi salú a deteriorá i tabata difícil pa mi move. Finalmente, apesar di mi famia su esfuersonan dedicá, nan no tabata por a cuidá mi mas na cas. Pues mi a pensa cu lo tabata mihó pa mi bai un cas di cuido. Atrobe, esei a nificá cambionan i un rutina nobo. Pero mi no a permití esaki ser un contratempu spiritual.

Mi nunca a stop mi lesamentu i investigacion di Bijbel. Mi a sigui considerá loke mi tabata por, no loke mi no tabata por. Mi a meditá riba e bendicionnan spiritual cu tur Testigo di Jehova tin. Mi a keda pegá na Jehova den oracion i a usa tur oportunidad pa predicá na otronan.

Awor mi ta pasa mi anochinan i parti di mi dianan den e cas di cuido. Parti atardi i anochi mi ta pasa sea na cas of na nos reunionnan cristian. Un servicio municipal ta haci areglo pa transporte regular pa i for dje reunionnan i pa i for di mi cas. Mi famia dedicá, e rumannan den e congregacion, i e personal n’e cas di cuido ta percurá pa mi den un manera maraviyoso.

Haciendo Loke Mi Por

Mi no ta considerá mi mes un inválido, i mi no ta ser tratá como tal dor di mi famia, ni dor di mi rumannan cristian. Nan ta cuidá mi amorosamente, permitiendo mi di sigui sirbi eficasmente como anciano. Mi ta conducí un Studio di Buki di Congregacion tur siman, i tambe e studio semanal di congregacion di E Toren di Vigilancia na Salon di Reino. Ta difícil pa mi bira e páginanan den Bijbel, pues un ruman ta asigná pa yudá mi haci esei n’e reunionnan. Mi ta conducí reunion i duna discurso sintá den mi rolstoel.

Dje manera ei ainda mi por haci hopi dje cosnan cu mi tabata disfrutá di dje promé, incluyendo bishitanan di pastoreo. (1 Pedro 5:2) Mi ta haci esaki ora rumannan bini cerca mi pa yudansa of conseho. Tambe mi ta usa telefon, tumando e iniciativa pa yama otronan. E animacion cu ta resultá for di esei ta mutuo. (Romanonan 1:11, 12) Un amigu a bisa recientemente: “Net ora mi ta sintí mi desanimá, bo ta yama pa encurashá mi.” Pero ami tambe ta ser animá, sabiendo cu Jehova ta bendicionando mi esfuersonan.

Promé i despues dje reunionnan, mi tin asociacion excelente cu e muchanan den e congregacion. Ya cu mi ta sintá den mi rolstoel, nos ta papia cu otro riba e mésun nivel di wowo. Mi ta apreciá nan sinceridad i frankesa. Un hobencito a yega di bisá mi un biaha: “Ruman ta un inválido cu masha bon tipo!”

Dor di enfocá riba loke mi por haci en bes di preocupá tocante loke mi no por haci, mi ta disfrutá di mi sirbishi na Jehova. Mi a siña hopi for di loke a sosodé cu mi. Mi a realisá cu nos ta ser entrená i fortalecí dor dje pruebanan cu nos ta pasa aden.—1 Pedro 5:10.

Mi a ripará cu hopi hende saludabel no ta comprendé cu nos semper mester tuma e adoracion di nos Tata celestial na serio. Si nos no haci esei, nos programa di studio, reunion i ministerio di veld por bira un simpel rutina. Mi ta considerá e percuracionnan aki como vital pa sobrebibí atrabes di fin dje mundu aki i drenta den Dios su Paradijs terenal primintí.—Salmo 37:9-11, 29; 1 Juan 2:17.

Semper nos mester tene e speransa di bida den Dios su binidero mundu nobo bibu den nos curason. (1 Tesalonicensenan 5:8) Tambe mi a siña pa no entregá den e lucha contra cualkier tendencia pa bira desanimá. Mi a siña mira Jehova como mi Tata i su organisacion como mi Mama. Mi a yega na realisá cu si nos haci e esfuerso, Jehova por usa cualkier di nos como un sirbidor eficas di dje.

Maske de bes en cuando mi a sinti cu mi tabata “tumbá,” na moda di papia, ‘mi no a ser destruí.’ Nunca mi a ser bandoná dor di Jehova i su organisacion, ni dor di mi famia ni dor di mi rumannan cristian. Gracias na mi esfuerso pa coge e Bijbel i cuminsá les’é, mi a recobrá mi fortalesa spiritual. Mi ta gradicidu na Jehova Dios, kende ta duna “poder mas ayá di loke ta normal” ora nos ta confia den dje.—2 Corintionan 4:7.

Cu pleno confiansa den Jehova, mi ta mira ansiosamente padilanti na futuro. Mi tin confiansa cu masha pronto Jehova Dios lo cumpli cu su promesa tocante un paradijs restorá aki riba tera huntu cu tur e bendicionnan maraviyoso cu lo e trece.—Revelacion 21:3, 4.