Pregunta di Lector

Na Filipensenan 2:9, Pablo a bisa tocante Jesus: “Dios a hals’é na un puesto superior i bondadosamente a dun’é e nomber cu ta riba tur otro nomber.” Kico e nomber nobo aki ta? I si Jesus ta inferior na Jehova, con Jesus su nomber ta riba tur otro nomber?

Filipensenan 2:8, 9 ta bisa: “Mas cu esei, ora el [Jesus] a haña su mes manera hende, el a humiyá su mes i a bira obediente te na morto, sí, morto riba un staca di tormento. P’e motibu aki mes tambe Dios a hals’é na un puesto superior i bondadosamente a dun’é e nomber cu ta riba tur otro nomber.”

E pasashi aki no ta nificá cu siendo cu solamente Jehova tin un nomber absolutamente riba tur otro nomber, Jesus mester ta e mésun persona cu Jehova. Manera e contexto den Filipensenan capítulo 2 ta mustra, Jesus a ricibí su nomber elevá despues di su resureccion. Promé cu esei, e no tabata poseé e nomber ei. Na otro banda, Jehova semper tabata supremo, i su posicion no a cambia nunca. E echo cu Jesus a ricibí un nomber mas haltu cu e nomber cu e tabatin promé cu su sirbishi terenal ta proba cu e no ta mescos cu Jehova. Ora Pablo a bisa cu Jesus a ser duná un nomber riba tur otro nomber, e tabata kier men cu Jesus awor tin e nomber di mas haltu di tur criatura di Dios.

Kico Jesus su nomber haltu ta? Isaías 9:6 ta yuda nos contestá. Profetisando tocante e binidero Mesías, Jesus, e versículo ei ta bisa: “E gobernacion di prins lo yega di ta riba su scouder. I su nomber lo ser yamá Maraviyoso Consehero, Dios Poderoso, Tata Eterno, Prins di Pas.” Aki Jesus su “nomber” tin di haber cu su posicion haltu i autoridad, i esei ta tambe e manera cu nos ta comprendé “e nomber cu ta riba tur otro nomber” mencioná na Filipensenan 2:9. Tur rudia ta ser mandá pa dobla na Jesus como reconocimentu di su posicion haltu di autoridad cu Jehova a dun’é—un posicion di autoridad mas haltu cu esun duná na cualkier otro criatura. E palabra “otro” den e traduccion aki no ta directamente representá den e texto griego riba cua e ta basá, pero e ta ser indicá dor dje sentido dje versículo. Jesus su “nomber” no ta riba su mes nomber sino e ta riba tur otro criatura su nomber.

Ki contentu nos ta pa uni cu tur fiel angel i hende hincando rudia como reconocimentu di Jesus su nomber! Nos ta haci esaki sometiendo nos mes na Jesus den e posicion elevá i poderoso duná na dje dor di Jehova—“p’e gloria di Dios e Tata.”—Filipensenan 2:11; Mateo 28:18.