Cien Aña di Edad i Riba Pia Ainda

MANERA RALPH MITCHELL A RELATA

Mi tata, un homber di tamaño mediano, tabata un predicador metodista. Nan a mand’é di iglesia pa iglesia cada dos of tres aña, mayoria biaha di un pueblo chikitu pa otro, incluyendo Asheville, North Carolina, Merca, caminda mi a nace na februari 1895. Pues mi a crece conociendo cristiandad hopi bon.

MI TA corda con mi tabata ser hibá como mucha homber yong n’e banki pa hende cu a lamentá nan picánan na reunionnan evangélico sumamente emocional pa ser yená cu e spiritu santu—pa “haña religion,” manera nan a yam’é. Nan a bisá mi pa confesá mi picánan, pa warda e Dies Mandamentunan, i ser bon hende. Dje manera ei lo mi bai cielu ora mi muri. ‘Wel,’ mi a bisa den mi mes, ‘mi ta suponé cu ami lo bai fiernu pasobra mi no por ta suficiente bon pa cielu.’ Mi a pensa cu solamente adultonan—specialmente predicadornan—tabata biba conforme e normanan bíblico.

Pero asta promé cu mi a yega mi edad di tiener, mi a cuminsá detectá hipocresia den religion. Por ehempel, mi tata tabata sacrificá e necesidadnan material di su famia djis pa duna e fondo di obispu un suma grandi di placa n’e conferencia general [reunion di cleronan cu e obispu.] El a spera cu esaki lo a trece un nombramentu na un iglesia cu un membresia mas grandi. Mi ta corda un predicador local cu tabata alabes un cunukero di mata di catuna. E tabata ansioso pa haña un posicion prominente, pues el a bende cien bulto di catuna i a bai n’e conferencia cu hopi placa. Ora a parce cu nan a haña tur e placa cu nan por a saca for dje auditorio—consistiendo pa mayor parti di predicadornan—e predicador cunukero di catuna aki a bula lanta i grita: “Esaki ta tur loke boso ta dunando boso obispu? Pa cada predicador cu presentá cu cincu dollar, lo mi contribuí cu dobel e cantidad!” Mas cu mil dollar a ser colectá, i e obispu a nombra e homber aki como e anciano presidente riba mi tata. Mi no por a kere cu un nombramentu asina a bini for di Dios. For dje tempu ei padilanti mi tabata sképtico tocante cualkier cos cu tabatin di haber cu religion.

Mi a ser reclutá como militar ora Merca a haña su mes enbolbí den e promé guera mundial. Mi ta corda bon con mi tabata tende e capelannan di ehército predicá na nos como soldatnan tocante bringa lealmente pa nos pais, i esaki solamente a aumentá mi disgusto pa religion. Mi metanan tabata pa sobrebibí, terminá mi educacion, i despues casa. No tabatin lugá pa religion den mi plannan pa futuro.

Un Cambio di Actitud

Na 1922, mi a namorá di un mucha muher yamá Louise. A resultá cu e tabata un católico deboto, i ora nos a dicidí na casa, e tabata kier un casamentu católico. Wel, ami sí no tabata kier ningun clase di ceremonia religioso, pues el a bai di acuerdo pa nos casa na un edificio municipal den e stad di New York.

Na principio nos no tabatin conflicto religioso. Mi simplemente a splik’é claramente cu mi no tabatin ningun confiansa den religion i cu nos lo a sali bon cu otro tanten cu no tabatin mencion di religion. Despues, entre añanan 1924 i 1937, yunan a nace—un tras di otro, te ora nos tabatin cincu mucha homber i cincu mucha muher! Louise tabata kier pa nos yunan bai scol católico. Ami no tabata kier pa nan haña ningun tipo di entrenamentu religioso, pues nos a pleita tocante esei.

Na cuminsamentu di 1939 a sosodé algu cu a cambia mi punto di bista riba religion completamente. Henry Webber i Harry Piatt, dos Testigo di Jehova, a bini na mi cas na Roselle, New Jersey. Masha lihé a bira bisto cu nan kier a papia tocante net e tópico cu mi no tabatin ningun interes pa discutí ariba—religion. Ainda mi fe tabata amargá p’e echo cu e capelannan den e ehército a bisa, ‘Bringa pa bo pais,’ miéntras e cleronan na cas a bisa, ‘Lo bo no mata.’ Ki un hipocresia! Mi a pensa cu lo mi stret e dos Testigonan ei. Mi a bisa nan: “Lagá mi bisa boso un cos. Si boso religion ta berdadero, e ora ei tur e otronan ta falsu. I asta si solamente un dje otronan ta berdadero, e ora ei tur sobrá, incluyendo esun di boso, ta falsu. Por tin solamente un religion berdadero.” Pa mi gran sorpresa, nan tabata di acuerdo cu mi!

Siguientemente, nan a pidí mi coge mi Bijbel i habrié na 1 Corintionan 1:10. Ei mi a lesa: “Awor mi ta roga boso, rumannan, p’e nomber di nos Señor Jesucristo, pa boso tur papia e mésun cos, i pa no tin division den boso; sino pa boso ta perfectamente uní huntu den e mésun mente i den e mésun huicio.” (King James Version) E texto aki a lanta mi curiosidad. Na mésun tempu, mi tabatin miedu cu e dos hombernan aki tabata tratando di hincá mi den un of otro tipo di culto. Tog, mi a siña algu—cu no mester tin division entre cristiannan. Mi tabatin hopi otro pregunta den mi mente. Por ehempel, Kico ta sosodé cu e alma ora hende muri? Cuantu lo mi a gusta pa considerá e tema ei cu nan! Pero, mi a pensa, esei lo a crea muchu hopi controversia religioso den cas.

Despues un dje dos hombernan a bisa: “Nos lo kier bini bek i papia cu bo atrobe otro siman.” Mi a purba despidí di nan discretamente, pero mi esposa a entremeté. El a bisa, “Ralph, nan kier sa ki dia nan por bini bek.” Esaki a sorprendé mi, ya cu e tabata un católico ferviente! No obstante, mi a pensa, ‘Kisas tog nos por haña algun punto di consenso riba e tópico di religion.’ Pues mi a bai di acuerdo pa laga Henry Webber i Harry Piatt pasa bek e siguiente diabierne.

Dje manera ei mi a cuminsá studia Bijbel cu Testigonan di Jehova. No hopi tempu despues di esaki, mi a ser invitá pa asistí na un congreso na Madison Square Garden n’e stad di New York. Mi ta corda cla-cla Joseph F. Rutherford su discurso “Gobiernu i Pas,” duná dia 25 di juni, 1939. Mi tabata un dje 18.000 personanan presente. En realidad, 75.000 a tende e discurso, ora bo incluí esnan cu a ser conectá mediante un coneccion internacional usando liñanan di radio-telefon.

Pero cosnan no a cana sin problema. Siguidornan dje pastor católico Charles Coughlin a menasá di habri e asamblea for di otro, i efectivamente, mas o ménos na mitar di Ruman Rutherford su discurso, cientos di hende rabiá a cuminsá bu i grita lemanan manera, “Heil Hitler!” i “Viva Franco!” Tabatin asina tantu conmocion cu bo por a tende e bochincha via e liñanan di telefon! A tuma rond di 15 minuut p’e ushernan silenciá e multitud desordená. Turesten, Ruman Rutherford, sin miedu, a sigui papia segun cu e repetido aplausonan for dje auditorio a dun’é apoyo.

Awor mi tabata realmente curioso. Pakico un pastor católico lo a instigá asina tantu odio contra Testigonan di Jehova? Mi a yega n’e conclusion cu mester tin algu den loke Rutherford tabata predicando—algu cu e clero no tabata kier pa hende manera ami tende. Pues mi a sigui studia Bijbel i haci progreso. Finalmente, na october di 1939, mi a simbolisá mi dedicacion na Jehova mediante bautismo bou di awa. Algun di mi yunan a ser bautisá e siguiente aña, i mi esposa, Louise, a ser bautisá na 1941.

Enfrentando Pruebanan

Pronto despues cu mi a aceptá e berdad, mi mama a fayecé, i mi tabatin cu regresá North Carolina pa su entiero. Mi a sinti cu mi concenshi no a permití mi asistí n’e misa di entiero cu lo a ser tené den e iglesia metodista. P’esei mi a yama mi tata na telefon promé cu mi a haci e biahe i a puntr’é pa tene e caha di morto n’e casa mortuoria. El a bai di acuerdo, pero ora mi a yega einan, nan tabata riba caminda p’e iglesia, unda nan a pensa cu ami siguramente lo a djoin nan.

Wel, mi no a djoin nan, i esaki a causa bastante conmocion den mi famia. Aunke ami cu mi ruman muher Edna semper tabata cerá cu otro, despues di entiero di Mama, e no tabata papia cu mi. Mi a skirbi cartanan, pero e no tabata contestá nan. Tur zomer ora Edna a bini New York pa asistí na cursonan di maestronan di scol na City College, mi tabata trata na busca contacto cuné. Pero e tabata nenga di topá mi, bisando cu e tabata ocupá. Cu tempu mi a entregá, ya cu a parce cu mi tabata solamente pest e. Hopi aña lo a pasa promé cu mi a tende di dje atrobe.

Debí na nan nengamentu pa saludá bandera, seis di mi yunan a ser expulsá for di scol na 1941, mescos cu hopi otro mucha na Merca i Cánada. Afin di cumpli cu e rekisito legal di educacion, e Testigonan a establecé nan mes scolnan yamá Scolnan di Reino. Un edificio cu tabata un hotel den Lakewood, New Jersey, tabata e sitio dje scol cu mi yunan a bai. Tabatin un Salon di Reino riba e promé piso, huntu cu e klas dje scol, un cushina i un área pa come. E cuartonan di drumi dje mucha muhernan tabata riba e di dos piso, i e cuartonan di drumi dje mucha hombernan tabata riba e di tres piso. E tabata un bon scol. Mayoria dje muchanan cu a bai scol einan tabata bai cas solamente fin di siman. Esnan cu tabata biba mas leu tabata bai cas cada dos siman.

For di mi promé añanan den e berdad, mi tabatin un deseo ardiente pa bira un pionero, manera evangelisadornan di tempu completo di Testigonan di Jehova ta ser yamá. N’e congreso di 1941 na St. Louis, Missouri, un ruman den e programa a conta con e por a traha pionero lantando 12 yu. Mi a pensa, ‘Si e por traha pionero cu 12, ami por traha pionero cu 10.’ Sin embargo, mi circunstancianan no a permití mi cuminsá traha pionero te cu 19 aña mas despues. Finalmente, dia 1 di october, 1960, mi por a cuminsá sirbi Jehova como pionero regular.

Un Bishita di Sorpresa

Na 1975, mi a ricibí un yamada di telefon for di mi ruman muher Edna. Awor mi tabatin 80 aña di edad, i mi no a mir’é ni tende su bos pa mas o ménos 20 aña. El a yamá mi for di aeropuerto, i a pidí mi pa bin busca e i su esposo. Tabata bon pa mira Edna atrobe, pero e sorpresa di mas grandi mester a bini ainda. Riba caminda pa cas, su esposo a bisa, “Bo tin un persona combertí.” Mi no a cai ariba kico e tabata kier men. Ora nos a yega cas, el a bolbe bisa un biaha mas, “Bo tin un persona combertí aki.” Mi esposa a comprendé mesora. Dirigiendo su mes na mi ruman muher, el a puntra, “Edna, bo ta un Testigo?” “Sigur cu sí,” Edna a contestá.

Con Edna a yega na aceptá e berdad? Wel, na 1972, den un esfuerso pa drecha nos relacion kibrá, mi a mand’é un abonament di regalo riba E Toren di Vigilancia. Rond di un aña despues, Edna a bira malu i a keda limitá na su cas. E revistanan tabata ainda riba su lesenar den nan enboltura. Debí na curiosidad Edna a habri un i a cuminsá lesa. Ora el a completá e revista, el a pensa den su mes, ‘Esaki ta e berdad!’ Pa ora cu Testigonan di Jehova a yama na su cas, el a lesa henter e stapel dje revistanan Toren di Vigilancia. El a aceptá un studio di Bijbel, i na su debido tempu el a bira un Testigo di Jehova.

Luchando cu Pérdida

Cu tempu mi esposa, Louise, a haña diabétis, i su condicion a empeorá te ora el a fayecé na 1979, cu 82 aña di edad. Ora Louise a muri, un parti di mi tambe a muri. Henter mi mundu a stop di existí. Mi no tabata sa kico pa haci. Mi no tabatin plan pa futuro, i mi tabatin mester di animacion desesperadamente. Un superintendente biahero, Richard Smith, a animá mi pa mi sigui mi curso di traha pionero. Mi a haña cu mi mayor consuelo a bini for di consolá otronan cu a perde un stimá den morto.

E Sociedad Watch Tower tabata organisando un tour di Israel na 1979, pues mi a duna nomber pa participá. E biahe aki tabata un gran estímulo pa mi, i ora mi a yega cas bek, mi a bai traha bek mesora den e sirbishi di pionero. Tur aña desde e tempu ei, mi a poné mi pa yuda den teritorio no-asigná of no trahá frecuentemente den un otro parti dje pais. Apesar di mi edad avansá, ainda mi ta capas pa haci mi mes disponibel p’e privilegio aki.

Mi ta calculá cu atrabes dje añanan, mi tabatin e goso di yuda rond di 50 persona riba e caminda pa bida. Mayoria di mi yunan ta den e berdad. Dos di mi yu muhernan ta sirbiendo como pionero regular. Un otro yu muher, Louise Blanton, ta sirbi n’e sede mundial di Testigonan di Jehova na Brooklyn, New York, cu su esposo, George, i un di mi yu hombernan a sirbi como anciano pa hopi aña.

Naturalmente, debí na imperfeccion heredá for di nos promé mayornan humano, nos tur ta sometí na malesa i morto. (Romanonan 5:12) Siguramente mi bida no tabata liber di dolornan. Actualmente mi ta sufriendo di artrítis den mi pia robes. Aveces e ta causa basta incomodidad, pero e no a strobá mi di ser activo. I mi ta pidi den oracion p’e no sosodé. Mi kier keda activo. Mi mayor deseo ta pa sigui den e sirbishi di pionero te n’e fin, haciendo tur loke mi por pa haci e nomber i propósitonan di Jehova conocí.

[Plachi na página 23]

Cu mi yu muher Rita