Bo Tin E Spiritu di Duna?

BO A ripará cu tin mas cu un solo spiritu of motivacion cu ta impulsá hende pa duna? Un regalo por ta un expresion di amor, di generosidad, di aprecio. Sin embargo bo no a tuma nota cu un regalo tambe por bini for di un persona su deseo pa ser bon mirá? Of e por ser duná simplemente debí na un sintimentu di obligacion of pa motibu cu e dunador kier algu en buelta.

E regalo por ta den un pakete mará cu un sinta bunita. Pero no ta berdad cu un bon regalo por ta tambe un buket di flor, un plato di cuminda of un acto bondadoso? En realidad, e regalonan cu ta ser apreciá mas profundamente hopi biaha ta enbolbé dunamentu di bo mes.

Bo Ta Busca pa Haña Fabor di un Hende?

No ta algu straño pa un hende duna un regalo na un persona pa haña su fabor. Den algun pais un yoncuman cu ta busca pa gana e curason di un bruid prospectivo por trece flor p’e. Aunke, e mucha muher sabí ta mira mas aleu cu e regalo. E ta wak si e spiritu tras dje regalo dje yoncuman ta unu amoroso cu tambe lo hacié un bon esposo. Un regalo asina, si e ta reflehá un spiritu piadoso, por hiba na hopi felicidad pa tantu e dunador como esun cu ta ricibié.

Bijbel ta papia di un ocasion ora Abigail, esposa di Nabal, rápidamente a prepará un regalo generoso pa David, kende el a reconocé como esun scogí dor di Dios como e futuro rey di Israel. E tambe a busca David su fabor. Su esposo a despreciá David i a reprochá David su hombernan na bos haltu. Encabesando un trupa di mas o ménos 400 homber armá, David a sali pa ruiná Nabal i su cas. Abigail a intervení, mandando rápidamente pa David un regalo generoso di suministro di cuminda pa su hombernan. E mes a yega despues di su regalo, i despues cu el a pidi dispensa humildemente pa loke su esposo a haci, el a duna evidencia di gran dicernimentu segun cu el a razoná cu David.

Su meta tabata noble, i e resultado tabata bon. David a aceptá su regalo i a bis’é: “Subi na pas pa bo cas. Mira, mi a scucha bo bos pa tene consideracion cu bo persona.” Mas tardi, despues cu Nabal a muri, David asta a proponé Abigail pa casa cuné, i el a aceptá gustosamente.—1 Samuel 25:13-42.

Sin embargo, den algun caso, e fabor cu un persona ta busca lo por enbolbé mustramentu di parcialidad, asta perversion di husticia. Den un caso asina, e regalo ta un soborno. E dunador ta pensa cu lo e saca beneficio, pero e ta horta su mes di pas mental. Semper tin e peliger cu otronan lo haña sa esei i cu lo e ser tené responsabel pa su accionnan. Asta si e fabor deseá ser otorgá, esun cu a busk’é por haña cu awor e tin un reputacion di un persona kende su motibunan ta dudoso. Reflehando sabiduria piadoso, Bijbel ta spierta contra regalonan asina.—Deuteronomio 16:19; Eclesiástes 7:7.

E Regalo Ta Bini di un Curason Dispuesto?

No tin duda tocante esaki—dunamentu di regalo na un persona cu bo ta stima di bo propio gana ta trece muchu mas goso cu dunamentu debí cu otronan ta duná bo un sintimentu di obligacion.

Relacioná cu e recogimentu di suministro di auxilio pa compañeronan cristian cu tabatin necesidad material, apostel Pablo a describí algun principio excelente di dunamentu piadoso. “Si e prontitud t’ei promé,” el a skirbi, “e ta specialmente aceptabel segun loke un persona tin, no segun loke un persona no tin.” El a agregá: “Laga cada un haci net manera el a determiná den su curason, no di mala gana ni bou di obligacion, pasobra Dios ta stima un dunador alegre.” (2 Corintionan 8:12; 9:7) Pues, hopi ta dependé di bo. En bes di hinca bo mes den debe dor di hiba un campaña di dunamentu di regalo, bo ta gasta placa segun bo forsa? En bes di sintí bo obligá pa duna principalmente pa motibu di presion social of comercial, bo ta haci loke bo a determiná den bo curason? Dje cristiannan di promé cu a aplicá tal principionan piadoso, Pablo a skirbi: “Nan di nan mes cuenta a sigui roga nos cu hopi súplica p’e privilegio di duna bondadosamente i pa un participacion den e ministerio destiná p’e santunan.”—2 Corintionan 8:4.

Na contraste cu esei, e Royal Bank Letter di november/december 1994 a bisa relacioná cu e simannan promé cu Pascu di Nacementu: “E temporada di fiesta por ser mirá como un estado di excitacion artificial stimulá dor di interesnan comercial pa urgi consumidornan pa cumpra cosnan cu otro ora nan lo no a cumpra.” Si e cumpramentu ta ser hací riba crédito, cualkier satisfaccion cu ta bini for di dunamentu di regalo probablemente lo disparcé lihé ora e cuentanan mester ser pagá.

Bo Interes Principal—E Ocasion? Of un Expresion di Amor?

Bo ta haña cu bo dunamentu di regalo ta ser hací mas tantu na ocasionnan cu ta parce di rekerí esei? Si ta asina, tal bes bo ta perdiendo hopi dje goso cu dunamentu spontáneo por trece.

Tin hopi hende cu no ta contentu cu e resultadonan di dunamentu di regalo riba dianan specífico. Un mama i alabes escritora a reconocé cu golosidad a manifestá su mes den su yunan segun cu e dia a acercá ora nan a spera di ricibí regalo. El a admití cu e mes no a disfrutá mes tantu di un regalo amoroso pasobra el a spera algu diferente. Un cantidad di informe ta bisa cu dianan di fiesta cu ta encerá festividadnan i intercambio di regalo tambe sa ta tempu ora tin hopi depresion emocional i abusu di alcohol.

Despues di a remarcá cu e énfasis riba dunamentu di regalo durante tempu di fiesta tin biaha ta afectá muchanan negativamente, un profesor di sicologia cu The New York Times a cita, ta recomendá: “Considerá dunamentu di algun regalo riba otro dianan como un manera pa reducí e tension.” Bo ta kere cu esei lo tin un bon efecto?

Tammy, un hobencita di 12 aña di edad den un famia cu no ta celebrá Pascu ni cumpleaño, a skirbi: “Ta mas dushi pa haña un regalo ora bo ménos ta sper’é.” El a bisa cu en bes di duna regalo djis un of dos biaha pa aña, su mayornan ta duna e i su ruman homber regalo henter aña. Pero tin algu cu ta mas importante p’e cu e regalonan ei. Manera e ta bis’é, “Mi tin un bida di famia masha felis.”

E buki Secrets of Strong Families ta declará francamente: “Mayoria di nos ta gasta tempu i placa vários biaha pa aña pa selectá e regalonan di mas apropiado pa cumpleaño, aniversario of dianan di fiesta p’e hendenan cu nos ta stima. E mihó regalo di tur lo no kita nada for dje cuenta di banco. I bo no tin nodi lor’é den papel di regalo. Si bo ta kere, manera mayoria hende, cu bo bida ta e posesion di mas balioso cu bo tin, anto un pida di bo bida ta e regalo di mas precioso cu bo tin pa ofrecé. Nos ta duna e regalo precioso ei den e cantidad di nos tempu cu nos ta duna na nos stimánan.”

Bo por laga e dunamentu ei extendé mas ayá cu bo propio famia. Dunamentu spontáneo pa yena un necesidad evidente cu otronan tin por trece satisfaccion special. Jesucristo a urgi nos pa demostrá tal interes amoroso den hende pober, coho i ciegu, agregando: “Lo bo ta felis, pasobra nan no tin nada pa pagá bo bek cuné.”—Lucas 14:12-14.

E corant Rockland Journal-News (Merca) recientemente a informá di un ehempel dje clase di dunamentu ei. Ora e cas di un señora di edad ciegu a basha den otro, amigunan a construí un cas nobo p’e. Vários empresa local a haci donacion, i un agencia local di gobiernu a haci un donacion financiero. “Pero, mas importante cu tur,” e corant a bisa, “e mas o ménos 150 hendenan, di cua mayoria ta asistí n’e congregacion Haverstraw di Testigonan di Jehova, a duna di nan tempu pa construí e cas.”

E artículo a continuá: “N’e sitio di construccion tabatin material stiwá banda di mesa yená cu cuminda. Den dos dia e trahadornan a construí un cas consistiendo di dos apartamento, tres piso haltu. . . . Testigonan di Jehova ta conocí pa nan abilidad pa construí edificionan rápidamente. . . . Sin embargo, tal rapides ta na contraste cu e permanencia di nan mision: percurá durabilidad den un trabou di amor. Kisas sra. Blakely no ta capas pa mira su cas nobo, pero su mannan por ful’é, i su curason conocé e profundidad di emocion na cua el a ser conmové dor dje acto inegoista aki.”

Un Spiritu di Generosidad Henter Aña

Esnan cu tin un spiritu berdaderamente generoso no ta warda riba dianan special. Nan no ta forma nan bida djis rond di nan mes so. Ora nan ricibí algu bon, nan ta disfrutá di compartié cu otronan. Esaki no ta nificá cu nan ta duna regalo pa loco. E no ta nificá cu nan ta duna te n’e grado cu nan famia ta keda perhudicá. E no ta nificá cu nan ta duna sin pensa riba con esei ta afectá esun cu ta ricibí. Sin embargo, nan ta hende cu ta “practicá dunamentu,” manera Jesus a siña su disipelnan haci.—Lucas 6:38.

Nan ta na haltura dje circunstancianan di amigu i bisiñanan cu ta di edad avansá, cu ta malu, of cu di otro manera ta den necesidad di animacion. Nan “regalo” por ta hacimentu di un rospondi of yuda cu trabou di cas. E por ta e kapmentu di palu of e kitamentu di sneu for di den caminda. E por ta un wea di cuminda prepará of un ora di tempu pa haci bishita i lesa huntu. Nan propio bida por ta ocupá pero no demasiado ocupá pa yuda. Nan a siña for di experencia cu berdaderamente “tin mas felicidad den duna cu tin den ricibí.”—Echonan 20:35.

E Dunador di mas grandi cu tur, naturalmente, ta nos Creador, Jehova Dios. E “ta duna na tur persona bida i rosea i tur cos.” (Echonan 17:25) Den Bijbel, e ta duna nos tambe perspicacia en cuanto su propósito pa pone fin na maldad, enfermedad i morto, i pa haci e tera aki un paradijs. (Salmo 37:10, 11; Revelacion 21:4, 5) Ora esnan cu tin un spiritu generoso haña sa di esaki, nan no ta tene e bon nobo pa nan mes. Un di nan mayor placernan ta di compartié cu otronan. Nan berdaderamente tin un spiritu piadoso di duna. Esei ta e spiritu cu abo ta cultivando?

[Plachinan na página 7]

Algun dje regalonan di mas precioso no ta costa placa