Nan A Haci e Boluntad di Jehova

Obedeciendo Jesus Su Palabranan di Despedida

RIBA e anochi di 14 di nísan, 33 E.C., Jesucristo i su 11 fiel apostelnan a len na un mesa den un cuarto ariba na Jerusalem. Conciente cu su morto tabata cerca, el a bisa nan: “Mi ta cu boso un poco tempu mas.” (Juan 13:33) En realidad, Hudas Iscariot ya caba tabata bayendo pa conspirá cu hombernan malbado cu kier a mata Jesus.

Ningun persona den e cuarto ariba ei a sinti e urgencia di e situacion mas cu Jesus. E tabata sa bon cu e tabata cerca di sufri. Tambe Jesus tabata sa cu su apostelnan lo bandon’é e anochi ei mes. (Mateo 26:31; Zacarías 13:7) Siendo cu esaki tabata Jesus su último oportunidad promé cu su morto pa papia cu su apostelnan, nos por ta sigur cu su palabranan di despedida a enfocá riba asuntunan di sumo importancia.

“Sigui Haci Esaki na Mi Recuerdo”

Huntu cu su fiel apostelnan, Jesus a instituí un celebracion nobo cu lo a reemplasá e Pascu hudiu. Apostel Pablo a yam’é “e cena di Señor.” (1 Corintionan 11:20) Tumando un pida pan sin zuurdeeg, Jesus a pronunciá un oracion. Despues el a kibra e pan i duna e pan na su apostelnan. “Tuma, come. Esaki ta nificá mi curpa,” el a bisa. Despues el a tuma un copa di biña, a ofrecé un oracion di gradicimentu i a dun’é na e apostelnan, bisando: “Bebe for di dje, boso tur; pasobra esaki ta nificá mi ‘sanger dje pacto,’ cu lo tin cu ser dramá na fabor di hopi pa pordon di picá.”—Mateo 26:26-28.

Kico tabata e nificacion dje evenemento aki? Manera Jesus a indicá, e pan a representá su curpa sin picá. (Hebreonan 7:26; 1 Pedro 2:22, 24) E biña a simbolisá Jesus su sanger dramá, cu lo a haci pordon di picá posibel. Su sanger sacrificial tambe lo a validá e pacto nobo entre Jehova Dios i 144.000 hende, cu eventualmente lo a bai goberná cu Jesus den shelu. (Hebreonan 9:14; 12:22-24; Revelacion 14:1) Dor di invitá su apostelnan pa participá den e cena aki, Jesus a indicá cu nan lo participá huntu cuné den e Reino celestial.

Relacioná cu e cena conmemorativo aki, Jesus a manda: “Sigui haci esaki na mi recuerdo.” (Lucas 22:19) Sí, e Cena di Señor lo tabata un evenemento anual, mescos cu e Pascu hudiu tabata. Miéntras cu e Pascu hudiu a conmemorá e liberacion dje israelitanan for di sclabitud den Egipto, e Cena di Señor lo a enfocá riba un liberacion muchu mas grandi—liberacion di humanidad rescatabel for di sclabitud na picá i morto. (1 Corintionan 5:7; Efesionan 1:7) Ademas, esnan tumando parti dje emblemanan di pan i biña lo a ser recordá di nan futuro privilegionan como rey i sacerdote den Dios su Reino celestial.—Revelacion 20:6.

E morto di Jesucristo berdaderamente tabata e suceso mas importante den historia humano. Esnan cu ta apreciá loke Jesus a haci ta obedecé su mandamentu relacioná cu e Cena di Señor: “Sigui haci esaki na mi recuerdo.” Testigonan di Jehova ta conmemorá e morto di Jesus tur aña riba e fecha cu ta corespondé cu 14 di nísan. Den 1996 e fecha aki ta cai riba 2 di april, despues cu solo baha. Bo ta ser invitá calurosamente pa asistí na e Salon di Reino den bo área.

“Mi Ta Duna Boso un Mandamentu Nobo”

Ademas di instituí e Cena di Señor, Jesus tabatin algun conseho di despedida pa su apostelnan. Apesar di nan excelente entrenamentu, e hombernan aki tabatin hopi di siña. Nan no a dicerní plenamente e propósito di Dios pa Jesus, pa nan, of pa e futuro. Pero Jesus no a purba clarificá tur e asuntunan aki n’e ocasion aki. (Juan 14:26; 16:12, 13) En bes di esei, el a papia tocante algu di gran importancia. “Mi ta duna boso un mandamentu nobo,” el a bisa, “pa boso stima un e otro; mescos cu ami a stima boso, pa boso tambe stima un e otro.” Anto Jesus a agregá: “Den esaki tur lo sa cu boso ta mi disipelnan, si boso tin amor entre boso.”—Juan 13:34, 35.

Den ki manera esaki tabata “un mandamentu nobo”? Wel, e Ley di Moises a manda: “Bo tin cu stima bo próhimo mescos cu bo mes.” (Levítico 19:18) Sin embargo, Jesus a haci un apelacion riba su siguidornan pa mustra amor di sacrificio propio cu lo bai te na e punto di duna bo bida na fabor di compañeronan cristian. Naturalmente, e ‘ley di amor’ lo a aplicá tambe den circunstancianan ménos crítico. Den tur situacion un siguidor di Jesucristo lo a tuma e iniciativa pa desplegá amor dor di yuda otronan spiritualmente i di otro manera.—Galationan 6:10.

Riba e último anochi aki di Jesus su bida terenal, amor a impulsá Jesus pa haci oracion na Jehova Dios na fabor di su disipelnan. En parte el a pidi: “Nan ta den e mundu i ami ta biniendo cerca bo. Tata Santu, vigilá nan pa causa di bo mes nomber cu bo a duná mi, pa nan por ta un mescos cu nos ta un.” (Juan 17:11) Ta notabel cu den e ruego aki na su Tata, Jesus a pidi den oracion pa e unidad amoroso di su siguidornan. (Juan 17:20-23) Nan mester a ‘stima un e otro mescos cu Jesus a stima nan.’—Juan 15:12.

E fiel apostelnan a obedecé Jesus su palabranan di despedida. Nos tambe mester cumpli cu su mandamentunan. Den e “último dianan” crítico aki, amor i unidad entre adoradornan berdadero ta mas importante cu nunca promé. (2 Timoteo 3:1) En berdad, cristiannan berdadero ta obedecé Jesus su mandamentunan i ta desplegá amor fraternal. Esaki ta incluí obedecé su mandamentu pa celebrá e Cena di Señor.