Jehova—Un Stimador di Rectitud i Husticia

UN MUCHA muher hóben den Sarajevo ta puntra su mes pakico e muchanan di su stad mester soportá asina tantu sufrimentu. “Nos no a haci nada pa merecé esei. Nos ta inocente,” e ta bisa. Mamanan argentino afligí a tene demostracionnan den un plasa público na Buenos Aires pa alrededor di 15 aña, como protesta contra e gobiernu actual pa e desaparicion di nan yunan. Un africano yamá Emmanuel, kende su mama i tres ruman muher a ser asesiná brutalmente durante un erupcion di violencia étnico, ta insistí: “Tur hende mester ricibí nan pago merecí . . . Nos kier husticia.”

Husticia ta un di Jehova Dios su atributonan principal. “Tur su camindanan ta husticia,” Bijbel ta bisa. En berdad, Jehova ta “un stimador di rectitud i husticia.” (Deuteronomio 32:4; Salmo 33:5) Pa conocé Dios bon, nos mester comprendé su sentido di husticia i siña imit’é.—Oséas 2:19, 20; Efesionan 5:1.

Nos concepto di husticia probablemente a ser influenciá dor di loke hende ta considerá cu e cualidad aki ta. Den algun parti di mundu, husticia hopi bes ta ser representá como un muher cu wowo tapá teniendo den cada man un spada i un balansa. Husticia humano lo mester ta imparcial, esta, ciegu pa rikesa of influencia. E mester pisa cuidadosamente den balansa e culpabilidad of inocencia di esnan acusá. Cu su spada, husticia mester protehá esnan inocente i castigá malechornan.

E buki Right and Reason—Ethics in Theory and Practice [Husticia i Inteligencia—Etica den Teoria i Práctica] ta bisa cu “husticia ta conectá cu ley, obligacion, derecho i debernan, i ta dicta su decisionnan final segun imparcialidad of segun loke un persona merecé.” Pero Jehova su husticia ta bai muchu mas leu cu esei. Nos por mira esaki dor di considerá e obranan i cualidadnan di Jesucristo, kende ta asina parecido na su Tata celestial.—Hebreonan 1:3.

E palabranan di Isaías 42:3 a ser aplicá na Jesus dor dje escritor di evangelio Mateo, kende a declará: “Lo e no machicá ningun caña kibrá, i lo e no paga ningun mecha di linen cu ta huma, te ora e manda husticia cu éxito.” Jesus a declará un mensahe consolador na hende cu tabata manera un caña kibrá cu tabata doblá i asta trapá. Nan tabata manera e mecha cu ta huma di un lampi, como si fuera nan último chispa di bida casi a ser pagá. En bes di figurativamente machicá cañanan kibrá i paga mechanan cu tabata huma, Jesus a sinti duele di esnan afligí, a siña nan i a cura nan, i a clarificá pa nan e husticia di Jehova Dios. (Mateo 12:10-21) Manera Isaías su profecia a predicí, e clase di husticia ei a inspirá speransa.

Misericordia i Jehova Su Husticia

Misericordia ta un parti fundamental di Dios su husticia. Esaki a bini padilanti ora Jesus tabata riba tera. Perfectamente el a representá Dios su normanan di husticia i rectitud. Sin embargo, e escribanan hudiu i e fariseonan a busca pa alcansá husticia dor di sigui un código inflexibel di leynan—di cua mayoria trahá pa nan mes. Nan husticia legalista generalmente a eliminá misericordia. Hopi confrontacion entre Jesus i e fariseonan a drei rond dje cuestion aki: Kico ta berdadero husticia i rectitud?—Mateo 9:10-13; Marco 3:1-5; Lucas 7:36-47.

Jesus a ilustrá con pa trata otronan den un manera hustu i recto. Un biaha un homber versá den e Ley a puntra Jesus kico tabata necesario pa por heredá bida eterno. Como contesta Jesus a hacié un pregunta i a encomend’é ora el a contestá cu e dos leynan mas importante tabata pa stima Dios cu henter bo curason, alma, mente i forsa i pa stima bo próhimo mescos cu bo mes. E ora ei e homber a puntra: “Ken realmente ta mi próhimo?” Jesus a contestá dor di conta e comparacion dje samaritano cu a yuda su próhimo.—Lucas 10:25-37.

Jehova su rectitud i husticia misericordioso a ser ilustrá den Jesus su comparacion dje samaritano. Dor di yuda inegoistamente un homber heridá cu e no tabata conocé, e samaritano a haci algu recto, hustu i misericordioso. Jesus mes a demostrá e mésun spiritu ora e tabata riba tera. E tabata recto i hustu. Ademas, el a duna su bida pa hende pober, pa humanidad pecaminoso i imperfecto sometí na sufrimentu, enfermedad i morto. Apostel Pablo a conectá husticia cu e percuracion dje rescate. El a skirbi: “Mescos cu mediante un solo delitu e resultado na hende di tur clase tabata condenacion, di igual manera tambe mediante un solo acto di hustificacion [of, “un solo acto hustu,” nota] e resultado na hende di tur clase ta cu nan ta ser declará hustu pa bida.” (Romanonan 5:18) E “solo acto hustu” aki tabata Dios su manera pa salba humanidad obediente dje consecuencianan desastroso di Adam su picá, pa cua nan no tabata directamente responsabel.

Dios su husticia a busca manera pa rescatá humanidad pecaminoso i na mésun tempu sostené principionan recto. Ignorá picá lo tabata inhustu i tambe lo no tabata amoroso, pasobra esei lo a animá kibramentu di ley. Na otro un banda, si Dios su husticia tabata limitá na parti sea un recompensa of un castigu, humanidad su situacion lo tabata sin speransa. Segun Bijbel, “e pago cu picá ta paga ta morto” i “no tin ningun hende hustu, ni sikiera un.” (Romanonan 3:10; 6:23) Cu gran costo personal pa su mes i pa su Yu stimá, Jehova a percurá un sacrificio di reconciliacion pa picánan.—1 Juan 2:1, 2.

E rescate ta mustra cu husticia divino ta mesclá cu amor basá riba principio (na griego, a·gaʹpe). En berdad, e husticia di Dios ta e resultado di su principionan recto—un refleho di loke e ta representá moralmente. P’esei, ora a·gaʹpe ta ser ehercé dor di Dios, e ta amor riba cua husticia divino ta basá. (Mateo 5:43-48) Pues si nos realmente ta comprendé Jehova su husticia, nos lo tin confiansa absoluto den su decisionnan hudicial. Como “e Hues di tur e tera,” semper e ta haci loke ta recto.—Génesis 18:25; Salmo 119:75.

Imitá Jehova Su Husticia

Bijbel ta animá nos pa “bira imitadornan di Dios.” (Efesionan 5:1) Esaki kier men imitá su husticia i tambe su amor. Sin embargo, ya cu nos ta imperfecto, nos camindanan no ta mes elevá cu esnan di Jehova Dios. (Isaías 55:8, 9; Ezekiel 18:25) Pues con nos por duna prueba di ta stimadornan di rectitud i husticia? Dor di bisti “e personalidad nobo cu a ser creá conforme cu e boluntad di Dios den berdadero husticia i lealtad.” (Efesionan 4:24) E ora ei nos lo stima loke Dios ta stima i odia loke e ta odia. “Berdadero husticia” ta evitá violencia, inmoralidad, impuresa i apostasia, pasobra esakinan ta violá loke ta santu. (Salmo 11:5; Efesionan 5:3-5; 2 Timoteo 2:16, 17) Husticia piadoso tambe ta impulsá nos pa demostrá interes sincero den otronan.—Salmo 37:21; Romanonan 15:1-3.

Ademas, si nos ta apreciá e naturalesa misericordioso di e husticia di Dios, nos lo no keda incliná pa husga rumannan spiritual. Con ta posibel pa nos comprendé nan mes bon cu Jehova? Nos lo no ta husgando nan desde nos mes punto di bista incliná na parcialidad? P’esei Jesus a spierta: “Stop di husga pa boso no ser husgá; pasobra cu e huicio cu cua boso ta husga, boso lo ser husgá; i cu e midí cu cua boso ta midi, nan lo midi boso. Pakico, anto, bo ta wak e pida yerba secu den e wowo di bo ruman, pero no ta tuma na cuenta e biga den bo mes wowo? Of con bo por bisa bo ruman, ‘Permití mi saca e pida yerba secu for di bo wowo’; ora, mira! tin un biga den bo mes wowo? Hipócrita! Saca promé e biga for di bo mes wowo, i e ora ei lo bo mira claramente con pa saca e pida yerba secu for dje wowo di bo ruman.” (Mateo 7:1-5) Un evaluacion onrado di nos mes imperfeccionnan lo prevení nos di haci husgamentunan cu Jehova lo considerá inhustu.

Ancianonan nombrá di congregacion ta obligá di husga den casonan di malecho serio. (1 Corintionan 5:12, 13) Ora di haci esei, nan ta corda cu Dios su husticia ta busca pa extendé misericordia caminda ta posibel. Si no tin base pa misericordia—manera den caso di pecadornan no-repentí—no por extendé misericordia. Pero ancianonan no ta expulsá un malechor asina for dje congregacion cu sintimentunan vengativo. Nan ta spera cu e accion di scomulgacion mes lo trece e persona na su sano huicio. (Compará cu Ezekiel 18:23.) Bou di e hefatura di Cristo, e ancianonan ta sirbi den e interes di husticia, i esaki ta incluí ser manera “un lugá di sconde for di bientu.” (Isaías 32:1, 2) P’esei nan mester demostrá imparcialidad i razonabilidad.—Deuteronomio 1:16, 17.

Sembra Simia den Husticia

Miéntras cu nos ta spera Dios su hustu mundu nobo, nos mester “busca husticia” afin di disfrutá di fabor divino. (Sofonías 2:3; 2 Pedro 3:13) E idea aki ta ser expresá masha bunita den e palabranan aki, hañá na Oséas 10:12: “Sembra simia pa boso mes den husticia; cosechá di acuerdo cu bondad amoroso. Labra pa boso mes tera cultivabel, ora tin tempu pa busca Jehova te ora cu e bini i duna boso instruccion den husticia.”

Den nos bida diario, nos tin hopi oportunidad pa ‘sembra simia den husticia,’ net manera Jesus a ilustrá cu su comparacion dje samaritano cu a yuda su próhimo. Jehova lo haci sigur cu nos ta “cosechá di acuerdo cu bondad amoroso.” Si nos sigui cana den e “caminda di husticia,” nos lo sigui ricibí instruccion den rectitud bou dje gobernacion di Reino. (Isaías 40:14) Segun tempu ta pasa, nos sin duda lo apreciá asta mas plenamente cu Jehova ta un stimador di rectitud i husticia.—Salmo 33:4, 5.

[Plachi na página 23]

E samaritano cu a yuda su próhimo a ilustrá Jehova su husticia

[Plachi na página 23]

Jesus tabatin duele di hende afligí, kendenan tabata manera caña kibrá