Con Wardadornan Cristian Ta Sirbí Bo

DEN hopi lugá ta posibel pa observá con wardadornan ta atendé un tou. Nan ta dirigí, protehá i percurá pa e carnénan. Esaki ta di interes pa ancianonan cristian, ya cu nan trabou ta incluí actividadnan di pastoreá. En berdad, ta nan responsabilidad pa “pastoreá e congregacion di Dios” i ‘pa presta atencion na henter e tou.’—Echonan 20:28.

Si bo ta un miembro dje congregacion cristian, con wardadornan spiritual por sirbí bo? I con abo mester reaccioná na e esfuersonan cu nan ta haci pa bo beneficio? Pakico e congregacion tin mester di nan yudansa?

Proteccion Contra Kico?

Den tempu di antigwedad leonnan i otro animalnan salbahe a pone tounan den peliger i a haci carnénan individual nan víctima. Wardadornan mester a percurá proteccion. (1 Samuel 17:34, 35) Wel, Satanas e Diabel “ta cana rond manera un leon cu ta gruña, buscando un hende pa devorá.” (1 Pedro 5:8) Furiosamente e ta bringa un guera no solamente contra Jehova su organisacion terenal den su totalidad sino tambe contra cada sirbidor individual di Dios. Kico ta Satanas su meta? E kier desanimá e pueblo di Jehova i asta prevení nan di ‘warda e mandamentunan di Dios’ i cumpli cu “e trabou di duna testimonio di Jesus.”—Revelacion 12:17.

Jehova a acusá e wardadornan gubernamental di antiguo Israel di negligencia debí cu Jehova su carnénan a bira “cuminda pa tur bestia salbahe di campo.” (Ezekiel 34:8) Sin embargo, ancianonan cristian tin un deseo sincero pa protehá esnan den e congregacion di manera cu ningun ta bai perdí debí na negligencia of debí na e influencia di Satanas, e mundu of “lobonan” apóstata. (Echonan 20:29, 30) Con e wardadornan ta yuda tur e miembronan dje tou mantené nan huicio i ser vigilante? Un medio ta dor di duna discursonan bíblico bon prepará for di plataforma di Salon di Reino. Un otro manera ta dor di combersacionnan positivo i animante promé i despues dje reunionnan. I un manera eficas mas ta dor di bishitá e “carnénan” personalmente na cas. (Compará cu Salmo 95:7.) Pero kico ta un bishita di pastoreo? Con mester haci un bishita asina? I ken mester ser bishitá?

Kico Ta un Bishita di Pastoreo?

Un bishita di pastoreo no ta djis un bishita social pa combersá tocante cosnan di poco importancia. Un anciano a remarcá: “Mayoria publicador ta disfrutá masha hopi mes di lesa un texto of considerá un personahe bíblico en particular. Naturalmente, no ta e anciano so ta papia. E publicador di Reino cu ta ser bishitá normalmente ta disfrutá di expresá su pensamentunan riba e Bijbel, i haciendo esaki ta fortalecé su mes fe. E anciano tal bes por bai cu un revista di Toren di Vigilancia of Spierta! pa asina considerá un artículo edificante. Kisas e consideracion spiritual aki ta loke ta distinguí un bishita di pastoreo for di un bishita social.”

Un otro anciano experenciá a comentá: “Promé cu e bishita, e anciano ta dedicá algun tempu pensando tocante e necesidadnan dje publicador cu e tin cu bai bishitá. Kico lo por edificá e publicador? Encomendacion sincero ta un parti esencial di bishitanan di pastoreo, pasobra esei ta fortalecé un persona pa perseverá.” Sí, un bishita di pastoreo ta mas cu simplemente un bishita amistoso cu cualkier persona den e congregacion lo por haci.

Pakico un Wardador Ta Bishitá Bo?

Ora un anciano ta bishitá un cas, e ta prepará pa animá compañeronan creyente i pa yuda nan ser firme den e fe. (Romanonan 1:11) Pues ora un of dos anciano ta deseá di bishitá bo, con bo ta reaccioná? Segun un superintendente biahero: “Si bishitanan di pastoreo ta ser hací solamente ora tin un problema, e promé reaccion ora proponé pa haci e bishita por ta, ‘Kico malu mi a haci?’” Wardadornan spiritual amoroso ta imitá Jehova, kende a percurá p’e salmista i semper ‘a refrescá su alma,’ specialmente den tempu di angustia i di necesidad special.—Salmo 23:1-4.

E meta di un bishita di pastoreo ta ‘pa edificá, i no pa basha bou.’ (2 Corintionan 13:10) En berdad, ta animante pa esun cu haña e bishita tende palabranan di aprecio pa su awante, su celo i su fiel trabou. Un anciano a remarcá: “Na un bishita di pastoreo, no ta bon pa duna e impresion cu bo a bini pa descubrí i considerá problemanan. Naturalmente, e publicador mes tal bes kier papia tocante un of otro dificultad en particular. I si un carné ta cocochando of ta isolando su mes for di e resto dje tou, e anciano tin cu haci algu pa yuda.”

Wardadornan cristian sin duda lo duna cuido special na cualkier un cu ta manera esnan describí cu e palabranan aki: “Esun perdí lo mi [Jehova] busca, i esun plamá lo mi trece bek, i esun kibrá lo mi mara cu verband i esun enfermiso lo mi fortalecé.” (Ezekiel 34:16) Sí, carnénan kisas mester ser buscá, trecé bek, mará cu verband of fortalecé. Wardadornan di Israel a neglishá e responsabilidadnan aki. Efectuando tal trabou ta rekerí pa un wardador yega cerca di un cierto carné i atendé na su necesidadnan. Básicamente, esaki mester ta un rasgo distintivo di cada bishita di pastoreo awe.

Carnénan Saludabel Tin Mester di Cuido

Nos mester concluí cu wardadornan spiritual actual no mester mustra atencion en particular na carnénan saludabel? Wel, ora un carné literal hañ’é den problema, ta mas fácil pa yud’é si e tin confiansa den e wardador. Un manual ta comentá cu “di naturalesa carnénan ta keda leu for di hende, i no ta semper fácil pa gana nan confiansa.” Entre otro cosnan, e mésun buki ta sugerí e indicacion básico aki pa gana e confiansa di carné: “Papia cu e carnénan regularmente. Nan ta custumbrá cu e stem, loke ta trankilisá nan. Bishitá e carnénan hopi bes den e sabana.”—Alles für das Schaf. Handbuch für die artgerechte Haltung (Tur Cos pa Carné. Manual Tocante Con pa Cria Nan Corectamente).

P’esei contacto personal ta necesario pa por tin un relacion di confiansa entre e wardador i e carnénan. Mescos ta cierto den e congregacion cristian. Un anciano a bisa: “Si bo ta conocí den e congregacion como un anciano cu regularmente ta bishitá e carnénan, esei ta hacié mas fácil pa bishitá un cu tin problema.” Pues, wardadornan spiritual no mester purba alimentá i percurá pa e carnénan solamente na e Salon di Reino. Te asina leu cu circunstancianan ta permití, ancianonan mester siña conocé e carnénan dor di haci bishitanan di pastoreo na nan cas. Un ruman cristian ta corda cu tempu e tabata un anciano recien nombrá, e superintendente presidente a yam’é na telefon i a pidié pa bishitá i consolá un ruman homber cu a caba di perde su yu muher den un teribel accidente di auto. E anciano ta admití: “Ki malu mi a sintí mi, ya cu nunca mi a yega di bishitá e ruman i ni sikiera tabata sa unda e tabata biba! Tabata un alivio ora un anciano maduro a ofrecé pa bai cu mi.” Sí, ancianonan ta yuda un e otro na bishitanan di pastoreo.

Ora di prepará i haci cierto bishita di pastoreo, un anciano tal bes por ser compañá dor di un sirbidor ministerial cu ta extendiendo su mes pa alcansá e “trabou excelente” di un superintendente. (1 Timoteo 3:1, 13) Cuantu un sirbidor ministerial ta apreciá pa mira con un anciano ta sirbi e carnénan durante bishitanan di pastoreo! Asina ancianonan i sirbidornan ministerial ta hala mas cerca di tur ruman den e congregacion, fortaleciendo e lasonan di amor i unidad cristian.—Colosensenan 3:14.

Trahando Tempu pa Bishitanan di Pastoreo

Ora un cuerpo di anciano a laga e trabou di bishita di pastoreo den man di e conductornan di Studio di Buki di Congregacion, tur publicador den algun grupo di Studio di Buki a ser bishitá dentro di seis luna, miéntras cu ningun a ser bishitá den otro gruponan. Esaki a impulsá un anciano pa bisa: “Ta parce cu algun anciano ta tuma e iniciativa i ta haci hopi trabou di pastoreo, pero otro ancianonan tin mester dje animacion di nan compañeronan anciano pa haci esei.” Pues algun cuerpo di anciano ta haci areglo pa tur publicador ser bishitá dor di wardadornan dentro di un periodo di tempu definí.

Naturalmente, un anciano of cualkier otro publicador por bishitá un persona den e congregacion sin tin cu spera pa areglonan special ser hací. Promé cu e haci un bishita di pastoreo, un anciano ta bel e ruman i ta bisa, “Mi ta haci bishita di pastoreo cerca un famia tur luna. Mi por bishitá boso pa mas o ménos un ora riba un dia otro luna? Ki dia lo cumbiní boso?”

Bendicionnan di Bishitanan di Pastoreo

Segun cu presionnan for dje sistema di cosnan malbado aki ta sigui aumentá, bishitanan animador di parti di wardadornan comprensivo ta bira mas i mas probechoso. Ora tur esnan den e tou ta ser duná animacion i yudansa mediante bishitanan di pastoreo, cada carné ta sintié a salbo i sigur.

Relacioná cu un congregacion caminda wardadornan tabata bishitá tur publicador di Reino regularmente, a ser informá: “E publicadornan a bira masha positivo tocante e bishitanan di pastoreo. Tabata masha comun pa un publicador acercá un dje ancianonan pa puntra ki dia lo el a bolbe haci un bishita, ya cu e publicador a disfrutá dje consideracion edificante durante e bishita anterior. Bishitanan di pastoreo tabata un factor cu a yuda mehorá e spiritu dje congregacion.” Otro informenan ta indicá cu ora wardadornan amorosamente ta sirbi den tal manera, e congregacion por crece den amor, unidad i calor di amistad. Ki un bendicion!

Wardadornan cristian ta haci bishita pa promové e bienestar spiritual di e carnénan. Ancianonan kier animá i fortalecé nan compañeronan creyente. Si un problema serio cu ta rekerí conseho mester sali na cla durante un bishita, lo por ta mihó pa haci areglo pa considerá esei na un otro ocasion, specialmente si un sirbidor ministerial ta compañando e anciano. Den cualkier caso, ta apropiado pa concluí e bishita di pastoreo cu un oracion.

Un wardador spiritual kier bishitá bo cas den futuro cercano? Si ta asina, keda den anticipacion felis dje animacion cu ta sperá bo. E anciano ta bini pa sirbí bo i pa fortalecé bo den bo determinacion pa keda riba e caminda cu ta hiba na bida eterno.—Mateo 7:13, 14.

[Kuadro na página 26]

SUGERENCIANAN PA BISHITANAN DI PASTOREO

◻ Traha un cita: Generalmente ta bon pa traha un cita. Si e anciano ta planea pa atendé cu un problema serio, lo ta apropiado pa informá e publicador di esaki di antemano.

◻ Preparacion: Considerá e persona su personalidad i situacion. Ofrecé encomendacion sincero. Pone como bo meta pa compartí un “don spiritual” cu ta animador i fortalecedor di fe.—Romanonan 1:11, 12.

◻ Ken pa bai cuné: Un otro anciano of un sirbidor ministerial cualificá.

◻ Durante e bishita: E anciano mester ta relahá, amoroso, positivo i flexibel. Puntra tocante e famia, nan bienestar, etcétera. Scucha cuidadosamente. Si un problema serio sali na cla, lo por ta mihó pa haci areglo pa un bishita di pastoreo special.

◻ Largura dje bishita: Tené bo na e tempu palabrá, i bai miéntras cu bo anfitrion ta disfrutando ainda dje bishita.

◻ Concluyendo e bishita: Un oracion ta apropiado i ta ser berdaderamente apreciá.—Filipensenan 4:6, 7.

[Plachi na página 24]

Wardadornan cristian ta percurá proteccion spiritual

[Plachi na página 26]

Bishitanan di pastoreo ta percurá oportunidadnan excelente pa animacion spiritual